Vonanyi kuti Bhaibheri rinodavira kudini muvhunjo iji.

Mabasa o Vapostori 24:15 inotivhunja kuti kunozova no “kumuka ko vakafa ko vandhu vakarurama no vandhu vacizivi kururama.” Vakarurama ndi vaya vakazwira Mwari vacito vafa. Ngo iyo ndava mazina avo akatahwa mu bhuku ro upenyu. (Malakia 3:16) Vacizivi kururama ndi vaya vakafa vacizivi kuwana mukana wo kujija ngo pamusoro pa Jehovha. Ngo iyo ndava mazina avo, aazivi kutahwa mu bhuku ro upenyu.

Zvinonangwa pana Johani 5:28, 29, ndizvona zvondhozvo no zvinonangwa pana Mabasa o Vapostori 24:15. Jesu wakananga kudari: “Vese vakaita zviro zvakanaka,” vanozomuswa “kuti vaende ku upenyu, asi vaya vakaita zviro zvakashata vanozomuswa kuti vaende kootongwa.” Vakarurami, vakaita zviro zvakanaka, vacito vafa. Ivona vanozomuswa kuti vaende ku upenyu ngokuti mazina avo, akatahwa mu bhuku ro upenyu. Asi vacizivi kururama, vakaita zviro zvakashata vacito vafa. Ngo iyo ndava, vanozomuswa kuti vaende kotongwa. Mazina avo, aazivi kutahwa mu bhuku ro upenyu. Ivona vanozotongwa kana kusoteseswa dangani vari kuita zviro mu njira yaushoni kana kuti haiwa. Pa mukuvo uu, ivona vanozova no mukana wo kujijira ngo pamusoro pa Jehovha no kuzova no mazina avo akatahwa mu bhuku ro upenyu.

Apokaripsi 20:12, 13, inonanga kuti vese vanonga vamuswa vanozodikana kuzwira “zvakatahwa mu muphukutu,” kana kuti mutemo jatinozopuwa ndi Mwari mu nyika imbza. Jehovha anozoparaja vaya vanoramba kuzwira.—Isaia 65:20.

Danieli 12:2, inonanga kuti vamweni vakavata mu rufu, vanozomuka kuti “vararame kucikaperi, vamweni kuti vapseruke no kutetemera kucikaperi.” Vhesi iyi iri kubhuya ngo zvinozoitika pakupejisira pasure po kumuswa kwavo. Vamweni vanozomuswa kuti “vararame kucikaperi” kuveni vamweni vanozomuswa kuti ‘vatetemere kucikaperi.’ Ngo kudaro, pakupera ko ciuru co makore, vamweni vanozoashira upenyu ucukaperi kuveni vamweni kuparajwa kucikaperi.—Apokaripsi 20:15; 21:3, 4.

Vonanyi muezaniso uwu basi. Mugariro wo zvikwata zviviri zvo vandhu vanodari kumuswa, ungaezaniswa no vandhu vanoda kupona mu nyika imweni. Vakarurama vakadari inga vaya vanotendehwa kugara mu nyikeyo ngokuti vanonga vecitendehwa ngo mutemo kuti vagaremo. Mukusiayana, vacizivi kururama, vakadari inga vandhu vanovha ku nyika imweni vanotendehwa kugara ko mukuvo wakati kuti mu nyika yovanodari. Vandhu ava vanodikana kuvonesa ngo zviito zvavo kuti ivona vanofanera kugara mu nyika yovari kwendari. Mukuezanavo, vacizivi kururama vanozomuswari, vanodikana kuzwira mutemo ja Jehovha no kuvonesa kuti ivona vaavandhu vakarurama kuti vakwanise kupona mu Paradhiso. Azvinenyi dangani ivona vanotendehwa kugara mu nyika iyi ko mukuvo wakati kuti kana ko njiku nganani, vamweni vangazoguma pa kutendehwa kamare kuva vagari vo nyika iyi, kuveni vamweni vangatohwirijwa ku nyika yavo. Izvi zvinozoitwa vakacijikira pa mufambiro no mugariro wo vanonga veciita mu nyika yovakaendari. Ngo kudaro, vese vanongari vapera kumuswa vanozotendehwa kugara mu nyika imbza zvecifira pa kugondeka kwavo pomwe no mugariro wavo mu nyika imbza.

Jehovha asipi basi Mwari wo rudo, asi iyena ndi Mwari wo ururami. (Deuteronòmio 32:4; Nduyo 33:5) Iyena anozokhombija rudo hwake ngo kumusa vakarurama no vacizivi kururama. Asi iyena anozovetera kuti vese vanomuswari, vazwire ndhungamiriro jake ngo pamusoro po zvakanaka no zvakashata. Basi vaya vanomuda no kupona mukuzwirana no ndhungamiriro jake, vanozotendehwa kupona mu nyika imbza.