Faigi hadia wanema li nibeʼe Zura Niʼamoniʼö.

Itutunö ba Halöwö Zinenge 24:15 wa so ”wanusugi niha si no mate, he satulö he si lö atulö”. Niha satulö yaʼia daʼö soloʼö nifakhoi Lowalangi fatua lö mate ira, börö daʼö tesura döira ba zura wangorifi. (Mal. 3:16) Niha si lö atulö yaʼia daʼö niha si lö fakhamö manöndra faʼaboto ba dödö sanandrösa khö Yehowa, börö daʼö lö si tesura döira ba zura wangorifi.

Itutunö ba Yohane 5:28, 29 wa so dombua ngawawa zi fagölö simane nitutunö ba Halöwö Zinenge 24:15. Imane Yesu wa niha ”samalua si sökhi tesusugi dania ba wanöndra faʼauri si lö aetu, ba samalua si lö sökhi tesusugi enaʼö tehuku”. Niha satulö, lafalua zi sökhi fatua lö mate ira. Tesusugi ira ba wanöndra faʼauri si lö aetu börö me tesura nasa döira ba zura wangorifi. Hizaʼi, niha si lö atulö, lafalua zi lö sökhi fatua lö mate ira. Tesusugi ira enaʼö tehuku börö me lö nasa musura döira ba zura wangorifi. Eluahania, munehe-nehegö ba mufaigi-faigi ira mazui labeʼe khöra ginötö. Ba ngaluo daʼö dania, tebeʼe khöra ginötö ba wanöndra faʼaboto ba dödö sanandrösa khö Yehowa enaʼö tesura döira ba zura wangorifi.

Itutunö ba Wamaʼeleʼö 20:12, 13 wa fefu niha nisusugi moguna laʼoʼö hadia zi no musura ba ’gölu-gölu zura si no mubokai’ yaʼia daʼö oroisa si bohou nibeʼe Lowalangi ba gulidanö si bohou. Muhori niha si lö moloʼö oroisa andrö.—Yes. 65:20.

Itutunö ba Danieli 12:2 wa so ösa niha nisusugi ”zanöndra faʼauri si lö aetu ba so niʼailasi ba so göi niʼoʼaya sagötö faʼara”. Itutunö ayati daʼö hadia nitema niha nisusugi ba gafuriata. Na no aefa Wamatörö si Saribu Fakhe, so dania zanöndra faʼauri si lö aetu ba so göi nihori sagötö faʼara.—Fam. 20:15; 21:3, 4.

Niha nisusugi andrö, tola mufagölösi ia simane niha si fatewu somasi toröi ba zi sambua soi. Börö daʼö, moguna so khöra visa mazui sura si tobali tandra-tandra wa mutehegö khöra toröi ba soi daʼö. Niha satulö andrö hulö simane niha si fatewu si no manöndra izin ba wohalöwö mazui enaʼö toröi ba zi sambua soi, ba tola göi latema hadia ia zi toʼölö latema ono mbanua si toröi ba soi daʼö. Niha si lö atulö hulö simane niha si fatewu sanöndra izin ba zi sabata mazui izin ba wangondrasi si sambua soi. Niha sanöndra izin simane daʼö, so nifaluania enaʼö tola toröi ia ba daʼö. Simanö göi niha si lö atulö, moguna latema goroisa Yehowa ba laʼoʼö daʼö enaʼö tola toröi ira ba Waradaiso sagötö faʼara. Gofu hewisa izin nibeʼe ba niha si fatewu andrö ba wamobörö, so ösa ba gotaluara zi tobali ono mbanua zi sambua soi ba so göi ösa nifofanö. Teʼodaligö daʼö moloʼö amuata hegöi nifaluara sagötö toröi ira ba soi daʼö. Simane daʼö göi nitema niha nisusugi ba gafuriata, teʼodaligö ia moloʼö famati hegöi nifaluara ba gulidanö si bohou.

Yehowa andrö tenga ha Lowalangi sebua faʼomasi, hizaʼi yaʼia göi Lowalangi satulö. (5 Mo. 32:4; Si. 33:5) Börö me sebua faʼomasi ia, andrö wa isusugi niha satulö hegöi si lö atulö. Hizaʼi, itötöna khöra enaʼö lafaudugö waʼaurira moloʼö goi-goinia salawa. Ha niha sangomasiʼö yaʼia ba samalua goi-goinia zi toröi ba gulidanö si bohou sagötö faʼara.