Tala oñgeni Ombimbiliya ikumbulula omapulo oo.

Omukanda Ovilinga 24:15 upopia okuti “makukakala etutilo liovaviuki na vana vehevaviuki.” Ovaviuki, ovo vana ankho vaumbila Siovaa Puetyi vehenenkhie. Mokonda yotyo omanyina avo ahonekwa momukanda womwenyo. (Mal. 3:16) Vana vehevaviuki, ovo vana vahakalele nomphitilo yokunoñgonoka Siovaa etyi ankho vehenenkhie. Mokonda yotyo omanyina avo kaekahi momukanda womwenyo.

Omukanda wa Suau 5:28, 29, nao upopia ovikundyi ovio vivali vya popiwa momukanda Ovilinga 24:15. Sesusi wati: “vana valinga ovipuka oviwa, avatutila pala okukala nomuenyo, mahi vana valinga ovipuka ovivi, avatutila pala ekoyeso.” Ovaviuki, ovo vana valinga ovipuka oviwa puetyi ankho vehenenkhie. Mavakatutiliswa pala okukala nomwenyo mokonda omanyina avo ahonekwa momukanda womwenyo. Mahi vana vehevaviuki valinga ovipuka ovivi puetyi ankho vehenenkhie. Ovo mavakatutiliswa pala okukoyeswa mokonda omanyina avo kaekahi momukanda womwenyo. Tyilekesa okuti mavakapewa omuvo wokutalua nawa. Pomuvo opo makakala nomphitilo yokunoñgonoka Siovaa nokupakwa omanyina avo momukanda womwenyo.

Omukanda Eholololo 20:12, 13, upopia okuti Ovanthu vatyo aveho makatutiliswa makesukisa okuendela movipuka “viahonekwa monombuingwa,” tyilekesa okuti mavekesukisa okuendela movitumino vya Siovaa mavikapakwa-ko mouye omupe. Vana vahakaendela movitumino ovio mavakahanyuako. — Isa. 65:20.

Omukanda wa Daniel 12:2, upopia okuti vamwe mavakatutiliswa ‘ovakakala nomwenyo wahapu, ovakuavo avakatutiliswa avakapolwa omunkhima nokukapenyua pala apeho.’ Ono velesikulu ombo mbupopia etyi matyikamoneka konthyulilo yomanima 1000. Konthyulilo yomanima 1000, vamwe “mavakakala nomwenyo,” ovakuavo “avakapenyua pala apeho.” Tyilekesa okuti vamwe mavakakala nomwenyo wahapu ovakuavo avakahanyuako pala apeho. — Ehol. 20:15; 21:3, 4.

Otyipuka otyo tyovikundyi vivali viovanthu mavakatutiliswa, matyiende ngetyi tyilingwa tyina omunthu ahanda okwiilukila motyilongo otyikuavo. Ovaviuki tupondola okuveeleka navana vatumwa okukala motyilongo tyimwe mokonda yovilinga vakalingamo. Pahe avapewa ovistu yovilinga opo vakale wotyilongo otyo. Mokonda yovilinga ovio mavakalingamo ovanthu ovo veiwe umwe nawa tupu vayekwa okulinga ovipuka vimwe. Mahi vana vehevaviuki ovo vekahi ngovanthu vana vahanda vala okukapila motyilongo tyimwe. Ovanthu ngovo vapewa ovistu eveyeka okukala motyilongo otyo onohanyi mbumwe vala. Tyilinge vana vapewa ovistu yovilinga tyilinge vana vapewa ovistu yokukapila vala motyilongo omo, opo vayekwe okukala motyilongo otyo vesukisa okulekesa okuti ovanthu vayumbwa onthumbi. Ovanthu vehevaviuki mavakatutiliswa vena okutavela ovitumino vya Siovaa, avalingi umwe evi vilekesa okuti pahe ovaviuki opo vakakale apeho Mouye Omupe. Naina katyesukisile ovistu patyi onongendi mbupewa tyina mbunyingila motyilongo tyimwe, mbumwe mbupondola okuyekwa okukala motyilongo otyo ononkhuavo ambutatwamo. Otyipuka otyo pahe tyitalelwa vala kovipuka mavakalinga motyilongo otyo. Otyo tyilekesa okuti ovipuka mavikamoneka novanthu aveho mavakakala mouye omupe vitei kuetyi mavakalinga mouye omupe.

Siovaa ha Huku vala una okankhenda mahi tupu o Huku youviuki. (Deut. 32:4; Sal. 33:5) Siovaa makakala noluembia naaveho mavakatutiliswa, tyilinge vana valingile ovipuka oviwa puetyi vehenenkhie tyilinge vana valingile ovipuka ovivi puetyi vehenenkhie. Mahi nongotyo tupu makaendela movitumino viae viavilapo. Mouye omupe mamukakala vala ovanthu vehole Siovaa tupu vaendela movitumino viae.