1. Dapre Malaki 3:16, ki liv Zeova pe ekri ladan e ki i annan dan sa liv?

 POUR plizyer milye lannen, Zeova pe ekri dan en liv ki spesyal. Dan sa liv, i annan en lalis non e premye non lo sa lalis i Abel, ki ti sa premye serviter fidel Zeova. b (Lik 11:50, 51) Depi sa letan, Zeova in ekri ankor non dan sa liv e ozordi i annan plizyer milyon non dan sa liv. Dan Labib, sa liv i ganny apele “liv souvenir,” “liv lavi” ek “roulo lavi.” Dan sa lartik, nou pou refer avek sa liv konman “liv lavi.”​—Lir Malaki 3:16; Rev. 3:5; 17:8.

2. Lekel ki zot non in ganny ekrir dan liv lavi e ki nou bezwen fer pour ki nou non i ganny ekrir dan sa liv?

² Dan sa liv spesyal, i annan non tou bann ki annan en gran respe pour Zeova e ki kontan son non. Zot pou annan sa loportinite pour ganny lavi eternel. Ozordi nou non i kapab ganny ekrir dan sa liv si nou annan en lanmitye pros avek Zeova. Sa lanmitye i posib gras a sakrifis son Garson, Zezi Kri. (Zan 3:16, 36) Ki swa nou annan lespwar pour viv pour touzour dan lesyel oubyen lo later, nou tou nou anvi ki nou non i ganny ekrir dan sa liv.

3-4. (a) Eski nou pou viv pour touzour si nou non i dan liv lavi ozordi? Eksplike. (b) Ki nou pou vwar dan sa lartik ek sa lartik ki swiv?

³ Eski sa i vedir ki tou bann ki zot non in ganny ekrir dan liv lavi pou definitivman ganny lavi eternel? Nou  trouv larepons dan sa ki Zeova ti dir Moiz dan Egzod 32:33. Zeova ti dir: “Sa dimoun ki’n fer pese kont mwan, mon pou efas son non dan mon liv.” Alor, bann non ki dan sa liv i kapab ganny efase. I konmsi Zeova in ekri bann non avek kreyon. (Rev. 3:5) Nou bezwen fer sir ki nou non i reste dan sa liv ziska ki i ganny ekrir avek lank, ki en keksoz permanan.

⁴ Sa i kapab fer nou demann serten kestyon. Par egzanp, ki Labib i dir konsernan bann ki zot non in ganny ekrir dan liv lavi e konsernan bann ki zot non pa’n ganny ekrir dan liv lavi? Kan ki bann ki zot non in reste dan liv lavi pou ganny lavi eternel? Ki nou pou dir lo bann ki’n mor e ki pa’n ganny loportinite pour aprann konn Zeova? Eski i annan en posibilite pour zot non ganny ekrir dan sa liv? Dan sa lartik ek sa lartik ki swiv, nou pou vwar larepons sa bann kestyon.

LEKEL KI ZOT NON IN GANNY EKRIR DAN LIV LAVI?

5-6. (a) Dapre Filipyen 4:3, lekel en group ki zot non in ganny ekrir dan liv lavi? (b) Kan ki zot non pou ganny ekrir dan en fason permanan dan sa liv?

⁵ Lekel ki zot non in ganny ekrir dan liv lavi? Pour konn larepons sa kestyon, nou pou koz lo senk group dimoun. Parmi sa bann group, i annan serten ki zot non in ganny ekrir dan liv lavi e serten ki zot non pa’n ganny ekrir dan liv lavi.

⁶ Sa premye group i bann ki’n ganny swazir pour dirize avek Zezi dan lesyel. Pour le moman, zot non in ganny ekrir dan liv lavi. Dapre sa ki zapot Pol ti dir bann frer ek ser dan lavil Filip, non  bann ki’n ganny swazir pour dirize ansanm avek Zezi i dan liv lavi. (Lir Filipyen 4:3.) Me pour zot non reste dan liv lavi, zot bezwen reste fidel. Apre ler zot ganny zot dernyen sele, ki swa avan zot mor oubyen avan gran ladetres i konmanse, zot non pou ganny ekrir dan en fason permanan dan sa liv.​—Rev. 7:3.

7. Ki mannyer Revelasyon 7:16, 17 i ed nou konpran kan ki non sa gran lafoul pou ganny ekrir dan liv lavi dan en fason permanan?

⁷ Sa dezyenm group i sa gran lafoul. Zot non in ganny ekrir dan liv lavi. Eski zot non pou ankor dan liv lavi apre ki zot in sirviv Armagedon? Wi! (Rev. 7:14) Zezi ti dir ki zot parey bann mouton e zot “pou ganny lavi eternel.” (Mat. 25:46) Menm si zot sirviv Armagedon, zot pa pou ganny lavi eternel deswit. Zot non pou ankor dan liv lavi me i pou’n ganny ekrir avek kreyon parey i ti ete avan. Pandan sa Mil An ki Zezi pou dirize, Zezi pou “vey lo zot parey en berze [e] i pou gid zot ver bann sours delo lavi.” Bann ki swiv gidans Kris e ki ganny trouve fidel avek Zeova pandan zizman final, zot non pou ganny ekrir dan en fason permanan dan liv lavi.​—Lir Revelasyon 7:16, 17.

8. Lekel ki zot non pa dan liv lavi e ki pou arive avek zot?

⁸ Sa trwazyenm group i bann kabri, ki pou ganny detri dan lager Armagedon. Zot non pa dan liv lavi. Zezi ti dir ki zot “pou ganny lanmor eternel.” (Mat. 25:46) Zeova ti enspir zapot Pol pour ekri ki “sa bann menm dimoun pou ganny pinisyon ek destriksyon eternel.” (2 Tesa. 1:9; 2 Pyer 2:9) Osi, tou dilon listwar in annan bann dimoun ki’n fer pese kont lespri sen. Zot osi zot pou ganny detrir konpletman. Alor i kler ki zot pa pou ganny resisite. (Mat. 12:32; Mark 3:28, 29; Ebr. 6:4-6) Aprezan, annou koz lo de group dimoun ki pou ganny resisite lo later.

BANN KI POU GANNY RESISITE

9. Dapre Akt 24:15, ki sa de group dimoun ki pou ganny resisite pour viv lo later e ki diferans i annan ant sa de group?

⁹ Labib i koz lo de group dimoun ki pou ganny resisite e ki annan sa lespwar pour viv pour touzour lo later. Sa i bann bon dimoun ek bann move dimoun. (Lir Akt 24:15.) Bann bon dimoun i bann ki’n fidel avek Zeova ler zot ti ankor vivan. De lot kote, bann move dimoun i bann ki pa ti servi Zeova avan zot mor. Anfet, laplipar sa bann dimoun ti fer bann move keksoz. Lefet ki sa de group i ganny resisite, eski sa i vedir ki zot non i dan liv lavi? Pour konn larepons sa kestyon, annou koz lo sak sa de group.

10. Akoz bann bon dimoun pou ganny resisite e ki privilez serten pou gannyen? (Vwar osi “Kestyon lekter” konsernan bann ki pou ganny resisite lo later, dan sa Latour Veyer.)

¹⁰ Sa katriyenm group i sa ki Labib i konsider konman bann bon dimoun. Avan zot ti mor, zot non ti dan liv lavi. Eski zot non ti ganny tire dan sa liv ler zot ti mor? Non, parski zot ankor “vivan” dan memwar Zeova. Zeova “pa Bondye bann mor, me Bondye bann ki vivan parski pour li zot tou zot vivan.” (Lik 20:38) Sa i vedir ki ler bann bon dimoun pou ganny resisite lo later, zot  non pou dan liv lavi me i pou’n ganny ekrir avek “kreyon.” (Lik 14:14) Serten ki pou ganny resisite pou annan sa privilez pour servi konman “bann prens lo later antye.”​—Ps. 45:16.

11. Ki bann move dimoun i bezwen aprann avan ki zot non i ganny ekrir dan liv lavi?

¹¹ Annou diskit lo sa senkyenm group ki Labib i apel bann move dimoun. I kapab ki zot pa ti konn bann lalwa Zeova e sa i fer ki zot ti fer bann move keksoz avan zot ti mor. Alor zot non pa ti dan liv lavi. Me Bondye pou resisit zot pour ki zot ganny sa loportinite pour fer ki zot non i ganny ekrir dan liv lavi. Sa bann dimoun pou bezwen en kantite led. Avan zot ti mor, serten parmi zot ti fer bann keksoz vreman mal. Alor zot pou bezwen ganny ansennyen ki mannyer pour viv dapre bann standar Zeova ki drwat. Pour arive fer sa, Rwayonm Bondye pou diriz sa pli gran travay lansennyman ki’n deza ganny fer lo later.

12. (a) Lekel ki pou ansenny bann move dimoun? (b) Ki pou arive avek bann ki refize aplik sa ki zot pe aprann?

¹² Lekel ki pou ansenny bann move dimoun? Sa gran lafoul ek bann bon dimoun ki’n resisite ki pou ansenny zot. Pour ki non bann move dimoun i ganny ekrir dan liv lavi, zot pou bezwen devlop en lanmitye avek Zeova e dedye zot lavi avek li. Zezi Kri ek bann Kretyen swazir pou dan lesyel e zot pou pe obzerv byen ki mannyer sa bann dimoun i reazir anver sa ki zot pe ganny ansennyen. (Rev. 20:4) Bann ki refize aplik sa ki zot pe aprann pou ganny touye, menm si zot annan 100 an. (Iza. 65:20) Zeova ek Zezi i konnen sa ki i annan dan leker e zot pa pou les personn fer okenn keksoz mal dan nouvo lemonn.​—Iza. 11:9; 60:18; 65:25; Zan 2:25.

 ZOT POU GANNY RESISITE POUR GANNY LAVI OUBYEN POUR GANNY ZIZE

13-14. (a) Dan lepase ki mannyer nou ti konpran sa ki Zezi ti dir dan Zan 5:29? (b) Ki nou bezwen pran kont konsernan sa ki Zezi ti dir?

¹³ Zezi osi ti koz konsernan bann ki pou ganny resisite pour viv lo later. Par egzanp, i ti dir: “Letan pe vini kot tou bann ki dan latonm pou tann son lavwa e zot pou resisite. Bann ki ti fer sa ki byen pou ganny resisite pour ganny lavi e bann ki ti fer sa ki mal pou ganny resisite pour ganny zize.” (Zan 5:28, 29) Ki Zezi ti pe dir?

¹⁴ Dan lepase, nou ti krwar ki Zezi pe refer avek sa ki sa bann dimoun pou fer apre ki zot in ganny resisite, setadir ki serten ti pou fer bann bon keksoz apre ki zot in resisite e lezot ti pou fer bann move keksoz apre ki zot in resisite. Me remarke ki Zezi pa ti dir ki bann ki resisite pou fer sa ki byen ouswa pou fer sa ki mal. I ti koz konsernan lepase parski i ti dir bann ki “ti fer sa ki byen” e bann ki “ti fer sa ki mal.” Sa i montre ki sa bann dimoun ti fer sa bann keksoz avan zot mor. Sa i fer sans parski personn pa pou ganny drwa fer sa ki mal dan nouvo lemonn. Alor i bezwen ki sa bann move dimoun ti fer bann move keksoz avan zot ti mor. Alor, ki Zezi ti pe dir ler i ti pe koz konsernan bann ki pou “ganny resisite pour ganny lavi” e bann ki pou “ganny resisite pour ganny zize”?

15. Lekel ki pou “ganny resisite pour ganny lavi” e akoz?

¹⁵ Bann bon dimoun ki ti fer bann bon keksoz avan ki zot ti mor pou “ganny resisite pour ganny lavi” parski zot non pou deza dan liv lavi. Sa i vedir ki rezireksyon “bann ki ti fer sa ki byen” ki ganny mansyonnen dan Zan 5:29 i menm rezireksyon ki ganny mansyonnen dan Akt 24:15 konsernan bann bon dimoun. Sa i annakor avek sa ki ganny dir dan Romen 6:7, ki dir: “Sa ki’n mor in ganny akite avek son pese.” Alor, ler bann bon dimoun i mor, Zeova i pardonn zot pese me i mazin tou bann bon keksoz ki zot in fer ler zot ti ankor vivan. (Ebr. 6:10) Byensir, bann bon dimoun ki resisite pou bezwen reste fidel pour ki zot non i reste dan liv lavi.

16. Ki pou arive avek bann ki “ganny resisite pour ganny zize”?

¹⁶ Ki pou arive avek bann ki ti fer sa ki mal avan zot mor? Menm si ler zot in mor zot in ganny akite avek zot pese, zot pa ti servi Zeova ler zot ti ankor vivan. Zot non pa dan liv lavi. Alor rezireksyon sa “bann ki ti fer sa ki mal” i sa menm rezireksyon ki ganny mansyonnen dan Akt 24:15 konsernan bann move dimoun. Zot pou “ganny resisite pour ganny zize.” c Sa i vedir ki Zezi pou obzerv zot e evalye zot. (Lik 22:30) I pou pran letan pour Zezi konnen si zot non i kapab ganny ekrir dan liv lavi. Si sa bann dimoun i aret fer bann move keksoz ki zot ti fer avan zot mor e dedye zot lavi avek Zeova, zot non i kapab ganny ekrir dan liv lavi.

17-18. Ki bann ki pou ganny resisite pour viv lo later pou bezwen fer e ki savedir “sa ki zot in fer” ki Revelasyon 20:12, 13 i koz lo la?

 ¹⁷ Ki swa bann dimoun ki pou ganny resisite i bann bon dimoun oubyen bann move dimoun, zot tou zot pou bezwen obei bann lalwa ki dan nouvo roulo ki pou ganny ouver pandan sa 1,000 an. Zapot Zan i dekri sa ki i ti vwar dan en vizyon: “Mon ti vwar bann mor, pti konman gran, pe debout devan tronn e bann roulo ti ganny ouver. Me en lot roulo ti ganny ouver, sa i roulo lavi. Bann mor ti ganny zize dapre bann keksoz ki ti’n ganny ekrir dan sa bann roulo e dapre sa ki zot in fer.”​—Rev. 20:12, 13.

¹⁸ Dapre kwa ki bann dimoun ki ganny resisite pou ganny zize? Eski i dapre sa ki zot in fer avan zot mor? Non. Rapel ki ler zot ti mor zot ti ganny akite avek zot pese. Alor, “sa ki zot in fer” i pa kapab bann keksoz ki zot ti fer avan zot ti mor. O kontrer, i bezwen pe refer avek bann keksoz ki zot pou fer dan nouvo lemonn apre ki zot in ganny ansennyen. Menm bann dimoun parey Noe, Samyel, David ek Danyel pou bezwen aprann konsernan Zezi e demontre lafwa dan son sakrifis. Si sa bann zonm pou annan en kantite pour aprann, bann move dimoun pou annan bokou plis pour zot aprann!

19. Ki pou arive avek bann ki pa aksepte sa zoli loportinite?

¹⁹ Ki pou arive avek bann ki pa aksepte sa zoli loportinite? Revelasyon 20:15 i dir: “Tou sa ki son non pa ti’n ganny ekrir dan liv lavi ti ganny zete dan lak dife.” Zot pou ganny detrir konpletman. Alor i vreman enportan ki nou fer sir ki nou non i ganny ekrir dan liv lavi e ki i reste dan sa liv!

20. Ki travay eksitan ki pou ganny fer pandan Renny Mil an Kris? (Vwar portre lo kouvertir.)

²⁰ Sa mil an ki Kris pou dirize pou en moman vreman eksitan. Pandan sa letan, pep Bondye pou fer sa pli gran travay lansennyman ki zot in deza fer. Me i pou osi sa letan kot kondwit bann bon dimoun ek bann move dimoun pou ganny evalye. (Iza. 26:9; Akt 17:31) Ki mannyer sa travay lansennyman pou deroule? Sa lartik ki swiv pou ed nou konpran e apresye sa zoli provizyon.