Kjikj mol, woo de Schreft dise Froag beauntwuat.

Aposteljeschicht 24:15 wiest ons, daut de “jerajchte uk de ojjerajchte vom Doot oppstonen woaren.” De Jerajchte sent dee, dee Gott deenden, ea dee storwen; dee äare Nomes sent em Läwesbuak jeschräwen (Mal. 3:16). De Ojjerajchte sent dee, dee nich de Jeläajenheit hauden, Jehova kjanen to lieren, ea dee storwen; dee äare Nomes sent nich em Läwesbuak jeschräwen.

Johanes 5:28-29 rät von deeselwje twee Gruppen waut Aposteljeschicht 24:15. Jesus säd: “Dee doa goodet jedonen haben” woaren oppstonen “toom Läwen, un dee, dee bie äare beese Woakjen jebläwen sent, stonen opp toom jerecht woaren.” De Jerajchte deeden goodet, ea dee storwen. Dee woaren oppstonen toom Läwen, wiels äare Nomes noch emma em Läwesbuak stonen. Oba de Ojjerajchte deeden schlajchte Woakjen, ea dee storwen. Dee woaren oppstonen toom jerecht woaren, wiels äare Nomes sent noch nich em Läwesbuak jeschräwen. Dee woaren fa eene jewesse Tiet jerecht, ooda unjasocht un beoobacht woaren. Dan woaren dee de Jeläajenheit haben, Jehova kjanen to lieren, soo daut dee äare Nomes kjennen em Läwesbuak jeschräwen woaren.

Openboarunk 20:12-13 moakt dietlich, daut aul dee, dee vom Doot oppstonen, sikj woaren motten no daut rechten, “waut en dee Bieekja . . . jeschräwen” steit; daut sent de niee Jesazen fa de niee Welt. Dee, waut sikj nich no dise Jesazen rechten, woaren venicht woaren (Jes. 65:20, NW).

Daniel 12:2 (NW) sajcht verut, daut eenje, dee em Doot schlopen, oppjewakjt woaren “to daut eewje Läwen un aundre to eewjet veachten un Schaund.” Dis Varsch rät doavon, woo daut tolatst met dee utkomen woat, waut oppstonen – entwäda woaren dee “eewjet Läwen” haben ooda “eewjet veachten.” Soo, opp Enj von de 1 000 Joa woaren eenje daut eewje Läwen kjrieen, aundre woaren eewich venicht woaren (Opb. 20:15; 21:3-4).

Vejlikj wie daut mol. De twee Gruppen, waut oppstonen woaren, wudd eena kjennen met Utlenda vejlikjen, dee en een aundret Launt wonen wellen. De Jerajchte sent soo aus dee, dee een Oabeitsvisa kjrieen ooda soont toom doa bliewen, wuaderch dee jewesse Rajchten un Frieheiten kjrieen em Launt. Oba de Ojjerajchte sent soo aus dee, dee een Spaziavisa kjrieen ooda soont fa eene jewesse Tiet. Soone Utlenda woaren motten bewiesen, daut see sikj doaraun hoolen, waut von an velangt woat, daut see kjennen wieda en daut Launt bliewen. Biejlikj soo es daut uk met de Ojjerajchte. Dee woaren motten wiesen, daut see sikj aun Jehova siene Jesazen hoolen un daut see wellen jerajcht sennen, om em Paradies to läwen. Endoont waut fa een Visa de Utlenda kjrieen, wan dee em Launt nenkomen, eenje woaren sikj doa veleicht met de Tiet kjennen tus moaken. Oba aundre woaren veleicht utem Launt rutjeschekjt woaren. Daut woat krakjt doano sennen, waut dee fa eene Enstalunk haben un woo dee sikj vehoolen. Krakjt soo es daut uk bie dee, waut vom Doot oppstonen. Doano woo dee sikj vehoolen un aus dee tru bliewen, woat sikj daut utwiesen, aus dee woaren kjennen en de niee Welt läwen.

Jehova es nich bloos metliedent, oba hee es uk jerajcht (5. Mo. 32:4; Psa. 33:5). Hee woat siene Leew doaderch wiesen, daut hee dee beid Gruppen vom Doot oppwakjen woat. Oba hee woat uk von jiedrem eenen velangen, daut dee sikj doaraun helt, waut rajcht un orrajcht es. Bloos dee, waut am leewen un soo läwen woaren, aus hee daut haben well, woaren wieda kjennen enne niee Welt läwen.