Wona lezvi a Bhibhiliya gi hlamulisako zvona a ciwutiso leci.

Mitiro 24:15 i hi byela lezvaku ku tava ni “kuvhuka ka lava vo lulama ni lava vo kala ku lulama”. Lava vo lulama hi lava va nga ingisa Nungungulu a cikhati leci va nga ha hanya. Hikwalaho, a mavito yabye ma tsalilwe bhukwini ga wutomi. (Mala. 3:16) Lava vo kala ku lulama va patsa lava va fileko na va nga vangi ni cikhati ca ku enela ca ku gondza xungetano hi Jehovha. Hikwalaho, a mavito yabye a ma tsaliwangi bhukwini ga wutomi.

Johani 5:28, 29 i wulawula hi mitlawa ya leyi ya yimbiri yi kumbukiwako ka Mitiro 24:15. Jesu i wulile lezvaku “lava va mahileko a zvilo zva zvi nene va [ta] vhuka vaya wutomini ni lava va mahileko a zvilo zva kubiha va [ta] vhuka vaya kulamulweni”. Lava vo lulama va mahile zvilo zva zvinene a cikhati leci va nga ha hanya. Va ta vhuka vaya wutomini hakuva a mavito yabye ma tsalilwe bhukwini ga wutomi. Hambulezvo, lava vo kala ku lulama va mahile zvilo zva kubiha a cikhati leci va nga ha hanya. Va ta vhuka vaya kulamulweni. A mavito yabye a ma tsaliwangi bhukwini ga wutomi. Hikwalaho, va ta lamuliwa kutani ku va tava ni cikhati ca ku hloliwa. Ndzeni ka cikhati leco, va tava ni thomo ga ku gondza xungetano hi Jehovha ni ku tlhela a mavito yabye ma tsaliwa bhukwini ga wutomi.

Kuvhululelwa 20:12, 13 i tlhamusela lezvaku vontlhe lava va to vhuxiwa zvi ta lava ku va ingisa “lezvi zvi tsalilweko mabhukwini”, ku nga milayo yiswa leyi Nungungulu a to hi nyika misaveni yiswa. Lava va to kala ku ingisa va ta lovisiwa. — Isa. 65:20.

Danieli 12:2 i phrofetile lezvaku a vokari va lava va fileko va ta vhuka vaya ‘wutomini ga pindzukelwa, kasike a van’wani va ta vhuka vaya tinganeni ni hlokiselelweni wu nga gumelwiko’. A vhesi legi gi wulawula hi lezvi zvi to va humelela hi magumo andzhako ka loku va vhuxilwe — ku kuma ‘wutomini ga pindzukelwa’ kutani ‘hlokiselelo wu nga gumelwiko’. Hikwalaho, kumbheleni ka 1000 wa malembe, a vokari va ta kuma wutomini ga pindzukelwa, a van’wani va lovisiwa kala kupindzuka. — Kuv. 20:15; 21:3, 4.

A ciyimo ca mitlawa leyi ya yimbiri ci nga fananisiwa ni ca vanhu va lavako ku ya tshama ka tiko gin’wani. Lava vo lulama va fana ni lava va kumako a visto ya ntiro kutani visto ya kuva muhanyi wa tiko lego, lezvi zvi mahako ku vava ni kutlhatlheka ni tifanelo to tala ni ku ti buza hi zvilo zvo fana ni lezvi zva venyi va tiko lego. Kanilezvi, lava vo kala ku lulama va fana ni lava va nga kumako a visto ya cikhatanyana, kutani ya ku va endza vaya ka tiko lego. A vanhu lavo na va nga se vhumelelwa ku va simama ku hanya ka tiko lego ga giswa, zvi ta lava ku va ranga hi ku komba lezvaku va ingisa milayo ya tiko lego ke. Hi kufanana, a vangalulamangiko lava va to vhuxiwa zvi ta lava ku va ingisa milayo ya Jehovha va tlhela va komba lezvaku vanhu vo lulama kasi va simama ku hanya paradhesini. Kani i visto muni va nga nyikiwa kasi va nghena ka tiko lego, a vokari va nga gumesa va kuma a visto ya wusumbulwa, kanilezvi a van’wani va nga hlongoliwa. A ciboho co gumesa ci seketelwa ka mahanyela yabye tikweni lego ga giswa. Hi ndlela yo fana, a kulamulwa ko gumesa ka vontlhe lava va to vhuxiwa ku ta seketelwa ka kukholwa kabye ni mahanyela yabye misaveni yiswa.

Jehovha a hi Nungungulu wa lirandzo basi, kanilezvi i Nungungulu wa kululama kambe. (Deut. 32:4; Lis. 33:5) I ta kombisa a lirandzo lakwe hi ku vhuxa lava vo lulama ni lava vo kala kululama. Kanilezvi i ta lava ku vontlhe va ingisa milayo yakwe yo tlakuka ya zvazvinene ni zvakubiha. Ntsena lava va to randza Jehovha va tlhela va hanya hi milayo yakwe hi vona va to vhumelelwa ku simama va hanya misaveni yiswa.