Diniho hoe akory ty amaleani-Baiboly ani-fanontanea reo.

Mivola ty Asan’ny Apostoly 24:15 fa “hovelomi-Ndranahary ty marina noho ty tsy marina.” Tsy ia olo marina reo fa ze olo nanoriky ty safà-Ndranahary zisiky nahafaty azy. Voasoratsy amy bokini-fiaina ao ty anaran-drozy. (Mal. 3:16) Anisani-tsy marina reo ze olo nimaty fe tsy afaky nianatsy mikasiky ani-Jehovah. Tsy voasoratsy amy bokini-fiaina ao zany ty anaran-drozy.

Mbo miresaky mikasiky olo marina noho tsy marina amy Asan’ny Apostoly 24:15 io avao koa ty Jaona 5:28, 29. Nivola Jesosy hoe “ze nanao ty soa le hovelomy mba hahazo fiaina, fa ze zatsy nanao raha raty, le hovelomy mba hotsarà.” Nanao raha soa ty olo marina talohani-nahafatesany. Hovelomy mba hahazo fiaina rozy satria fa nivoasoratsy amy bokini-fiaina ao ty anaran-drozy. Fa ty olo tsy marina, zatsy nanao raha raty talohani-nahafatesany. Hovelomy mba hotsarà rozy. Mbo tsy voasoratsy amy bokini-fiaina ao ty anaran-drozy, ka handalo fotoam-pitsarà rozy. Afaky hianatsy mikasiky ani-Jehovah rozy anatini-fotoa io, sady afaky hanao raha mba ho voasoratsy amy bokini-fiaina ao ty anaran-drozy.

Mivola ty Apokalypsy 20:12, 13 fa hisy boky mihoro, zany hoe lalàna vaovao hamea-Ndranahary antsika amy tontolo vaovao ao. Le resahiny ao hoe mila manoriky ze raha “voasoratsy tamy boky mihoro reo” ao ze olo iaby hovelomy amy maty. Haripakini-Jehovah ze tsy manoriky ani-zay.​—Isaia 65:20.

Fa nivola ty Daniela 12:2 hoe misy amy olo matory amy fahafatesa ao rey hifoha, ka ty sisany “hahazo fiaina zisiky farany, fa ty ilany ho afa-baraka noho tsy hasia dikany zisiky farany.” Fitsarà farany ani-olo hovelomy amy maty rey volanini-andininy io. Na rozy hahazo “fiaina zisiky farany” na “tsy hasia dikany zisiky farany.” Lafa tampitsy zany ty 1 000 tao, le hahazo fiaina zisiky farany ty olo sisany, fa ty ilany haripaky zisiky farany.​—Apok. 20:15; 21:3, 4.

Toy misy ohatsy: Azo ampitovizy amy vahiny ta hifindra an-tany hafa any rey, ty raha hiseho amy karazan’olo roe hovelomy amy maty reo. Sahala amin’olo nahazo vizà, zany hoe nahazo alala hipetraky na hiasa amy tany iny any ty olo marina. Fe tsy manahaky ani-zay ty olo tsy marina. Sahala amy vahiny nahazo vizà rey rozy fe mbo tsy afaky mipetraky ela amy tany iny ao fa mandalo avao. Tsy maintsy manao raha mifanaraky amy ty lalàna misy amy tany iny ao ie, zay vo hengà hipetraky ao. Mitovy amy zay koa olo tsy marina hovelomy amy maty rey. Mila manaraky ty lalànani-Jehovah rozy sady mila mampiseho hoe olo marina, amy zay ho afaky hiay amy Paradisa ao avao. Fe ndre ino ino ty vizà niazoni-vahiny rey tamy voalohany any, le mety hahazo zom-pirenena ty sisany amin-drozy lafa mandeha ty fotoa fa ty ilany mety horoasy bakao. Mianky amy ty raha ataon-drozy noho ty fandaisam-batan-drozy ro hahavy an-drozy hijano amy tany iny ao na horoasy bakao. Mitovy amy zay koa olo iaby hovelomy rey. Mianky amy ty finoan-drozy noho ty fandaisam-batan-drozy amy tontolo vaovao ao ro tena hitsarà an-drozy amy farany.

Ndranahary be fitiava Jehovah. Fe tsy zay avao fa Ndranahary manao ty rariny koa ie. (Deot. 32:4; Sal. 33:5) Hasehony hoe be fitiava ie lafa hovelominy ty marina noho ty tsy marina. Fe ndre zay, tsy hampandefitsy ty fitsipikiny mikasiky ty soa noho ty raty ie. Ze olo tea azy noho manoriky ty fitsipikiny avao ro hengàny hiay amy tontolo vaovao ao.