Biblia ima nishcata ricushun.

Hechos 24:15-pica: ‘Cashcata rurajcunapish, mana cashcata rurajcunapish causaringacunami’ ninmi. Cashcata rurajcunaca manaraj huañushpa Yayitu Diosta cazushcamantami causaita chasquinapaj libropica paicunapaj shuticuna can (Malaquías 3:16). Cutin mana cashcata rurajcunaca manaraj huañushpaca Yayitu Diosta rijsina oportunidadtaca mana charircacunachu. Chaimantami paicunapaj shuticunaca causaita chasquinapaj libropica mana can.

Hechos 24:15-pi shinallatajmi Juan 5:28, 29-pipish nin. Chaipica Jesusca “allita rurajcunaca huiñai causaita chasquingapajmi causaringacuna”, cutin “mana allita rurajcunaca juzgashca cangapajmi causaringacuna” ninmi. Allita rurajcunapaj shuticunaca causaita chasquinapaj libropimi can. Chaimantami panicunaca causaita chasquingapaj causaringacuna. Cutin mana allita rurajcunapaj shuticunaca causaita chasquinapaj libropica mana canchu. Chaimantami paicuna causarishpaca Yayitu Diosta rijsina oportunidadta charingacuna. Paicunataca allita decidishcata ricushpa o mana allita decidishcata ricushpami Jesusca juzganga. Paicuna cazujpica causaita chasquinapaj libropimi paicunapaj shuticunaca quillcashca canga.

Apocalipsis 20:12, 13-pica: ‘Tucui causarishcacunami mushuj rollocunapi tiyaj yachachishcacunataca cazuna cancuna’ ninmi. Chaicunata mana cazujcunaca tucuchishcami cangacuna (Isaías 65:20).

Daniel 12:2-pica: ‘Huañushcacunapish causachishcami canga. Shujcunaca huiñai causaipajmi causachishca canga. Caishujcunaca huiñaita pingachishca cangapajmi causachishca canga’ ninmi. Ña 1.000 huatacuna tucurijpimi allita rurajcunaca “huiñai causaita” charingacuna. Cutin mana allita rurajcunaca “para siempremi tucuchishca” cangacuna (Apocalipsis 20:15; 21:3, 4).

Por ejemplo, causarigrij ishqui grupocunataca shujtaj llajtapi causanaman risha nij gentecunahuanmi chꞌimbapurai tucunchij. Cashcata rurajcunaca shuj llajtapi trabajangapaj o chaipi causangapaj shuj visata chasquij shinami cancuna. Chai visamantami huaquin beneficiocunata charincuna. Cutin mana cashcata rurajcunaca ashalla tiempota chaipi causangapaj o paseangapaj shuj visata chasquij shinallami cancuna. Shinapish paicuna chaipi saquirisha nishpaca chai llajtapaj leycunatami cazuna can. Chai shinallatajmi mana allita rurajcunaca Paraíso Allpapi causashpa catingapajca Yayitu Diospaj mandashcacunata cazuna cancuna. Ima visata charishpapish ishquindij grupocunami allita rurashpaca chaipi saquirina oportunidadta charingacuna. Cutin mana allicunata rurashpaca chai llajtamanta llujshishpa rina obligaciontami charingacuna. Chai shinallatajmi Paraíso Allpapi causarijcunapish allita rurashpaca, Paraíso Allpapi saquirina oportunidadta charingacuna. Cutin mana allicunata rurashpaca Paraíso Allpapica mana causai tucungacunachu.

Jehová Diosca cashcata ruraj, cꞌuyajmi can (Deuteronomio 32:4; Salmo 33:5). Cꞌuyaj Dios cashcamantami allita rurajcunatapish, mana allita rurajcunatapish huiñaipaj causana oportunidadta cunga. Shinapish Diosta cazujcunallami Paraíso Allpapi causai tucungacuna.