1. Малахия 3:16-ла болзо, Иегова кандый бичик бичип турган, ондо не бар?

 ИЕГОВА канча муҥ јылдардыҥ туркунына аҥылу бичик бичип јат. Бу бичикте улустыҥ аттары бичилген. Эҥ ле озо Иегованыҥ чындык керечизиниҥ — Авельдиҥ ады турат (Лука 11:50, 51) b. Ол ӧйдӧҥ ала Иегова бойыныҥ бичигине ӧскӧ дӧ улустыҥ аттарын бичийт. Бӱгӱнги кӱнде олордыҥ тоозы канча миллион. Оны Агару Бичик «эзем бичик», «јӱрӱмниҥ тӱрбеги» ле «јӱрӱмниҥ бичиги» деп адайт. Је бу јӧрмӧлдӧ бис оны «јӱрӱмниҥ бичиги» деп адаарыс. (Малахия 3:16 кычырыгар; Ачыл. 3:5; 17:8).

2. Јӱрӱмниҥ бичигинде кемдердиҥ ады-јолы бар, бистиҥ де ады-јолыс анда бичилип калзын деп нени эдер керек?

² Бу аҥылу бичикте Иегованаҥ айап турган ла оныҥ адын баалап турган улустыҥ ады-јолы бичилет. Бу улуста ӱргӱлјиге јӱретен арга бар. Јӱрӱмниҥ бичигине бистиҥ де ады-јолысты бичип салзын деп турган болзоос, нени эдер керек? Иисустыҥ толынты тайылгазы ажыра Иегова Кудайла колбуларды тыҥыдар керек (Иоанн 3:16, ЈТ, 36). Бис теҥериде де эмезе јерде де јӱретен ижемјилӱ болзоос, бистиҥ ончобыс ады-јолыс бу бичикте болзын деп кӱӱнзеп јадыс.

3, 4. а) Ады-јолыс јӱрӱмниҥ бичигине бичилип калган болзо, бисти алаҥзу јогынаҥ јажын-чакка јӱрер деп айдарга јараар ба? Јартап беригер. б) Бу ла келер јӧрмӧлдӧ нени шӱӱжерис?

 ³ Је јӱрӱмниҥ бичигине бичилип калган улус ӱргӱлји јӱрӱмди алаҥзу јогынаҥ алар деп айдарга јараар ба? Каруузын Иегованыҥ Моисейге айткан сӧстӧринеҥ кӧрӧдис: «Меге удура кинчек эткен кижини мен бичигимнеҥ јоголтып саларым» (Чыг. 32:33). Айдарда, Иегова бу бичикке бичилип калган улустыҥ ады-јолын, карандашла бичип салгандый, јоголтып салардаҥ айабас (Ачыл. 3:5). Оныҥ учун биске, ады-јолыс бу бичикке јажын-чакка ручкала бичип салгандый болзын деп, бастыра кӱчистеҥ албаданар керек.

⁴ Је кезик сурактар чыгат, темдектезе, Агару Бичикте јӱрӱмниҥ бичигине бичилген ле бичилбеген улус керегинде не айдылат? Бу бичикке бичилип калган улус ӱргӱлји јӱрӱмди качан алар? А Иегованы билбей божоп калган улусла не болор? Олордыҥ ады-јолы бу бичикке бичилер бе? Бу сурактардыҥ каруулары бу јӧрмӧлдӧ лӧ келер јӧрмӧлдӧ берилер.

ЈӰРӰМНИҤ БИЧИГИНЕ КЕМДЕРДИҤ АДЫ-ЈОЛЫ БИЧИЛГЕН?

5, 6. а) Филиппыдагыларга 4:3-ле болзо, јӱрӱмниҥ бичигинде кемдердиҥ аттары бар? б) Бу улустыҥ аттары јӱрӱмниҥ бичигине јажын-чакка качан бичилет?

⁵ Јӱрӱмниҥ бичигинде кемдердиҥ ады-јолы бар? Бу сурактыҥ каруузын билип аларга, беш бӧлӱк улусты кӧрӱп ийектер. Бу улустыҥ кезигиниҥ ады бичилип калган, кезигинийи бичилбеген.

⁶ Баштапкы бӧлӱкке Иисусла кожо теҥериде башкарар эдип талдалган улус кирет. Бу улустыҥ аттары эм тура јӱрӱмниҥ бичигинде бар ба? Эйе бар. Апостол Павел Филиппыдагы јуунга самара  бичип турарда, майлаткандардыҥ ады-јолы бу бичикте бичилип калган деп айткан. (Филиппыдагыларга 4:3 кычырыгар.) Је олордыҥ ады-јолы бу бичиктеҥ јоголып калбазын деп, Кудайга оноҥ ло ары чындык артар учурлу. Оныҥ кийнинде, качан майлаткандар калганчы таҥманы алып ийзе — божоор алдында эмезе улу тӱбек башталардаҥ озо — олордыҥ ады-јолы јӱрӱмниҥ бичигине јажын-чакка бичилип калар (Ачыл. 7:3).

7. Ачылта 7:16, 17-ле болзо, кара-бајырт улустыҥ ады-јолы јӱрӱмниҥ бичигине јоголбос эдип качан бичилер?

⁷ Экинчи бӧлӱк улус — кара бајырт ӧскӧ койлор. Олордыҥ ады-јолы јӱрӱмниҥ бичигине эм тура бичилген бе? Эйе, бичилип калган. Армагеддонныҥ кийнинде олордыҥ ады-јолдоры анда артар ба? Эйе, артар (Ачыл. 7:14). Иисустыҥ айтканыла, койлорго тӱҥейлелген бу улус «ӱргӱлји јӱрӱм» алар (Матф. 25:46). Је бу кайрал Армагеддонды ӧдӱп чыккан улуска тургуза ла берилбес. Олордыҥ ады јӱрӱмниҥ бичигинде сӱрлеп айдылган карандашла бичилген. Иисус олорды бир муҥ јылдыҥ туркунына башкарар ӧйдӧ «кабырар, тирӱ сууныҥ агындарына апарар». Бу улус Христоско сӧсуккур болзо, анайда ок Иегова олорды чындык улус деп кӧрзӧ, олордыҥ ады-јолы јӱрӱмниҥ бичигине качан да јоголбос эдип бичилип калар. (Ачылта 7:16, 17 кычырыгар.)

8. Јӱрӱмниҥ бичигине кемдердиҥ ады-јолы бичилбеген, олорло не болор?

⁸ А ӱчинчи бӧлӱк улус — Армагеддондо јоголтылатан улус. Олордыҥ ады-јолы јӱрӱмниҥ бичигине бичилбеген. Иисус олорды эчкилерге тӱҥдештирип, «олор ӱргӱлји кыйынга [«јоголтышка», ЈТ] барар» деп айткан (Матф. 25:46). Апостол Павел де олор керегинде мындый сӧстӧр бичиген: «Олорго јаргы чыгарылар, олор јажын-чакка јоголтылып калар» (ЈТ) (2 Фес. 1:9; 2 Пётр 2:9). Бу улустыҥ тоозына алдында јаткан, је Кудайдыҥ агару тынына биле тура удура барган улус база кирет. Олор ӱргӱлји јӱрӱмге эмес, ӱргӱлји јоголтышка барар. Айдарда, бу улус ӱргӱлји јӱрӱмге тиргизилбес деп јарт кӧрӱп јадыс (Матф. 12:32; Марк 3:28, 29; Евр. 6:4—6). А эмди дезе јердеги јӱрӱмге тиргизилетен эки бӧлӱк улусты кӧрӱп ийектер.

ТИРИЛЕТЕН УЛУС

9. Јерде кандый эки бӧлӱк улус тирилер? Олордыҥ башказы неде? (Апостолдордыҥ ижи 24:15).

⁹ Агару Бичикте айдылганыла, келер ӧйдӧ «актулар да, акту эместер де тирилер», олордо јердеги јӱрӱмге ӱргӱлјиге јӱретен арга болор. (Апостолдордыҥ ижи 24:15, ЈТ кычырыгар.) «Актулар» дезе — бастыра јӱрӱмине Иегованыҥ ишчилери болгон улус. А «акту эместер» дезе Иегованыҥ ишчилери болбогон. Олордыҥ јӱрӱмин де кӧрзӧ, Иегованыҥ нормаларына чек келишпеген. Бу эки бӧлӱк улус келер ӧйдӧ тирилетен болордо, олордыҥ ады-јолы јӱрӱмниҥ бичигине бичилип калган ба? Каруузын аларга, олордыҥ кажызын ла башка кӧрӱп ийектер.

10. «Актулар» нениҥ учун тиргизилер, олордыҥ кезигине кандый алкыш берилер? (Јерде тирилиш керегинде бу чыгармада «Кычыраачылардыҥ сурактарынаҥ» кычырып аларга јараар.)

¹⁰ Тӧртинчи бӧлӱк улус — «актулар». Олордыҥ ады-јолы јӱрӱмниҥ бичигине божоордоҥ озо бичилип калган. Је бу улус божоп калза, Иегова олордыҥ адын јӱрӱмниҥ бичигинеҥ кырып салат па? Јок, олор Иегованыҥ санаазында  тирӱ. Иисустыҥ айтканыла болзо, Иегова — «ӧлгӧндӧрдиҥ Кудайы эмес, Ол эзен јӱргендердиҥ Кудайы. Кудайга ончо улус тирӱ» (Лука 20:38). Айдарда, бу чындык улус тирилзе, олордыҥ ады јӱрӱмниҥ бичигинеҥ кырылбаган болор, «карандашла» да бичилген болзо (Лука 14:14). Бу улустыҥ кезигине «бастыра јердиҥ ӱстинде јайзаҥдар» болотон алкыш берилер (Сар. 45:16).

11. «Акту эместердиҥ» ады-јолы јӱрӱмниҥ бичигине бичилзин деп, олорго нени билип алар керек болор?

¹¹ Эмди дезе бежинчи бӧлӱк улусты куучындажып ийектер — «акту эместерди». Олордыҥ ады-јолы јӱрӱмниҥ бичигине бичилбеген. Нениҥ учун дезе олордыҥ кезиги Иегованыҥ нормаларын билбеген болор. Иегова олорды тиргизип, ады-јолы јӱрӱмниҥ бичигине бичилетен арга берер. Бу улустыҥ кезиги тирӱ тужында коркышту јаман керектер эткен. Оныҥ учун олорго сӱреен јаан болуш керек болор. Олорды Кудайдыҥ чындык нормаларыла канайып јӱретенине ӱредерис. Бу ишти эдерге, Кудайдыҥ Каандыгы кижиликтиҥ тӱӱкизинде качан да болбогон сӱреен јаан ӱредӱ программа ӧткӱрер.

12. а) Акту эместерди кемдер ӱредер? б) Солынарга кӱӱнзебеген кижиле не болор?

¹² Акту эместерди кемдер ӱредер? Кара бајырт албаты ла тирилген акту улус. Акту эместерге олордыҥ ады-јолы јӱрӱмниҥ бичигине бичилип калзын деп, Иегованыҥ најызы болор керек ле ого бойыныҥ јӱрӱмин учурлаар керек болор. Бу улустыҥ кӧгӱс ӧзӱмин теҥеридеги јаргычылар — Иисус ла майлаткандар лаптап кӧрӧр (Ачыл. 20:4). Је солынарга кӱӱнзебеген кижи јоголтылып калар, 100 те јашту болзо (Иса. 65:20). Иегова ла Иисус улустыҥ јӱрегин кӧрӱп јат, оныҥ учун јаҥы јӱрӱмде кем де кемге де каршу јетирип болбос (Иса. 11:9; 60:18; 65:25; Иоанн 2:25).

 КЕЗИГИ ӰРГӰЛЈИ ЈӰРӰМ АЛАРГА, КЕЗИГИ ЈАРГЫНЫҤ АЛДЫНА ТУРАРГА ТИРИЛЕР

13, 14. а) Иоанн 5:29-тагы сӧстӧрди алдында бис канайып оҥдогоныс? б) Бу сӧстӧрди чын оҥдоорго нени ајаруга алар керек?

¹³ Јерде тирилетен улус керегинде Иисус база айткан: «Сӧӧк салар јерде јаткандардыҥ ончозы Кудайдыҥ Уулыныҥ ӱнин угар ӧй једип келедири. Јакшы эдип јӱргендери јӱрӱм јӱрерге тирилер; јаман эдип јӱргендери буруладарга [«јаргыныҥ алдына турарга», ЈТ] тирилер» (Иоанн 5:28, 29). Бу сӧстӧрлӧ Иисус нени айдарга сананган?

¹⁴ Алдында бис мында Иисус улустыҥ тирилген кийнинеҥ эдетен керектери керегинде айдып турган деп бодогоныс. Ӧскӧртӧ айтса, кезик улус тирилген кийнинеҥ јакшы керектер эдер, кезик улус јаман керектер эдер. Је бир немени ајаруга алып ийектер: Иисус мында тирилген улус јакшы керектер эдер, эмезе јаман керектер эдер деп айтпаган. Ол ӧткӧн ӧй керегинде айткан. Иисус «јакшы эдип јӱргендер» ле «јаман эдип јӱргендер» керегинде айткан. Андый болордо, Иисус бу ӱлгерде тирилген улустыҥ божоордоҥ озо эткен керектерин айткан. Је чын ла, бу сӧстӧрди мынайып оҥдоор керек эмес пе? Нениҥ учун дезе јаҥы телекейде кем де јаман керектер эдип болбос. Айдарда, акту эместер јаман керектерди божоордоҥ озо эткен. Айса болзо, Иисустыҥ сӧстӧрин канайып оҥдоор? Ол бу эки бӧлӱк улус тирилер дегениле нени айдарга сананган?

15. Ӱргӱлји јӱрӱм аларга кемдер тирилер, нениҥ учун?

¹⁵ Јакшы керектер эткен акту улус ӱргӱлји јӱрӱм аларга тирилер, нениҥ учун дезе олордыҥ ады-јолы јӱрӱмниҥ бичигинде бичилип калган. Айдарда, Иоанн 5:29-та айдылган «јакшы эдип јӱргендер» ол ло Апостолдордыҥ ижи 24:15-те айдылган «актулар» болуп јат. Је актулар божоп калган болордо, бис олордыҥ ады-јолы јӱрӱмниҥ бичигинде бар деп, нениҥ учун айдып турганыс? Нениҥ учун дезе Римдегилерге 6:7-де айдылганыла, «ӧлӱп калган кижи кинчектеҥ јайымдал[ып]» калган. Ӧскӧртӧ айтса актулар божоп калза, Иегова олордыҥ кинчегин таштап салат. Је олордыҥ јакшы керектерин ол ундыбай јат (Евр. 6:10). Оныҥ учун бу улустыҥ ады-јолы јӱрӱмниҥ бичигинде артып калат. Је тирилген кийнинде, олордыҥ ады-јолы јӱрӱмниҥ бичигинеҥ кырылып калбазын деп, олор Кудайга оноҥ ло ары чындык артар учурлу.

16. Кемдер «јаргыныҥ алдына турар»?

¹⁶ Јаман керектер эткен акту эмес улусла не болор? Олор божоп каларда кинчектери ташталып калган. Бу улус тирӱ јӱрерде Иеговага иштебеген. Олордыҥ ады-јолы јӱрӱмниҥ бичигинде јок. «Јаман эдип јӱргендер» Апостолдордыҥ ижи 24:15-те айдылган «акту эместер» болуп јат. Олор тирилип келзе, «јаргыныҥ алдына турар» c. Бу не дегени? Бу дегежин Иисус олордыҥ кандый керектер эдерин лаптап кӧрӧр (Лука 22:30). Олордыҥ ады-јолын јӱрӱмниҥ бичигине бичийтен бе, јок по деп билип аларга, ӧй керек болор. Бу улус јаман керектерин таштап, Иеговага  учурланза, олордыҥ ады-јолын јӱрӱмниҥ бичигине бичип салар.

17, 18. Јерде тиргизилген ончо улуска нени эдер керек болор? Ачылта 20:12, 13-те кандый керектер керегинде айдылат?

¹⁷ Тирилген улустыҥ ончозына — актуларга да, акту эместерге де — јаҥы тӱрбектерде бичилген јасактарга багынар керек болор. Бу тӱрбектер Иисус бир муҥ јылга башкарза ачылар. Апостол Иоанн бу керегинде мындый сӧстӧр бичиген: «Кудайдыҥ алдында турган ӧлгӧн улусты, кичӱлерди ле улуларды кӧрӱп ийгем. Тӱрбектер ачык болгон, ӧскӧ тӱрбек база ачык болгон — јӱрӱмниҥ тӱрбеги. Ӧлгӧн улус тӱрбектерде бичилгениле эткен керектериле јаргылаткан» (Ачыл. 20:12, 13).

¹⁸ Тирилген улус кандый «керектериле» јаргыладар? Божоордоҥ озо эткен керектериле бе? Јок! Олор божоп каларда, кинчектери ташталып калган деп ундыбас керек. Айдарда, Иегова тирилген улусты божоордоҥ озо эткен керектериле јаргылабас. Је бу улус јаҥы јӱрӱмде болотон ӱредӱ программаны алынар ба, јок по деп кӧрӧр болор. Керек дезе Кудайдыҥ чындык ишчилерине де, темдектезе, Нойго, Самуилге, Давидке ле Даниилге Иисус Христос керегинде билгирлер алып, оныҥ тайылгазына бӱдер керек болор. Оныҥ учун акту эместерге де оноҥ кӧп немеге ӱренер керек болор.

19. Ады-јолын јӱрӱмниҥ бичигине бичидерге кӱӱнзебеген улусла не болор?

¹⁹ Је јӱрӱмниҥ бичигине ады-јолын бичитпеске турган улусла не болор? Ачылта 20:15-теги сӧстӧрлӧ болзо: «Јӱрӱмниҥ тӱрбегинде бичилбегени, отту кӧлгӧ ташталган». Олор јажын-чакка јоголтылып калар. Оныҥ да учун биске јӱрӱмниҥ бичигине ады-јолыс бичилип, оноҥ качан да кырылбазын деп бастыра кӱчисти салып, албаданар керек!

20. Иисустыҥ бир муҥ јылга башкарар ӧйинде кандый сӱреен кайкамчылу иш ӧткӱрилер? (Кадарындагы јурукты кӧрӱгер.)

²⁰ Иисус бир муҥ јылдыҥ туркунына башкарза, сӱреен кайкамчылу ӧй болор! Анда тӱӱкиде качан да болбогон сӱреен јаан ӱредӱ программа болор. Анайда ок теҥеридеги јаргычылар акту ла акту эмес улустыҥ кандый керектер эдип турганын лаптап кӧрӧр (Иса. 26:9; Ап. ижи 17:31). 1 000 јылдыҥ туркунына ӱредӱ программа канайып ӧткӱрилер? Бу программаны оноҥ тыҥ баалаарга ла оны јакшы оҥдоп аларга келер јӧрмӧл болужар.