Tiyeni tiwone mwayuyankhila makonsho amene aŵa Baibolo.

Pa Machitidwe 24:15 Baibolo yutiuja kuti “kuzankhale kuuka kwa olungama na osalungama kumo.” Olungama ni ŵanthu amene enzemvwila Mulungu penze akaliyemwalila. Tetyo, mazina ŵawo elembewa m’buku ya moyo. (Mal. 3:16) Osalungama opamikijapo ŵanthu amene enzeve mwayi wophunzila za Yehova penze akaliyemwalila. Tetyo, mazina ŵawo aliyelembewe m’buku ya moyo.

Lemba ya Yohane 5:28, 29 yunena za magulu aŵili a ŵanthu amene aŵa, amene otomolewasoti pa Machitidwe 24:15. Yesu enena kuti: “Ŵala enzechita viweme” azauke kuti alondele moyo. “Ŵala enzechita viipa azauke kuti aweluziwe.” Olungama amene aŵa enzechita viweme penze akaliyemwalila. Ove azauke kuti alondele moyo chifukwa mazina ŵawo akali m’buku ya moyo. Osalungama amene aŵa, enzechita viipa penze akaliyemwalila. Tetyo, azauke kuti aweluziwe. Pakuti mazina ŵawo aliyelembewe m’buku ya moyo, ove azapasiwe mwayi wakuti aweluziwe, kapena kuti kuyamba awonewa keno achinja. Pa nthawe yamene iyo, ove azankhale na mwayi wophunzila za Yehova komasoti kuti mazina ŵawo alembewe m’buku ya moyo.

Lemba ya Chivumbulutso 20:12, 13 yufotokoza kuti ŵanthu onse amene akuti azaushiwe, azafunike kumvwila “volembewa m’mipukutu yamene iyo,” vamene ni malamulo anyowani ŵakuti azatipase Mulungu m’chalo chanyowani. Ŵanthu akuti azalekemvwila azawonongewe.—Yes. 65:20.

Lemba ya Danieli 12:2 inenelatu kuti ayakine amene emwalila, azauke kuti ‘alondele moyo wosasila koma ayakine azalondele chitonzo ndipo azazondewe mpaka kale-kale.’ Vesi yamene iyi yunena za chiweluzo chosilijila chati azalondele ŵanthu akuti azaushiwe—chamene nikulondela “moyo wosasila” olo “kuzondewa mpaka kale-kale.” Pamapeto pa vyaka 1.000, ayakine azalondele moyo wosasila ndipo ayakine azawonongewe mpaka kale-kale.—Chiv. 20:15; 21:3, 4.

Ganizilani chisanzo ichi. Magulu aŵili amene aŵa a ŵanthu akuti azaushiwe, tingaŵalinganije na ŵanthu amene ofuna kunkhala m’chalo chiyakine. Olungama ali monga ni ŵanthu amene aluta m’chalo chiyakine ndipo apasiwa vipepa voŵalola kunkhala olo kukata ntchito m’chalo chamene icho kwa nthawe itali komasoti kukhala na ufulu wochita vinthu viyakine. Mosiyana na vamene ivi, osalungama ali monga ni ŵanthu amene aluta m’chalo chiyakine ndipo apasiwa vipepa voŵalola tyala kunkhala m’chalo chamene icho monga alwendo komasoti kwa nthawe itontho. Alwendo oteti, angafunike kuti awoneshe mwa vochita vawo keno angalolelewe kuti apitilije kunkhala m’chalo chamene icho. Molingana na vamene ivi, osalungama amene akuti azaushiwe azafunike kumvwila malamulo a Yehova komasoti kuwonesha mwa vochita vawo kuti ni olungama, kuti apitilije kunkhala m’Paladaiso. Ndipo keno ŵanthu amene aluta m’chalo chiyakine apasiwa vipepa votyani, ayakine mu kupita kwa nthawe ololewa kunkhala nzika za chalo chamene icho, pamene ayakine ojoshewa kwawo. Vamene ivi vutolela vochita komasoti nkhalidwe yawo m’chalo chamene icho chaluta. Molingana na vamene ivi, chiweluzo chati azapasiwe ŵala akuti azaushiwe, chizadalile pa kukhulupilika kwawo komasoti vochita vawo m’chalo chanyowani.

Sikuti Yehova wangonkhala tyala Mulungu wachikondi, koma ni Mulungusoti wachilungamo. (Deut. 32:4; Sal. 33:5) Yove azawoneshe chikondi chake pousha olungama na osalungama kumo. Koma pa nthawe imozi-mozi yamene iyo, azafune kuti ŵanthu amene awo akomvwila mfundo zake zokhuza chiweme na chiipa. Koma tyala ŵanthu ŵala akuti azawoneshe kuti omukonda nomvwila mfundo zake, niye akuti azalolewe kupitilija kunkhala m’chalo chanyowani.