1. Sigun iti Malakias 3:16, ania a libro ti isursurat ni Jehova, ken ania ti linaon dayta?

 RINIBUN a tawen nga agsursurat ni Jehova iti espesial a libro. Daytoy a libro ket listaan dagiti nagan. Ti damo a naisurat iti dayta ket ti nagan ti kaunaan a matalek a saksi a ni Abel. * (Luc. 11:50, 51) Sipud idin, adda dagiti nagan nga innayon ni Jehova iti dayta a libro, ket ita, minilionen dagiti nagan nga adda iti dayta. Iti Biblia, dayta a libro ket maawagan iti “libro a pakalaglagipan,” “libro ti biag,” ken “lukot ti biag.” Iti daytoy nga artikulo, tukoyentayo dayta kas ti “libro ti biag.”​—Basaen ti Malakias 3:16; Apoc. 3:5; 17:8.

2. Makinnagan dagiti naisurat iti libro ti biag, ken kasano a maisurat ti nagantayo iti dayta a libro?

² Nakasurat iti daytoy espesial a libro ti nagan ti amin nga agdaydayaw ken Jehova a napakuyogan iti panagbuteng, wenno nauneg a panagraem, ken mangipatpateg iti naganna. Addanto gundawayda nga agbiag nga agnanayon. Ita, mabalin a maisurat ti nagantayo iti dayta a libro no addaantayo iti nasinged ken personal a relasion ken Jehova maibatay iti daton a subbot ti Anakna a ni Jesu-Kristo. (Juan 3:16, 36) Kayattayo amin a maisurat ti nagantayo iti dayta a libro​—idiay man langit wenno ditoy daga ti namnamatayo.

3-4. (a) Agbiagtayo kadi nga agnanayon no naisuraten ti nagantayo iti libro ti biag? Ilawlawag. (b) Ania ti pagsasaritaantayo iti daytoy nga artikulo ken iti sumaruno?

³ Kayatna kadi a sawen a siguradon nga agbiag nga agnanayon  ti amin a nakasurat ti naganda iti daytoy a libro? Makitatayo ti sungbat dayta a saludsod iti imbaga ni Jehova ken Moises: “Ti laeng nakabasol kaniak ti punasek ti naganna iti librok.” (Ex. 32:33) Dagiti ngarud nagan a nakasurat iti dayta a libro ket mabalin a mapunas wenno mabura, a kas man la lapis pay laeng ti inusar ni Jehova a nangisurat kadagita a nagan. (Apoc. 3:5, ftn.) Masapul a siguraduentayo nga agtalinaed a nakasurat ti nagantayo iti dayta a libro agingga a kas man la bolpen ti usarenen ni Jehova a mangisurat tapno permanenten dayta.

⁴ Natural laeng nga adda dagiti tumaud a saludsodtayo. Kas pagarigan, ania ti ibagbaga ti Biblia maipapan kadagidiay naisuraten ti naganda iti libro ti biag agraman dagidiay saan pay a naisurat ti naganda iti dayta? Kaano nga umawat iti biag nga agnanayon dagidiay naisuraten ti naganda iti dayta a libro? Dagidiay ngay awan man la ti gundawayda a nangammo maipapan ken Jehova sakbay a natayda? Mabalin pay kadi a maisurat ti naganda iti dayta a libro? Masungbatan dagita iti daytoy nga artikulo ken iti sumaruno.

MAKINNAGAN DAGITI NAISURATEN ITI LIBRO?

5-6. (a) Kas ipakita ti Filipos 4:3, makinnagan dagiti naisuraten iti libro ti biag? (b) Kaanonto a permanente a maisurat ti naganda iti libro ti biag?

⁵ Makinnagan dagiti naisuraten iti daytoy simboliko a libro? Tapno masungbatan dayta, pagsasaritaantayo ti lima a nagduduma a grupo dagiti tattao. Naisuraten iti libro ti biag ti nagan ti dadduma kadakuada, ngem ti dadduma ket saan.

⁶ Ti umuna a grupo ket buklen dagidiay napili a makipagturay ken Jesus idiay langit. Naisurat kadin ti naganda iti libro ti biag? Wen. Sigun iti imbaga ni apostol Pablo kadagiti ‘katrabahuanna’ idiay Filipos, naisuraten iti  libro ti biag ti nagan dagiti dinutokan ti espiritu a naawis a makipagturay ken Jesus. (Basaen ti Filipos 4:3.) Ngem tapno agtalinaed ti naganda iti dayta a simboliko a libro, masapul nga agtalinaedda a matalek. Ket inton maawatda ti maudi a pannakaselioda, sakbay man a matayda wenno sakbay a mangrugi ti dakkel a rigat, permanenten a maisurat ti naganda iti daytoy a libro.​—Apoc. 7:3.

7. Sigun iti maawatantayo iti Apocalipsis 7:16, 17, kaano a permanente a maisurat iti libro ti biag ti nagan ti dakkel a bunggoy ti sabsabali a karnero?

⁷ Ti maikadua a grupo ket buklen ti dakkel a bunggoy ti sabsabali a karnero. Naisurat kadin ti naganda iti libro ti biag? Wen. Adda pay la kadi ti naganda iti libro ti biag kalpasan a makalasatda iti Armagedon? Wen. (Apoc. 7:14) Imbaga ni Jesus a dagitoy nga arig karnero ket “agbiagto nga agnanayon.” (Mat. 25:46) Ngem dagiti makalasat iti Armagedon ket saan a dagus nga umawat iti biag nga agnanayon. Kas man la nakasurat pay laeng iti lapis ti naganda iti libro ti biag. Bayat ti Sangaribu a Tawen a Turay, ni Jesus “ti mangipastor ken mangiturong kadakuada kadagiti ubbog ti dandanum ti biag.” Dagidiay agtulnog iti panangidalan ni Kristo ken mapaneknekan a matalek ken Jehova bayat ti maudi a panangukom ket permanententon a maisurat ti naganda iti libro ti biag.​—Basaen ti Apocalipsis 7:16, 17.

8. Makinnagan dagiti saan a naisurat iti libro ti biag, ken ania ti mapasamakto kadakuada?

⁸ Ti maikatlo a grupo ket buklen dagiti kalding a madadael inton Armagedon. Saan a naisurat ti naganda iti libro ti biag. Kuna ni Jesus a “madadaelto dagitoy iti agnanayon.” (Mat. 25:46) Inwanwan ti Dios ni Pablo a mangibaga a “dagitoy a mismo ket ukomento ti Apo. Dusaenna ida iti agnanayon a pannakadadael.” (2 Tes. 1:9; 2 Ped. 2:9) Kasta met laeng ti makuna kadagidiay nangigagara ken mangigaggagara nga agbasol maibusor iti nasantuan nga espiritu. Madadaeldanto met iti agnanayon, saanda nga umawat iti biag nga agnanayon. Nalawag a saandanto a mapagungar. (Mat. 12:32; Mar. 3:28, 29; Heb. 6:4-6) Usigentayo itan ti dua a grupo dagiti tattao a mapagungarto ditoy daga.

DAGITI MAPAGUNGAR

9. Sigun iti Aramid 24:15, ania a dua a grupo dagiti tattao ti mapagungarto ditoy daga, ken ania ti nagdumaanda?

⁹ Dinakamat ti Biblia ti dua a grupo dagiti tattao a mapagungar nga addaan gundaway nga agbiag nga agnanayon ditoy daga, “dagiti nalinteg” ken “dagiti nakillo.” (Basaen ti Aramid 24:15.) “Dagiti nalinteg” ket dagiti simamatalek a nagserbi ken Jehova bayat a sibibiagda. Iti sabali a bangir, “dagiti nakillo” ket dagiti tattao a saan a nagserbi ken Jehova sakbay a natayda. Kinapudnona, kaaduan kadakuada ti saan a nagaramid iti naimbag. Gapu ta mapagungar dagita a dua a grupo, makunatayo kadi a naisurat dagiti naganda iti libro ti biag? Tapno masungbatan dayta, usigentayo ti tunggal grupo.

10. Apay a mapagungarto “dagiti nalinteg,” ken ania a pribilehio ti maawat ti dadduma kadakuada? (Kitaen met iti daytoy a ruar ti “Salsaludsod Dagiti Agbasbasa” maipapan iti panagungar ditoy daga.)

¹⁰ “Dagiti nalinteg” ti maikapat a grupo. Sakbay a natayda, naisuraten ti naganda iti libro ti biag. Idi natayda, naikkat kadi dagiti naganda iti dayta a libro? Saan, ta “sibibiagda” latta iti lagip ni Jehova. Ni Jehova ket “Dios, saan a dagiti natay, no di ket dagiti sibibiag, ta sibibiagda amin kenkuana.” (Luc. 20:38) Kayat a sawen dayta nga inton dagiti nalinteg ket mapagungar ditoy daga, addanto  latta dagiti naganda iti libro ti biag. Ngem arigna nakasurat pay laeng dagita iti “lapis.” (Luc. 14:14) Sigurado a dadduma kadagita a mapagungar ket umawatto iti pribilehio nga agserbi kas “piprinsipe iti intero a daga.”​—Sal. 45:16.

11. Anianto ti masapul a maisuro kadagiti “nakillo” sakbay a maisurat ti naganda iti libro ti biag?

¹¹ Kamaudiananna, usigentayo ti maikalima a grupo, “dagiti nakillo.” Nalabit gapu ta dida ammo dagiti kayat ni Jehova nga aramidenda, saan a nalinteg ti panagbiagda sakbay a natayda. Dayta ti rason a saan a naisurat ti naganda iti libro ti biag. Ngem pagungaren ida ti Dios tapno ikkanna ida iti gundaway a maisuratto met laeng ti naganda iti dayta a libro. Adunto a tulong ti kasapulan dagitoy a “nakillo.” Sakbay a natayda, nakarangranggas ti dadduma kadakuada ken nakadakdakes ti ar-aramidenda. Masapul ngarud a maisuro kadakuada no kasano ti agbiag maitunos kadagiti nalinteg a pagalagadan ni Jehova. Tapno maaramidda dayta, iwanwanto ti Pagarian ti Dios ti kasaknapan a programa ti panangisuro iti intero a pakasaritaan ti tao.

12. (a) Siasinonto ti mangisuro kadagiti nakillo? (b) Anianto ti mapasamak kadagidiay saanda a kayat nga iyaplikar dagiti nasursuroda?

¹² Siasinonto ti mangisuro kadagiti nakillo? Ti dakkel a bunggoy ken dagiti nalinteg a mapagungar. Tapno maisurat iti libro ti biag ti nagan dagiti nakillo, masapul a maaddaanda iti relasion ken Jehova ken idedikarda ti biagda kenkuana. Obserbaranto a naimbag ni Jesu-Kristo ken dagiti kakaduana nga ukom ti panagrang-ay ti amin a nakillo. (Apoc. 20:4) Asinoman a dina kayat ti umawat iti kasta a tulong ket saanto a mapalubosan nga agtultuloy nga agbiag​—uray no mabalin nga agtawenton iti 100. (Isa. 65:20) Mabasa ni Jehova ken ni Jesus ti puso dagiti tattao ken siguraduenda nga awanto ti mapalubosan a mangriribuk iti baro a lubong.​—Isa. 11:9; 60:18; 65:25; Juan 2:25.

 PANAGUNGAR TAPNO AGBIAG KEN MAUKOM

13-14. (a) Ania idi ti naawatantayo iti imbaga ni Jesus iti Juan 5:29? (b) Ania ti masapul a laglagipentayo maipapan kadagita nga imbagana?

¹³ Dinakamat met ni Jesus ti maipapan kadagidiay mapagungar ditoy daga. Kas pagarigan, imbagana: “Dumtengto ti tiempo nga amin a natay nga adda iti pakalaglagipan a tanem mangngegdanto ti timekna ket rummuarda, dagidiay nagaramid iti naimbag mapagungarda tapno agbiag, ken dagidiay nagaramid iti dakes mapagungarda tapno maukom.” (Juan 5:28, 29) Ania ti kayat a sawen ni Jesus?

¹⁴ Ti naawatantayo idi a tuktukoyen dagiti imbaga ni Jesus ket dagiti aramiden dagiti mapagungar kalpasan ti panagungarda. Kayatna a sawen, ti dadduma a mapagungar ket agaramidto iti naimbag, ngem ti dadduma a mapagungar ket agaramidto iti dakes. Nupay kasta, laglagipentayo a saan nga imbaga ni Jesus a dagidiay rummuar kadagiti pakalaglagipan a tanem ket agaramidto iti naimbag wenno agaramidto iti dakes. Inusarna ti past tense, kayatna a sawen, nalpasen. Ti imbagana ket dagidiay “nagaramid iti naimbag” ken dagidiay “nagaramid iti dakes.” Ipakita dayta a dagiti inaramidda ket naaramid sakbay ti ipapatayda. Rasonable dayta ta awanto ngaminen ti mapalubosan nga agaramid iti dakes idiay baro a lubong. No kasta, dagiti dakes nga aramid dagiti nakillo ket inaramidda sakbay ti ipapatayda. Ania ngarud ti kayat a sawen ni Jesus idi imbagana a “mapagungarda tapno agbiag” ken “mapagungarda tapno maukom”?

15. Siasino dagiti ‘mapagungar tapno agbiag,’ ken apay?

¹⁵ Dagiti nalinteg, a nagaramid iti naimbag sakbay ti ipapatayda ket ‘mapagungarto tapno agbiag’ ta naisuraten dagiti naganda iti libro ti biag. Kaipapanan dayta a ti panagungar “dagidiay nagaramid iti naimbag” a nadeskribir iti Juan 5:29 ket ti met laeng panagungar “dagiti nalinteg” a nadakamat iti Aramid 24:15. Daytoy a pannakailawlawag ket maitunos iti mabasa iti Roma 6:7: “Ti natayen a tao ket naabsuelton iti basolna.” Dagiti basol dagitoy a nalinteg ket inabsuelton ni Jehova idi natayda. Ngem malaglagipna latta ti kinamatalekda idi sibibiagda. (Heb. 6:10) Siempre, masapul nga agtalinaed a matalek dagitoy a nalinteg a mapagungar tapno agtalinaed ti naganda iti libro ti biag.

16. Ania ti kayat a sawen ti “mapagungarda tapno maukom”?

¹⁶ Dagidiay ngay nagaramid iti dakes sakbay a natayda? Uray no naabsuelton dagiti basolda idi natayda, saanda nga agserserbi ken Jehova idi sibibiagda. Saan pay a naisurat ti naganda iti libro ti biag. No kasta, ti panagungar “dagidiay nagaramid iti dakes” ket ti met laeng panagungar “dagiti nakillo” a nadakamat iti Aramid 24:15. “Mapagungarda tapno maukom.” * Dagiti nakillo ket maukom, kayatna a sawen, obserbaran ken subokento ida ni Jesus. (Luc. 22:30) Tiempo ti kasapulan sakbay a maikeddeng no maikari a maisurat ti naganda iti libro ti biag. No saanton nga uliten dagiti nakillo ti dati a dakes a kabibiagda ken idedikarda ti biagda ken Jehova, sa la maisurat ti naganda iti libro ti biag.

17-18. Anianto ti masapul nga aramiden ti amin a mapagungar ditoy daga, ken ania dagiti ‘aramid’ a tuktukoyen ti Apocalipsis 20:12, 13?

 ¹⁷ Dagiti man mapagungarto ket dati a nalinteg wenno nakillo, masapul nga agtulnogdanto kadagiti linteg nga adda kadagiti baro a lukot a maukrad bayat ti 1,000 a tawen. Dineskribir ni apostol Juan dagiti nakitana iti sirmata: “Nakitak dagiti natay, dagiti natan-ok ken nanumo, a nakatakder iti sanguanan ti trono, ket naukrad dagiti lukot. Ngem naukrad ti sabali pay a lukot; dayta ti lukot ti biag. Naukom dagiti natay kadagiti banag a naisurat kadagiti lukot sigun kadagiti aramidda.”​—Apoc. 20:12, 13.

¹⁸ Ania dagiti ‘aramid’ a pakaukoman dagiti mapagungar? Dagiti kadi inaramidda sakbay a natayda? Saan! Laglagipentayo nga idi natayda, naabsuelton dagiti basolda. Isu a dagiti “aramidda” ket saan a dagiti inaramidda sakbay a natayda. Tumukoy la ketdi dagita kadagiti aramidenda kalpasan a masursuruanda idiay baro a lubong. Masapulto nga ammuen uray dagiti matalek a lallaki a kas kada Noe, Samuel, David, ken Daniel ti maipapan ken Jesu-Kristo ken ipakitada ti pammatida iti sakripisiona. Lallalo a masapul a kastanto ti aramiden dagiti nakillo!

19. Anianto ti maudi a pagtungpalan dagidiay saan nga umawat iti daytoy nakasaysayaat nga oportunidad?

¹⁹ Anianto ti maudi a pagtungpalan dagidiay saan nga umawat iti daytoy nakasaysayaat nga oportunidad? Kuna ti Apocalipsis 20:15: “Naitapuak met iti danaw nga apuy ti asinoman a saan a nasarakan a naisurat iti libro ti biag.” Wen, naan-anay a madadaeldanto iti agnanayon! Nakapatpateg ngarud a siguraduentayo a naisurat ti nagantayo iti libro ti biag ken agtalinaed dayta sadiay!

20. Ania a makapagagar a trabaho ti maaramidto bayat ti Sangaribu a Tawen a Turay? (Kitaen ti ladawan iti akkub.)

²⁰ Talaga a makapagagar a tiempo ti Sangaribu a Tawen a Turay! Tiemponto dayta a maaramid ti kasaknapan a programa ti panangisuro iti intero a daga. Ngem tiemponto met dayta a maobserbaran ken masubok ti kababalin dagiti nalinteg ken dagiti nakillo. (Isa. 26:9; Ara. 17:31) Kasanonto a maaramid dayta a programa ti panangisuro? Makatulong ti sumaruno nga artikulo tapno maawatan ken maapresiartayo daytoy a nakasaysayaat nga urnos.