Tutadilenu mvutu Biblia yana hana.

Makalegelo 24:15 yana zuela egi “athu abonga nu athu abola mbaafuzumuga.” Athu abonga idi athu akhalele mutumagela Nzambi gutuama egi afue, hene majina awo adi mu mukanda wa monyo. (Mal. 3:16) Athu abola adi athu anyi ahetelego diago luendu lua gujiya Yehowa gutuama egi afue, hene majina awo ashigo mu mukanda wa monyo.

Yone 5:28, 29 nu Makalegelo 24:15 yana zuelela athu a luholo lumoshi. Yesu wazuelele egi: “Athu anyi akalegele ndaga jiabonga, mbaafuzumuga ha guheta monyo. Uvi anyi akalegele ndaga jiabola, mbaafuzumuga ha gusophesewa.” Athu abonga akalegele ndaga jiabonga gutuama egi afue. Mbaafuzumuga ha guheta monyo handaga majina awo wawa gawo agusonega mu mukanda wa monyo. Uvi, athu abola akalegele ndaga jiabola gutuama egi afue, hene mbaafuzumuga ha gusophesewa. Majina awo ashigo mu mukanda wa monyo, mbaasophesewa yakotelesa mbatadila muabonga makalegelo awo. Mu tangua diene, mbaaheta luendu lua gulonguga ha gujiya Yehowa, ngenyi majina awo mbasonegewa mu mukanda wa monyo.

Gumonesa 20:12, 13 yana monesa egi athu agasue mbaafuzumuga adi naye gutumagela “ndaga jidi jia gusonega mu rulo,” yakotelesa mikhuala ihe-ihe inyi mbayituhana Nzambi mu mavu ahe-ahe. Yehowa mbawushiya athu mbaatuna gutumagela mikhuala yene.—Yesh. 65:20.

Danyele 12:2 yadiangele guzuela egi athu ako anyi afuile mbaafuzumuga ha ‘gujinga ivo nu ivo’ uvi ako mbaafuzumuga ‘ha guvishiwa musonyi nu ha gumona lamba dia ivo nu ivo.’ Verse eyi idi muzuelela ndaga jia gisugishilo mbajikalegewa mukunda nu athu mbaafuzumuga ha guheta ‘monyo wa ivo nu ivo’ nga ha ‘gumona lamba dia ivo nu ivo.’ Hene, gu gisugishilo gia ivo 1000, athu ako mbaaheta monyo wa ivo nu ivo, uvi ako mbashiyiwa mayilago.—Gumo. 20:15; 21:3, 4.

Tutadilenu gifezegeselo gimoshi. Tuajiya gufuanesa mahunji mbadi a athu mbaafuzumuga nu athu adi mutshigina guya mujinga mu gifutshi giko. Athu abonga adi gifua athu ana heta mukanda wana hana njila ha gukalagala mudimo mu gifutshi giko (permis de travail) nga mukanda ana hana muthu ha gujinga mu gifutshi giko masugu avula (visa de résidents). Mikanda yene yana guakuatesa ha gujinga muabonga mu gifutshi giene. Uvi athu abola adi gifua athu ana heta mukanda udi guahana njila ha guya mutshita masugu azonda mu gifutshi giko (visa temporaire). Athu ene adi naye gutshita yagasue hagula ahenewe njila ha gulandula gujinga mu gifutshi gihe-gihe. Luholo lumoshi nji, athu abola anyi mbaafuzumuga adi naye gutumagela mikhuala ya Yehowa nu gumonesa egi adi athu abonga ha gulandula gujinga mu phaladiso. Mukatshi dia athu ana heta viza ya gutshita masugu avula mu gifutshi gihe-gihe nga mukunda nu masugu azonda, ako ana kayewa, uvi ako ana bua enya gifutshi giene. Desizio diasuga diana zudiwa ha gutadila makalegelo ana monesa athu ene mu gifutshi gihe-gihe. Luholo lumoshi nji, mbaazula desizio diasuga mukunda nu athu agasue mbaafuzumuga ha gutadila gutshigina guawo nu makalegelo mbaamonesa mu mavu ahe-ahe.

Yehowa wana vila athu khenda uvi wana sophesa nji ndaga mu luholo luatagana. (Mikh. 32:4; Ngi. 33:5) Mbawumonesa guzumba guenji luholo mbalufuzumuna muene athu abonga hamoshi nu athu abola. Uvi mbawutshigina egi mukut’awo agasue atumagele mikhuala yenji yatagana. Athu anyi mbaazumba Yehowa nu mbatumagela mikhuala yenji ene mbaahanewa njila ha gulandula gujinga mu mavu ahe-ahe.