Dineho tie akore ty amalea ty Baiboly o fagnonteneagne rehoe.

Mirehake ty Asan’ny Apostoly 24:15 tie “hovelomen’Andrianagnahare ty maregne naho ty tsy maregne.” O ndaty maregne rehafe’e eò le ze ndaty nankatò an’Andrianagnahare taloha ty nimateza’e. Agnate i boke i fiaignagney ao areke ty agnara iareo. (Mal. 3:16) Le agnisa o ndaty tsy maregne rehoe ze ndaty tsy nanagne fahafahagne hianatse ty miomba i Jehovah taloha ty nimateza’e. Tsy voasoratse agnate i boke i fiaignagney ao areke ty agnara iareo.

Mirehake o antoko o ndaty rehafe ty Asan’ny Apostoly 24:15 rehoe ty Jaona 5:28, 29. Rehafe i Jesosy ao tie “ze nanao ty soa”, le “hovelomegne mba hahazo fiaignagne”, fa “ze zatse nanao raty hovelomegne mba hotsaraegne.” I ndaty maregne rey le ze nanao ty soa taloha ty nimateza’e. Hovelomegne ho amy i fiaignagney iareo, satria fa voasoratse amy i boke i fiaignagney ao ty agnara iareo. Fa i ndaty tsy maregne rey le ze zatse nanao raty taloha ty nimateza’e. Mbe tsy voasoratse amy i boke i fiaignagney ao ty agnara iareo, sady hotsaraegne iareo amy ze fotoagne zay ndra harahegne maso tie manao akore ty findesam-bata iareo. Hanagne fahafahagne hianatse ty miomba i Jehovah iareo agnate ze fotoagne zay, sady miankigne amy izay ty hahavoasoratse ty agnara iareo amy i boke i fiaignagney ao.

Rehafe ty Apokalypsy 20:12, 13 tie ze ndaty iaby hovelomegne amy ty mate, le mila mankatò “ze raha voasoratse amy i horognam-bokey ao.” Tsy inogne io fa ze lily vaovao horihegne amy tontolo vaovao ao. Haringagne ze tsy mankatò o lily rehoe.​—Isaia 65:20.

Mirehake ty Daniela 12:2 tie misy ndaty hovelomegne, le “hahazo fiaignagne tsy hisy fara’e, faie ty ila’e ho salatse naho tsy hisy dika’e nainai’e.” Mirehake ty lilim-pitsaragne fara’e hanjò o ndaty hovelomegne amy ty mateo o andine’e iohoe. Ndra iareo hahazo “havelogne nainai’e”, ndra iareo “tsy hisy dika’e nainai’e.” Naho fa tapetse areke i 1000 taogney, le hisy ndaty hahazo havelogne nainai’e, le hisy ndaty ho ringagne nainai’e.​—Apok. 20:15; 21:3, 4.

Dineho ty ohatse raike toy. O antoko o ndaty roe hovelomegne amy ty mate rehoe, le azo ampitoviegne amy ty ndaty te hipetrake an-tane hafa agne. I ndaty maregne rey le mitovy amy ty ndaty nahazo vizà mba hitoboke an-tane hafa agne noho ty fankasitrahagne ty asa natao’e, ndra ndaty nahazo vizà magnomey fahafahagne malalake aze hitoboke an-tane hafa agne. Fa i ndaty tsy maregne rey, le mitovy amy ty ndaty nahazo vizà hitoboke an-tane hafa agne faie tsy maharetse ndra manahake o ndaty mpitilikeo avao. Naho le lia’e te hitoboke agne avao areke o ndaty rehoe, le mila atoro iareo amy ty raha atao iareo tie fagneva ty hijanogne agne avao iareo. Hoe izay ka i ndaty tsy maregne rey. Mila mankatò ty lily i Jehovah iareo, sady mila atoro iareo ka tie ndaty maregne iareo amy izay le lia’e ho amy i Paradisay ao avao. Faie ndra vizà inogne ty niazo ty ndaty raike aloha ty ho nandehana’e an-tane hafa agne, le izao ty raha va’e hisy: Ndra reke le lia’e mahazo zom-pirenena agne ndra reke va’e hampoliegne. Miankigne amy ty toe-tsai’e naho ty findesam-bata’e amy i toeragney agne avao zay. Hoe izay ka fa miankigne amy ty finoagne naho ty findesam-bata i ndaty hovelomegne amy ty mate amy i tontolo vaovao ao rey ty lilim-pitsaragne hoazo iareo.

Tsy Andrianagnahare bey hatea avao ty Jehovah fa Andrianagnahare tea rare’e ka. (Deot. 32:4; Sal. 33:5) Fomba hanoroa’e ze hatea’e zay ty ho fameloma’e o ndaty maregne naho o ndaty tsy maregneo. Faie tea’e ka naho magnorike ty fitsipi’e miomba ty soa naho ty raty iareo iaby. Ze manoro ty hatea’e Aze naho ze mankatò ty fitsipi’e avao ro hiaigne nainai’e amy i tontolo vaovaoy ao.