Medewehla ia duwen Paipel eh sapengala peidek pwukat.

Wiewia 24:15 padahkihong kitail me e pahn mie “kaiasada ong me pwung kan oh me sapwung kan.” Me pwung kan iei irail kan me kin peikiong Koht mwohn arail mehla, eri ederail kan ntingdi nan pwuhken mour. (Mal. 3:16) Me sapwung kan iei irail kan mehla ahpw sohte ahneki ahnsou mwahu en sukuhlki duwen Siohwa, eri ederail kan sohte ntingdi nan pwuhken mour.

Sohn 5:28, 29 kin koasoakoasoia pwihn riauohte me Wiewia 24:15 koasoia. Sises mahsanih me “irail me wiewia me mwahu” pahn “iasadahng mour, a irail me wiewia me suwed en iasadahng kadeik.” Me pwung kan kin wia me mwahu mwohn arail mehla. Irail pahn iasadahng mour pwehki ederail ko ntintingte nan pwuhken mour. Ahpw, me sapwung kan kin wia me suwed mwohn arail mehla. Irail pahn iasadahng kadeik. Ederail kan saikinte ntingdi nan pwuhken mour, oh re pahn ale kadeik, de mie me pahn kin tetehk mwahu arail wiewia kan ahnsowo. Erein ahnsowo, irail pahn ahneki ahnsou mwahu en sukuhlki duwen Siohwa oh nantihong pwe ederail kan en ntingdi nan pwuhken mour.

Kaudiahl 20:12, 13 kawehwehda me koaros me iasada pahn anahne peikiong “soahng kan me ntinting nan pwuhk ko,” me iei kosonned kapw kan me pahn kohda nan sampah kapw. Irail kan me sohte peikiong pahn sohrala.​—Ais. 65:20.

Daniel 12:2 kohpada me ekei me melahr kan pahn iasadahng “mour soutuk, oh ekei pahn lokolongki kanamenek poatopoat.” Iretikitik wet koasoakoasoia duwen kaimwiseklahn kadeik me pahn wiawihong me iasada kan. Irail pahn alehdi “mour soutuk” de “kanamenek poatopoat.” Eri ni imwin pahr kido, ekei pahn ale mour soutuk, oh ekei pahn sohrala kohkohlahte.​—Kaud. 20:15; 21:3, 4.

Medewehla karasaras wet. Irair en pwihn riauo me iasada kak pahrekiong aramas kei me men kohla oh kousoanla ehu sahpw tohrohr. Me pwung kan kin pahrekiong irail kan me ale doaropwehn visa me mweidohng irail en kak doadoahk oh kousoan wasao oh ekis ahneki saledek. Ahpw me sapwung kan kin pahrekiong irail me ale doaropwehn visa pwehn kak doadoahk oh kousoan wasao erein ahnsou kiste. Wiewiahn irail pwukat anahne dehdehda mwahu mwohn irail ale mweimwei en pousehlahte kousoan nan sahpw kapwo. Duwehte met, me sapwung kan me iasada pahn anahne peikiong sapwellimen Siohwa kosonned kan pwehn kadehdehda me irail wiewia me pwung pwe ren kak mihmihte nan Paradais. Sohte lipilipil soangen doaropwehn visa dah me koaros alehdi ni ar tepin pedolong nan ehu sahpw tohrohr, ekei irail pahn kedekedeo wiahla towe mehlel en wehio, ahpw ekei pahn anahne kohkohsang. Met pahn poahsoankihda arail wiewia oh tiahk kan nan sahpw kapwo. Eri duwehte met, dahme pahn wiawihong koaros me iasada pahn poahsoandahsang arail pwoson oh arail wiewia kan nan sampah kapwo.

Siohwa sohte ketin wiahte Koht emen me limpoak, ahpw e pil wia Koht emen me pwung oh pahrek. (Deud. 32:4; Mel. 33:5) E pahn ketin kasalehda sapwellime limpoak ni eh pahn ketin kaiasada me pwung oh me sapwung kan. Ahpw e pil ketin kasik me irail koaros pahn peikiong sapwellime koasoandi kan ong dahme pwung oh sapwung. Irail kante me poakohng ih oh peikiong sapwellime koasoandi kan pahn ale mweimwei en pousehlahte kousoan nan sampah kapwo.