Luku fa Bijbel e piki na aksi disi.

Tori fu den apostel 24:15 e taki dati Gado o gi „wan opobaka na den sma di du san reti èn na den sma di no du san reti”. Den sma di du san reti na den wan di ben e gi yesi na Gado fosi den kon dede. Sobun, a nen fu den skrifi na ini a buku fu libi (Mal. 3:16). Na ini a grupu fu den sma di no du san reti yu abi den wan di dede sondro fu kisi na okasi fu leri sabi Yehovah èn fu dati ede a nen fu den no skrifi na ini a buku fu libi.

Yohanes 5:28, 29 e taki fu den srefi tu grupu di kari na Tori fu den apostel 24:15. Yesus taki dati „den sma di du bun sani, o opo baka fu kisi libi èn den sma di du takru sani, o opo baka fu kisi krutu”. Den sma di du san reti na den sma di ben du bun sani fosi den kon dede. Den o opo baka fu kisi libi fu di den nen skrifi ete na ini a buku fu libi. Ma den sma di no du san reti na den sma di ben e du takru sani fosi den kon dede. A nen fu den sma disi no skrifi ete na ini a buku fu libi. Den o opo baka fu kisi krutu. Disi wani taki dati Gado nanga Krestes o luku den bun fu wan pisi ten fu si fa den e tyari densrefi. Na a ten dati, den sma disi o kisi na okasi fu kon sabi moro fu Yehovah èn fu tyari densrefi na so wan fasi taki a nen fu den kan skrifi na ini a buku fu libi.

Openbaring 20:12, 13 e tyari kon na krin taki ala sma di kisi wan opobaka o abi fu gi yesi na den sani di „skrifi na ini den bukulolo”. Dati na den nyun wet di Gado o gi wi na ini a nyun grontapu. Den sma di no o gi yesi na den wet dati no o tan na libi.​—Yes. 65:20.

Danièl 12:2 e taki dati sonwan fu den sma di dede o wiki baka „fu kisi têgo libi”, ma trawan o wiki baka „fu kisi syen èn fu tron wan tegu sani fu ala ten”. A tekst disi e sori san o pasa nanga den sma disi te den kisi wan opobaka: Den o kisi „têgo libi” noso den o tron „wan tegu sani fu ala ten”. Sobun, na a kaba fu den 1000 yari, son sma o kisi têgo libi èn trawan o kisi pori fu ala ten.​—Openb. 20:15; 21:3, 4.

Luku wan agersitori. Wi kan agersi a situwâsi fu den tu grupu di o kisi wan opobaka nanga a di fu sma di wani libi na ini wan tra kondre. Den sma di du san reti de leki sma di e kisi visum fu man wroko noso fu tan fu wan langa pisi ten na ini wan tra kondre. A visum dati e gi den spesrutu reti so taki den man du furu fu den sani di den borgu fu a kondre dati man du. Ma den sma di no du san reti de leki sma di e kisi visum fu tan fu wan syatu pisi ten nomo na ini wan tra kondre. Den sma disi o abi fu sori taki den e hori densrefi na den wet fu a kondre efu den wani tan libi na ini a kondre dati. Na so a de tu taki te den sma di no du san reti kisi wan opobaka, dan den o abi fu gi yesi na den wet fu Yehovah èn den o abi fu sori taki den na sma di e du san bun efu den wani tan na ini Paradijs. Sobun, awansi sortu visum sma e kisi fu man go na ini a kondre, sonwan fu den e tron borgu fu a kondre dati te fu kaba, ma trawan o abi fu gowe libi a kondre. A fasi fa den sma disi e tyari densrefi na ini a kondre dati o sori efu den mag tan libi drape. Na so a de tu taki ala den sma di o kisi wan opobaka o abi fu sori taki den e tan gi yesi na Gado èn den o abi fu tyari densrefi na a yoisti fasi na ini a nyun grontapu.

Boiti taki Yehovah na a Gado fu lobi, a de sosrefi a Gado fu retidu (Deut. 32:4; Ps. 33:5). Fa a o sori lobi? A o gi sma di du san reti èn sma di no du san reti wan opobaka. Ma a o fruwakti fu den alamala taki den e hori densrefi na den wet fu en di e sori san bun èn san no bun. Soso den sma di kon lobi en èn di e hori densrefi na den wet fu en o mag tan libi na ini a nyun grontapu.