Bae iumi storyim ansa from Bible for disfala kwestin.

Acts 24:15 storyim hao God bae mekem “pipol wea raeteous and pipol wea no raeteous for laef bak.” Pipol wea raeteous hem olketa wea nem blo olketa stap insaed buk blo laef, bikos olketa obeyim God bifor olketa dae. (Malakae 3:16) Pipol wea no raeteous hem olketa wea nem blo olketa no stap insaed buk blo laef, bikos olketa no garem chance for lane abaotem Jehovah, then olketa dae. Samfala narawan insaed disfala grup tu.

John 5:28, 29 storyim tu tufala grup wea Acts 24:15 storyim. Taem tufala grup hia laef bak Jesus sei “olketa wea duim gud samting” bae kasem “laef olowe, bat olketa wea duim nogud samting bae kasem judgment.” So pipol wea raeteous hem olketa wea duim gud samting bifor olketa dae. Taem olketa laef bak olketa bae garem chance for laef olowe, bikos nem blo olketa stap yet insaed buk blo laef. Bat pipol wea no raeteous hem olketa wea duim nogud samting bifor olketa dae, and taem olketa laef bak olketa bae kasem judgment. Nem blo olketa no stap yet insaed buk blo laef bikos judgment blo olketa bae gohed yet for samfala taem. Lo datfala taem, olketa bae garem chance for lane abaotem Jehovah and for hem raetem nem blo olketa insaed buk blo laef.

Revelation 20:12, 13 sei evriwan wea laef bak bae need for obeyim “samting wea stap insaed long olketa scroll,” wea hem nao olketa niu law wea God bae givim for iumi lo niu world. Bat pipol wea no obeyim olketa niu law hia, Jehovah bae finisim.—Aesaea 65:20.

Daniel 12:2 (NWT) storyim hao staka pipol wea laef bak bae “kasem laef olowe and olketa narawan bae kasem shame and nogud samting for olowe.” Disfala scripture storyim final judgment wea olketa bae kasem, wea hem nao for “laef olowe” or for kasem “nogud samting for olowe.” So, lo end blo datfala 1,000 year rul, samfala bae kasem laef olowe and olketa narawan bae finis for olowe.​—Rev. 20:15; 21:3, 4.

Iumi savve comparem situation blo tufala grup hia wea bae resurrect witim foreigner wea laek for go stap lo nara kantri. Pipol wea raeteous olketa olsem foreigner wea kasem work permit or residence visa, wea mekem hem savve kasem samfala raet and benefit wea olketa citizen garem. Bat pipol wea no raeteous olketa olsem foreigner wea kasem temporary visa or visitors visa. Hem bae need for duim samting wea showimaot hem fit for gohed stap lo kantri. Disfala example showimaot hao olketa wea no raeteous bae need for followim olketa law blo Jehovah mekem olketa savve gohed stap lo Paradaes. Tingim tu, nomata which visa nao olketa foreigner kasem for stap lo kantri, gogo maet samfala kamap citizen and samfala gavman bae deportim olketa. Final disison bae depend lo wei blo olketa and wanem olketa duim taem olketa stap lo datfala kantri. Hem semsem tu for evriwan wea laef bak. For olketa kasem laef olowe or nomoa, datwan bae depend lo wei blo olketa lo niu world and sapos olketa gohed faithful.

Jehovah laekem evri samting for mas stret and hem lovem pipol. (Diutronomi 32:4; Sams 33:5) From hem lovem pipol, hem bae resurrectim olketa wea raeteous and olketa wea no raeteous. Bat hem laekem olketa for followim olketa raeteous standard blo hem. So olketa wea lovem hem and obeyim olketa standard blo hem nomoa bae gohed stap lo niu world.