Ṱhogomelani nḓila ine Bivhili ya fhindula ngayo dzenedzi mbudziso.

Mishumo 24:15 i amba uri hu ḓo ‘vuswa vho lugaho na vha songo lugaho.’ Vho lugaho ndi vhe vha vha vha tshi thetshelesa Mudzimu musi vha sa athu u lovha, zwa ita uri madzina avho a ṅwalwe kha bugu ya vhutshilo. (Maḽ. 3:16) Vha songo lugaho ndi vhe vha si wane tshibuli tsha u guda nga ha Yehova, zwa ita uri madzina avho a si ṅwalwe kha bugu ya vhutshilo.

Yohane 5:28, 29 i ambela kha zwigwada zwivhili zwo ambiwaho kha Mishumo 24:15. Yesu o ri: “Vhe vha ita zwivhuya vha ḓo vuswa uri vha tshile, vhe vha ita zwivhi vha ḓo vuswa uri vha haṱulwe.” Vho lugaho vho ita zwivhuya musi vha sa athu u lovha. Vha ḓo vuselwa uri vha tshile ngauri madzina avho a tshee o ṅwalwa kha bugu ya vhutshilo. Fhedzi vha songo lugaho vho ita zwivhi musi vha sa athu u lovha. Vhone vha ḓo vuswa uri vha haṱulwe. Madzina avho ho ngo ṅwalwa kha bugu ya vhutshilo nahone vha ḓo fhiwa tshifhinga tsha uri vha haṱulwe kana uri hu ṱoliwe nḓila ine vha ḓifara ngayo. Nga tshenetsho tshifhinga, vha ḓo vha na tshibuli tsha u guda nga ha Yehova na u ita uri madzina avho a ṅwalwe kha bugu ya vhutshilo.

Nzumbululo 20:12, 13 i amba uri vhathu vhoṱhe vho vuswaho vha ḓo tea u tevhedza “zwo ṅwaliwaho kha mipombo,” zwine zwa vha milayo miswa ine Mudzimu a ḓo ri ṋea yone shangoni ḽiswa. Vhane vha si thetshelese vha ḓo fheliswa.—Yes. 65:20.

Daniele 12:2 i amba uri vho faho vha ḓo vuselwa “u tshila tshoṱhe, ngeno vhaṅwe vha tshi ḓo vuselwa u shoniswa na u nyadziwa lwa tshoṱhe.” Yeneyi ndimana i khou amba nga ha musi vho vuswaho vha tshi haṱulwa lwa u fhedzisela. Vhaṅwe vha ḓo vuselwa “u tshila tshoṱhe,” ngeno vhaṅwe vha tshi ḓo vuselwa “u nyadziwa lwa tshoṱhe.” Zwenezwi zwi amba uri mafheloni a miṅwaha ya 1 000, vhaṅwe vha ḓo wana vhutshilo vhu sa fheli, ngeno vhaṅwe vha tshi ḓo fheliswa tshoṱhe.—Nzumb. 20:15; 21:3, 4.

Ṱhogomelani tsumbo i tevhelaho. Vhuimo ha zwigwada zwivhili zwa vhathu vho vuswaho vhu nga fanyiswa na ha vhathu vhane vha bva kha ḽiṅwe shango vhane vha ṱoḓa u dzula kha ḽiṅwe shango. Vho lugaho vha fana na muthu o ṋewaho thendelo ya u shuma kana ya u dzula kha ḽiṅwe shango. Vha songo lugaho vha fana na vhathu vhane vha bva kha ḽiṅwe shango vhe vha tou ṋewa thendelo ya tshifhinganyana kana ya u ḓa kha ḽeneḽo shango sa muthu o dalaho. Uri vhenevho vhathu vha tendelwe uri vha bvele phanḓa vha tshi dzula kha shango ḽiswa, vha tea u sumbedza nga nḓila ine vha tshila ngayo uri vha a fanelea u dzula kha ḽeneḽo shango. Nga hu fanaho, vhathu vha songo lugaho vho vuswaho vha ḓo tea u tevhedza milayo ya Yehova na u sumbedza nga nḓila ine vha tshila ngayo uri vha a fanelea u dzula Pharadisoni. Hu sa londwi uri vhathu vhane vha bva kha ḽiṅwe shango vho wana thendelo ifhio musi vha tshi swika kha ḽeneḽo shango, vhaṅwe vha nga fhedzisela vho tendelwa u vha vhadzulapo vha ḽeneḽo shango, ngeno vhaṅwe vha tshi nga humiselwa hune vha bva hone. Uri hu itea mini khavho zwi ya nga mavhonele avho na nḓila ine vha ḓifara ngayo shangoni ḽiswa. Nga hu fanaho, phetho ya uri vhoṱhe vho vuswaho vha a fanelea u dzula shangoni ḽiswa kana a vha fanelei, i ḓo ḓitika nga u fhulufhedzea havho na nḓila ine vha ḓifara ngayo shangoni ḽiswa.

Yehova ndi Mudzimu a re na lufuno na ane a haṱula nga nḓila yo teaho. (Dot. 32:4; Ps. 33:5) U ḓo sumbedza lufuno lwawe nga u vusa vho lugaho na vha songo lugaho. Fhedzi u ḓo lavhelela uri vha tshile nga nḓila ine a ṱoḓa vha tshi tshila ngayo. Vhane vha ḓo tendelwa u bvela phanḓa vha tshi tshila shangoni ḽawe ḽiswa ndi vhane vha tshila nga nḓila ine a ṱoḓa vha tshi tshila ngayo.