Jkʼeltik kʼusi chal li Vivliae.

Li Echos 24:15 chal «ti chchaʼkuxiik li buchʼutik tukʼike xchiʼuk li buchʼutik muʼyuk tukʼike». Li buchʼutik tukʼike jaʼ skʼoplalik li buchʼutik chchʼunbeik xa onoʼox smantal Dios kʼalal muʼyuk toʼox chamemike, jaʼ yuʼun te tsʼibabil sbiik li ta slivroal kuxlejale (Mal. 3:16). Li buchʼutik muʼyuk laj yojtikinik Jeova kʼalal skʼan toʼox xchamike te kapal skʼoplalik li ta jtsop krixchanoetik ti muʼyuk tukʼike, jaʼ yuʼun muʼyuk te tsʼibabil sbiik li ta slivroal kuxlejale.

Li Juan 5:28 xchiʼuk 29 te chalbe skʼoplal li xchaʼchopal krixchanoetik chal ta Echos 24:15. Li Jesuse xi laj yale: «Chchaʼkuxiik sventa kuxlejal li buchʼutik lek kʼusitik la spasike xchiʼuk chchaʼkuxiik sventa chapanel li buchʼutik toj chopol kʼusitik la spasike». Li buchʼutik tukʼike lek kʼusitik la spasik kʼalal skʼan toʼox xchamike. Jaʼ yuʼun, chchaʼkuxiik sventa kuxlejal, yuʼun te tsʼibabil sbiik li ta slivroal kuxlejale. Yan li buchʼutik muʼyuk tukʼike jaʼ la spasik li kʼusitik chopol kʼalal muʼyuk toʼox chamemike, vaʼun ta xichʼik chaʼkuxesel sventa chapanel. Li sbiike muʼyuk to te tsʼibabil li ta slivroal kuxlejale xchiʼuk chichʼik chapanel, jaʼ xkaltik, chichʼ kʼelel ti kʼu yelan stalelalike. Ti vaʼ sjalile, ta x-akʼbat yojtikinik li Jeovae xchiʼuk xuʼ xichʼ tsʼibabel sbiik li ta slivroal kuxlejale.

Li Apokalipsis 20:12 xchiʼuk 13 chal ti skotol li buchʼutik chchaʼkuxiike skʼan xchʼunik li kʼusitik «te tsʼibabil ta balbalvunetike», jaʼ xkaltik, li achʼ mantaletik chkichʼtik akʼbel ta achʼ balumile. Li buchʼutik mu xchʼunike ta xichʼ chʼaybel skʼoplalik (Is. 65:20).

Li Daniel 12:2 chal ti buchʼutik chamemike oy chchaʼkuxiik tal «sventa xkuxiik sbatel osil, yantike jaʼ sventa xichʼik kʼexlaltasel xchiʼuk pʼajel sbatel osil». Li versikulo liʼe chal kʼusi tstaik mi laj xa ox yichʼik chaʼkuxesele: kuxlejal sbatel osil o pʼajel sbatel osil. Jaʼ yuʼun, mi tsuts li Jmil Jabile, junantike chkuxiik sbatel osil, pe li yantike chichʼik lajesel sbatel osil (Apok. 20:15; 21:3, 4).

Li chaʼchop buchʼutik chchaʼkuxiike xuʼ jkoʼoltastik ta krixchanoetik ti tskʼan chbat nakiikuk ta yan lume. Li buchʼutik tukʼike xkoʼolajik ta krixchanoetik ti ch-akʼbat svisaik sventa abtelal o sventa te xnakiik li ta lum bu chkʼotike. Ta skoj li svisa ch-akʼbatike, xuʼ x-abtejik xchiʼuk oy kʼusitik xuʼ spasik li ta lum bu chkʼotike. Yan li buchʼutik muʼyuk tukʼike xkoʼolajik ta krixchanoetik ti ch-akʼbat svisaik sventa oy noʼox kʼuk sjalil te oyik li ta lum bu chkʼotike o ta vulaʼal noʼox. Sventa x-akʼbatik permiso ti teuk to xnakiik ta lume, skʼan xakʼik ta ilel ti chchʼunik li mantaletik ch-akʼbatike. Jaʼ noʼox jech ek, sventa te xkomik ta naklej ta Paraiso li buchʼutik muʼyuk tukʼike, skʼan xchʼunbeik li smantaltak Jeovae xchiʼuk ti xakʼik ta ilel ti lek kʼusi tspasike. Mu ventauk kʼusi visail ch-akʼbatik li buchʼutik chbatik ta yan lume, ta tsʼakale oy jlom ch-akʼbat lek svunalik sventa te xkom nakiikuk, pe li yane ta sutesat ta slumalik. Li kʼusi tstsakik ta ventae jaʼ ti kʼu yelan la xchʼunik mantal li ta lum bu kʼotike. Jaʼ noʼox jech ek, li kʼusi chichʼ tsakel ta venta ta stojolal li buchʼutik chchaʼkuxiike jaʼ li kʼusi tspasik li ta achʼ balumile xchiʼuk mi tukʼ chakʼ sbaike.

Li Jeovae maʼuk noʼox jun Dios ti oy xkʼuxul yoʼontone, yuʼun melel kʼusi chal xchiʼuk tukʼ yoʼonton (Deut. 32:4; Sal. 33:5). Li Jeovae chakʼ ta ilel kʼanelal kʼalal chchaʼkuxes li krixchanoetik ti tukʼik xchiʼuk ti muʼyuk tukʼike. Pe oy ta yoʼonton xtok ti xchʼunik li mantaletik ta sventa li kʼusi lek chil xchiʼuk li kʼusi muʼyuk lek chile. Jaʼ noʼox li buchʼutik tskʼanik Jeova xchiʼuk ti chchʼunbeik smantaltake chkuxiik-o li ta achʼ balumile.