Te dikha sar i Biblija odgovorini ko akala pućiba.

Ko Dela apostolska 24:15 pisini „so o Devel ka uskrsnini hem okolen soj tane pravedna hem okolen soj tane nepravedna.“ O pravedna manuša tane okola kola angleder te meren šunđe e Devle hem odolese olenge anava tane pisime ki knjiga ando životi (Mal. 3:16). O nepravedna manuša tane okola kola angleder te meren na hine len prilika te penđaren e Jehova hem te sikljon olestar. Odolese, olenge anava nane pisime ki knjiga ando životi.

O lafija ando Jovan 5:28, 29 odnosinena pe ki isto grupa andi koja vaćeri pe ko Dela apostolska 24:15. O Isus phenđa so „okola so ćerđe šukar“ ka ušten „ko uskrsenje ando životi, a okola so „ćerđe lošno ko uskrsenje ando suđenje.“ O pravedna manuša ćerđe šukar buća angleder te meren. On ka ušten ko uskrsenje ando životi hem odolese olenge anava tane pisime ki knjiga ando životi. Ama, o nepravedna manuša ćerđe lošna buća angleder te meren. On ka ušten ko uskrsenje ando suđenje. Olenge anava pana nane pisime ki knjiga ando životi sose jekh vreme valjani te dikhel pe sar ka reagujinen ko odova so ka sikljon. Đi trajini odova vreme, on ka ovel len prilika te sikljon ando Jehova hem olenge anava ka oven pisime ki knjiga ando životi.

Ko Otkrivenje 20:12, 13 pisini so sare kola ka uskrsninen ka valjani te ićeren pe ko odova so pisini ko „svitko ando životi“, kova o Devel ka del amen ko nevo sveto. Ov ka uništini okolen kola na ka oven lese poslušna (Is. 65:20).

Ko Danilo 12:2 pisini so disave ando okola so mulje ka ušten „aso večno životi, a avera asi večno lađ.“ Akava stih vaćeri ando završno suđenje okolenđe kola ka uskrsninen, disaven ađićeri o „večno životi“, a disaven i „večno lađ.“ Odolese, ko krajo andi Hiljadaberšengi vladavina disave ka dobinen o večno životi, a disave ka oven zauvek uništime (Otkr. 20:15; 21:3, 4).

Razmislin ando akava poređenje. O duj grupe kola ka uskrsninen šaj te uporedina e manušencar kola mangena te živinen ki aver phuv. O pravednikija tane sar okola kola dobinena i radno viza ja isi len boravak. Sebepi odova, on šaj te ovel len sloboda te ćeren diso. A o nepravednikija tane sar okola kola dobinena disavi privremeno ja turističko viza. Disave strancija ka valjani te mothoven save tane angleder so dozvolini pe lenđe te živinen ki odija phuv kaj đelje. Isto ađahar, o nepravednikija kola ka uskrsninen ka valjani te šunen e Jehovase zakonija hem te mothoven soj tane pravedna te šaj te aćhon ko raj ki phuv. Bizo obzir savi viza o strancija ka dobinen angleder te khuven ki aver phuv, disave šaj te dobinen o državljanstvo, a disave šaj ka valjani te oven fordime andi odija phuv. Ama, da li ka aćhon ili na, ka zavisini ando odova da li ićerena pe ko zakon andi odija phuv hem sar ponašinena pe. Isto ađahar, ked ka ovel i završno kušnja da li okola kola ka uskrsninen ka živinen večno ka zavisini andi olengi vera hem da li ićerena pe ko Jehovase zakonija ko nevo sveto.

O Jehova nane samo Devel ando mangipe, već hem Devel andi pravda (Pon. zak. 32:4; Ps. 33:5). Ov ka mothovi po mangipe ađahar so ka uskrsnini hem okolen soj tane pravedna hem okolen soj tane nepravedna. Ama, sarinendar ka očekujini te ićeren pe ko olese merilija ando odova soj tano šukar, a soj tano lošno. Samo okolenđe kola ka mangen le hem kola ka ićeren pe ko olese merilija ka ovel dozvolimo te živinen ko nevo sveto.