Cabanga ngendlela liBhayibheli leliyiphendvula ngayo lemibuto.

Imisebenti 24:15 isitjela kutsi “labalungile nalabangakalungi batawuvuswa ekufeni.” Labalungile ngulabo lebebalalela Nkulunkulu ngaphambi kwekutsi bafe, ngako emagama abo abhaliwe encwadzini yekuphila. (Mal. 3:16) Labangakalungi ngulabo labafa bangakalitfoli kahle litfuba lekufundza ngaJehova, ngako emagama abo awakabhalwa encwadzini yekuphila.

Johane 5:28, 29 ukhuluma ngemacembu lafanako nalawo lokukhulunywa ngawo embhalweni weMisebenti 24:15. Jesu watsi “labo labente lokuhle batawuvuselwa ekuphileni, labo labente lokubi bavuselwe ekwehlulelweni.” Labalungile bebenta lokuhle ngaphambi kwekutsi bafe. Batawuvuselwa ekuphileni ngobe emagama abo solo abhaliwe encwadzini yekuphila. Kodvwa labangakalungi bebenta tintfo letimbi ngaphambi kwekutsi bafe. Batawuvuselwa ekwehlulelweni. Emagama abo asengakabhalwa encwadzini yekuphila futsi batawunikwa sikhatsi sekwehlulelwa nobe sekubukisiswa. Ngaleso sikhatsi, batawuba nelitfuba lekufundza ngaJehova nelekutsi emagama abo abhalwe encwadzini yekuphila.

Sembulo 20:12, 13 sisitjela kutsi bonkhe labatawuvuswa ekufeni kutawudzingeka balalele ‘tintfo letibhalwe kulemiculu,’ lokusho imitsetfo lemisha letawuba khona eveni lelisha. Labo labangeke balalele batawubhujiswa.​—Isa. 65:20.

Danyela 12:2 utsi labanye labafile batawuvukela ‘ekuphileni lokuphakadze kantsi labanye bavukele ehlazweni laphakadze.’ Lelivesi likhuluma ngekwehlulelwa kwekugcina kwalabo labatawube bavusiwe, labanye batawutfola ‘kuphila lokuphakadze’ kani labanye batfole ‘lihlazo laphakadze.’ Ngako ekupheleni kweminyaka leyinkhulungwane, labanye batawutfola kuphila lokuphakadze futsi labanye batawubhujiswa ngalokuphelele.​—Semb. 20:15; 21:3, 4.

Lamacembu lamabili singawafananisa nebantfu labafuna kuhlala kulelinye live. Labalungile singabafananisa nalabo labatfola i-visa yekusebenta nobe yekuhlala, lebenta bative bayincenye yalelolive futsi bative bakhululekile. Kodvwa labangakalungi singabafananisa nalabo labatfola i-visa yesikhashana nobe i-visa yetivakashi. Kutawudzingeka bavete kutsi bayakulungela kuhlala kulelive ngaphambi kwekutsi bavunyelwe kuchubeka bahlala khona. Ngendlela lefanako, labo labangakalungi labatawuvuswa kutawudzingeka balalele imitsetfo yaJehova futsi bavete kutsi balungile kuze bachubeke bahlala ePharadisi. Kodvwa ngisho bangatfola yiphi i-visa, labanye bangahle banikwe buve balelolive kodvwa labanye bangahle babuyiselwe eveni labo. Loko kuya ngekutsi bebatiphetse njani kulelive. Ngalokufanako, kutsi laba labavusiwe batawuchubeka yini bahlala eveni lelisha kutawuya ngekutsi betsembekile yini nangekutsi batiphetse njani.

Jehova akagcini nje ngekuba nguNkulunkulu lonelutsandvo kodvwa uphindze abe nguNkulunkulu lolungile nalowehlulela ngekulunga. (Dut. 32:4; Hla. 33:5) Utawukhombisa lutsandvo lwakhe ngekutsi avuse labalungile nalabangakalungi. Kodvwa utawulindzela kutsi bonkhe balalele timiso takhe letiphakeme talokulungile nalokungakalungi. Ngulabo labamtsandzako nalabatawuphila ngetimiso takhe kuphela latabavumela kutsi bachubeke baphila eveni lelisha.