Teie te pahonoraa a te Bibilia.

Ia au i te Ohipa 24:15, “e tia-faahou-raa to te feia parau-tia e to te feia parau-tia ore.” Te feia parau-tia, o te feia ïa tei tavini i te Atua hou a pohe ai. Tei roto to ratou iˈoa i te buka o te ora. (Mal. 3:16) Te feia parau-tia ore, o te feia ïa tei pohe ma te ore e ite o vai Iehova e aita to ratou iˈoa i papaihia i roto i te buka o te ora.

I roto i te Ioane 5:28, 29, e faahitihia na pǔpǔ e piti o te Ohipa 24:15. Ua parau Iesu no nia i te feia tei rave i te mea maitai, e tia mai ratou no te ora, e no nia i te feia i rave noa i te mea ino, e tia mai ïa ratou no te haavaraa. Ua rave te feia parau-tia i te mea maitai hou a pohe ai. E tia mai ratou no te ora no te mea tei roto to ratou iˈoa i te buka o te ora. Area te feia parau-tia ore, ua rave ratou i te mea ino hou a pohe ai e e tia mai ratou no te haavaraa. Aita to ratou iˈoa i papaihia ˈtura i roto i te buka o te ora. E haavahia ratou, te auraa, e hiˈopoahia to ratou haerea. I roto i tera area taime, e haapii ratou no nia ia Iehova ia nehenehe to ratou iˈoa e tapaohia i roto i te buka o te ora.

Ia au i te Apokalupo 20:12, 13, mea tia ia haapao te feia atoa tei faatiahia mai “i tei papaihia i roto i te mau otaro,” oia hoi te mau ture apî ta te Atua e horoa i roto i te ao apî. Area te feia faaroo ore, e haamouhia ïa ratou.​—Isa. 65:20.

Ua tohu te Daniela 12:2 e e ara mai vetahi “no te ora mure ore e vetahi atu no te haama e te vahavaha mure ore.” Te faahiti ra teie irava i te haavaraa hopea o te feia o te faatiahia mai. E fanaˈo ratou i “te ora mure ore” aore ra “te vahavaha mure ore.” I te hopea o na tausani matahiti, e fanaˈo vetahi i te ora mure ore area vetahi e haamouhia ratou.​—Apo. 20:15; 21:3, 4.

Teie te tahi hiˈoraa. E nehenehe na piti pǔpǔ tei faatiahia mai e faaauhia i te feia e hinaaro ra e ora i te tahi atu fenua. E au te feia parau-tia i te feia e parau faatia ta ratou no te ohipa aore ra no te ora i tera fenua. No te feia parau-tia ore râ, e au ratou i te feia ua horoahia ta ratou parau faatia, no te hoê taime poto, e titauhia râ ia ratou ia faaite e te hinaaro mau ra ratou e ora i tera fenua. Hoê â huru no te feia parau-tia ore tei faatiahia mai, e titauhia ia ratou ia haapao i te mau ture a Iehova e ia faaite i te hoê haerea afaro no te ora i roto i te Paradaiso. Noa ˈtu eaha te parau faatia i noaa mai ia ratou no te haere i te tahi atu fenua, e nehenehe vetahi e riro ei mero huiraatira o tera fenua area vetahi e anihia ratou ia hoˈi i to ratou fenua. E faaotihia te reira ia au i te huru e haerea ta ratou e faaite a ora ˈi i tera fenua. Hoê â huru no te feia e faatiahia mai, e haavahia ratou ia au i to ratou taiva ore e to ratou haerea i roto i te ao apî.

E Atua here Iehova, mea parau-tia e mea afaro o ˈna. (Deut. 32:4; Sal. 33:5) E faaite Iehova i to ˈna here ma te faatia mai i te feia parau-tia e te feia parau-tia ore. E titau o ˈna ia faatura ratou i ta ˈna mau ture aveia tia roa. O te feia anaˈe e here ra ia ˈna e e haapao ra i ta ˈna mau ture aveia te nehenehe e ora e a muri noa ˈtu i roto i te ao apî.