1. Nitihka Malaki 3:16, nama bup ke ditulis Jehovah? Nama utai ke bisi dalam bup nya?

 BERIBU taun Jehovah udah nulis siti bup ti istimewa. Dalam bup nya bisi siti lis nama orang ke berengkah enggau nama saksi keterubah ti tetap ati, iya nya Abel. b (Luk. 11:50, 51) Kenyau ari nya, Jehovah udah nulis mayuh nama dalam bup nya, lalu kemayaharitu bup nya ngundan bejuta iti nama orang. Dalam Bup Kudus, bup nya dikumbai “bup pengidup” tauka “gulung surat pengidup.” Dalam artikel tu, kitai deka ngumbai bup nya, “bup pengidup.”—Bacha Malaki 3:16; Pem. 3:5; 17:8.

2. Nama sapa ke ditulis dalam bup pengidup, lalu baka ni kitai ulih nentuka nama kitai bisi ditulis dalam bup nya?

² Bup ti istimewa tu ngundan nama orang ke nyembah Jehovah enggau ati ti nangi tauka basa ti dalam, lalu sida mega rinduka nama Jehovah. Sida deka bisi peluang bulih pengidup ti meruan belama iya. Kemayaharitu, nama kitai mega ulih ditulis dalam bup nya enti kitai ngemansangka kaul ti rapat enggau Jehovah. Kaul nya berpelasarka genselan tebus anak Iya, Jesus Kristus. (Jhn. 3:16, 36) Semua kitai tentu dekaka nama  kitai ditulis dalam bup nya, sekalika kitai deka diau ba serega tauka ba dunya.

3-4. (a) Kati kitai deka idup belama iya enti nama kitai diatu bisi ditulis dalam bup pengidup? Terangka. (b) Nama deka dikerandauka kitai dalam artikel tu enggau artikel ke nangkanka tu?

³ Kati tu reti iya nama semua orang ke bisi ditulis dalam bup tu gerenti deka bulih pengidup ti meruan belama iya? Kitai ulih tetemuka saut ngagai tanya nya ba utai ti dipadah Jehovah ngagai Moses ke ditulis ba Pemansut 32:33. Jehovah madahka: “Semina orang ke udah bedosa ngelaban Aku aja ti deka dibuai Aku nama ari bup Aku.” Nya alai, nama ke bisi dalam bup nya diatu ulih dibuai. Nya baka Jehovah udah nulis nama sida ngena pinsil. (Pem. 3:5) Kitai patut nentuka nama kitai mengkang dalam bup nya nyentuk ngagai maya iya enda ulih dipadamka agi, baka ke ditulis ngena pen.

⁴ Tang kitai engka bisi sekeda tanya. Ambika chunto, nama dipadah Bup Kudus pasal nama orang ke ditulis dalam bup pengidup sereta pasal nama orang ke enda ditulis dia? Kemaya sida ke bisi nama ditulis dalam bup nya deka bulih pengidup ti meruan belama iya? Baka ni enggau sida ke udah mati tang nadai kala bisi peluang ngelala Jehovah? Kati nama sida bisi peluang ditulis dalam bup nya? Semua tanya tu deka disaut dalam artikel tu enggau artikel ke nangkanka tu.

NAMA SAPA KE BISI DALAM BUP NYA?

5-6. (a) Baka ke ditulis ba Pilipi 4:3, nama sapa ke bisi ditulis dalam bup pengidup? (b) Ni maya nama sida deka mengkang bisi dalam bup pengidup nya lalu enda ulih dipadam?

⁵ Nama sapa ke bisi ditulis dalam bup pengidup tu? Kena nyaut tanya nya, kitai deka berandauka lima iti raban orang. Ari lima iti raban tu, sekeda ari nama sida bisi ditulis lalu kebukai nadai.

 ⁶ Raban ti keterubah nya orang ke udah dipilih merintah enggau Jesus ba serega. Kati nama sida diatu bisi dalam bup pengidup? Au bisi. Nitihka jaku rasul Paul ngagai orang ke “begulai gawa” enggau iya ba Pilipi, nama orang ke dipilih ngagai serega, ke dibai sama enggau Jesus merintah, diatu bisi ditulis dalam bup pengidup. (Bacha Pilipi 4:3.) Tang, ngambika nama sida terus bisi dalam bup nya, sida enda tau enda mengkang tetap ati. Pengudah sida nerima chop ti penudi, nama sida deka meruan bisi dalam bup nya. Utai tu deka nyadi sebedau sida mati tauka sebedau Penusah ti Besai berengkah.—Pem. 7:3.

7. Nitihka Pemandang 7:16, 17, kemaya nama seraban orang ti mayuh deka meruan bisi dalam bup pengidup?

⁷ Orang ba raban ti kedua nya seraban orang ti mayuh ke mega dikumbai bedus ti bukai. Kati nama sida diatu bisi ditulis dalam bup pengidup? Au bisi. Kati nama sida agi bisi dalam bup pengidup pengudah sida selamat maya Armagedon? Au. (Pem. 7:9, 14) Jesus madahka, sida ti baka bedus tu “deka idup belama iya.” (Mat. 25:46; Jhn. 10:16) Tang sida ke selamat maya Armagedon enda tekala nya nerima pengidup ti meruan belama iya. Nama sida baka ke ditulis dalam bup pengidup ngena pinsil. Maya Seribu Taun Kristus Merintah, Jesus “deka ngiring sida ngagai pun penatai ai pengidup.” Nama orang ke ngasika iring Kristus sereta ditemu tetap ati ngagai Jehovah deka ditulis belama iya dalam bup pengidup.—Bacha Pemandang 7:16, 17.

8. Nama sapa ke enda ditulis dalam bup pengidup, lalu nama deka nyadi ngagai sida?

⁸ Raban ti ketiga nya orang ti disemaka baka kambin ke deka dipunaska maya Armagedon. Nama sida nadai ditulis dalam bup pengidup. Jesus madahka, sida “deka mati belama iya.” (Mat. 25:46) Di baruh iring kuasa kudus, Paul madah ngagai kitai, “sida deka diakim lalu diukum. Sida deka dipunaska belama iya.” (2 Tes. 1:9; 2 Pet. 2:9) Pia mega, sepemanjai sejarah, semua orang ke udah bedosa ngelaban kuasa kudus Petara enda ulih idup meruan belama iya, tang sida deka dipunaska belama iya. Sida tentu enda diangkatka idup baru. (Mat. 12:32; Mrk. 3:28, 29; Heb. 6:4-6) Diatu aram kitai beratika dua iti raban orang ke deka diangkatka idup baru ba dunya.

SIDA KE DEKA DIANGKATKA IDUP BARU

9. Nitihka Surat Kereja Rasul 24:15, nama dua iti raban orang ke deka diangkatka idup baru ba dunya? Nama utai ti bebida entara dua iti raban tu?

⁹ Bup Kudus bisi nyebut pasal dua iti raban orang ke deka diangkatka idup baru lalu bisi peluang idup belama iya ba dunya, iya nya “orang ke lurus” enggau “orang ke enda lurus.” (Bacha Surat Kereja Rasul 24:15.) “Orang ke lurus” nya orang ke tetap ati nyembah Jehovah lebuh sida agi idup. Tang “orang ke enda lurus” nya orang ke enda nyembah Jehovah sebedau sida mati. Kebendar iya, mayuh ari sida ngembuan ulah ti enda lurus. Ketegal dua iti raban tu deka diangkatka idup baru, ulih kitai ngumbai nama sida bisi dalam bup pengidup? Kena nyaut tanya tu, aram beratika tiap iti raban nya.

10. Nama kebuah “orang ke lurus” deka diangkatka idup baru? Nama peluang ke diulih sekeda ari sida? (Peda mega “Tanya ari Pemacha” dalam majalah tu ke bekaul enggau pengangkat ari mati ba dunya.)

¹⁰ Raban ti keempat nya “orang ke lurus.” Sebedau sida mati, nama sida bisi ditulis dalam bup pengidup. Kati nama sida dibuai ari bup pengidup pengudah sida mati? Enda, laban sida agi “idup” dalam pengingat Jehovah. Jehovah “ukai Petara ke orang ti mati, tang Petara ke orang ti idup, laban ba mata Iya semua sida agi idup.” (Luk. 20:38) Reti iya, lebuh orang ke lurus diangkatka idup baru ba dunya, nama sida ulih ditemu dalam  bup pengidup taja pan nama sida terubah iya disemaka baka ditulis ngena “pinsil.” (Luk. 14:14) Sekeda ari orang ke diangkatka idup baru deka bisi peluang “merintah semua dunya.”—Mas. 45:16.

11. Nama patut dipelajarka “orang ke enda lurus” ngambika nama sida ulih ditulis dalam bup pengidup?

¹¹ Kepenudi iya, peratika raban ti kelima, “orang ke enda lurus.” Pengidup sida enda lurus sebedau sida mati, engka ketegal sida enda nemu pasal adat Jehovah. Nya alai, nama sida enda ditulis dalam bup pengidup. Tang lebuh Petara ngangkatka sida idup baru, Iya meri sida peluang ngambika nama sida ulih ditulis dalam bup nya. “Orang ke enda lurus” tu begunaka mayuh tulung. Sekeda ari sida ngereja mayuh utai ti jai sebedau sida mati. Nya alai, sida patut diajar chara idup nitihka standard pengelurus Jehovah. Kena ngajar sida chara ngereja nya, Perintah Petara deka ngatur pengawa ngajar sereta belajar ti pemadu besai ke kala dikereja ba dunya.

12. (a) Sapa deka ngajar orang ke enda lurus? (b) Nama deka nyadi ngagai sida ke enggai nitihka utai ti udah dipelajarka sida?

¹² Sapa deka ngajar orang ke enda lurus? Seraban orang ti mayuh enggau orang ke lurus ti udah diangkatka idup baru. Orang ke enda lurus patut ngemansangka kaul enggau Jehovah sereta nyerahka diri ngagai Iya ngambika nama sida ulih ditulis dalam bup pengidup. Jesus Kristus enggau orang ke sama merintah enggau iya deka beratika enggau bejimat ari serega kena meda chara orang ke enda lurus nerima utai ti diajar ngagai sida. (Pem. 20:4) Sida ke enggai nitihka utai ti dipelajarka sida deka dipunaska taja pan sida engka beumur 100 taun. (Isa. 65:20) Jehovah enggau Jesus ulih meda ati sida, lalu seduai iya tentu enda ngemendarka sapa-sapa mai pengerusak  ngagai dunya ti baru nya.—Isa. 11:9; 60:18; 65:25; Jhn. 2:25.

DIANGKATKA IDUP BARU—BULIH PENGIDUP TI MERUAN BELAMA IYA TAUKA DIAKIM

13-14. (a) Nama utai ti ditemu kitai suba pasal jaku Jesus ke ditulis ba John 5:29? (b) Nama utai ti patut diperatika kitai pasal jaku iya?

¹³ Jesus mega bisi nyebut pasal orang ke deka diangkatka idup baru ba dunya. Ambika chunto, Jesus madahka: “Anang tekenyit ketegal utai tu, laban maya deka datai alai semua orang ke ba dalam kubur deka ninga nyawa iya, lalu pansut. Orang ke ngereja utai ti manah deka diangkatka idup baru lalu bulih pengidup ti meruan belama iya, tang orang ke ngereja utai ti jai deka diangkatka idup baru lalu diakim.” (Jhn. 5:28, 29) Nama reti utai ti dipadah Jesus?

¹⁴ Suba kitai ngumbai jaku Jesus dituju ngagai utai ti digaga orang pengudah sida diangkatka idup baru. Reti iya, sekeda orang deka diangkatka idup baru lalu ngereja utai ti manah tang kebukai deka ngereja utai ti jai. Taja pia, peratika, Jesus nadai madahka orang ke deka pansut ari kubur deka ngereja utai ti manah tauka deka ngereja utai ti jai. Nya alai, pekara tu dituju ngagai utai ti digaga sida sebedau sida mati. Penerang tu endang masuk akal, laban nadai orang deka dikemendarka ngereja utai ti jai ba dunya ti baru. Nya alai, orang ke ngereja utai ti enda lurus tentu udah ngereja utai ti jai nya sebedau sida mati. Enti pia, nama reti jaku Jesus lebuh iya madah orang “deka diangkatka idup baru lalu bulih pengidup ti meruan belama iya” sereta orang “deka diangkatka idup baru lalu diakim”?

15. Sapa “deka diangkatka idup baru lalu bulih pengidup ti meruan belama iya,” lalu nama kebuah?

¹⁵ Orang ke lurus, ke ngereja utai ti manah sebedau sida mati, “deka diangkatka idup baru lalu bulih pengidup ti meruan belama iya” laban nama sida udah ditulis dalam bup pengidup. Reti iya, “orang ke ngereja utai ti manah” ke diangkatka idup baru ti dipadah ba John 5:29 nya sama enggau “orang ke lurus” ke diangkatka idup baru ke ditulis ba Surat Kereja Rasul 24:15. Penerang tu sejalai enggau utai ti dipadah ba Rome 6:7 ke madahka: “Orang ke udah mati udah dilepaska ari dosa iya.” Nyadi lebuh orang ke lurus tu mati, Jehovah ngampunka dosa sida. Tang Iya deka ngingatka semua utai ti lurus ke dikereja sida lebuh sida agi idup. (Heb. 6:10) Endang amat, orang ke lurus ti diangkatka idup baru patut mengkang tetap ati ngambika nama sida ulih terus bisi dalam bup pengidup.

16. Nama reti orang “deka diangkatka idup baru lalu diakim”?

¹⁶ Baka ni enggau sida ke ngereja utai ti jai sebedau sida mati? Taja pan dosa sida udah dibuai lebuh sida mati, tang sida enda nyembah Jehovah maya sida agi idup. Nama sida nadai ditulis dalam bup pengidup. Nya alai, “orang ke ngereja utai ti jai” ke diangkatka idup baru nya sama enggau “orang ke enda lurus” ti diangkatka idup baru ke dipadah ba Surat Kereja Rasul 24:15. Sida “deka diangkatka idup baru lalu diakim.” c Reti iya, Jesus deka beratika sereta nguji orang ke enda lurus. (Luk. 22:30) Pengudah siti-siti timpuh, Jesus deka nemu sekalika nama sida layak ditulis dalam bup pengidup tauka enda. Nama orang ke enda lurus semina deka ditulis dalam bup pengidup enti sida ngubah jalai pengidup sida ti enda manah sereta nyerahka pengidup sida ngagai Jehovah.

17-18. Nama patut digaga semua orang ke udah diangkatka idup baru ba dunya? Nama reti “pengawa” ke ditulis ba Pemandang 20:12, 13?

 ¹⁷ Enda ngira sekalika suba sida nya orang ke lurus tauka orang ke enda lurus, semua orang ke udah diangkatka idup baru patut ngasika adat ke ditemu dalam gulung surat ti baru ke deka dibuka maya timpuh Seribu Taun Kristus Merintah. Rasul John nerangka genera ke dipeda iya: “Aku mega meda orang mati, enda ngira orang biasa tauka orang ke tinggi pangkat, bediri ba mua kerusi diraja nya, lalu mayuh gulung surat dibuka. Udah nya, bisi siti agi gulung surat dibuka, iya nya gulung surat pengidup. Orang mati diakim nitihka pengawa sida ke ditulis ba semua gulung surat nya.”—Pem. 20:12, 13.

¹⁸ Sida ke diangkatka idup baru deka diakim nitihka “pengawa” nama? Kati nya pengawa ti dikereja sida sebedau sida mati? Ukai! Kingatka, dosa sida ke suba udah diampun maya sida mati. Nya alai, “pengawa” sida tentu ukai pengawa ti dikereja ba pengidup sida ke suba. Tang pengawa nya dituju ngagai utai ti dikereja sida nitihka utai ti deka dipelajarka sida ba dunya ti baru. Indah orang ke tetap ati baka Noah, Samuel, David, enggau Daniel mega patut belajar pasal Jesus Kristus lalu ngayanka pengarap ngagai genselan tebus Jesus. Enti sida tu bisi mayuh utai ti patut dipelajar, orang ke enda lurus tentu bisi mayuh agi utai ti patut dipelajar!

19. Nama deka nyadi ngagai sida ke nulak peluang ti istimewa tu?

¹⁹ Nama deka nyadi ngagai sida ke nulak peluang ti istimewa tu? Pemandang 20:15 madahka: “Barang sapa ke nama iya enda ditulis ba bup pengidup, mega deka ditikau ngagai danau api.” Au, sida deka dipunaska belama iya. Endang amat beguna kitai nentuka nama kitai bisi ditulis dalam bup pengidup lalu mengkang bisi dalam bup nya!

20. Nama pengawa ti ngagitka ati ke deka dikereja maya timpuh Seribu Taun Kristus Merintah? (Peda gambar ba mua majalah.)

²⁰ Timpuh Seribu Taun Kristus Merintah tentu timpuh ti amat ngagitka ati! Timpuh nya deka nyengkaum pengawa ngajar sereta belajar ti pemadu besai ke kala dikereja nembiak Petara. Tang nya mega maya ulah orang ke lurus enggau orang ke enda lurus deka diakim. (Isa. 26:9; SKR. 17:31) Baka ni pengawa ngajar sereta belajar tu deka dipejalaika? Artikel ti nangkanka tu deka nulung kitai mereti sereta beterima kasih ke atur ti manah tu.