Wonani umo Baibolo likuzgolera mafumbo agha.

Lemba la Milimo 24:15 likutiphalira kuti kuzamuŵa “chiwuka cha ŵarunji na ŵambura urunji.” Ŵarunji ni ŵanthu awo ŵakapulikiranga Chiuta pambere ŵandafwe, ndipo mazina ghawo ghali kulembeka mu buku la umoyo. (Mal. 3:16) Ŵambura urunji ŵakusazgapo ŵanthu awo ŵali kufwa kweni ŵakaŵavya mwaŵi wakukwana wakuti ŵasambire za Yehova. Ŵanthu aŵa mazina ghawo ghandalembeke mu buku la umoyo.

Lemba la Yohane 5:28, 29 likuyowoyaso za magulu ghaŵiri agha, agho ghakuzunulikaso pa lemba la Milimo 24:15. Yesu wakati “awo ŵakachitanga vinthu viwemi ŵazamuwukira ku umoyo, awo ŵakachitanga vinthu viheni ŵazamuwukira ku cheruzgo.” Ŵarunji ŵakachitanga vinthu viwemi pambere ŵandafwe. Ŵazamuwukira ku umoyo chifukwa mazina ghawo ghachali mu buku la umoyo. Ndipouli, ŵambura urunji ŵakachitanga vinthu viheni pambere ŵandafwe, ndipo ŵazamuwukira ku cheruzgo. Mazina ghawo ghachali ghandalembeke mu buku la umoyo, ndipo ŵazamupika nyengo yakuti ŵeruzgike, panji kuti nyengo yakuti ŵaŵawonerepo umo ŵachitirenge vinthu. Panyengo iyi, ŵazamuŵa na mwaŵi wakuti ŵasambire za Yehova kweniso kuti mazina ghawo ghalembeke mu buku la umoyo.

Lemba la Chivumbuzi 20:12, 13 likulongosora kuti wose awo ŵazamuwuskika ŵakwenera kuzakapulikira ivyo vili ‘kulembeka mu mipukutu,’ agho ni malango ghaphya agho Chiuta wazamupeleka mu charu chiphya. Awo ŵazamuleka kupulikira, ŵazamuparanyika.—Yes. 65:20.

Lemba la Daniyeli 12:2 likayowoyerathu kuti ŵanyake mwa awo ŵakugona mu tulo twa nyifwa ŵazamuwukira ku “umoyo wamuyirayira ndipo ŵanyake ŵazamulengeskeka na kuyuyulika kwamuyirayira.” Vesi ili likuyowoya za cheruzgo chaumaliro cha awo ŵazamuwuskika. Ŵazamupokera “umoyo wamuyirayira” panji “kuyuyulika kwamuyirayira.” Ntheura paumaliro wa vyaka 1,000, ŵanyake ŵazamupokera umoyo wamuyirayira ndipo ŵanyake ŵazamuparanyika kwamuyirayira.—Chivu. 20:15; 21:3, 4.

Ghanaghanirani chiyelezgero ichi. Magulu ghaŵiri gha ŵanthu awo ŵazamuwuskika tingaghayaniska na magulu ghaŵiri gha ŵanthu awo ŵakukhumba kukakhala mu charu chinyake. Ŵarunji ŵali nga ni ŵanthu awo ŵaŵapa chikalata chakuzomerezgeka chakuti ŵakagwilire ntchito mu charu chinyake panji ŵakakhale mu charu chinyake mwawanangwa kwanyengo yitali. Apo ŵambura urunji ŵali nga ni ŵanthu awo ŵakukhumba kuti ŵalute ku charu chinyake kweni ŵaŵapa chikalata chakuzomerezgeka chakuti ŵakakhaleko nyengo yichoko waka. Ŵalendo ŵanthena, ivyo iwo ŵachitenge ndivyo vingapangiska kuti ŵazomerezgeke kulutilira kukhala mu charu chinyake panji yayi. Mwakuyana waka, ŵanthu ŵambura urunji awo ŵazamuwuskika ŵakwenera kuzakapulikira malango gha Yehova na kuzgoka ŵarunji kuti ŵazakalutilire kukhala mu Paradiso. Ndipo kwali ŵalendo awo ŵanjira mu charu ŵaŵapa vikalata vyakuzomerezgeka vyakuti ŵakhale nyengo yitali panji yifupi, kweni para nyengo yajumphapo ŵanyake ŵangaŵapa wenekaya, apo ŵanyake ŵangaŵawezga. Vyose vikuthemba pa nkharo yawo kweniso umo ŵachitiranga vinthu panyengo iyo ŵakhaliranga mu charu chaŵene. Ndimoso viliri na wose awo ŵazamuwuskika, ŵazamweruzgika kuyana na chipulikano chawo kweniso ivyo ŵazamuchita mu charu chiphya.

Yehova ni Chiuta wachitemwa pera yayi kweniso ni Chiuta waurunji. (Doto. 32:4; Sal. 33:5) Wazamulongora chitemwa chake mwakuwuska ŵarunji na ŵambura urunji wuwo. Ndipouli, ŵanthu wose ŵazamukhumbikwira kupulikira malango ghake pa nkhani ya icho ntchiwemi na chiheni. Ŵekha awo ŵazamumutemwa Yehova, na kulondezga malango ghake ndiwo ŵazamuŵa ŵakwenelera kulutilira kukhala mu charu chiphya.