Onani momwe Baibolo inkudawirira mibvunzo mwaya.

Lemba ya Machitidwe 24:15 inkutifokozera kuti kudzakhale ‘kumuka kwa olungama na osalungama kubodzi.’ Olungama ni wanthu omwe ambabvera Mulungu akanati kufa ndipo madzina yawo yadanembewa m’bukhu ya moyo. (Mal. 3:16) Wanthu osalungama ni wale omwe adaferamo osakhala na mwayi wakuti amudziwe bwinobwino Yahova, ndipomwapa madzina yawo yalibe kunembewa m’bukhu ya moyo.

Lemba ya Yohane 5:28, 29 inkulewambo va magulu yabodzibodzi yomwe yankutomolewa pa Machitidwe 24:15. Yesu adati ‘wanthu omwe adachita vabwino’ adzakhale na mwayi ‘womukisiwa nkupasiwa moyo ndipo omwe adachita voipa adzamukisiwe kuti aweruziwe.’ Wanthu olungama adachita vinthu vabwino akanati kufa. Akadzamukisiwa adzatambiriretu moyo ndawa madzina yawo yali kale m’bukhu ya moyo. Koma wanthu osalungama adachita vinthu voipa akanati kufa. Ndipomwapa akadzamukisiwa, adzafunikane kuweruziwa. Koma madzina yawo yadzakhale yakalibe kunembewa ndawa panthawe mwiyi adzakhale akupendewa makhalidwe yawo. Panthawe mwiyi, iwo adzakhale na mwayi wopfunzira va Yahova kuti madzina yawo yanembewembo m’bukhu ya moyo.

Lemba ya Chivumbulutso 20:12, 13 ifotokoza kuti wanthu wose womukisiwa achadekana kudzabvera ‘vinthu vonembewa m’mipukutu,’ vomwe ni malamulo yanyowani yomwe yadzaphatisiwe basa mudziko inyowani. Wanthu omwe adzabverelini adzachenekewe.—Yes. 65:20.

Lemba ya Danieli 12:2 idaleweratu kuti wanthu anango omwe adafa adzamukisiwe ‘nkupasiwa moyo wosapera koma anango vidzawalirelini bwino ndipo adzazondewe mpakana kalekale.’ Lemba mwiyi inkutsindika kuti kudzakhale kumukisiwa nkutambira ‘moyo wosapera’ na ‘kuzondewa mpakana kalekale.’ Vimwivi vinkutanthauza kuti kumapeto kwa magole 1000, anango adzatambire moyo wosapera, koma anango adzachenekewe.—Chiv. 20:15; 21:3, 4.

Onani chitsanzo ichi. Magulu yawiri ya wanthu womukisiwa tingayalinganize na wanthu omwe achoka dziko iyi kuti akhale dziko inango. Olungama ali ninge wanthu omwe apasiwa chipepa chowabvumiza kungena mudziko nkupasiwa ufulu wakuti akhaliretu. Koma osalungama ali ninge wanthu omwe abvumiziwa kungena, koma andopasiwa ntsiku zing’onong’ono ndipo adakawonewa ninge alendo. Vochita va wanthu mwawa vingachitise kuti abvumiziwe kukhaliratu mudziko mweyo panango neye. Nchibodzibodzimbo, wanthu osalungama akadzamukisiwa, achadekana kudzawonesa kuti ankufuna kukhala olungama kuti abvumiziwe kukhaliratu m’Paradaiso. Vilibe basa peno munthu wandongena m’dziko nkuuziwa kuti akhaliretu koma munango nkupasiwa ntsiku zochepa nkumbawonewa ninge mulendo, wose achadekana kubvera malamulo ya boma. Ndawa peno ankubveralini, boma ingasaine kundowathamingisa. Khalidwe yawo ndiyo ingachitise kuti apitirize kukhalamo panango neye. Molingana na vimwevi, khalidwe ya wanthu omwe adzamukisiwe ndiyo idzachitise kuti apitirize kukhala mudziko inyowani panango neye.

Yahova sikuti wandokhala Mulungu wachifundo chabe, koma iye ni Mulungu pomwe wachilungamo. (Deut. 32:4; Sal. 33:5) Yahova adzawonese kuti ni wachikondi akadzamukisa wanthu olungama na wosalungama. Koma iye adzachinjelini mpfundo zake pankhani ya makhalidwe yabwino. Wanthu omwe adzakonde Yahova na kumubvera, ndiwo wati adzabvumiziwe kuti akhaliretu mudziko inyowani.