Ойдолэ тодомы, кыӵе валэктон сётэ Библия та юанъёслы.

Апостолъёслэн ужъёсазы 24:15 вераське, «шонер улэмъёс но, шонер улымтэос но» улӟытэмын луозы шуыса. Шонер улэмъёс — со адямиос, кудъёсыз кулэмзылэсь азьло Инмарлэсь кылзӥськыса улӥзы. Соин ик соослэн нимъёссы буре ваён книгае гожтэмын (Мал. 3:16). Нош шонер улымтэос — со адямиос, кудъёсыз кулэмзылэсь азьло кыӵе ке мугъёсын сэрен Иеговаез тодыны ӧз быгатэ. Соин ик соослэн нимъёссы буре ваён книгаын ӧвӧл.

Иоаннлэсь 5:28, 29 вераське со ик адямиос сярысь, кудъёсыз сярысь вераськиз Апостолъёслэн ужъёсазы 24:15. Иисус вераз: «Ӟеч уж лэсьтӥсьёс быронтэм улонэ пырыны улӟозы, нош урод уж лэсьтӥсьёс янгыше сюронлы улӟозы». Шонер улэмъёс кулэмзылэсь азьло ӟеч ужъёс лэсьтӥзы. Соос улӟозы, быронтэм улон басьтон понна, малы ке шуоно соослэн нимъёссы буре ваён книгаын гожтэмын луозы на. Нош шонер улымтэос кулэмзылэсь азьло урод ужъёс лэсьтӥзы. Соос улӟозы, янгыше сюрон понна, яке суд улэ сюрон понна. Соослэн нимъёссы буре ваён книгаын ӧвӧл на. Соин ик инмысь судьяос сак чаклалозы, кызьы соос асьсэды возё. Шонер улымтэослэн но нимъёссы буре ваён книгае гожтэмын мед луозы шуыса, соос Иегова сярысь тодон валан басьтыны быгатозы.

Усьтӥськонын 20:12, 13 верамъя, вань улӟытэм адямиослы кылзӥськоно луоз солэсь, мар гожтэмын книгаосын. Мукет сямен вераса, соослы быдэсъяно луоз выль законъёсты, кудъёссэ Инмар выль дуннеын сётоз. Соосты, кинъёс та законъёслэсь уз кылзӥське, Иегова быдтоз (Ис. 65:20).

Данииллэн 12:2 азьло ик гожтэмын вал, «тросэз сайкалозы» шуыса: «одӥгъёсыз пумтэм вапумъёс ӵоже улон понна, мукетъёсыз — пумтэм вапумъёс ӵоже возьытэ вуон... понна». Та кылбурын вераське, мар возьма улӟытэм адямиосты: яке «пумтэм вапумъёс ӵоже улон», яке «пумтэм вапумъёс ӵоже возьытэ вуон». Мукет сямен вераса, 1 000 ар йылпумъяськем бере кинлы ке быронтэм улон сётэмын луоз, нош кин ке пыраклы быдтэмын луоз (Усьт. 20:15; 21:3, 4).

Эскеромы таӵе примерез. Улӟытэм адямиосты ӵошатыны луэ адямиосын, кудъёсыз мукет шаере кошкыса улыны малпало. Шонер улэмъёс кельшо адямиослы, кудъёсызлы кемалы виза сётӥзы. Соос быгато мукет шаерын ужаны, озьы ик соослэн мукет правооссы но вань. Нош шонер улымтэос кельшо адямиослы, кудъёсызлы огдырлы гинэ виза сётӥзы. Мукет шаерын кемагес улон понна, соос со шаерысь кивалтӥсьёслэсь кылзӥськыны кулэ. Ӵапак озьы ик улӟытэм шонер улымтэослы но, райын улон понна, Иеговалэн законъёсызлэсь кылзӥськоно но шонер ужъёс лэсьтоно луоз. Кыӵе гинэ виза адямилы сётэмын медам луы, со кивалтӥсьёслэсь кылзӥськиз ке, солы лэзёзы со шаерын улыны, нош ӧз кылзӥськы ке, сое шаерысь уллялозы. Озьы ик шонер улэмъёс но, шонер улымтэос но, выль дуннеын Инмарлы оскымон луизы но шонер ужъёс лэсьтӥзы ке, райын улыны быгатозы.

Иегова — гажась-жалясь но шонерлыко Инмар (К. Зак. 32:4; Пс. 32:5). Яратэменыз со шонер улэмъёсты но, шонер улымтэосты но улӟытоз. Но со дыре ик ваньмызлы Иегова одӥг кадь курон-косонъёс пуктэ. Соос гинэ, кинъёс Иеговаез яратозы но солэсь кылзӥськыса улозы, пырак дауръёс ӵоже выль дуннеын улыны быгатозы.