TƆM ÑƲƲ ŊGƲ ÐƖKPƐLƖKƖƔ YƆ 39
Ña-hɩɖɛ wɛ «wezuu takayaɣ taa»?
«Pama ɛ-camɩyɛ lakasɩ takayaɣ [yaa tɔzʋʋ takayaɣ] ɛ-ɛsɩndaa mba pañaŋ [Yehowa] . . . yɔ.»—MAL. 3:16.
HENDU 61 Yehowa Aseɣɖe Tɩnaa, iwolo ɛzɩdaa!
LƖMAƔZA SƆSƆNA *
Kpaɣnɩ Aabɛɛlɩ alɩwaatʋ taa, Yehowa wɛɛ nɛ ɛsɔzʋʋ hɩla «wezuu takayaɣ» taa (Cɔnɩ tayʋʋ 1-2)
1. Ɛzɩ Malakiya 3:16 yɔɔdʋʋ yɔ, takayaɣ ŋga Yehowa wɛɛ nɛ ɛmaɣ, nɛ ɛbɛ wɛ takayaɣ ŋga ka-taa?
PƖLAKƖ pɩnzɩ kudokiŋ sakɩyɛ yɔ, Yehowa wɛɛ nɛ ɛmaɣ ŋgee takayaɣ nakɛyɛ. Hɩla wɛnɩ takayaɣ ŋga ka-taa, nɛ aseɣɖe tʋ siɣsiɣ tʋ Aabɛɛlɩ hɩɖɛ ɛcalɩnɩ maʋ ka-taa. * (Luka 11:50, 51) Kpaɣnɩ alɩwaatʋ ndʋ lɛ, Yehowa sɔzɩ hɩla takayaɣ ŋga ka-taa; nɛ sɔnɔ ɛyaa miiliyɔɔwaa sakɩyɛ hɩla wɛnɩ ka-taa. Bibl yaɣ takayaɣ ŋga se «camɩyɛ lakasɩ takayaɣ [yaa tɔzʋʋ takayaɣ,]» «wezuu takayaɣ,» nɛ «wezuu takayaɣ kikpiyaɣ.» Tɔm ñʋʋ kʋnɛ kɩ-taa, ɖɩkaɣ takayaɣ ŋga yaʋ se «wezuu takayaɣ.»—Kalɩ Malakiya 3:16; Natʋ 3:5; 17:8.
2. (a) Mba hɩla pamaɣ wezuu takayaɣ taa? (b) Ɛbɛ ɖɩpɩzɩɣ ɖɩla nɛ pama ɖa-hɩɖɛ takayaɣ ŋga ka-taa?
2 Ɛyaa mba payɩ pɛsɛɣ Yehowa nɛ ñamtʋ siŋŋ nɛ pɔsɔɔlɩ ɛ-hɩɖɛ yɔ, pa-hɩla wɛ ŋgee takayaɣ ŋga ka-taa. Pakaɣ wɛnʋʋ waɖɛ se paha-wɛ wezuu maatɛŋ. Sɔnɔ, ye ɖɩtɩŋnɩ Yehowa Pɩyalʋ Yesu Krɩstʋ yɔɔ nɛ ɖɩñaɣ pana nɛ taabalɩyɛ kɩbanɖɛ wɛɛ ɖa nɛ Yehowa ɖɛ-hɛkʋ taa yɔ, papɩzɩɣ nɛ pama ɖa-hɩla wezuu takayaɣ taa. (Yoh. 3:16, 36) Paa ɖɩwɛnɩ lidaʋ se ɖɩkaɣ caɣʋ wezuu ɛsɔdaa yaa tataa yɔ, ɖa-tɩŋa payɩ ɖɩsɔɔlaa se pama ɖa-hɩla wezuu takayaɣ ŋga ka-taa.
3-4. (a) Ye alɩwaatʋ tʋnɛ tɩ-taa pama ɖa-hɩɖɛ wezuu takayaɣ taa yɔ, ɛzɩ pɩwɩlɩɣ se ɖɩkaɣ caɣʋ wezuu maatɛŋ? Lɩzɩ pɩ-taa. (b) Ɛbɛ ɖɩkaɣ naʋ tɔm ñʋʋ kʋnɛ nɛ ŋgʋ kɩkɔŋ yɔ ɩ-taa?
3 Ɛzɩ pɩwɩlɩɣ se mba payɩ pama pa-hɩla takayaɣ ŋga ka-taa yɔ paa pɩɩkpawa nɛ pitii yɔ pehikiɣ wezuu maatɛŋ? Ðɩnaɣ tɔm ndʋ tɩ-yɔɔ cosuu tɔm ndʋ Yehowa heyi Moyizi nɛ pama-tʋ Ejipiti Lɩʋ 32:33 taa yɔ tɩ-taa. Yehowa yɔɔdɩ peeɖe se: «Weyi ɛɖʋ-m ɖɩwɩzɩyɛ yɔ, ɛnʋ mahɩzɩɣ man-takayaɣ taa.» Ye mbʋ, hɩla wena awɛ takayaɣ ŋga ka-taa lɛɛlɛɛyɔ yɔ, papɩzɩɣ nɛ pahɩzɩ-yɛ. Ðɩpɩzɩɣ nɛ ɖɩyɔɔdɩ se pɩwɛ ɛzɩ kiɖe tɛɛ lɛ, Yehowa ma hɩla ana nɛ kɩɖɩñɔɔ yɔ. (Natʋ 3:5) Pɩwɛɛ se ɖɩñaɣ pana nɛ ɖa-hɩɖɛ wɛɛ takayaɣ ŋga ka-taa pɩkɔɔ nɛ pɩtalɩ alɩwaatʋ ndʋ pamaɣ-ɖɩ nɛ tɔlɩm nɛ ɖɩwɛɛ tam yɔ.
4 Pɩpɩzɩɣ piyele nɛ ɖɩpɔzʋʋ tɔm ɛzɩ tʋnɛ: Suwe Bibl yɔɔdʋʋ ɛyaa mba pama pa-hɩla wezuu takayaɣ taa nɛ ɛyaa mba patɩma pa-hɩla takayaɣ ŋga ka-taa yɔ pɔ-yɔɔ? Ɛyaa mba pama pa-hɩla takayaɣ ŋga ka-taa yɔ, ɛzɩmtaa pakaɣ-wɛ haʋ wezuu maatɛŋ? Mba patihiɣ waɖɛ wiɖiyi se pɛkpɛlɩkɩ nɛ patɩlɩ Yehowa pʋcɔ nɛ pasɩ yɔ, ɛbɛ pɩtɛŋnɩ-wɛ? Ɛzɩ papɩzɩɣ nɛ pama pa-hɩla wezuu takayaɣ ŋga ka-taa? Pakaɣ tɔm pɔzʋʋ mbʋ pɩ-yɔɔ cosuu tɔm ñʋʋ kʋnɛ nɛ ŋgʋ kɩkɔŋ yɔ ɩ-taa.
MBA HƖLA WƐ WEZUU TAKAYAƔ TAA?
5-6. (a) Ɛzɩ Filiipi mba 4:3 yɔɔdʋʋ yɔ, hɩla wena pama wezuu takayaɣ taa yɔ, mba hɩla wɛ a-taa? (b) Alɩwaatʋ ndʋ pakaɣ maʋ pa-hɩla wezuu takayaɣ taa tam?
5 Mba hɩla pama wezuu takayaɣ taa? Pɩsa nɛ ɖicosi tɔm ndʋ tɩ-yɔɔ lɛ, ɖɩkaɣ yɔɔdʋʋ ɛyaa tindima ndɩ ndɩ kagbanzɩ tɔm. Tindima ana, pama a-taa naayɛ hɩla wezuu takayaɣ taa ɛlɛ lɛɛna lɛ patɩma a-hɩla ka-taa.
6 Mba palɩzɩ-wɛ se pa nɛ Yesu pɔtɔɔ kewiyitu ɛsɔdaa yɔ, mba wɛnɩ kajalaɣ tindimiye taa. Ɛzɩ pama pa-hɩla wezuu takayaɣ taa alɩwaatʋ tʋnɛ tɩ-taa? Ɛɛɛ. Tɔm ndʋ apostoloo Pɔɔlɩ mawa nɛ etiyini Filiipi Krɩstʋ ñɩma ‘mba ɛ nɛ wɛ palakɩ tʋmɩyɛ’ yɔ, tɩwɩlɩɣ se patam numwaa pʋ-tɔbʋʋ se mba paya-wɛ se pa nɛ Yesu pɔtɔɔ kewiyitu yɔ, pa-hɩla wɛ wezuu takayaɣ taa lɛɛlɛɛyɔ. (Kalɩ Filiipi mba 4:3.) Ɛlɛ pɩsa nɛ pa-hɩla wɛɛ takayaɣ ŋga ka-taa tam lɛ, pɩpɔzʋʋ se powolo pɩ-yɔɔ nɛ pɛwɛɛ siɣsiɣ. Pamʋʋ pɛ-kɛdɛzaɣ mayaɣ nɛ pɩtɛ lɛ, pamaɣ pa-hɩla wezuu takayaɣ taa tam. Pɩlakɩ mbʋ pʋcɔ nɛ pasɩ yaa pʋcɔ nɛ kʋñɔŋ sɔsɔʋ paɣzɩ.—Natʋ 7:3.
7. Tɔm ndʋ tɩwɛ Natʋ 7:16, 17 taa yɔ, ɛzɩma tɩsɩɣnɩ-ɖʋ se ɖɩtɩlɩ alɩwaatʋ ndʋ pakaɣ maʋ samaɣ sɔsɔɔ taa mba hɩla wezuu takayaɣ taa tam yɔ?
7 Samaɣ sɔsɔɔ taa mba yaa heŋ lɛɛŋ wɛnɩ tindimiye naalɛ ñɩnɖɛ taa. Ɛzɩ pama pa-hɩla wezuu takayaɣ taa lɛɛlɛɛyɔ? Ɛɛɛ. Pehikiɣ ñʋʋ yabʋ Armaagedɔɔ you taa nɛ pɩtɛ lɛ, ɛzɩ pa-hɩla wɛɣ wezuu takayaɣ taa mbʋ? Ɛɛɛ. (Natʋ 7:14) Yesu kpaɣ-wɛ nɛ ɛmaɣzɩnɩ heŋ nɛ ɛyɔɔdɩ se pakaɣ wobu «wezuu maatɛŋ taa.» (Mat. 25:46) Ɛlɛ ɛyaa mba pehikiɣ ñʋʋ yabʋ Armaagedɔɔ you taa yɔ paakaɣ-wɛ haʋ wezuu maatɛŋ kpaagbaa. Pa-hɩla kaɣ wobu pɩ-yɔɔ nɛ awɛɛ wezuu takayaɣ taa ɛzɩ paamaʋ-yɛ nɛ kɩɖɩñɔɔ yɔ. Pɩnzɩ Kudoku Kewiyitu Tɔɔʋ alɩwaatʋ taa, Yesu ‘kaɣ-wɛ ɖiyuu nɛ ewoni-wɛ wezuu lɩm hila cɔlɔ.’ Mba petisiɣ nɛ Yesu ɖiyi-wɛ nɛ pɩtɛmna se pakpakɩɣ-wɛ se pɛwɛ siɣsiɣ Yehowa ɛsɩndaa kɛdɛzaɣ tɔm hʋʋ alɩwaatʋ taa yɔ, pakaɣ maʋ pa-hɩla tam wezuu takayaɣ taa.—Kalɩ Natʋ 7:16, 17.
8. Mba hɩla patɩma wezuu takayaɣ taa, nɛ ɛbɛ kaɣ-wɛ talʋʋ?
8 Tindimiye naadozo ñɩnɖɛ taa mba lɛ ɛyaa mba pakpaɣ-wɛ nɛ pamaɣzɩnɩ pʋŋ nɛ pakaɣ-wɛ ɖɩzʋʋ Armaagedɔɔ you taa yɔ. Pa-hɩla fɛyɩ wezuu takayaɣ taa. Yesu yɔɔdaa se: «Pakaɣ wobu ɖɩzʋʋ maatɛŋ taa.» (Mat. 25:46) Fezuu kiɖeɖeu ɖiyi Pɔɔlɩ nɛ eheyi-ɖʋ se: «Pakaɣ hɔm ɛyaa mba pa-nɩŋgbaaŋ nɛ paɖɩzɩ-wɛ tamtam.» (2 Tes. 1:9; 2 Pɩy. 2:9) Mbʋ ɖɔɖɔ, ɛyaa wezuu caɣʋ taa, mba payɩ paɖʋ faɖaɖa nɛ payʋsɩnɩ fezuu kiɖeɖeu yɔ, paakaɣ hiɣu wezuu maatɛŋ; ɛlɛ pakaɣ-wɛ ɖɩzʋʋ tamtam. Pɩnaɣ kpayɩ kpayɩ se paakaɣ-wɛ fezuu. (Mat. 12:32; Mark. 3:28, 29; Ebr. 6:4-6) Lɛɛlɛɛyɔ lɛ, eyele nɛ ɖɩyɔɔdɩ ɛyaa tindima naalɛ wena pakaɣ fezuu tɛtʋ yɔɔ yɔ a-tɔm.
MBA PAKAƔ-WƐ FEZUU YƆ
9. (a) Ɛzɩ Tʋma Labʋ 24:15 wɩlʋʋ yɔ, ɛyaa tindima naalɛ wena pakaɣ fezuu tɛtʋ yɔɔ? (b) Tʋkaɣ ŋga wɛ ɛyaa tindima naalɛ ana a-hɛkʋ taa?
9 Bibl yɔɔdʋʋ ɛyaa tindima naayɛ naalɛ tɔm se pakaɣ a-taa mba fezuu, nɛ pɛwɛnɩ lidaʋ se pakaɣ caɣʋ wezuu tam tam tɛtʋ yɔɔ. Ɛyaa tindima ana lɛ «ɛyaa siɣsiɣ tɩnaa» nɛ «mba pɛfɛyɩ siɣsiɣ yɔ.» (Kalɩ Tʋma Labʋ 24:15.) «Ɛyaa siɣsiɣ tɩnaa» lɛ ɛyaa mba pɛsɛ Yehowa siɣsiɣ pʋcɔ nɛ pasɩ yɔ. Piyele nɛ «mba pɛfɛyɩ siɣsiɣ yɔ,» patɩsɛɛ Yehowa siɣsiɣ pʋcɔ nɛ pasɩ. Toovenim taa lɛ, hɔɔlɩŋ sakɩyɛ taa lɛ, pataawɛɛ siɣsiɣ Yehowa ɛsɩndaa mbʋ pʋyɔɔ yɔ patɩcaɣ wezuu nɛ pɩla nɔɔ kʋɖʋmaɣ nɛ ɛ-paɣtʋ nɛ ɛ-paɣtʋ kila. Paɖʋʋ se pefeziɣ tindima naalɛ ana a-taa mba yɔ, ɛzɩ ɖɩpɩzɩɣ nɛ ɖɩyɔɔdɩ se pama pa-hɩla wezuu takayaɣ taa? Pɩsa nɛ ɖicosi tɔm pɔzʋʋ mbʋ pʋyɔɔ lɛ, iyele nɛ ɖɩyɔɔdɩ paa tindimiye nɖɩ lɛ ɖɩ-yɔɔ tɔm.
10. (a) Ɛbɛ yɔɔ pakaɣ fezuu «ɛyaa siɣsiɣ tɩnaa»? (b) Nɛ waɖɛ nɖɩ pakaɣ haʋ pa-taa nabɛyɛ? (Kalɩ ɖɔɖɔ takayaɣ kanɛ ka-taa tɔm ñʋʋ «Tɔm ndʋ ɖa-takayɩsɩ kalɩyaa pɔzʋʋ yɔ», kɩyɔɔdʋʋ ɛyaa mba pakaɣ fezuu tɛtʋ yɔɔ yɔ pɔ-tɔm.)
10 «Ɛyaa siɣsiɣ tɩnaa» kɛnɩ tindimiye naanza ñɩnɖɛ. Pama pa-hɩla wezuu takayaɣ taa pʋcɔ nɛ pasɩ. Alɩwaatʋ ndʋ pasɩba yɔ, ɛzɩ pahɩzɩ pa-hɩla wezuu takayaɣ taa? Aayɩ, mbʋ pʋyɔɔ yɔ, pɛkpɛndɩ pɛwɛ «wezuu» Yehowa maɣzɩm taa. Yehowa tɩkɛ «sɩɖaa tɛ Ɛsɔ, ɛlɛ ɛsadɩnaa tɛ Ɛsɔ, mbʋ pʋyɔɔ yɔ ɛ-ɛsɩndaa lɛ, pa-tɩŋa payɩ pɛwɛ wezuu.» (Luka 20:38) Pʋ-tɔbʋʋ lɛ se alɩwaatʋ ndʋ pefeziɣ ɛyaa siɣsiɣ tɩnaa tɛtʋ yɔɔ yɔ pa-hɩla wɛɣ wezuu takayaɣ taa, ɛlɛ awɛɣ ɛzɩ paamaɣʋ-yɛ nɛ kɩɖɩñɔɔ yɔ. (Luka 14:14) Pɩtʋʋ fɛyɩ se ɛyaa siɣsiɣ tɩnaa mba pefeziɣ yɔ, pakaɣ pa-taa nabɛyɛ haʋ waɖɛ nɛ pɛkɛ «awumbiya tɛtʋ kpeekpe yɔɔ.»—Keɣa 44:17.
11. Ɛyaa «mba pɛfɛyɩ siɣsiɣ yɔ», pʋcɔ nɛ papɩzɩ nɛ pama pa-hɩla wezuu takayaɣ taa lɛ, ɛbɛ pɩkaɣ pɔzʋʋ se pɛkpɛlɩkɩ?
11 Kɛdɛzaɣ ɖeɖe lɛ, iyele nɛ ɖɩna tindimiye kagbanzɩ ñɩnɖɛ; nɖɩ lɛ «mba pɛfɛyɩ siɣsiɣ yɔ.» Pɩtɩla yɔ, pataatɩlɩ Yehowa paɣtʋ, pʋyɔɔ lɛ patɩcaɣ wezuu ŋgʋ kɩwɛ siɣsiɣ yɔ pʋcɔ nɛ pasɩ. Pʋyɔɔ lɛ, patɩma pa-hɩla wezuu takayaɣ taa. Ɛlɛ pefeziɣ-wɛ lɛ, Ɛsɔ haɣ-wɛ waɖɛ se pacaɣ wezuu ŋgʋ kiyeki nɛ pama pa-hɩla wezuu takayaɣ taa yɔ. Pɩkaɣ pɔzʋʋ se pasɩnɩ-wɛ siŋŋ. Pʋcɔ nɛ pasɩkɩ lɛ, pa-taa nabɛyɛ kaalabɩ lakasɩ kɩdɛkɛdɩsɩ siŋŋ. Pʋyɔɔ lɛ, pɩkaɣ pɔzʋʋ se pawɩlɩ-wɛ ɛzɩma pacaɣ wezuu nɛ pɩla nɔɔ kʋɖʋmaɣ nɛ Yehowa paɣtʋ nɛ ɛ-paɣtʋ kila yɔ. Pɩsa nɛ pawɩlɩ-wɛ ɛzɩma pala mbʋ yɔ lɛ, Ɛsɔ Kewiyaɣ kaɣ ɖiyuu tɔm wɩlʋʋ tʋmɩyɛ sɔsɔɖɛ naɖɩyɛ; nɛ tʋmɩyɛ nɖɩ, wiɖiyi patɩlabɩtɩ-ɖɩ mbʋ tɛtʋ yɔɔ.
12. (a) Mba kaɣ wɩlʋʋ tɔm ɛyaa mba pɛfɛyɩ siɣsiɣ yɔ? (b) Ɛyaa mba pekiziɣ se paaɖɔŋ tɔm ndʋ pɛkpɛlɩkɩɣ yɔ tɩ-yɔɔ yɔ, ɛbɛ kaɣ-wɛ talʋʋ?
12 Mba kaɣ wɩlʋʋ tɔm ɛyaa mba pɛfɛyɩ siɣsiɣ yɔ? Samaɣ sɔsɔɔ taa mba nɛ ɛyaa siɣsiɣ tɩnaa mba pakaɣ fezuu yɔ. Pɩsa nɛ pama ɛyaa mba pɛfɛyɩ siɣsiɣ yɔ pa-hɩla wezuu takayaɣ taa lɛ, pɩkaɣ pɔzʋʋ se pañaɣ pana nɛ taabalɩyɛ wɛɛ pa nɛ Yehowa pɛ-hɛkʋ taa nɛ paha-ɩ pa-tɩ. Yesu Krɩstʋ nɛ patam numwaa pakaɣ wɛʋ ɛsɔdaa nɛ pɛ-ɛsa kaɣ wɛʋ ɛyaa mba pɛfɛyɩ siɣsiɣ yɔ pɔ-yɔɔ se pana se ɛzɩma pakaɣ mʋʋ tɔm ndʋ pawɩlɩɣ-wɛ yɔ. (Natʋ 20:4) Mba payɩ pekiziɣ se pataasɩnɩ-wɛ yɔ, pakaɣ-wɛ ɖɩzʋʋ paa paawɛnɩ pɩnzɩ 100 yɔ. (Iza. 65:20) Yehowa nɛ Yesu panaɣ mbʋ pɩwɛ ɛyʋ laŋɩyɛ taa yɔ, nɛ paakaɣ nɔɔyʋ haʋ nʋmɔʋ se ɛkɔnɩ asɛyʋʋ nakʋyʋ ɛjaɖɛ kɩfaɖɛ taa.—Iza. 11:9; 60:18; 65:25; Yoh. 2:25.
MBA PEFEŊ SE PEHIƔ WEZUU NƐ MBA PEFEŊ SE PAHƲƲNƖ-WƐ TƆM YƆ
13-14. (a) Tɔm ndʋ Yesu yɔɔdɩ Yohanɛɛsɩ 5:29 taa yɔ, ɖooo lɛ ɛzɩma ɖɩnɩɣaɣ tɩ-taa? (b) Tɔm ndʋ pɩwɛɛ se ɖɩtɩlɩ pɩlɩɩnɩ tɔm ndʋ tɩ-yɔɔ?
13 Yesu yɔɔdɩ ɖɔɖɔ mba pakaɣ-wɛ fezuu tɛtʋ yɔɔ yɔ pɔ-tɔm. Ɛyɔɔdaa se: «Ñɩɣyʋʋ kɔŋ, nɛ kɩ-yɔɔ lɛ, mba payɩ pɛwɛ pɩlaŋ taa yɔ, pakaɣ nɩʋ ɛ-nɔɔ nɛ palɩɩ, mba palabɩ lakasɩ kɩbanzɩ yɔ, pefeŋ se pehiɣ wezuu; nɛ mba palabɩ lakasɩ kɩdɛkɛdɩsɩ yɔ, pefeŋ se pahʋʋnɩ-wɛ tɔm.» (Yoh. 5:28, 29) Suwe Yesu ñɩnaɣ yɔɔdʋʋ?
14 Ðooo lɛ, ɖɩnɩɣaɣ Yesu tɔm ndʋ tɩ-taa se titukuuni mbʋ ɛyaa mba pakaɣ fezuu yɔ pakaɣ labʋ pe-femtu wayɩ yɔ; pʋ-tɔbʋʋ se nabɛyɛ kaɣ fem nɛ pala mbʋ pɩwɛ ɖeu yɔ; nɛ alɩwaatʋ kʋɖʋmtʋ ndʋ tɩ-taa lɛ, lalaa kaɣ fem se pala mbʋ pɩfɛyɩ ɖeu yɔ. Ɛlɛ yʋsɩ se Yesu tɩyɔɔdɩ se ɛyaa ñɩtɩɣ nɛ palɩɩnɩ pɩlaŋ taa lɛ, pakaɣ labʋ mbʋ pɩwɛ ɖeu yɔ yaa pakaɣ labʋ mbʋ pɩfɛyɩ ɖeu yɔ. Ɛlabɩnɩ tʋmɩyɛ tɔm loyisi nzɩ sɩwɩlɩɣ se mbʋ pɩ-tɔm ɛɛwɛɛ nɛ ɛyɔɔdʋʋ yɔ pɩtɛm ɖɛʋ. Ɛyɔɔdɩ mba «palabɩ lakasɩ kɩbanzɩ» nɛ mba «palabɩ lakasɩ kɩdɛkɛdɩsɩ yɔ» pɔ-tɔm. Pɩwɩlɩɣ se ɛyaa mba, paalabɩ lakasɩ nzɩ pʋcɔ nɛ pasɩ. Tɔm ndʋ tɩ-taa wɛ nɩʋ yaa pɩtɩkɛ mbʋ? Toovenim taa lɛ, paakaɣ haʋ nɔɔyʋ nʋmɔʋ se ɛla lakasɩ kɩdɛkɛdɩsɩ ɛjaɖɛ kɩfaɖɛ taa. Ɛyaa mba pɛfɛyɩ siɣsiɣ yɔ, paalabɩ lakasɩ kɩdɛkɛdɩsɩ nzɩ pʋcɔ nɛ pasɩkɩ. Ye mbʋ, ɛzɩma pɩwɛɛ se ɖɩnɩɩ tɔm ndʋ Yesu yɔɔdaa se nabɛyɛ ‘feŋ se pehiɣ wezuu’ nɛ lalaa ‘feŋ se pahʋʋnɩ-wɛ tɔm’ yɔ tɩ-taa?
15. Mba kaɣ ‘fem se pehiɣ wezuu,’ nɛ ɛbɛ yɔɔ?
15 Ɛyaa siɣsiɣ tɩnaa labɩ lakasɩ kɩbanzɩ pʋcɔ nɛ pasɩ, nɛ pakaɣ ‘fem se pehiɣ wezuu’ mbʋ pʋyɔɔ yɔ pɛtɛm pa-hɩla maʋ wezuu takayaɣ taa. Pɩwɩlɩɣ se ɛyaa mba pɔyɔɔdɩ pɔ-tɔm Yohanɛɛsɩ 5:29 taa se «palabɩ lakasɩ kɩbanzɩ» nɛ pakaɣ-wɛ fezuu yɔ, pɔ-tɔm ɖɔɖɔ pɔyɔɔdɩ Tʋma Labʋ 24:15 taa se pɛkɛ «ɛyaa siɣsiɣ tɩnaa» mba pakaɣ-wɛ fezuu yɔ. Tɔm taa nɩʋ pʋnɛ pɩlakɩ nɔɔ kʋɖʋmaɣ nɛ tɔm ndʋ tɩwɛ Roma mba 6:7 taa yɔ. Tɩtɔŋ se: «Ɛyʋ weyi ɛsɩba yɔ, ɛlɩ ɛ-kɩwɛɛkɩm taa.» Ye mbʋ, alɩwaatʋ ndʋ ɛyaa siɣsiɣ tɩnaa mba pasɩba yɔ, Yehowa kpeɣ-wɛ pa-kɩwɛɛkɩm; ɛlɛ ɛkaɣ tɔzʋʋ lakasɩ siɣsiɣ ñɩnzɩ nzɩ payɩ palaba pʋcɔ nɛ pasɩ yɔ sɩ-yɔɔ. (Ebr. 6:10) Toovenim taa lɛ, ɛyaa siɣsiɣ tɩnaa mba pefeziɣ-wɛ yɔ, pɩkaɣ pɔzʋʋ se powolo pɩ-yɔɔ nɛ pɔɖɔkɩ pe-siɣsiɣ wɛtʋ nɛ pɩsa nɛ pa-hɩla wɛɛ wezuu takayaɣ taa tam.
16. Pɔyɔɔdʋʋ se nabɛyɛ ‘feŋ se pahʋʋnɩ-wɛ tɔm’ yɔ, pʋ-tɔbʋʋ lɛ suwe?
16 Piyele nɛ mba palabɩ lakasɩ kɩdɛkɛdɩsɩ pʋcɔ nɛ pasɩ yɔ? Paa pekpeɣ-wɛ pa-kɩwɛɛkɩm alɩwaatʋ ndʋ pasɩba yɔ, pataasɛɛ Yehowa siɣsiɣ pʋcɔ nɛ pasɩ. Patɩma pa-hɩla wezuu takayaɣ taa. Ye mbʋ, «mba palabɩ lakasɩ kɩdɛkɛdɩsɩ» nɛ pakaɣ-wɛ fezuu yɔ, pɔ-tɔm ɖɔɖɔ pɔyɔɔdɩ Tʋma Labʋ 24:15 taa se pɛkɛ ɛyaa «mba pɛfɛyɩ siɣsiɣ» nɛ pakaɣ-wɛ fezuu yɔ. Pɛkɛ ɛyaa mba «pefeŋ se pahʋʋnɩ-wɛ tɔm» yɔ. * Pakaɣ ɛyaa mba pɛfɛyɩ siɣsiɣ yɔ tɔm hʋnʋʋ, pʋ-tɔbʋʋ lɛ se Yesu kaɣ-wɛ takʋʋ. (Luka 22:30) Pʋcɔ nɛ Yesu ɖiɣzina se pamʋnaa se pama pa-hɩla wezuu takayaɣ taa yaa patɩmʋna lɛ, pɩkaɣ kpaɣʋ alɩwaatʋ. Ye peyebi wezuu kɩdɛkɛdʋ ŋgʋ pacakaɣ yɔ nɛ paha pa-tɩ Yehowa yɔ, pi-ɖeke piyekina nɛ ɛma pa-hɩla wezuu takayaɣ taa.
17-18. (a) Ɛyaa mba payɩ pakaɣ-wɛ fezuu se pacaɣ wezuu tɛtʋ yɔɔ yɔ, ɛbɛ pɩkaɣ pɔzʋʋ se pala? (b) Nɛ «lakasɩ» nzɩ pɔyɔɔdɩ sɩ-tɔm Natʋ 20:12, 13 taa yɔ, ɛbɛ sɩsɩŋnaa?
17 Pɩnzɩ 1000 Kewiyitu Tɔɔʋ alɩwaatʋ taa, pakaɣ kuluu takayɩsɩ kikpiyisi kɩfasɩ nasɩyɩ; mba pakaɣ-wɛ fezuu yɔ, paa paawɛ siɣsiɣ pʋcɔ nɛ pasɩ yaa pataawɛɛ siɣsiɣ yɔ, pɩkaɣ pɔzʋʋ se paña paɣtʋ ndʋ tɩwɛ sɩ-taa yɔ. Apostoloo Yohanɛɛsɩ kɛdɩ mbʋ ɛna natʋ natʋyʋ taa yɔ pɩ-tɔm ɛzʋnɔ: «Mana sɩɖaa, sɔsaa nɛ cikpema, pasɩŋ kewiyaɣ kpelaɣ ɛsɩndaa; nɛ pokuli takayɩsɩ kikpiyisi. Ɛlɛ pokuli takayaɣ kikpiyaɣ lɛɛka; kɛkɛ wezuu takayaɣ kikpiyaɣ. Patɩŋnɩ tɔm ndʋ pama takayɩsɩ kikpiyisi nzɩ sɩ-taa yɔ tɩ-yɔɔ nɛ pahʋʋnɩ sɩɖaa tɔm pa-lakasɩ yɔɔ.»—Natʋ 20:12, 13.
18 Mba pakaɣ-wɛ fezuu yɔ, «lakasɩ» nzɩ yɔɔ pakaɣ-wɛ tɔm hʋnʋʋ? Ɛzɩ pɩkaɣ kɛʋ lakasɩ nzɩ paalaba nɛ pʋcɔ pasɩkɩ yɔ? Aayɩ! Tɔzɩ se alɩwaatʋ ndʋ pasɩba yɔ, palɩ kɩwɛɛkɩm mbʋ paalaba nɛ pɩɖɛɛ yɔ pɩ-taa. Ye mbʋ, «pa-lakasɩ» nzɩ sɩ-tɔm pɔyɔɔdʋʋ cɩnɛ yɔ, sɩɩpɩzɩɣ nɛ sɩkɛ lakasɩ nzɩ paalaba pʋcɔ nɛ pasɩ yɔ. Ɛlɛ, situkuuni mbʋ pakaɣ labʋ alɩwaatʋ ndʋ pamʋʋ falɩsʋʋ ɛjaɖɛ kɩfaɖɛ taa yɔ. Halɩ pɩkaɣ pɔzʋʋ se ɛyaa siɣsiɣ tɩnaa ɛzɩ Noowa, Samɩyɛɛlɩ, Daviid, nɛ Danɩyɛɛlɩ pɛkpɛlɩkɩ Yesu Krɩstʋ yɔɔ tɔm nɛ pɛwɛɛnɩ tisuu ɛ-kɩlaʋ yɔɔ. Ye pɩwɛɛ se abalaa mba pɛkpɛlɩkɩ tɔm sakɩyɛ yɔ, pɩwɩlɩɣ se ɛyaa mba pɛfɛyɩ siɣsiɣ yɔ pɩkaɣ pɔzʋʋ se pɛkpɛlɩkɩ tɔm sakɩyɛ nɛ pɩkɩlɩ!
19. Mba pekiziɣ waɖɛ kɩbanɖɛ nɖɩ yɔ, ɛbɛ pɩkaɣ-wɛ tɛmnʋʋ?
19 Ɛbɛ pɩkaɣ tɛmnʋʋ mba pekiziɣ waɖɛ kɩbanɖɛ nɖɩ yɔ? Natʋ 20:15 heyiɣ-ɖʋ se: «Weyi patɩna ɛ-hɩɖɛ wezuu takayaɣ taa yɔ, pɔlɔ-ɩ miŋ lɩyɛ taa.» Ɛɛɛ, pakaɣ-wɛ ɖɩzʋʋ caɣ caɣ. Ye mbʋ, pɩcɛyɩ siŋŋ se ɖɩñaɣ pana nɛ pama ɖa-hɩɖɛ wezuu takayaɣ taa nɛ ɖɩwɛɛ ka-taa tam!
Koobu abalɩñɩnʋ nɔɔyʋ wɛɛ nɛ ɛɖʋʋ nesi tɔm wɩlʋʋ tʋmɩyɛ sɔsɔɖɛ nɖɩ pakaɣ labʋ Pɩnzɩ Kudoku Kewiyitu Tɔɔʋ alɩwaatʋ taa yɔ (Cɔnɩ tayʋʋ 20)
20. Tʋmɩyɛ kɩbanɖɛ nɖɩ pakaɣ labʋ Pɩnzɩ Kudoku Kewiyitu Tɔɔʋ alɩwaatʋ taa? (Cɔnɩ takayaɣ huyuu yɔɔ kɩlɛmʋʋ.)
20 Pɩnzɩ Kudoku Kewiyitu Tɔɔʋ alɩwaatʋ kaɣ kɛʋ alɩwaatʋ kɩbandʋ kpem! Alɩwaatʋ ndʋ tɩ-taa, Ɛsɔ samaɣ kaɣ ɖʋʋ nesi tɔm wɩlʋʋ tʋmɩyɛ sɔsɔɖɛ naɖɩyɛ nɛ wiɖiyi patɩlabɩtɩ-ɖɩ mbʋ tɛtʋ yɔɔ. Ɛlɛ alɩwaatʋ ndʋ tɩ-taa ɖɔɖɔ lɛ, pɩkaɣ pɔzʋʋ se ɛyaa siɣsiɣ tɩnaa nɛ mba pɛfɛyɩ siɣsiɣ yɔ pawɩlɩ se pɔsɔɔlɩ faaa se pañaŋ Yehowa paɣtʋ. (Iza. 26:9; Tʋma 17:31) Ɛzɩma pakaɣ labʋ tɔm wɩlʋʋ tʋmɩyɛ nɖɩ? Tɔm ñʋʋ ŋgʋ kɩkɔŋ yɔ, kɩkaɣ-ɖʋ sɩnʋʋ nɛ ɖɩna ɛzɩma pɩkaɣ ɖɔm yɔ. Nɛ kɩkaɣ-ɖʋ sɩnʋʋ ɖɔɖɔ nɛ ɖɩwɛɛnɩ ɛsɩmɩyɛ ɖʋtʋ kɩbandʋ ndʋ tɩ-yɔɔ.
HENDU 147 Wezuu maatɛŋ lidaʋ
^ Yesu yɔɔdɩ Yohanɛɛsɩ 5:28, 29 taa se nabɛyɛ ‘feŋ se pehiɣ wezuu’ nɛ lalaa ‘feŋ se pahʋʋnɩ-wɛ tɔm.’ Tɔm ñʋʋ kʋnɛ, kɩyɔɔdʋʋ lɛɣzɩtʋ ndʋ ɖɩlaba pɩlɩɩnɩ ɛzɩma ɖɩnɩɣaɣ tɔm ndʋ tɩ-taa yɔ pɩ-tɔm. Ðɩkaɣ nɩʋ femtu ndʋ tɩ-naalɛ tɩ-tɔbʋʋ, nɛ ɖɩkaɣ naʋ mba pɔ-tɔm pɔyɔɔdɩ femtu ndʋ tɩ-taa yɔ.
^ Papaɣzɩ takayaɣ ŋga maʋ «ɛjaɖɛ kiɖe tɛɛ.» Pɩtɩkɛ kedeŋa maɣmaɣ tɔm pɔyɔɔdʋʋ cɩnɛ, ɛlɛ ɛyaa mba pɛwɛnɩ lidaʋ se pakaɣ-wɛ holuu kɩwɛɛkɩm nesi tɛɛ yɔ pɔ-tɔm pɔyɔɔdʋʋ. (Mat. 25:34; Natʋ 17:8). Ye mbʋ, pɩwɛ ɛzɩ ɛyʋ siɣsiɣ tʋ Aabɛɛlɩ hɩɖɛ pacalɩnɩ maʋ wezuu takayaɣ taa yɔ.
^ Tɔm loyaɣ ŋga palabɩnɩ tʋmɩyɛ cɩnɛ se «pahʋʋnɩ-wɛ tɔm» yɔ, ɖooo lɛ, ɖɩlɩzaɣ pɩ-taa se kɔ-tɔbʋʋ lɛ se pakʋʋ pɔ-tɔm. Toovenim taa lɛ, papɩzɩɣ nɛ palɩzɩ tɔm loyaɣ «pahʋʋnɩ-wɛ tɔm» taa mbʋ. Ɛlɛ hɔɔlʋʋ kʋnɛ kɩ-taa lɛ, pɩwɛ ɛzɩ Yesu labɩnɩ tʋmɩyɛ tɔm loyaɣ «pahʋʋnɩ-wɛ tɔm» se ɛwɩlɩ ɛzɩma nɔɔyʋ cɔŋnɩ nɔɔyʋ camɩyɛ se ɛtakɩ-ɩ yɔ, yaa ɛzɩ Grɛɛkɩ tɔm kpou nakʋyʋ yɔɔdʋʋ yɔ, kawɩlɩɣ ɛzɩma «patazɩɣ nɔɔyʋ lakasɩ taa yɔ.»
