Yetegyereze oku Baibuli erikugarukamu ebibuuzo ebi.

Ebyakozirwe 24:15 nihagira ngu nihaza kubaho “okuzooka kw’abahikiriire n’abatahikiriire.” Abahikiriire n’abarikworobera Ruhanga batakafiire, kandi amaziina gaabo gari omu kitabo ky’amagara. (Mal. 3:16) Abatahikiriire nibatwariramu abo abarikufa batatungire omugisha gurikumara kwega ahari Yehova, abo amaziina gaabo tigari mu kitabo ky’amagara.

Yohaana 5:28, 29 naho nihagamba neegamba aha bantu nibo bamwe abarikugambwaho omu Ebyakozirwe 24:15. Yesu akagira ngu “abo abaakozire gye” nibaija ‘kuzookyera amagara, n’abo abaakozire kubi, bazookyere okucwerwa orubanja.’ Abahikiriire bakakora ebirungi batakafiire. Nibaija kuzookyera amagara ahakuba amaziina gaabo gakihandiikirwe omu kitabo ky’amagara. Kwonka, abatahikiriire bakakora ebintu bibi batakafiire. Nibaija kuzookyera okucwerwa orubanja. Amaziina gaabo tigakahandiikirwe omu kitabo ky’amagara, kandi nibaija kuheebwa obwire kureeba oku baraatwaze. Omu bwire obwo, nibaija kutunga omugisha gw’okwega ebirikukwata ahari Yehova, kugira ngu amaziina gaabo gaahandiikwe omu kitabo ky’amagara.

Okushuuruurwa 20:12, 13 nihashoboorora ngu boona abaraazoorwe nibaija kuba baine kworobera ‘ebihandiikirwe omu’ mizingo, nibyo biragiro ebisya ebi turaaheebwe omu nsi ensya. Abataraabyorobere nibaija kucwekyerezibwa.—Isa. 65:20.

Danieli 12:2 nihagira ngu bamwe abagwejegyereire omu kufa nibaija kusisiimukira “amagara agatahwaho, abandi basisiimukire okuhemuka n’okugaywa okutarihwaho.” Omushororongo ogu nigugamba eky’aha muheru ekiraahikye aha baraazookye. Nibaija kutunga “amagara agatahwaho” nari ‘okugaywa okutarikuhwaho.’ N’ahabw’ekyo aha kuhendera kw’emyaka 1,000, bamwe nibaija kutunga amagara agatahwaho, n’abandi nibaija kucwekyererezibwa kimwe.—Kush. 20:15; 21:3, 4.

Teekateeka aha ky’okureeberaho eki. Embeera za guruupu ibiri ez’abaraazookye nizibaasa kugyeragyeranisibwa n’ez’abashuhuuki abarikwenda kutuura omu ihanga erindi. Abahikiriire bari nk’abo abarikutunga ekihandiiko ekirikubaikiriza kukorera omu ihanga baine obugabe buringaniire nari kutuurayo. Kandi, abatahikiriire ni nk’abashuhuuki abarikutunga ekihandiiko ekirikubaikiriza kutaaha omu ihanga kumara obwire bukye nari kurambura kyonka. Abashuhuuki abo nibaba baine kworeka ngu bahikire kuguma nibatuura omu ihanga eryo. Nikyo kimwe, abatahikiriire abaraazoorwe nikiija kubeetengyesa kworobera ebiragiro bya Yehova kandi boorekye ngu bahikire kuguma omuri Paradiso. N’obu abashuhuuki barikuheebwa ekihandiiko ekirikubaikiriza kutaaha omu ihanga erindi, abamwe nibabaasa kwikirizibwa kuba abatuuzi, kandi abandi nibabaasa kubingwa. Okucwamu okwo nikurugiirira aha ku barikutwaza baaba bari omu ihanga eryo. N’ahabw’ekyo, boona abaraazoorwe nibaija kucwerwa orubanja rw’aha muheru barikwihirira aha ku baraayorekye okwikiriza kwabo n’oku baraatwaze omu nsi ensya.

Yehova ni Ruhanga omunyambabazi kandi omuringaaniza. (Bir. 32:4; Zab. 33:5) Naija kworeka rukundo ye arikuzoora abahikiriire n’abatahikiriire. Kwonka naija kuguma ahamiire aha mitindo ye erikukirayo erikukwata aha kihikire n’ekigwire. Abaraayorekye ngu nibakunda Yehova kandi bakagyendera aha mitindo ye nibo bonka abaraikirizibwe kugumizamu nibatuura omu nsi ensya.