Bâ tongana nyen la Bible akiri tënë na ahunda so.

Kusala 24:15 atene so “a yeke zingo ande na kuâ azo ti mbilimbili na azo so ayeke mbilimbili pëpe.” Azo ti mbilimbili ayeke azo so amä yanga ti Nzapa kozo ti tene ala kui, tongaso iri ti ala ayeke na yâ ti mbeti ti fini (Mal. 3:16). Azo so ayeke mbilimbili pëpe ayeke azo so akui sân ti wara lege nzoni ti hinga ye na ndö ti Jéhovah, tongaso iri ti ala ayeke na yâ ti mbeti ti fini ape.

Jean 5:28, 29 aye ti sara tënë ti agroupe use so a sara tënë ni na Kusala 24:15. Jésus atene so “ala so asara aye ti nzoni, zingongo ti ala na kuâ ague na ala ti wara fini na ala so angbâ ti sara aye ti sioni, zingongo ti ala na kuâ ague na ala ti wara ngbanga.” Azo ti mbilimbili asara anzoni ye kozo na kuâ ti ala. Ala yeke zingo na kuâ ti wara fini ndali ti so iri ti ala angbâ na yâ ti mbeti ti fini. Ye oko, azo so ayeke mbilimbili pëpe asara asioni ye kozo na kuâ ti ala. Ala yeke zingo na kuâ ti wara ngbanga. A sû iri ti ala na yâ ti mbeti ti fini ape, na ala yeke wara ngbanga na lege so a yeke bâ yâ ti asarango ye ti ala nzoni teti mbeni ngoi. Na ngoi ni so, ala yeke wara lege ti manda ye na ndö ti Jéhovah nga ti sara si a sû iri ti ala na yâ ti mbeti ti fini.

Apocalypse 20:12, 13 afa so azo kue so ayeke zingo ande na kuâ abezoin ti sara ye alingbi na “aye so a sû ni na yâ ti arouleau”, so ti tene, afini ndia so Nzapa ayeke fa ni na e na yâ ti fini dunia. Jéhovah ayeke futi ande azo so amä yanga ti lo ape.—És. 65:20.

Daniel 12:2 atene kozo awe so ambeni zo so akui awe ayeke zingo ti “wara fini ti lakue lakue, nga ambeni ayeke zingo ti ga ye ti hengo ni nga ye so a ne ni pëpe teti lakue lakue.” Versê so asara tënë ti ndangba ye so azo so a zingo ala na kuâ ayeke wara: ambeni ayeke “wara fini ti lakue lakue,” ambeni ayeke ga “ye so a ne ni pëpe teti lakue lakue.” Tongaso, na hunzingo ti ngu 1 000, ambeni zo ayeke wara ande fini ti lakue lakue, a yeke futi ande ambeni biani biani.—Apoc. 20:15; 21:3, 4.

Zia e mû mbeni tapande. A peut ti haka dutingo ti agroupe use ti azo so azingo na kuâ na dutingo ti awande so aye ti vivre na yâ ti mbeni kodro. Azo ti mbilimbili ayeke tongana awande so awara mbeni visa ti kua wala visa ti duti na yâ ti mbeni kodro; visa ni amû lege na ala ti wara ambeni droit so amolenge ti kodro ni ayeke na ni. Me azo so ayeke mbilimbili pëpe ayeke tongana awande so awara mbeni visa so amû lege na ala ti duti na yâ ti mbeni kodro teti mbeni ngoi wala visa ti avisiteur. Mara ti awande so adoit ti sara ambeni ye kozo si a mû lege na ala ti ngbâ ti vivre na yâ ti fini kodro ni. Legeoko nga, azo so ayeke mbilimbili pëpe so a zingo ala na kuâ abezoin ande ti sara ye alingbi na andia ti Jéhovah nga ala fa so ala yeke azo ti mbilimbili si ala ngbâ na yâ ti Paradis. Atâa mara ti visa wa la awande awara na tongo nda ni so amû lege na ala ti lï na yâ ti mbeni kodro, na nda ni, ambeni ayeke ga amolenge ti kodro ni, me a yeke kiri na ambeni na kodro ti ala. A yeke mû ndangba desizion ni alingbi na bango ndo nga na sarango ye ti ala na yâ ti fini kodro ni. Legeoko nga, ndangba ngbanga so a yeke fâ ande na ndö ti azo kue so a zingo ala na kuâ ayeke lingbi na dutingo be-ta-zo ti ala nga na sarango ye ti ala na yâ ti fini dunia.

Jéhovah ayeke Nzapa ti ndoye, me lo yeke nga Nzapa so aye fango ngbanga ti mbilimbili (Deut. 32:4; Ps. 33:5). Lo yeke fa ande ndoye ti lo na lege so lo yeke zingo na kuâ azo ti mbilimbili nga na azo so ayeke mbilimbili pëpe. Me lo yeke hunda ande na ala kue ti sara ye alingbi na andia ti lo na ndö ti ye so ayeke na lege ni nga ye so ayeke na lege ni ape. Gï azo so andoye lo nga asara ye alingbi na andia ti lo la lo yeke mû ande lege na ala ti ngbâ ti vivre na yâ ti fini dunia.