Chaymantayá yachaykusun.

Hechos 24:15 nisqanpim nin ‘allin ruwaq hinaspa mana allin ruwaq runakuna kawsarimunankumanta’. Allin ruwaqkunaqa manaraq wañukuchkaspankum Diosta kasukurqaku. Chayraykum sutinkupas Diospa libronpi kachkan (Mal. 3:16). Manaraq wañukuchkaspanku Diosta mana serviqkunapas mana allin ruwaqkunam kanku. Chayraykum paykunapa sutinqa Diospa libronpiqa mana kanchu.

Hechos 24:15 nisqanmantaqa rimanmi Juan 5:28, 29 nisqanpipas, Jesusmi nirqa: “Allin ruwaqkunam hatarimunqaku hinalla kawsakunankupaq, mana allin ruwaqkunañataqmi juzgasqa kanankupaq”, nispa. Manaraq wañukuchkaspa allin ruwaqkunaqa hinalla kawsakunankupaqmi hatarimunqaku, paykunapaqariki sutinkuqa hinallam kachkan Diospa libronpi. Manaraq wañukuchkaspa mana allin kaqkunata ruwaqkunam ichaqa juzgasqa kanankupaq hatarimunqaku. Paykunapa sutinqa manam kanchu Diospa libronpiqa. Paykunaqa huk tiempom juzgasqa kanqaku. Chay tiempopim paykunaqa Jehova Diosta riqsinankupaq chaynataq sutinku Diospa libronpi kananpaq kallpanchakunanku kanqa.

Apocalipsis 20:12, 13 nisqanman hinaqa, kawsarimuqkunaqa llapallankum wankusqa qillqapi kamachikuykunata kasukunanku kanqa, mana kasukuqkunaqa kaqmantam wañunqaku (Is. 65:20).

Daniel 12:2 nisqanpim nin: “Wakinmi kawsarimunqa wiña-wiñaypaq kawsakunankupaq, wakinñataqmi wiña-wiñaypaq chiqnisqa kanankupaq hinaspa pinqaypi kanankupaq”, nispa. Kaypiqa nichkan kawsarimuqkuna wiña-wiñaypaq kawsakunankumantam utaq wiña-wiñaypaq pinqaypi kanankumantam. Chaynaqa 1.000 wata tukuytaqa wakinmi wiñay kawsayta haypanqa wakinñataqmi wiñaypaq wañunqa (Apoc. 20:15; 21:3, 4).

Chaymanta allinta entiendenapaqyá rimarisunchik huklaw nacionpiña yachayta munaq runakunamanta. Allin ruwaqkunaqa rikchakunmanmi huklaw nacionpiña yachaq runakunaman. Chay runakunaqa chay nacionpi runakuna hinam imapaqpas derechoyuq kanku. Mana allin ruwaqkunañataqmi rikchakunman huklaw nacionta riqsinanpaq riq runakunaman. Chay runakunaqa chay nacionpi hinalla kanankupaqqa chay nacionpi kamachikuykunatam kasukunanku. Chaynallataqmi, mana allin ruwaqkunapas hinalla kawsanankupaqqa Jehova Diospa kamachisqankunata kasukunanku kanqa, hinaspapas tukuy imapim allin ruwaq kananku kanqa. Huklaw nacionman riq runakunaqariki imayna kawsasqankuman hinam chay nacionpi qipanku, wakinkum ichaqa wischuchikunku. Chaynataqmi kanqa kawsarimuqkunawanpas, hinalla kawsanankupaqqa Diospim hapipakunanku kanqa hinaspapas allin kaqkunatam ruwananku kanqa.

Jehova Diosqa manam llakipayakuqllachu, aswanqa allin ruwaqmi hinaspa mana pimanpas sayapakuqmi (Deut. 32:4; Sal. 33:5). Allin ruwaqkunatapas chaynataq mana allin ruwaqkunatapas kuyasqanraykum payqa kawsarichinqa. Chaywanpas payqa munan kamachikuyninkunata kasukunankutam. Payta kuyaspanku kamachikuyninkunata kasukuqkunallam hinalla kawsanqaku.