Kũlĩhĩsa ndomo Embimbiliya li tambulula apulilo a-a.

Ovilinga 24:15 li tu sapuila okuti ku laika oku kala “epinduko lia vakuesunga lava havakuesungako.” Vakuesunga omanu vana okuti, osimbu ka va file, va enda oku pokola ku Suku kuenje olonduko viavo via sonehiwa velivulu liomuenyo. (Mal. 3:16) Omanu vana havakuesungako, mua kongela vana okuti eci va fa ka va kuatele epuluvi lioku lilongisa catiamẽla ku Yehova kuenje olonduko viavo ka via sonehiwile velivulu liomuenyo.

Ovimunga vivali via tukuiwa ku Yoano 5:28, 29 vimuamue levi via tukuiwa kelivulu Liovilinga 24:15. Yesu wa lombolola okuti: “Vana va linga ovina viwa” va tundila “epinduko liomuenyo, vana va linga ovina vĩvi, va tundila epinduko liesombiso. Vakuesunga, va linga ovina viwa osimbu ka va file. Ovo va ka pindukila oku kala lomuenyo omo okuti, olonduko viavo handi via sonehiwa velivulu liomuenyo. Pole, vana havakuesungako osimbu ka va file, va lingaile ovina vĩvi. Ovo va ka pindukila esombiso. Olonduko viavo handi ka via sonehiwile velivulu liomuenyo, handi va ka pita vesombiso. Vokuenda kuotembo yaco, ovo va ka kuata epuluvi lioku lilongisa catiamẽla ku Yehova kuenje olonduko viavo vi ka sonehiwa velivulu liomuenyo.

Esituluilo 20:12, 13 li lombolola okuti vosi vana va ka pinduiwa va ka sukila oku pokola ‘kovina via sonehiwa voviña,’ okuti ovihandeleko viokaliye Suku a ka tu ĩha voluali luokaliye. Vana ka va ka pokola, Yehova o ka va kundula.—Isa. 65:20.

Ku Daniele 12:2 ku popia okuti vamue pokati ka vana va pekela kolofa va ka pindukila “omuenyo ko pui kuenda vakuavo va ka tambula esepu ka li pui.” Ocinimbu eci ci lombolola onima ya sulako ya vana va ka pinduiwa okuti “omuenyo ko pui” ale “esepu ka li pui.” Kesulilo 1.000 yanyamo, vamue va ka tambula omuenyo ko pui kuenda vakuavo va ka kunduiwa otembo ka yi pui.—Esit. 20:15; 21:3, 4.

Konomuisa ocindekaise eci. Oku pinduiwa kuovimunga vivali ku sokisiwa lovingendeleyi vimue vi yongola oku kala vofeka yikuavo. Vakuesunga va sokisiwa la vana va tambula ocicapa cimue ci va ecelela oku talavaya, ale ci va ecelela oku kala olonungi via kũlĩhĩwa haivio vi kuete elianjo. Ca litepa lava havakuesungako ceci okuti ovo va sokisiwa lovingendeleyi vina vi tambula ocicapa coku kala otembo yitito vofeka, ale coku kala ukombe. Ovingendeleyi viaco, vi sukila oku lekisa uvangi umue u va ecelela oku taviwa oku kala vofeka yikuavo. Cimuamue haico okuti, vana havakuesungako va ka pinduka, va ka sukila oku pokola kovihandeleko via Yehova loku lekisa okuti vakuesunga, oco vamameko oku kala Voluali Luokaliye. Ovingendeleyi vialua poku iñila vofeka yimue citava okuti vimue vi tambula ocicapa coku kala onungi, pole, vikuavo sio. Onjila yi nõliwa yi tamba kekalo kuenda kocituwa omunu a lekisa vofeka yikuavo a kasi. Cimuamue haico okuti, kesombiso lia sulako liomanu vosi va ka pinduiwa, li ka tamba kekolelo kuenda kovituwa va ka lekisa voluali luokaliye.

Yehova o Sukuko yimue yocisola kuenda yesunga. (Esin. 32:4; Osa. 33:5) Eye o ka lekisa ocisola poku pindula vakuesunga kuenda vana havakuesungako. Pole, eye o lavoka okuti vosi va pokola kolonumbi viaye vieci ciwa leci cĩvi. Vana va sole Yehova loku kapako olonumbi viaye, ovo va ka eceliwa oku amamako oku kala voluali luokaliye.