Tokoshishima wopo wɔ Bible okadjimolande lá weepó wɛsɔ.

Elemo 24:15 ntoshimelaka ante ‘ekfundwelo kɛ anto wa wɔlɔ la kɛ anto wapɔlɔ kengoyala.’ Anto wa wɔlɔ oyɛwɔnde anto walɛmɛyɛki Ndjambe lá ntondo k’iwɔ mvɔ, djɛkondeke wiina wawɔ wafunamaka l’onkanda wɔ lowiko. (Mal. 3:16) Anto wa nyɛtshi nde anto wavwisá ipa la mba mbamba kɛ wɔlɔ kɛ ndjeka akambo wa wɔlɔ walendana la Yehova, djɛkondeke wiina wawɔ watafunamá l’onkanda wɔ lowiko.

Djɔanɛ 5:28, 29 otepelande ngo nkambo dj’eloyi wɛkɔ epe w’otepelawɔ lá Elemo 24:15. Yeso atepelaka ante ‘anto wananghaki akambo wa wɔlɔ’ wangokfundɔ ‘lá ekfundwelo kɛ lowiko, edjinge anto wananghaki akambo wapɔlɔ wangokfundɔ lá ekfundwelo kɛ dombo.’ Anto wa wɔlɔ wánangháki akambo wa wɔlɔ lá ntondo k’iwɔ mvɔ. Iwɔ wangokfundɔ lá ekfundwelo kɛ lowiko ladjikɛnde wiina wawɔ wamboshiyɛka mfunama l’onkanda wɔ lowiko. Koko anto wa nyɛtshi, wánangháki akambo wa nyɛtshi lá ntondo k’iwɔ mvɔ. Iwɔ wangokfundɔ l’ekfundwelo kɛ dombo. Wiina wawɔ watafunama l’onkanda wɔ lowiko edjinge wangaalomboyɛ lá ilá k’eleko kɛmɔtshi, kana ntepela ente wangoshishima nanghedji djɛwɔ la nkɔmɛ nkfumɔ. L’eleko kɛsɔ iwɔ wangowa mbamba kɛ ndjeka akambo walendana la Yehova la kɛ wiina wawɔ mfunama l’onkanda wɔ lowiko.

Ndjiso 20:12, 13 mpakisolaka ante onto onkfumɔ wongokfundɔ́ ladjɛ nɛmɛyɛ ‘akambo wafunamisá l’ɛwɔmbɔ,’ ntepela ente ɛlɛmbɛ wɛ bango wɛ Ndjambe ndongotila l’andja wa bango. Anto wápángɔlɛmɛyɛ ɛlɛmbɛ wɛsɔ wangotshitana.​—Iza. 65:20.

Danyɛlɛ 12:2 atepelaka ante anto amɔtshi wetamisá ilɔ yɛ nyɔyi wangowetshɔ ‘tá lowiko l’etshinda edjinge ankina tá nsɔnyi la tá nyɔnyɔ kɛ lotshinda.’ Vɛrse djɛsɔ nyɛnyɛka eposelo w’ekomo wengoposá má ekfundwelo kɛwɔ, ntepela ente wangowa ‘lowiko l’etshinda’ kana ‘nyɔnyɔ kɛ lotshinda.’ Djɛkondeke l’ekomo k’ɛnɔnyi 1 000, anto amɔtshi wangowa lowiko l’etshinda, koko amɔtshi wangatshita lotshinda lotshinda.​—Ndj. 20:15; 21:3, 4.

Tokoshishima ndjɔmbɔmba kɛnɛ. Nkambo dj’eloyi epe wengokfundɔ́ nkoka ndjɛlama l’angangɛnda wakɔpa nsɛkɔ djɛ ntowika l’owila onkina. Anto wa wɔlɔ, walekɔ etengo anto w’iyɔmbɔpɛyɛ viza dj’olemo kana viza dj’intaselo k’akotshɛ́ dj’iwɔ ndjewama la mba ndambo kɛ lotshungɔ l’owila w’angangɛnda. Koko, anto wa nyɛtshi walekɔ etengo anto w’iyɔmbɔpɛyɛ viza dj’itenyi kana dj’anto wayɛka ngo ndowembola owila ko nkalɔ. Lá ntondo k’iwɔ ndawawola djɛ ntshikala lotshinda lotshinda l’owila wɔ bango wɔsɔ, angangɛnda ankfumɔ wasɔ ladjɛ nyɛnyɛ iyɔmɛlɛ ambɔ walekɔ anto wɛlama djɛ ndjintasɛ l’owila wɔ bango wɔsɔ. Wopo wɔk’ɔmɔ ndeke, anto wa nyɛtshi wangokfundɔ́ l’andja wa bango ladjɛ nɛmɛyɛ ɛlɛmbɛ wɛ Yehova edjinge nyɛnyɛ má nanghedji djɛwɔ ambɔ walekɔ anto wɛlamá djɛ mbika lá Paradiso. Lonkina, ayale olemo kana viza djɛkɔnge dj’ɔpɛyɛwɔ angangɛnda má bango dj’iwɔ ndjingela l’owila onkina, wamɔtshi nkoka ndjawolama djɛ ntshikala etengo wana wa mbandja w’owila wɔkɔ koko ankina ndakawoyɛ. Nkano dj’ekomo nkoka ndɔsamá lá nkilika djalelo la nanghedji djɛwɔ dj’iyɔmbɛnyɛ l’owila wɔ bango. Wopo wɔk’ɔmɔ ndeke, nkano dj’iyɔngɔsa lá nkambo dj’anto ankfumɔ wangokfundɔ́ ngolendana la djawo djɛwɔ edjinge la nanghedji dj’iyongotoyala la djɛkɔ lá andja wa bango.

Yehova apalekɔ ngo Ndjambe kɛ lokana nkɛtshi toko, koko alekɔ lonkina Ndjambe kɛ sii la kɛ ngandji. (Mvu. 32:4; Yee. 33:5) Nde anghɛnyɛ ngandji kɛnde má nkfundola ayale anto wa wɔlɔ kana wapɔlɔ. Koko nde angaalɔmba iyankfumɔ djɛ nɛmɛyɛ ɛlɛmbɛ wɛnde welá djiko welendana la wɔlɔ edjinge la nyɛtshi. Ngo anto wangɔkɔpá la wangowiká lá yopo y’okana l’ɛlɛmbɛ wɛnde ndeke ndongawola dj’iwɔ nkindjɛ mbika l’andja wa bango.