Ma tikitakaj tlen Biblia kiijtoua.

Hechos 24:15 kiijtoua moyolkuisej “tlen kuajkualmej uan tlen axkuajkualmej”. “Tlen kuajkualmej” elij katli kineltokayayaj toTeotsij kema ayamo mikiyayaj uan inintoka ijkuilijtok ipan nopa amochtli tlen kiijtoua ajkia itstos nochipa (Mal. 3:16). “Tlen axkuajkualmej” elij katli amo uelkej kiixmatij Jehová kema nojua itstoyaj, yeka inintoka amo ijkuilijtok ipan nopa amochtli.

Juan 5:28, 29 nojkia kamanalti tlen nopa maseualmej katli moyolkuisej tlen kiijtoua Hechos 24:15. Jesús kiijtok kema moyolkuisej katli kichijkej tlen kuali, kiselisej nemilistli, uan katli kichijkej tlen amo kuali, kintlajtolsenkauasej. Katli kichijkej tlen kuali kema ayamo mikiyayaj kiselisej nemilistli pampa inintoka ijkuilijtok ipan nopa amochtli. Uan katli kichijkej tlen amo kuali, kintlajtolsenkauasej kema moyolkuisej pampa inintoka amo ijkuilijtok ipan nopa amochtli. Yeka kiitasej kenijkatsa monejnemiltisej ipan nopa tonali, uan kinkauasej ma kinextikaj tlaj kinekij kiixmatisej Jehová uan ma moijkuilo inintoka ipan nopa amochtli.

Apocalipsis 20:12, 13 kiijtoua nochi katli moyolkuisej monekis kichiuasej “tlen ijkuilijtok ipan nopa sekinok amatlapouali” o nopa yankuik tlanauatili tlen kinmakasej ipan yankuik Tlaltipaktli. Uan katli amo kineltokasej, kintsontlamiltisej (Is. 65:20).

Daniel 12:2 kiijtoua sekij katli moyolkuisej kiselisej “nopa yolistli tlen axkema tlamis” uan sekinok “kipantisej pinaualistli uan tlaijiyouilistli tlen axkema tlamis”. Ni versículo kiijtoua tlen kiselisej kema tlamis nopa Mil Xiuitl: “Yolistli tlen axkema tlamis” o “pinaualistli uan tlaijiyouilistli tlen axkema tlamis”. Uajka, sekij itstosej nochipa uan sekij kintsontlamiltisej (Apoc. 20:15; 21:3, 4).

Ma timoiljuikaj ipan ni tlamantli. Nopa ome pamitl maseualmej katli moyolkuisej elij kej katli kinekij yasej itstotij ipan seyok altepetl. “Tlen kuajkualmej” kejuak kipiaj se amatl tlen kiijtoua uelis tekitisej ipan nopa altepetl o itstosej nopaya uan kichiuasej se keski tlamantli. Uan “tlen axkuajkualmej” kejuak kipiaj se amatl tlen kiijtoua uelis itstosej san se keski tonali o san paxalosej. Tlaj kinekij mokauasej ipan nopa altepetl, moneki kinextisej kinekij itstosej nopaya. Uajka, katli amo kuali monejnemiltijkej monekis kineltokasej Jehová itlanauatiljuaj uan kinextisej kipiaj kuali ininyolo tlaj kinekij itstosej nochipa ipan nopa yankuik Tlaltipaktli. Maske amo sanse amatl kinmakaj katli yauij itstotij ipan seyok altepetl, uelis teipa sekij kinkauasej ma itstokaj nochipa uan sekij kinkuepaltisej pampa kiitasej kenijkatsa monejnemiltisej ipan nopa altepetl. Nojkia, katli moyolkuisej monekis kinextisej tlaj kuali tlaneltokaj uan kuali monejnemiltisej ipan nopa yankuik Tlaltipaktli, kiampa uelis kiitasej tlaj itstosej nochipa o amo.

Jehová amo san techtlasojtla, nojkia kichiua tlen xitlauak (Deut. 32:4; Sal. 33:5). Maske kinextis teiknelia kema kinyolkuis katli xitlauakej uan katli amo, nojkia kichias ma kineltokakaj itlanauatiljuaj. Uelis itstosej ipan nopa yankuik Tlaltipaktli san katli kineltokasej uan kiiknelisej.