Wona edzi Bhibhiliya yi hlamulago khidzo siwudziso sesi.

Mithumo 24:15 a gu hi embeya gu khuye gu na manega “guwuga ga vale va fudego, va nya gululama ni va nya sighoho.” Va nya gululama khu vale va fudego na va gu engisa Nungungulu, khu kharato malina yawe ma lovidwe umo nya libhuku nya womi. (Mal. 3:16) Va nya mba lulama khu vale va fudego nya mba hevbula khu Jehovha, khu kharato malina yawe kha ma lowa umo nya libhuku nya womi.

Johane 5:28, 29 a gu ganeya khu mitsawa yayimweyo yi khumbugwago umo ga Mithumo 24:15. Jesu a di ganeya gu khuye “ava va na bani va na giride mithumo nya yadi” va na “wuga vaya guvbanyani, gasi vale va na gu bani va giride guvivba va na wuga vaya [gu lamudwatunu].” Va nya gu lulama va ngafa na va gu giride silo nya sadi va na wuga va vbanya, kholu malina yawe ma na ba ma lovidwe umo nya libhuku nya womi. Ambari ulolo, va nya mba lulama va ngafa na va giride silo nyo vivbe va na wuga va hongola gu lamudwatunu. Avo malina yawe ma na ba mari mwalo umo nya libhuku nya womi, nigu avo va na lamudwa khu tepo nyo khaguri mwendro gu woneledwa. Ndrani nya tepo yeyi, avo va na ningwa lithomo nya gu hevbule khu Jehovha ni gu malina yawe ma lowa umo nya libhuku nya womi.

Gutuledwa 20:12, 13 a gu tshamuseya gu khuye vatshavbo va na wuswago va na ba va yede gu engisa esi si na ba si lovidwe umo nya “mabhuku” a gu milayo nya yiphya Nungungulu a na hi ningago mafuni nya maphya. Jehovha a na fuvisa vale nya gu kha va na nga engisa. — Isa. 65:20.

Dhaniyeli 12:2 ganede gu khuye vale va ladego gufani va na wugela “guvbanyani nya gupindruge, vambe va wugela guya dzitshonini, gusanisekani nyamba vbela.” Livhesi leli, la gu ganeya khu gu lamudwa nya gu hegise ga ava va na wuswago khu gufani, avo va na hakha ‘womi nya gupindruge’ mwendro “gusanisekani nyamba vbela.” Khu kharato, guvbeyani nya 1000 myaga vambe va na hakha womi nya gupindruge ni vambe va na fuviswa kala gupindruga. — Gutu. 20:15; 21:3, 4.

Nga wona gipimaniso nyo khaguri. Mitsawa mivili yi na wuswago, yi nga fananiswa ni valuveli va vbwetago gu vbanya ga limbe litigo. Avo nya gu lulame va gu fana ni muthu a hakhago lidangaliya (visto) nya thumo mwendro nya gu dzumeledwe gu vbanya ga litigo nyo khaguri, eli li mu ningago lithomo nya gu tidwe ni gu tshulega. Ganiolu, avo nya mba lulama va gu fana ni valuveli avo adzina va hakhago lidangaliya (visto) nyo vbanye ga litigo nyo khaguri khu gitepwana. Valuveli vava si na lomba va yeyedza khu mithumo na va si dzumeledwe gu vbanya ga litigo lile nya liphya. Khu ndziya nyo fane, ava nya mba lulama va na wuswago si na lomba gu va engisa milayo ya Jehovha va bwe va yeyedza khu mavbanyelo gasi va simama gu vbanya paredhesini. Nigu ni levbini lidangaliya eli valuveli va na li hakhago gupheyani gasi gu beya ga limbe litigo, vambe adzina va nga dzumeledwa gu khala ga litigo lolo ni gu vambe adzina va nga tutumiswa. Esi si na hungwa na si gu seketedwa avbo nya mavbanyelo yawe ni mithumo yawe omu nya litigo lile nya liphya. Khu ndziya nyo fane, gu lamudwa nyo hegise ga vatshavbo vale va na wuswago gu na dzi seketeya avba nya gu tumbege gwawo ni mavbanyelo yawe mafuni nya maphya.

Jehovha khandri Nungungulu nya lihaladzo basi, ganiolu uye gambe Nungungulu nya gu lulame. (Dhet. 32:4; Ndzi. 33:5) Uye a na yeyedza lihaladzo laye khu gu wusa vatshavbo ava nya gu lulame ni ava nya sighoho. Ganiolu, uye a gu vireya gu khuye vatshavbo va engisa milayo yaye yi ganeyago khu silo nya sadi ni esi nya gu vivbe. Vale basi va mu haladzago ni gu engisa milayo yaye va na simama gu vbanya mafuni nya maphya.