Mai dur, va avela te dichas o răspunso la Bibliaco cadale pușimatande.

Andal Fapte 24:15 jianas că „va avela iech jiuvindimos vi codolenghe orta, hai vi codolenghe neorta”. Codola orta sile le manușa cai slujisarde le Devlesche mai anglal te meren, cadea că lenghe anava sile scriime ando lil la viațaco. (Mal. 3:16) Mașcar codola neorta si le manușa cai ci arăsle te sichion anda o Iehova mai anglal te meren, cadea că lenghe anava ci sile scriime ando lil la viațaco.

Ando Ioan 5:28, 29 del-pe duma sa anda codola dui grupuri sar andel Fapte 24:15. O Isus phenel că „codola cai cărde buchia lașe” va avena uștiade anda „iech jiuvindimos la viațaco, hai codola cai cărde buchia nasul, anda iech jiuvindimos la crisaco”. Codola orta cărde buchia lașe angla so te meren. Von va avena uștiade anda iech jiuvindimos la viațaco anda codoia că lenghe anava sile deja scriime ando lil la viațaco. Codola neorta cărde buchia nasul mai anglal te meren. Len va avela-len iech jiuvindimos la crisaco. Lenghe anava ci va avena încă scriime ando lil la viațaco, cadea că va nachena prin iech cris. Ande codo timpo, von va daștina te sichion anda o Iehova hai si lenghe dini i ocazia ca vi lenghe anava te aven scriime ando lil la viațaco.

Andi Revelația 20:12, 13 sicavel-pe că sea codola jiuvindime va trebuna te încăren le buchia „scriime andel suluri”, adică le neve legi cai va avena dine andi lumea nevi. Codola cai ci camen te încăren-le va avena chosle cu sea. (Is. 65:20)

Ando Daniel 12:2 phenel-pe că chichiva anda codola cai soven ando merimos ‘va uștena anda i viața veșnico, hai aver anda o prasamos hai disprețo veșnico’. Ando verseto del-pe duma anda i palutni cris codolenghi jiuvindime. Von va primina ori viața veșnico ori prasamos veșnico. Cadea că, cana va nachena le 1 000 bărș, va avena manușa cai va primina viața veșnico, hai aver va avena chosle anda sea o timpo. (Rev. 20:15; 21:3, 4)

Te dichas iech ilustrarea. I situația ande savi arachen-pe cadal dui grupuri daștil te avel sar i situația ande savi sile le manușa cai camen te train ande aver them. Codola orta sile sar le manușa cai primin iech viza andai buchi sau viza cai sicavel că daștin te beșen code. Cadea că len silen anumime drepturi hai libertatea. Tha, codola neorta sile sar le manușa cai primin iech viza de vizitator. Dacă camen te așen ando nevo them, von trebun te sicaven că sile manușa demno te beșen code. Sa cadea, caște așen ando Paradiso, codola neorta trebun te încăren le norme le Iehovasche hai te cărdion manușa orta. Tha, orisavi avela i viza cai sas dini ieche manușesche cana avilea ande iech them, ji la urmă, so cherel va sicavela dacă va primila i cetățenia, sau va avela șiudino avri othar. O rezultato încărel catar lesco phiraimos hai atitudinea cai siles caring o nevo them. O rezultato le jiuvindimasco încărel catar o pachiamos hai o phiraimos cai va avela ieche manușes andi lumea nevi.

O Iehova ci silo numai iech Del pherdo compasiunea, tha vi iech Del cai silo orta. (Deut. 32:4; Ps. 33:5) Vo va sicavela peschi iubirea cana va jiuvindila vi codolen orta, tha vi codolen neorta. Tha ande sa codo timpo, vo va încărela ca pesche norme moralo uce, ca numai codola cai iubin-les hai încăren lesche legi te aven mechle te așen andi lumea nevi.