A hi voneni nhlamulu ya Bibele.

Mintirho 24:15 yi vula swaku “lava ku lulama ni lava kalaka va nga lulamanga va ta pfuxiwa.” Lava ku lulama hi lava a va tshembekile ka Yehovha na va nga se fa, funtshi mavito ya vona ma tsaliwile ka buku la wutomi. (Mal. 3:16) Lava ku kala va nga lulamanga va patsa vanhu lava nga fa na va nga djondzanga hi Yehovha funtshi mavito ya vona a ma tsaliwanga ka buku la wutomi.

Lava ku vulavuliwaka hi vona ka Yohane 5:28, 29, va fana ni lava ku vulavuliwaka hi vona ka Mintirho 24:15. Yesu a vule swaku “lava nga yentxa swa swinene va ta kuma wutomi, kambe lava a va yentxa swa ku biha va ta pfukela ku yavanyisiwa.” Lava ku lulama va yentxe minchumu ya yinene na va nge se fa. Se, va ta pfuxiwa swaku va kuma wutomi, hikusa mavito ya vona ma ha li kona ka buku la wutomi. Kambe lava ku kala va nga lulamanga va yentxe minchumu ya ku biha na va nge se fa. Se, va ta pfuxiwa swaku va yavanyisiwa naswona mavito ya vona a ma tsaliwanga ka buku la wutomi. Naswona, va ta nyikiwa nkama wa ku yavanyisiwa kumbe ku kambeliwa ku vona swaku va faneleka kuva va tsaliwa ka buku la wutomi. Ka nkama wolowo, va ta djondza hi Yehovha naswona loko va yingisa, mavito ya vona ma ta tsaliwa ka buku ya wutomi.

Buku la Nhlawutelo 20:12, 13 li vula swaku hinkwavu lava nga ta pfuxiwa va fanele va yingisa “leswi nga tsaliwa ka mabuku”, ku nga minawu leyi Xikwembu xi nga ta hi nyika yona ka misava ya nyuwani. Se, lava nga ta kala va nga yi yingisi va ta helisiwa.  — Esa. 65:20.

Daniyele 12:2 yi profete leswaku “van’wana va ta pfukela ku kuma wutomi la ku kala li nga heli kasi lava van’wana va ta pfukela ku voneliwa hansi ni ku nyenyiwa hi masiku ni masiku.” Ndzimana leyi, yi vulavula hi leswi nga ta gama swi yentxeka hi lava nga ta va na va pfuxiwile. Van’wana va ta kuma “wutomi la ku kala li nga heli” kasi van’wani va ta “nyenyiwa hi masiku ni masiku.” Leswi swi vula swaku loko se ku hele 1.000 wa malembe van’wani va ta kuma wutomi la ku kala li nga heli, kasi van’wani va ta helisiwa swa wugamu.  — Nhla. 20:15; 21:3, 4.

Pimisa hi xikombiso lexi. Mintlawa leyi yimbirhi, leyi nga ta pfuxiwa yi nga fanisiwa ni vanhu lava lavaka ku ya tshama ka tiko lin’wani. Lava ku lulama va nga fanisiwa ni lava pfumeleliwaka ku tshama va tlhela va tirha na va chunsekile ka tiko leli va nga ka lona, kasi lava ku kala va nga lulamanga vo pfumeleliwa ku tshama swa nkamanyana. Leswaku va pfumeleliwa ku tama va tshama tikweni, swi lava va kombisa swaku va faneleka. Hilani ku fanaka, lava ku kala va nga lulamanga lava nga ta pfuxiwa, swi ta lava va djondza minawu ya Yehovha va tlhela va yi yingisa swaku va tama va tshama ka misava ya nyuwani. Kambe, ku nga na mhaka swaku vanhu lava, nkama lowu va nga fika va pfumeleliwe ku tshama nkama muni kumbe ku yentxa yini ka tiko lolelo, hi ku famba ka nkama, van’wana va nga ha pfumeleliwa ku lumba tiko lolelo kumbe va nga ha hlongoliwa. Swi ta ya hi mahanyelo ya vona ka tiko leli se va nga ka lona. Hilani ku fanaka, loko se ku hele 1.000 wa malembe, swaku lava nga ta pfuxiwa va kuma wutomi la ku kala li nga heli swi ta ya hi kuva va kombise lipfumelo ndzeni ka 1.000 wa malembe.

Yehovha a ngo va Xikwembu xa lirhandzu ntsena, kambe a tlhela a kombisa wululami. (Det. 32:4; Pis. 33:5) A ta kombisa lirhandzu lolelo hi ku pfuxa va ku lulama ni va ku kala va nga lulamanga. Naswona, a ta lava swaku hinkwavu va yingisa minawu ya yena. Kova lava nga ta mu rhandza va tlhela va yingisa minawu ya yena ntsena, lava nga ta pfumeleliwa ku hanya hi masiku ni masiku.