OSHITUKULWA SHOKUKONAKONWA 39
Mbela edina loye ola shangwa “membo lomwenyo”?
“Embo lokudimbulukwa ava hava tila Omwene nohava fimaneke edina laye.” — MAL. 3:16.
EIMBILO 61 Eendombwedi, tu puleni komesho!
EXUKU LOSHITUKULWA *
Okudja pefimbo laAbel, Jehova okwa kala ta weda omadina “membo lomwenyo” (Tala okatendo 1-2)
1. Metwokumwe naMalakia 3:16, Jehova okwa kala nokushanga embo lilipi, noshike tashi hangwa membo olo?
MOMUKOKOMOKO womido omayovi, Jehova okwa kala ta shange embo le likalekelwa. Membo olo omu na omusholondodo womadina, a hovela nedina londombwedi yotete idiinini, Abel. * (Luk. 11:50, 51) Momukokomoko womido omafele, Jehova okwa kala ta weda mo omadina membo olo, nokunena omu na omadina omamiliyona. MOmbiibeli, embo olo ola ifanwa “embo lokudimbulukwa” nosho yo ‘embo lomwenyo.’ Moshitukulwa eshi, ohatu li yukifa ‘kembo lomwenyo.’ — Lesha Malakia 3:16; Eh. 3:5; 17:8.
2. Oolyelye omadina avo a shangwa membo lomwenyo, nongahelipi omadina etu taa dulu okushangwa membo olo?
2 Embo olo le likalekelwa oli na omadina aaveshe ovo hava longele Jehova noutile, ile tu tye ve mu fimaneka neenghono nova lenga edina laye. Ove na omhito yoku ka mona omwenyo waalushe. Kunena, omadina etu otaa dulu okushangwa membo olo, ngeenge otwa kala tu na ekwatafano lopofingo naJehova, olo la kanghamena kekuliloyambo lOmona waye, Jesus Kristus. (Joh. 3:16, 36) Atusheni otwa hala omadina etu a shangwe membo olo, kashi na nee mbudi kutya otu na eteelelo loku ka kala nomwenyo meulu, ile okombada yedu.
3-4. (a) Mbela ohatu ka kala nomwenyo fiyo alushe, ngeenge omadina etu okwa shangwa membo lomwenyo paife? Shi yelifa. (b) Oshike hatu ka kundafana moshitukulwa eshi, nomwaasho tashi shikula ko?
3 Mbela osho osha hala kutya aveshe ovo omadina avo a shangwa membo olo otava ka mona omwenyo waalushe? Opo tu mone enyamukulo lepulo olo, natu taleni meendjovo odo Jehova a lombwela Moses di li muExodus 32:33. Jehova okwa ti: “Keshe tuu ou ta nyono kwaame, ye ohandi ke mu dima mo membo lange.” Onghee hano, omadina oo a shangwa paife membo olo otaa dulu okudimwa mo. Osha fa shi li ngaha kutya Jehova okwa shanga mo omadina oo nopena yekala oku shi popya pafaneko. (Eh. 3:5) Onghee otu na okushilipaleka kutya omadina etu otaa kala membo olo fiyo osheshi a shangwa mo nopena yohinga, oku shi popya pafaneko.
4 Osho otashi dulu okupendula omapulo amwe mufye. Pashihopaenenwa, Ombiibeli oya popya shike shi na sha naavo omadina avo a shangwa membo lomwenyo nosho yo ovo omadina avo inaa shangwa mo? Onaini ovo omadina avo a shangwa membo olo tava ka mona omwenyo waalushe? Ongahelipi shi na sha naavo va fya inava mona omhito yokushiiva Jehova? Mbela omadina avo otaa dulu okushangwa membo olo? Omapulo oo otaa ka nyamukulwa moshitukulwa eshi, nomwaashi tashi shikula ko.
OOLYELYE OMADINA AVO A SHANGWA MEMBO LOMWENYO?
5-6. (a) Ngaashi sha ulikwa mOvafilippi 4:3, oolyelye omadina avo a shangwa membo lomwenyo? (b) Onaini omadina avo taa ka shangwa fiyo alushe membo lomwenyo?
5 Oolyelye omadina avo a shangwa membo olo lopafaneko? Opo tu nyamukule epulo olo, ohatu ka tala keengudu dovanhu dopatano da yoolokafana. Mokati keengudu odo, vamwe omadina ovo okwa shangwa membo lomwenyo, ofimbo vamwe inava shangwa mo.
6 Ongudu yotete oya fikama po mwaavo va hoololwa va ka pangele pamwe naJesus meulu. Mbela omadina avo okwa shangwa paife membo lomwenyo? Heeno. Omuyapostoli Paulus okwa li a lombwela ‘ovalongi pamwe naye’ muFilippi kutya omadina ovavaekwa, ovo va hoololwa va ka pangele pamwe naJesus, okwa shangwa paife membo lomwenyo. (Lesha Ovafilippi 4:3.) Ndele opo va kaleke omadina avo membo olo lopafaneko, ove na okukala ovadiinini. Opo nee ngeenge ova didilikwa xuuninwa, kutya nee ofimbo inava fya, ile ofimbo oudjuu munene inau hovela, omadina avo otaa ka shangwa fiyo alushe membo olo. — Eh. 7:3.
7. Metwokumwe nEhololo 7:16, 17, onaini omadina ongudu inene yeedi dimwe taa ka shangwa fiyo alushe membo lomwenyo?
7 Ongudu onhivali oya fikama po mongudu inene yeedi dimwe. Mbela paife omadina avo okwa shangwa membo lomwenyo? Heeno. Mbela omadina avo otaa kala a shangwa membo lomwenyo konima yokuxupa moita yaArmagedon? Heeno. (Eh. 7:14) Jesus okwa popya shi na sha naavo va fa eedi kutya otava ka kala “nomwenyo fiyo alushe.” (Mat. 25:46) Ndele ovo tava ka xupa puArmagedon, itava ka pewa diva omwenyo waalushe. Omadina avo otaa kala a shangwa membo lomwenyo nopena yekala oku shi popya pafaneko. Momukokomoko wOmido Eyovi dOkupangela kwaKristus, Jesus ote “ke va lifa noku va twala keefifiya domeva omwenyo.” Ovo tava ka dulika kewiliko laKristus notava ka talika ko ovadiinini kuJehova, omadina avo otaa ka shangwa fiyo alushe membo lomwenyo. — Lesha Ehololo 7:16, 17.
8. Oolyelye omadina avo inaa shangwa membo lomwenyo, notava ka ningilwa shike?
8 Ongudu onhinhatu oya fikama po mwaavo va fa oikombo, ovo tava ka hanaunwa po puArmagedon. Omadina avo inaa shangwa membo lomwenyo. Jesus okwa popya kutya “otava ka hanaunwa po fiyo alushe.” (Mat. 25:46) Paulus okwa nwefwa mo a popye kutya ‘otava ka tokolwa nokuhanaunwa po fiyo alushe.’ (2 Tes. 1:9; 2 Pet. 2:9) Osho otashi dulu yo okuyukifwa kwaavo va kala nokunyonena owina komhepo iyapuki momukokomoko wefimbo. Navo otava ka hanaunwa po fiyo alushe, ndele itava ka kala nomwenyo waalushe. Osha yela kutya itava ka nyumunwa. (Mat. 12:32; Mark. 3:28, 29; Heb. 6:4-6) Paife natu ka konakoneni noukeka eengudu dopavali dovanhu, ovo tava ka nyumuninwa kombada yedu.
OVO TAVA KA NYUMUNWA
9. Ngaashi sha ulikwa mOilonga 24:15, eengudu dopavali dovanhu dilipi tadi ka nyumuninwa kombada yedu, noda yoolokafana ngahelipi?
9 Ombiibeli oya popya eengudu dovanhu dopavali, ovo tava ka nyumunwa nokukala nomwenyo fiyo alushe kombada yedu, “ovayuki novalunde.” (Lesha oilonga 24:15.) “Ovayuki,” ovovo va kala nokulongela Jehova noudiinini, ofimbo vali momwenyo. Ofimbo ‘ovalunde,’ ovovo inava longela Jehova noudiinini. Kakele kaasho, peemhito dimwe, eenghatu davo oda kala dihe li pauyuki. Molwaashi eengudu odo adishe oda nyumunwa, mbela ohatu dulu okutya omadina avo okwa shangwa membo lomwenyo? Opo tu nyamukule epulo olo, natu ka kundafaneni ongudu keshe pauhandimwe.
10. Omolwashike “ovayuki” tava nyumunwa, noufembanghenda ulipi vamwe tava ka hafela? (Tala yo “Omapulo a dja kovaleshi” moshifo eshi, shi na sha nokunyumuninwa kombada yedu.)
10 Ongudu onhine oya fikama po ‘movayuki.’ Omadina avo okwa hangwa a shangwa membo lomwenyo ofimbo inava fya. Mbela omadina avo okwa li a kufwa mo membo olo, eshi va fya? Ahowe. Molwaashi Jehova natango okwe va tala ko “ve na omwenyo.” Jehova “oye Kalunga kovanamwenyo, ndele ke fi Kalunga kovafi, molwaashi okwe va tala ko ve na omwenyo.” (Luk. 20:38) Osho osha hala kutya, eshi ovayuki tava ka nyumuninwa kombada yedu, omadina avo okwa hangwa nale a shangwa membo lomwenyo, nonande okwa shangwa mo nopena yekala, oku shi popya pafaneko. (Luk. 14:14) Nopehe na omalimbililo, vamwe vomovanyumunwa ovo otava ka kala ve na oufembanghenda wokukala ve li “oidale moshilongo ashishe.” — Eps. 45:16.
11. ‘Ovalunde’ ova pumbwa okulihonga shike, ofimbo omadina avo inaa shangwa membo lomwenyo?
11 Xuuninwa, natu ka kundafaneni ongudu onhinhano ‘yovalunde.’ Ova fya ve li ovalunde, molwaashi kava li ve shii eemhango daJehova. Onghee omadina avo kaa li a shangwa membo lomwenyo. Ashike eshi Kalunga te ke va nyumuna ote ke va pa omhito, opo omadina avo a dule okushangwa membo olo. ‘Ovalunde’ ovo otava ka pumbwa ekwafo linene. Vamwe vomuvo, ofimbo inava fya, ova li va longa oilonga ii neenghono. Ova pumbwa okuhongwa nghee ve na okukala metwokumwe nomifikamhango daJehova douyuki. Opo va dule okuhongwa okuninga ngaho, Ouhamba waKalunga otau ka unganeka ehongo la denga mbada, olo inali kala ko nale mondjokonona yovanhu aveshe.
12. (a) Oolyelye tava ka honga ovalunde? (b) Oshike tashi ka ningilwa ovo tava ka anya okutula moilonga osho tave lihongo?
12 Oolyelye tava ka honga ovalunde? Ongudu inene nosho yo ovanyumunwa ovayuki. Opo omadina ovalunde a dule okushangwa membo lomwenyo, otava ka pumbwa okukala nekwatafano naJehova noku mu liyapulila. Jesus Kristus nosho yo ovavaekwa otava ka kala nokukonenena ve li meulu nghee ovalunde tave linyenge kwaasho tava hongwa. (Eh. 20:4) Keshe tuu oo ta ka anya okutula moilonga osho ta hongwa ota ka hanaunwa po, nonande na hangike e na eedula 100. (Jes. 65:20) Jehova naJesus ohava dulu okumona osho shi li momitima dovanhu. Onghee itava ka pitika nande oumwe a longe owii mounyuni mupe. — Jes. 11:9; 60:18; 65:25; Joh. 2:25.
OKUNYUMUNINWA OMWENYO NOSHO YO ETOKOLO
13-14. (a) Nale otwa li tu udite ko ngahelipi eendjovo daJesus, odo di li muJohannes 5:29? (b) Oshike tu na okudidilika shi na sha neendjovo odo?
13 Jesus okwa popya yo kombinga yaavo tava ka nyumukila omwenyo oku kombada yedu. Pashihopaenenwa, okwa ti: “Efimbo otali uya eshi aveshe ovo ve li meembiladimbuluko tava ka uda ondaka yaye, ndele tava di mo, ava va longa ouwa otava ka nyumukila omwenyo, naava va longa owii otava ka nyumukila etokolo.” (Joh. 5:28, 29) Jesus okwa li a hala okutya ngahelipi?
14 Nale otwa li tu udite ko eendjovo daJesus da yukifwa koilonga oyo ovanyumunwa tava ka longa konima eshi va nyumunwa. Sha hala kutya, vamwe otava ka nyumuninwa omwenyo nokulonga ouwa, ofimbo vamwe tava ka nyumunwa nokulonga owii. Ashike didilika kutya Jesus ina popya kutya ovo tava ka dja meembiladimbuluko otava ka longa ouwa, ile otava ka longa owii. Okwa longifa epitafimbo. Okwa popya shi na sha naavo va “longa ouwa” nosho yo ovo va “longa owii.” Osho otashi ulike kutya ova longa oilonga oyo, ofimbo inava fya. Osho oshi shii okuudiwa ko. Hasho mbela? Komesho yaaishe, kape na oo ta ka pitikilwa okulonga owii mounyuni mupe. Ovalunde ove na okukala va longa owii, ofimbo inava fya. Ndele mbela eendjovo daJesus di na sha ‘nokunyumukila omwenyo nokunyumukila etokolo’ oda hala okutya ngahelipi?
15. Oolyelye tava ka “nyumukila omwenyo,” nomolwashike?
15 Ovayuki, ovo va longa ouwa, ofimbo inava fya, otava ka “nyumukila omwenyo,” molwaashi omadina avo otaa ka hangwa nale a shangwa membo lomwenyo. Osho osha hala kutya enyumuko laavo va “longa ouwa,” ovo va popiwa muJohannes 5:29, ola faafana nenyumuko ‘lovayuki,’ ovo va popiwa mOilonga 24:15. Eudeko olo oli li metwokumwe naasho sha popiwa mOvaroma 6:7, oyo ya ti: “Ngeenge omunhu okwa fi, okwa manguluka ko koulunde.” Oulunde oo wa longwa kovayuki ovo, owa xulifwa po eshi va fya, ashike oilonga yavo youdiinini inai dimbiwa. (Heb. 6:10) Ovanyumunwa, ovo ovayuki, otava ka pumbwa okukala ovadiinini, opo omadina avo a kale membo lomwenyo.
16. ‘Okunyumukila etokolo’ osha yukifwa kushike?
16 Ongahelipi shi na sha naavo va longo owii, ofimbo inava fya? Nonande omanyono avo okwa dimwa po eshi va fya, kava li va longela Jehova noudiinini, eshi va li momwenyo. Omadina avo inaa shangwa membo lomwenyo. Onghee hano, enyumuko laavo “va longa owii” ola faafana nenyumuko ‘lovalunde,’ olo la popiwa mOilonga 24:15. Otava ka “nyumukila etokolo.” * Ovalunde otava ka tokolwa meityo olo kutya otava ka konakonwa. (Luk. 22:30) Ngeenge opa piti efimbo lonhumba, Jesus ota ka shiiva ngeenge omadina avo okwa wana okushangwa membo lomwenyo, ile hasho. Omadina avo otaa ka dula ashike okushangwa membo lomwenyo, ngeenge ova efa po elihumbato lavo lii lonale, nokuliyapulila Jehova.
17-18. Aveshe ovo tava ka nyumuninwa kombada yedu otava ka pumbwa okuninga shike, ‘noilonga’ oyo ya tumbulwa mEhololo 20:12, 13, otai ulike kushike?
17 Ovanyumunwa ovo, kashi na nee mbudi kutya ova li ovayuki, ile ovalunde, otava ka pumbwa okudulika keemhango, odo tadi ka hangwa momishangwatonywa dipe, odo tadi ka tonyununwa pefimbo lomido 1 000. Omuyapostoli Johannes okwa popya osho a mona memoniko a ti: “Onda mona ovafi, oipuna neehepele, va fikama komesho yolukalwapangelo, nopa li omishangwatonywa da tonyununwa. Opa li yo pa tonyununwa omushangwatonywa umwe womwenyo, novafi ova li va tokolwa metwokumwe naasho sha shangwa momishangwatonywa odo she likolelela koilonga yavo.” — Eh. 20:12, 13.
18 Ovanyumunwa otava ka tokolwa she likolelela “koilonga” ilipi? Mbela okoilonga oyo va longa, ofimbo inava fya? Hasho! Dimbuluka kutya omatimba avo okwa dimwa po eshi va fya. Onghee hano, apa ‘oilonga yavo’ itai ulike kwaasho va longa monakudiwa. Ponhele yaasho, oi na okukala tai ulike koilonga yavo oyo tava ka longa konima, eshi va deulwa mounyuni mupe. Nokuli novalumenhu ovadiinini ngaashi Noa, Samuel, David naDaniel otava ka hongwa kombinga yaJesus Kristus nokukala ve na eitavelo tali longo mekuliloyambo laye. Ngeenge ovalumenhu ovo ovadiinini otava ka hongwa shihapu, osha yela kutya ovalunde otava ka kala ve na shihapu neenghono okulihonga.
19. Oshike tashi ka ningilwa xuuninwa ovo itava ka tambula ko omhito oyo itunhula?
19 Oshike tashi ka ningilwa xuuninwa ovo itava ka tambula ko omhito oyo itunhula? Ehololo 20:15 ola ti: “Ovo inava shangwa membo lomwenyo ova umbilwa mefuta lomundilo.” Otava ka hanaunwa po fiyo alushe. Inashi fimana tuu okushilipaleka kutya omadina etu okwa shangwa membo lomwenyo notaa kala mo!
Omumwatate ta kufa ombinga moilongayokuhonga, oyo tai ka longwa pefimbolOmido Eyovi dOkupangela kwaKristus (Tala oshitukulwa shokukonakonwa okatendo 20)
20. Oilonga itunhula ilipi tai ka longwa momukokomoko wOmido Eyovi dEpangelo laKristus? (Tala efano kombada yoshifo.)
20 Omido Eyovi dEpangelo laKristus itadi ka kala tuu efimbo litunhula! Otadi ka kwatela mo oilonga yokuhonga ya denga mbada, oyo ovapiya vaJehova inava longa nande onale kombada yetu. Otali ka kala yo efimbo lokukonakona elihumbato lovayuki nosho yo lovalunde. (Jes. 26:9; Oil. 17:31) Ehongo olo otali ka wanifwa po ngahelipi? Oshitukulwa tashi shikula ko otashi ke tu kwafela tu ude ko efiloshisho olo litunhula notu kale nolupandu li na sha nalo.
EIMBILO 147 Eudaneko lomwenyo waalushe
^ Oshitukulwa eshi otashi kundafana eudeko la pepalekwa li na sha neendjovo daJesus, odo di li muJohannes 5:28, 29, di na sha ‘nokunyumukila omwenyo’ nosho yo ‘okunyumukila etokolo.’ Ohatu ke lihonga kutya omanyumuko oo opavali otaa ulike kushike, nonokutya oolyelye va kwatelwa mo menyumuko keshe.
^ Embo olo ola hovelwa okushangwa okudja “pehovelo lounyuni,” sha hala kutya, pefimbo lovanhu ovo ve na omhito yokumona ouwa mekuliloyambo laJesus. (Mat. 25:34; Eh. 17:8) Onghee osha fa shi li ngaha kutya omuyuki Abel oye omunhu wotete, oo a shangwa membo olo lomwenyo.
^ Monakudiwa, otwa li twa yelifa kutya outumbulilo “etokolo,” oo wa longifwa apa, otau ulike kokutokolelwa owii, ile kokuvelwa ombedi. Oshoshili kutya outumbulilo “etokolo” otau dulu okukala u na eityo olo. Ashike pomhito oyo, osha fa shi li ngaha kutya Jesus okwa longifa outumbulilo “etokolo” monghedi ya mbwalangadja, ta ulike kokukonenena omunhu noukeka. Ile oku mu yeleka, ngaashi emboitya limwe lOmbiibeli yOshigreka le shi popya kutya “okukonakona umwe.”
