Tubandeyi kutala mushindo awaluula Bible ku ino nkonko.

Mukanda wa Bikitshino 24:15 awitulungula’shi akukekala “lusangukilo lwa bafwe, lwa balulame mpaa na lwa bashii-balulame, Kilombeeno Kipya 2014.” Bantu balulame, mbaaba booso babaadi abakookiela Efile Mukulu kumpala ku’abo kufua, na mashina aabo ngafundibue mu mukanda wa muwa. (Mal. 3:16) Mu bantu bashii balulame, mui mpaa na baaba babafuile kushi’bo kupeta mushindo wa kulonga pabitale Yehowa, na mashina aabo ta ngafundibue mu mukanda wa muwa nya.

Mukanda wa Yowano 5:28, 29, aulesha nka bino bisaka bibidi bimune biabadi bakuile mu mukanda wa Bikitshino 24:15. Yesu bakuile’shi: “baaba bakite bi buwa” abakabuuku “bwa lusangukilo lwa muwa, na baaba booso bakite bi bubi bwa lusangukilo lwa kiimu.” Balulame babakitshiine mianda i buwa kumpala kua kufua. Abakabuuku bua lusangukilo lua muwa muanda mashina aabo aki afundibue mu mukanda wa muwa. Anka, bashii balulame babaadi abakitshi mianda i bubi kumpala kua’shi bafue. Abakabuuku bua lusangukilo lua kiimu. Mashina aabo ta ngafundibue mu mukanda wa muwa nya, abakatuele mu kipungo kia kiimu sunga kia kutompibua kumpala kua kukuminyibua. Mu kiakia kipungo, abakapete mushindo wa kulonga pabitale Yehowa na kufundisha mashina aabo mu mukanda wa muwa.

Mukanda wa Kibafumbwilwe 20:12, 13 aupatuula’shi, baaba booso abakasanguka abakekala na lukalo lua kukookiela ku “mianda ifundibue mu mifungofungo NWT,” kuamba’shi, miya ipia y’abaketupa kui Efile Mukulu mu nsenga ipia. Yehowa akabutula baaba booso bash’abakakookiela ku yanka.​—Yesh. 65:20.

Mukanda wa Ndanyele 12:2 taubapuile kutemuka’shi, bangi ba ku baaba balaale mu lufu abakabuuku ‘bwa muwa wa ikalayika bangi bwa buufu na mpombo ya looso.’ Uno verse akula bua kipeta kia mfudiilo akikatuuku bua baaba abakasanguka, bua “muwa wa ikalayika” sunga bua “mpombo ya looso” Biabia, ku mfudiilo kua bipua 1 000 bia kumunana, bangi abakapete muwa wa ikalayika; na bangi namu abakabutudibua bua losoo.​—Kibaf. 20:15; 21:3, 4.

Tubande kuata kileshesho. Muanda wa bino bisaka bibidi abikasanguka, tui balombene kuibipuandikisha na bantu beenyi abakiebe kuenda mu kushaala mu kingi kibundi. Bantu balulame be nka bu bano booso abapetaa mukanda wa mudimo, sunga mukanda awibapa matulua a kushaala muiwumbo mu bulungantu. Mu kuilekeena na biabia, bantu bashii balulame be nka bu beenyi balombene kupeta mukanda awibapa matalua a kushaala muiwumbo mafuku apeela, sunga bu be mu kutemba. Bano beenyi abitungu’shi bakite kintu kampanda abo banabene, kumpala ku’abo kuibapa matalua a kutungunuka na kushaala mu nsenga ipia. Mu mushindo umune, bantu bashii balulame abakasanguka abitungu bakakokiele miya ya Yehowa na baleshe abo banabene’shi mbalulame bua’shi bashaale mu Mpaladisu. Sunga baaba beenyi bapeta mukanda wa kushaala muiwumbo, bangi mbalombene kupeta ungi mukanda awibapa matalua a kuikala bu bena eumbo, anka bangi mbulamatadi mmulombene kuibabinga muiwumbo sunga bekala na wawa mukanda. Kipeta akikatuuku muyile bikitshiino biabo na muikeelo wabo mu nsenga ipia. Mu mushindo umune, kiimu kia mfudiilo kui baaba booso abakasanguka, akikekala kimeene ku lulamato luabo na ku muikeelo wabo mu nsenga ipia.

Yehowa ta muikale nka penda bu Efile Mukulu sha lusa nya, kadi mmuikale dingi Efile Mukulu sha kululama. (Miy. 32:4; Mis. 33:5) Akalesha kifulo kiaye pa kusangula bisaka bioso bibidi, kia balulame na kia bashii balulame. Akatengiela’shi ooso a kuabadi, akookiele mayi aaye a kulonda a ki buwa na ki bubi. Anka penda baaba abakamufulu, na abakekala na nshalelo muipushene na mayi aaye a kulonda, ngi bakalekieela bua’shi batungunukie na kushaala mu nsenga ipia.