Muthokororye mukhalelo Piipiliya onaakhuleiye makoho yaala.

Saweriwa T’arummwa 24:15 NN onnanleela wi onarwa “okhala ovinya tho wa ékhaikhai ni óhikhala ékhaikhai.” Eekhaikhai ti yaale yaamwiiwelela Muluku ehaakumve okhwa, mwawiihiiha masina aya aarempwa mu liivuru a okumi. (Malak. 3:16) Oohikhala eekhaikhai anaphitaanyerya yaale akhwile ehirino ekari yawaakhwanela ya ohuserya vooloca sa Yehova, mwawiihiiha masina aya haarempwe mu liivuru a okumi.

Yohani 5:28, 29, TNM onnaloca sa makhuuru mamohamoha meeli yaawo anatharihiwa mu Saweriwa T’arummwa 24:15. Yesu olonce wi “yaale yenreno ichu saphaama” anahaala “oviihiwa wi yaakhele ekumi yoohimala, nave yaale yenreno ichu soonanara, oviihiwa wi yathorihiwe.” Eekhaikhai yaapaka ichu saphaama ehaakumve okhwa. Awo anahaala oviihiwa wi yaakhele okumi nthowa nawi masina aya aarempwa mu liivuru a okumi. Nyenya oohikhala eekhaikhai yaapaka ichu soonanara ehaakumve okhwa. Awo anahaala oviihiwa wi yathorihiwe. Masina aya nlelo haarempwe mu liivuru a okumi, nave awo anahaala okhalano elukuluku ya othorihiwa naari ovareryeliwa. Variyari va elukuluku yeeyo, awo anahaala okhalano ekari ya ohuserya vooloca sa Yehova ni orempwa masina aya mu liivuru a okumi.

Wupulula 20:12, 13 onnathariha wi oothene yaale anahaala oviihiwa mookhwani anaphwanela wiiwelela ichu soothene inahaala ‘orempwa mu aliivuru,’ela ti wi, malamulo mavyaani yaawo Yehova onahaaleiye onivaha mu elapo evyaani. Yehova onahaala waatoloxa oothene yaale eni ehiiwelele.—Isa. 65:20.

Daniyeli 12:2 ooloherya wi yaale akhwile anahaala ovinya, akina anaya “wookumini woohimala nave akina woonyemuwani ni othanyeya woohimala.” Eversikulu ela enaloca sa makuchuwelo a yaale anahaala oviihiwa mookhwani wi yaakhele “okumi woohimala” naari “othanyeya woohimala.” Mwawiihiiha, wookuchulani wa iyaakha 1.000, akina anahaala waakhela okumi woohimala nave akina anahaala otoloxiwa okhala wookhala.—Wup. 20:15; 21:3, 4.

Muthokororye niphwanaphwaniho nimoha. Mukhalelo wa makhuuru yaala meeli anahaala oviihiwa onanwerya olikanyihiwa ni anamarwa yaawo anachuna okhala mu elapo ekina. Eekhaikhai ari ntoko anamarwa yaale yaakhenle weemereryiwa wa olapa naari okhala mu elapo ekina yoowo onaweeriha osuweliwa naari okhala ootaphuwa. Moohiyana, oohikhala eekhaikhai ari ntoko anamarwa yaawo anawerya weemereryiwa okhala mu elukuluku vakhaani naari ntoko aleco. Anamarwa yaala anaphwanela wooniherya wi annaphwanelela ehakumve weemereryiwa otitelela okhala mu elapo ekina. Moolikana, oohikhala eekhaikhai yaawo anahaala oviihiwa anaphwanela wiiwelela malamulo a Yehova ni wooniherya wi teekhaikhai wi etitelele okhala Mparataiso. Nave moohipwacha weemereryiwa wa mukhalelo taani anamarwa yaakhenlaaya woopaceryani evolowaka mu elapo ekina, akina ananwerya weemereryiwa omaka weiwo nave akina ananwerya okookiheryiwa mu elapo aya. Yookhumelela enahaala othipeleya mmukhalelo ni meecelo aya mu elapo yeeyo aryaaya. Mwawiihiiha tho, yoolakelela wa oothene anahaala oviihiwa mookhwani onahaala othipeleya mu ororomeleya ni meecelo aya mu elapo evyaani.

Yehova tahi pahiru Muluku oosivela nyenya tho Muluku eekhaikhai. (Malam. 32:4; Sal. 33:5) Owo onamooniherya osivela wawe moorweela wa waaviiha mookhwani eekhaikhai ni oohikhala eekhaikhai. Nyenya owo onaweherya wi oothene yaawo yiiwelele malamulo awe wa yeeyo eri yaphaama ni yoonanara. Pahiru yaale anamusivela nave anakhala mwawiiwanana ni malakiheryo awe anahaala weemereryiwa otitelela okhala mu elapo evyaani.