Bibliachö ima ninqanta rikärishun.

‘Allita ruraqkuna y mana allita ruraqkunapis’ kawariyämunampaq kaqtam Hëchus 24:15 nin. Allita ruraq kaqkunaqa, manaraq wanurnin Diosta wiyakushqa kaqkunam kayan. Tsëmi jutinkunaqa, pikuna kawayänampaq kaqta rikätsikoq libruchö qellqarëkan (Mal. 3:16). Mana alli kaqta ruraqkunaqa, manaraq wanurnin Diospita yachakuyta mana puëdishqa kaqkunapis kayanmi. Tsëmi jutinkunaqa pikuna kawayänampaq kaqta rikätsikoq libruchötsu qellqarëkan.

Juan 5:28 y 29 ninqanchöpis, Hëchus 24:15 ninqanchö ishkan grüpu nunakunallapaqmi parlan. Jesusqa, “allikunata rurashqa kaqkunaqa, kawayänampaqmi kawariyämunqa, y mana allikunata rurashqa kaqkunanam, juzgashqa kayänampaq kawariyämunqa” nirqan. Allita ruraqkunaqa, manaraq wanurmi alli kaqkunata rurashqa kayarqan. Pikuna kawayänampaq kaqta rikätsikoq libruchö jutinkuna qellqarëkaptinmi, pëkunaqa kawayänampaq kawariyämunqa. Peru manaraq wanurnin mana alli kaqta ruraq kaqkunaqa, juzgashqa kayänampaqmi kawariyämunqa. Pëkunapa jutinkunaqa, manam pikuna kawayänampaq kaqta rikätsikoq libruchöqa qellqarëkanraqtsu. Tsëmi pëkunaqa, juk tiempupa wiyakoq o mana wiyakoq kayanqanta rikätsikuyanqa. Tsë tiempuchömi, Jehoväpita yachakuyänampaq y pikuna kawayänampaq kaqta rikätsikoq libruchö jutinkuna qellqakänampaq kallpachakuyänan.

Apocalipsis 20:12 y 13 ninqannömi, llapan kawarimoq kaqkunaqa ‘röllukunachö ninqanta’ wiyakuyänan, juk parlakuychöqa, Shumaq Patsachö mushoq leykunata. Y tsë leyta mana wiyakoqkunaqa ushakäyanqam (Is. 65:20).

Daniel 12:2 ninqannömi, punuykaq cuenta wakin wanushqakunaqa “imëyaqpis kawayänampaq” y wakinna “imëyaqpis penqapashqa y despreciashqa kayänampaq” kawariyämunqa. Kë versïculuqa, kawarimoqkuna imachö ushayänampaq kaqtam rikätsikun. Wakinmi, ‘imëyaqpis kawayanqa’ y wakinnam, imëyaqpis ‘despreciashqa’ kayanqa. Tsëmi waranqa wata pasariptinqa, wakinqa manana wanushpa kawakuyanqa, peru wakinqa chipyëpam ushakäyanqa (Apoc. 20:15; 21:3, 4).

Kawarimoq tsë ishkë grüpu nunakunaqa, juk nacionchö kawëta munaq nunakunanömi kayan. Alli kaqta ruraqkunaqa, juk nacionchö trabajayänampaq o täräyänampaq permïsuta chaskeq nunakunanömi kayan. Peru mana allikunata rurashqa kaqkunaqa, juk nacionchö wallka tiempulla kayänampaq o tsë nacionta reqipakuyänampaq permïsuta chaskeq nunakunanöllam kayan. Chäyanqan nacionchö kawëta munarqa, tsëchö leykunata respetayanqantam rikätsikuyänan. Tsë cuentam, mana alli kaqta rurashqa kaqkunaqa Shumaq Patsachö kawarnin sïguiyänampaqqa, Jehoväpa leyninkunata wiyakuyänan y alli kaqta ruraq kayanqanta rikätsikuyänan. Y juk nacionman charnin ima permïsuta chaskishqa karpis, wakinkunaqa tsë nacionchö quedakuyta puëdiyanqam, peru wakinkunaqa qarqushqam kayanqa. Y tsëqa kanqa, tsë nacionchö imanö portakushqa kayanqampitam. Tsë cuentallam Patsachö llapan kawarimoq kaqkunaqa, Diosllata sirwiyanqampita y Shumaq Patsachö imanö portakushqa kayanqampita, imëyaqpis kawakurnin sïguiyanqa o chipyëpa ushakäyanqa.

Jehoväqa manam llakipäkoq Diosllatsu, sinöqa alli kaqta ruraq y rasun kaqllata parlaqmi (Deut. 32:4; Sal. 33:5). Alli kaqta y mana alli kaqta rurashqa kaqkunata kawaritsimurmi, kuyakoq kanqanta rikätsikunqa. Tsënö kaptimpis, mandakunqankunata llapankuna cäsukuyänantam shuyaranqa. Pëta kuyaq kaqkuna y mandakunqanta wiyakoq kaqkunallam Shumaq Patsachö kawarnin sïguiyanqa.