Boo luku unfa di Bëibel ta piki dee hakisi aki.

Tjabukama 24:15 ta piki u taa te „sëmbë dëdë de o toona weki baka, dee bi libi bunu a Masa Gadu wojo ku dee an bi libi bunu tuu”. Dee sëmbë dee bi libi bunu, da dee sëmbë dee bi ta piki Gadu buka ufö de dëdë. Nöö fëën mbei në u de dë a di Buku u Libi (Mal. 3:16). Dee sëmbë dee an bi libi bunu, da dee sëmbë dee an bi feni wan bumbuu okasi u ko sabi Jehovah ufö de lasi libi. Nöö në u de an dë a di Buku u Libi.

Johanisi 5:28, 29 ta taki u dee tu kulupu sëmbë dee Tjabukama 24:15 ta taki soni u de. Jesosi bi taki taa „dee sëmbë dee bi libi bunu, o weki ko a libi baka u de feni libi, nöö dee sëmbë dee bi libi hogi, o weki ko a libi baka u de kuutu de”. Dee sëmbë dee bi libi bunu, bi du bumbuu soni ufö de dëdë. De o weki ko a libi baka u de feni libi, u di në u de dë a di Buku u Libi. Ma dee sëmbë dee bi libi hogi, bi du soni di an bi bunu ufö de dëdë. De o weki ko a libi baka u de kuutu de. Në u de an dë a di Buku u Libi, nöö Gadu o ta luku unfa de o ta tja deseei. A di pisiten dë, de o feni di okasi u de ko sabi soni u Jehovah, söseei u de du soni sö taa Gadu sikifi në u de a di buku.

Akoalimbo 20:12, 13 ta taki da u taa hii dee sëmbë dee o weki ko a libi baka, musu libi ku dee soni dee sikifi a „dee buku”. Dee buku aki da dee njunjun wëti dee Gadu o da u a di njunjun goonliba. Jehovah o kii dee sëmbë dee an o ta hoi dee wëti dë.​—Jes. 65:20.

Daniëli 12:2 ta taki taa so sëmbë o weki ko a libi baka „u libi u teego, nöö so u de o weki ko a libi baka u kisi sen ku buuse u nöömö”. Di tëkisi aki ta taki andi o pasa ku dee sëmbë baka te de weki ko a libi baka. De o „feni di libi u teego” nasö de o „kisi sen ku buuse u nöömö”. Di soni aki kë taki taa baka di 1000 jaa, nöö so sëmbë o feni di libi u teego, nöö wotowan o dëdë kaba a sösö.​—Ako. 20:15; 21:3, 4.

Boo buta pakisei a di woto aki. U sa tei dee tu kulupu sëmbë aki tuu maaka ku sëmbë di kë go libi a wan woto köndë. Dee sëmbë dee bi libi bunu, dë kuma sëmbë di feni pampia di ta da de pasi u de sa wooko a di köndë ka de go, nasö u de sa libi nëën u wan pisiten. Di pampia aki ta da de pasi tu u de sa feni heepi a gaan lanti u di köndë. Ma dee sëmbë dee an bi libi bunu, dë kuma dee sëmbë dee feni pampia u go libi u wan kölö pisiten a di köndë, nasö u de go köi. Dee lö sëmbë aki musu lei taa de fiti u kisi di pampia di o da de pasi u de sa libi a di köndë dë go dou. Wë sö nöö a o dë da dee sëmbë dee an bi libi bunu di de o weki ko a libi baka. De o abi fu hoi dee wëti u Jehovah, söseei de musu libi a wan leti fasi, ee de kë libi u teego a di Paladëisi. Wë aluwasi un pei pampia sëmbë feni di de dou a wan woto köndë, tökuseei te u kaba fëën so u de o feni pampia u de sa fika a di köndë, ma kandë so u de an o feni. Di fasi fa dee sëmbë o ta tja deseei, hën o mbei lanti luku ee de o da de pampia u de libi a di köndë, nasö ee de an o da de. Sö nöö a o dë da dee sëmbë dee o weki ko a libi baka. Di hoi di de o ta hoi deseei a Jehovah, ku di fasi fa de o ta tja deseei a di njunjun goonliba, hën o lei ee de o fika a libi.

Jehovah an dë wan Gadu di ta fii da sëmbë nöö a kaba, ma a dë wan Gadu di ta du soni a wan leti fasi tu (Deto. 32:4; Ps. 33:5). A o lei taa a lobi sëmbë, u di a o weki dee sëmbë dee bi libi bunu nëën wojo ko a libi baka, ku dee an bi libi bunu tuu. Ma a o kë taa hii de tuu musu ta hoi dee wëti fëën. Dee sëmbë dee o lobi ën, söseei dee o ta hoi dee wëti fëën wanwan, o sa libi u teego a di njunjun goonliba.