See how Bible answer this questions.

Acts 24:15 talk say: “Righteous people and people wey no dey righteous go come back to life.” The righteous na people wey obey God before they die, so God don write their name for the book of life. (Mal. 3:16) But people wey no dey righteous na people wey no really get the opportunity to learn about Jehovah, so their name no dey for the book of life.

John 5:28, 29 de talk about the same group of people wey Acts 24:15 talk about. Jesus talk say, ‘People wey don do good go resurrect get life, and people wey don do bad go resurrect face judgement.’ The righteous people do good things before they die. They go resurrect get life because their name don dey for the book of life. But the people wey no dey righteous do wicked things before they die. They go resurrect to face judgment, since their name never dey the book of life. For the time of that judgment, they go get the chance to show if they go obey God. And they go use that time learn about Jehovah, and if they obey Jehovah, their name go enter the book of life.

Revelation 20:12, 13 talk say all the people wey God go bring back to life must obey all the things wey “dey inside the scroll.” This one mean say they go obey all the law wey God go give for the new world. And Jehovah go destroy all the people wey no obey the law.​—Isa. 65:20.

Daniel 12:2 talk say some people wey don die go resurrect “get life wey no go end and some go suffer shame and disgrace forever.” This verse de talk about the final judgment wey people wey God go bring back to life go face. The people wey obey God go “get life wey no go end” and the people wey no obey God “go suffer shame and disgrace forever.” So for the end of the 1,000 years, some people wey God bring back to life go live forever, and God go destroy the rest forever.​—Rev. 20:15; 21:3, 4.

Think about this example. We fit compare the righteous people and people wey no dey righteous wey God go bring come back to life, to strangers wey want go live for another country. The people wey dey righteous be like the strangers wey get visa to fit work or stay for the new country. This visa go give them some freedom and make people know say they get right to stay and work for the country. But the people wey no dey righteous be like the ones wey receive visa to stay for small time for the country or to stay as visitors. So they must show say they be good people so that the government of the country go allow them continue to stay for there. Na so e still be with the people wey no dey righteous wey God go bring back to life. They must obey the laws wey Jehovah give and show say they don become righteous people, so that God go allow them to continue to live for Paradise. No matter the visa wey they get when they first enter the country, as time de go, the government go allow some to be citizen for the country, and they no go allow the rest continue to stay for their country. Na the things wey they do and how they behave go make the government make them citizen or send them go back to where they come from. Na so e still be, the final decision for all the people wey God go bring back to life go depend on their character and how they take dey faithful for the new world.

Jehovah no de only show pity, but e still de judge well. (Deut. 32:4; Ps. 33:5) Jehovah go show say e really love people as e go bring people wey dey righteous and people wey no dey righteous come back to life. But e go make sure say na only people wey obey-am go live forever. So na only people wey love and obey-am, e go allow to continue to live for the new world.