Bona kamoo Beibele e arabago dipotšišo tše ka gona.

Ditiro 24:15 e re botša gore “go tla ba le tsogo ya ba lokilego gotee le ba sa lokago.” Bao ba lokilego ke batho bao ba hwilego ba botegela Modimo, ka gona maina a bona a ngwadilwe ka pukung ya bophelo. (Mal. 3:16) Bao ba sa lokago ba akaretša batho bao ba hwilego ba se ba hwetša sebaka sa go ithuta ka Jehofa, ka gona maina a bona ga se a ngwalwa ka pukung ya bophelo.

Johane 5:28, 29 e bolela ka dihlopha tše pedi tšeo di lego go Ditiro 24:15. Jesu o re “bao ba dirilego dilo tše dibotse ba tla tsogela bophelong, bao ba tlwaetšego go dira dilo tše mpe ba tla tsogela kahlolo.” Bao ba lokilego ba dirile dilo tše dibotse pele ba ehwa. Ba tlo tsošwa gomme ba phela gape ka gobane maina a bona a sa ngwadilwe ka pukung ya bophelo. Eupša bao ba sa lokago ba dirile dilo tše mpe pele ba ehwa. Ka gona ba tlo tsošetšwa kahlolong. Maina a bona ga se a tšwa a ngwalwa ka pukung ya bophelo, gomme seo se bolela gore ba sa tlo hwetša nako ya go itlhatsela ge e ba ba rata Modimo goba aowa. Ka nako yeo ba tlo ba le sebaka sa go ithuta ka Jehofa le go dira gore maina a bona a ngwalwe ka pukung ya bophelo.

Kutollo 20:12, 13 e re botša gore bohle bao ba tsošitšwego ba tlo swanelwa ke go latela “dilo tšeo di ngwadilwego mangwalong a go phuthwa,” e lego melao yeo Jehofa a tlago go re nea yona lefaseng le lefsa. Bao ba ka se e latelego ba tlo fedišwa.—Jes. 65:20.

Daniele 12:2 e boletše e sa le pele gore ba bangwe ba bao ba robetšego mabitleng ba tla “tsogela bophelong bjo bo sa felego gomme ba bangwe ba tsogela go gobošwa le go hlaswa go iša mehleng ya neng le neng.” Temana ye e bolela ka kahlolo ya mafelelo ya bao ba tsošitšwego bahung. Ba tlo hwetša “bophelo bjo bo sa felego” goba “go gobošwa mo go sa felego.” Ka gona ka morago ga mengwaga e sekete, ba bangwe ba tlo hwetša bophelo bjo bo sa felego mola ba bangwe ba tlo fedišetšwa sa ruri.—Kut. 20:15; 21:3, 4.

Nagana ka mohlala wo. Taba ye ya dihlopha tše tše pedi e ka swantšhwa le batho bao ba nyakago go dula nageng e nngwe. Bao ba lokilego ba ka swantšhwa le bao ba hwetšago mangwalo a molao ao a tlago go ba nea tshwanelo ya go dula nageng yeo ka mo go sa felego ba lokologile. Eupša bao ba sa lokago ba swantšhwa le bao ba hwetšago mangwalo a go dula ka nakwana moo nageng. Batho bao ba tlo swanelwa ke go itlhatsela ge e ba ba swanelega gore ba ka dula nageng yeo ba nyakago go dula go yona. Ka mo go swanago, bao ba sa lokago ba tlo swanelwa ke go latela melao ya Jehofa le go itlhatsela ba lokile e le gore ba swanelege go dula paradeiseng. Go sa šetšwe gore batho ka moka bao ba nyakago go dula nageng yeo ba ka newa tumelelo mathomong, eupša ba bangwe ka ba feleletša ba hweditše mangwalo a gore ba dule go ya go ile mola ba bangwe ba ka swanelwa ke go boela morago. Seo se ithekgile ka maitshwaro a bona nageng yeo ba lego go yona. Ka mo go swanago phetho yeo e tlago go tšewa ke bao ba tla bego ba tsošitšwe bahung, e tlo ithekga ka tumelo ya bona le gore ba itshwara bjang lefaseng le lefsa.

Jehofa ga se Modimo yo a nago le lerato feela, eupša o ahlola ka go loka le ka go se kgetholle. (Doit. 32:4; Ps. 33:5) O tlo bontšha lerato ge a tsoša bao ba lokilego le ba sa lokago. Eupša o tlo letela gore batho bao ka moka ba latele melao ya gagwe ya se se lokilego le se se sa lokago. Ke feela bao ba tlago go mo rata le go phela ka melao ya gagwe ba tlago go dula ba phela lefaseng le lefsa.