Tjheja indlela iBhayibheli eliyiphendula ngayo imibuzo le.

IzEnzo 24:15 zithi, “kuzokuba nokuvuswa kwabafileko kwabalungileko nabangakalungi.” Abalungileko ngilaba abalalela uZimu ngaphambi kokuthi bahlongakale, yeke, amagamabo atlolwe encwadini yokuphila (Mal. 3:16) Abangakalungi bafakahlangana labo abahlongakala bangakalifumani ithuba elaneleko lokufunda ngoJehova, yeke, amagamabo awakatlolwa encwadini yokuphila.

UJwanisi 5:28, 29 Uqalisele eenqubuthwini ezimbili ezifanako nalezo ekukhulunywa ngazo kuzEnzo 24:15. UJesu uthi, “labo abenze okuhle bavuselwe ekuphileni, begodu labo ababenomukghwa wokwenza okumbi bavuselwe ekwahlulelweni.” Abalungileko benza izinto ezihle ngaphambi kokuhlongakala. Bazokuvuselwa ekuphileni ngombana amagamabo asesesencwadini yokuphila. Abangakalungi bona benza izinto ezimbi ngaphambi kokuhlongakala. Bazokuvuselwa ekwahlulelweni. Amagamabo awakatlolwa encwadini yokuphila, begodu kuzokuhlolisiswa kuhle izenzo zabo. Hlangana nesikhatheso, bazokuba nethuba lokufunda ngoJehova nelokobana amagamabo atlolwe encwadini yokuphila.

IsAmbulo 20:12, 13 Sisihlathulela ukuthi boke abazokuvuswa kuzokutlhogeka balalele ‘izinto ezitlolwe emisongweni,’ lokho kutjho ukuthi uZimu uzosinikela imithetho emitjha ephasini elitjha. Labo abangalaleliko bazokutjhatjalaliswa.—Isa. 65:20.

UDanyela 12:2 ubikezela ukuthi abanye balabo abalele ekufeni bazokuvukela “ekuphileni okungapheliko, abanye bavukele ehlazweni elisinyenyiso esingapheliko.” Iveseli likhuluma ngomphumela wamaswaphela wabavusiweko ukuthi uzakuba ‘kuphila okungapheliko’ namkha “sinyenyiso esingapheliko.” Yeke, ekupheleni kweminyaka eyi-1 000, abanye bazokufumana ukuphila okungapheliko; bese kuthi abanye batjhatjalaliswe ngokungapheliko.—IsAm. 20:15; 21:3, 4.

Akhesenze umfanekiso naku. Ubujamo beenqhema ezimbili ezizokuvuswa bungafaniswa nobujamo babantu ababuya kwenye inarha bayokuhlala kwenye. Abalungileko bafana nalabo abafumana amaphepha abavumela bona bangahlala enarheni namkha abatjhaphulula kwezinye izinto. Ngokuhlukileko kilokhu, abangakalungi bafana nabantu bakwenye inarha abangafumana amaphepha wesikhatjhana enarheni. Abantwaba kuzokufuze balwele ukutjengisa bona bazizakhamuzi ezifanelekako ngaphambi kobana bavunyelwe ukuhlala enarheni leyo. Ngendlela efanako, abangakalungi abazokuvuswa, kuzokufuze balalele imithetho kaJehova begodu batjengise ukuthi balungile nabazakuhlala ePharadesi. Akunandaba bona bafumana umhlobo onjani wamaphepha labo abafika kwenye inarha, abanye kungenzeka ngokukhamba kwesikhathi bazifumanele amaphepha abavumela bona babe zizakhamuzi enarheni leyo, bese kuthi abanye bangabamukeli enarheni leyo. Indlela abaziphatha ngayo ngiyo ezokutjho bona bayamukelwa namkha abamukelwa enarheni etja leyo. Ngendlela efanako, isiqunto malungana nalabo abazokuvuswa, sizokuthathwa ngokuya ngokukholwa kunye nokuziphatha kwabo ephasini elitjha.

UJehova akasinguZimu olithando kwaphela, kodwana unguZimu wobulungiswa nokulunga. (Dut. 32:4; Rhu. 33:5) Uzokutjengisa ithando lakhe ngokuthi avuse abalungileko nabangakalungi. Ngesikhathi esifanako, uzokulindela boke bona balandele iinkambiso zakhe zokulungileko nokungakalungi. Ngilabo kwaphela abamthandako nabamlalelako abazokuvunyelwa ukuphila ephasini elitjha.