Tɔsɛdingole woho wakadimola Bible ambola asɔ.

Etsha 24:15 totɛka dia “eolwelo k’anto w’ɛlɔlɔ ndo k’anto wa kɔlɔ” kayoyala. Anto w’ɛlɔlɔ wekɔ wanɛ wakakitanyiyaka Nzambi la ntondo ka nyɔi kawɔ ndo nkombo yawɔ yakafundama lo dibuku dia lɔsɛnɔ. (Mal. 3:16) L’atei w’anto wa kɔlɔ mbele ndo wanɛ wakavu aha la nkondja diaaso dia dimɛna dia mbeka awui wendana la Jehowa, ndo nkombo yawɔ kofundama lo dibuku dia lɔsɛnɔ.

Joani 5:28, 29 tɛkɛtaka dikambo dia elui ehende w’anto akɔ waamɛ wɔtɛkɛtami lo Etsha 24:15. Yeso totɛka ɔnɛ: “Wanɛ wakasalaka akambo w’ɛlɔlɔ” wayolɔ “lo eolwelo ka lɔsɛnɔ ndo wanɛ wakasalaka akambo wa kɔlɔ lo eolwelo ka kilombo.” Anto w’ɛlɔlɔ wakasalaka akambo w’ɛlɔlɔ la ntondo ka vɔ mvɔ. Vɔ wayolɔ lo eolwelo ka lɔsɛnɔ nɛ dia nkombo yawɔ yekekɔ lo dibuku dia lɔsɛnɔ. Koko, anto wa kɔlɔ wakasalaka akambo wa kɔlɔ la ntondo ka vɔ mvɔ. Vɔ wayolɔ lo eolwelo ka kilombo. Nkombo yawɔ kofundama lo dibuku dia lɔsɛnɔ ndo vɔ wayonga lo kilombo l’edja k’etena kɛmɔtshi kana wayɔsɛdingwama. L’etena kɛsɔ, vɔ wayonga la diaaso dia mbeka awui wendana la Jehowa dia nkombo yawɔ fundama lo dibuku dia lɔsɛnɔ.

Ɛnyɛlɔ 20:12, 13 nembetshiyaka di’anto tshɛ wayolɔ wayohomba nkitanyiya “akambo wakafundama lo wɛɔmbɔ,” mbuta ate ɛlɛmbɛ w’eyoyo wayotonga l’andja w’oyoyo. Wanɛ wahatokitanyiya wayonyɛma.​—Isa. 65:20.

Danyɛlɛ 12:2 tokɛka di’amɔtshi l’atei wa wanɛ woladi djɔ lo nyɔi wayemɔ, “otsha lo lɔsɛnɔ la pondjo ndo akina otsha lo nsɔnyi ndo lo diɔnyɔ dia pondjo.” Divɛsa nɛ tɛkɛtaka dikambo dia etombelo w’ekomelo wayonga le wanɛ wayolɔ mbuta ate, vɔ wayokondja “lɔsɛnɔ la pondjo” kana “diɔnyɔ dia pondjo.” Laasɔ, l’ekomelo k’ɛnɔnyi 1 000, amɔtshi wayokondja lɔsɛnɔ la pondjo ndo akina wayolanyema pondjo pondjo.​—Ɛny. 20:15; 21:3, 4.

Tɔsɛdingole ɛnyɛlɔ kɛmɔtshi. Dikambo di’elui ehende w’anto wayolɔ koka mbɛdikama l’angɛndangɛnda walanga monɔ otsha lo wodja okina. Anto w’ɛlɔlɔ wekɔ oko anto wambokondja viza k’olimu kana viza katodjasɛ kawasha yema ya lotshungɔ kana kaakimanyiya dia vɔ mbeyama. Otshikitanyi la wɔ, anto wa kɔlɔ wekɔ oko angɛndangɛnda wambokondja viza ka lo tshanda mɔtshi kana k’anto wambotshɔ tembola wodja. Angɛndangɛnda asɔ tshɛ pombaka mɛnya la ntondo ka vɔ ndjetawɔma dia vɔ sunganaka mbidjasɛ lo wodja w’oyoyo ɔsɔ. Woho akɔ waamɛ mbele, anto wa kɔlɔ wayolɔ pombaka nkitanyiya ɛlɛmbɛ wa Jehowa ndo mɛnya oma lo etsha awɔ dia vɔ kokaka ntshikala lo Paradiso. Oyadi viza kakɔna kayokondja angɛndangɛnda dia mbɔtɔ lo wodja okina, amɔtshi koka ndjokondja viza kayowakonya dia mbetawɔma oko ase wodja akɔ ndo akina koka kaloyama otsha lo wodja awɔ. Yɛdikɔ y’ekomelo koka ndjɔsama lo ndjela etsha awɔ ndo lɔkɛwɔ lawɔ lo wodja w’oyoyo. Woho akɔ waamɛ mbele, yɛdikɔ y’ekomelo lo dikambo dia wanɛ tshɛ wayolɔ, yayolemanɛ la kɔlamelo yawɔ ndo la lɔkɛwɔ layonga lawɔ l’andja w’oyoyo.

Jehowa bu tsho Nzambi ka ngandji koko nde ekɔ nto Nzambi ka losembwe. (Eoh. 32:4; Os. 33:5) Nde ayɛnya ngandji kande lo mbolola anto w’ɛlɔlɔ l’anto wa kɔlɔ. L’etena kakɔ kaamɛ nde ayotetemala nama atɔndɔ ande wa laadiko wendana la lɔkɛwɔ. Paka wanɛ wayowolanga ndo wayotetemala nsɛna lo ndjela atɔndɔ ande mbayetawɔma dia ntetemala nsɛna l’andja w’oyoyo.