Awˬ Lawn 39
‘Co tiꞈ ha tiꞈ liꞈ awˬ hkʼaw lo nawˬ ve awˬ meh cawˬ˗aw laˇ?’
“Gʼuiˬ sha mehˆ gʼuˇ suhˍ lo, yawˇ htaꞈ kawˆ leh yawˆ yan ve chaw teˇ hpaˍ ve awˬ meh bvuhꞈ keu taˍ ve caˇ lanˇ liꞈ kʼoˆ teˇ maˬ cawˬ ve yoˬ.”—MAˍLAˍHKIˆ 3:16.
KʼA MUIˬ HKAWˇ 61 Shaˉhkiˆhkanˍ ve chaw teˇ hpaˍ˗oˬ, kʼai loˬ!
HENˇ TUˬ VE TEˇ HPAˍ *
Aˍbeˍlaˆ ve awˬ co˗e htaˇ tanˬ leh ‘co tiꞈ ha tiꞈ gʼa tuˬ liꞈ awˬ hkʼaw lo’ Yaˬhoˉvaˬ chaw yaˇ ve awˬ meh maˇ maˇ bvuhꞈ keu ve (Awˬ tawn 1-2 nyi sheˍ)
1. Maˍlaˍhkiˆ liꞈ 3:16 hkʼaw kʼoˆ taˍ ve hkʼe, Yaˬhoˉvaˬ aˬ htoꞈ ma ve liꞈ bvuhꞈ taˍ ve le? Leh liꞈ chi ve hkʼaw aˬ htoꞈ ma bvuhꞈ taˍ ve le?
Peuˬ laˬ ve laiˉ hinˉ hkʼawꞈ htaˇ, Yaˬhoˉvaˬ lehˬ daꞈ jaˇ ve liꞈ kʼoˆ teˇ kʼoˆ tanˬ bvuhꞈ ve yoˬ. Liꞈ kʼoˆ chi ve hkʼaw shaˉhkiˆhkanˍ ve ka tiꞈ yeˬ ve chaw awˬ meh cawˬ leh awˉ lawˉ teˇ gʼaˇ ve awˬ meh lehˬ Aˍbeˍlaˆ hpehꞈ ve yoˬ. * (Luˉkaꞈ 11:50, 51) Oˇ htaˇ tanˬ leh liꞈ kʼoˆ chi ve hkʼaw Yaˬhoˉvaˬ lehˬ, chaw awˬ meh maˇ maˇ bvuhꞈ keu taˍ ve yoˬ. Chi beuꞈ teˇ co˗e liꞈ kʼoˆ chi ve hkʼaw chaw laiˉ lanˬ gʼaˇ ve awˬ meh cawˬ ve yoˬ. Liꞈ hpu hkʼaw liꞈ kʼoˆ chi ve htaꞈ laiˉ meh kuˬ ve yoˬ. Tawˇ pa haˉ te kʼo, ‘Gʼuiˬ sha mehˆ gʼuˇ suhˍ lo chaw teˇ hpaˍ ve awˬ meh’ bvuhꞈ keu taˍ ve liꞈ, leh ‘co tiꞈ ha tiꞈ liꞈ awˬ hkʼaw lo’ awˬ meh cawˬ ve yoˬ. Awˬ lawn chi ve hkʼaw liꞈ kʼoˆ chi htaꞈ ‘co tiꞈ ha tiꞈ liꞈ’ tehꞈ kuˬ ve yoˬ.—Maˍlaˍhkiˆ 3:16 gʼaw sheˍ; Hpeuꞈ maˍ ve 3:5; 17:8.
2. Co tiꞈ ha tiꞈ gʼa tuˬ liꞈ awˬ hkʼaw lo a shu ve awˬ meh kaꞈ cawˬ ve le? Leh liꞈ chi ve hkʼaw ngaˬ hui ve awˬ meh cawˬ tuˬ hkʼaˬ hkʼe gʼa te cawˇ ve le?
2 Liꞈ chi ve hkʼaw Yaˬhoˉvaˬ htaꞈ yawˆ yan ve chaw teˇ gʼaˇ le le leh yawˇ ve awˬ meh htaꞈ haꞈ ve chaw ve awˬ meh cawˬ ve yoˬ. Yawˇ hui co tiꞈ ha tiꞈ gʼa tuˬ awˬ hkʼaˇ cawˬ ve yoˬ. Ngaˬ hui Yaˬhoˉvaˬ geh meuˆ daꞈ leh Yeˍsuˆ htaiˍ hkʼawꞈ laˇ ve htaꞈ pa taw, chi beuꞈ teˇ co˗e liꞈ chi ve hkʼaw ngaˬ hui kaꞈ awˬ meh cawˬ gʼa ve yoˬ. (Yoˇhanˬ 3:16, 36) Ngaˬ hui mvuhˇ naw ma hkʼoˆ dawˇ law kuiˬ cawˬ ve maˇ heˆ leh miˬ guiˬ hkʼoˆ lo dawˇ law kuiˬ cawˬ ve chaw htawˇ maˇ kʼoˆ, liꞈ chi ve hkʼaw awˬ meh cawˬ gaˇ ve yoˬ.
3-4. (a) Chi teˇ hkui ngaˬ hui co tiꞈ ha tiꞈ gʼa tuˬ liꞈ awˬ hkʼaw lo awˬ meh cawˬ ve kʼo, chi lehˬ ngaˬ hui co tiꞈ ha tiꞈ gʼa tuˬ ve htaꞈ kʼoˆ gaˇ ve hehˉ laˇ? Tawˇ pa haˉ kʼoˆ maˍ laˇ sheˍ. (b) Awˬ lawn chi ve hkʼaw leh gʼuˇ suhˍ teˇ lawn hkʼaw aˬ htoꞈ ma htaꞈ henˇ tuˬ le?
3 Teˇ gʼaˇ le le co tiꞈ ha tiꞈ gʼa tuˬ liꞈ awˬ hkʼaw lo awˬ meh cawˬ ve lehˬ, co tiꞈ ha tiꞈ awˬ tehˬ awˬ na gʼa tuˬ ve htaꞈ kʼoˆ gaˇ ve laˇ? Tawˆ kʼai ve liꞈ 32:33 hkʼaw Yaˬhoˉvaˬ Moˉseˍ htaꞈ tawˇ yaw piˇ htaˇ ve htaꞈ teˇ geh nyi sheˍ. Yaˬhoˉvaˬ kʼoˆ ve, “ngaˬ htaꞈ te yaꞈ ve chaw teˇ hpaˍ ve awˬ meh htaꞈ ceh tiˉ ngaˬ ve liꞈ daw hkʼaw shiˆ baˬ tuˬ yoˬ.” Liꞈ chi ve hkʼaw awˬ meh cawˬ ve htaꞈ shiˆ baˬ gʼa ve tehꞈ hpeuꞈ maw laˇ ve yoˬ. Awˬ meh chi ve teˇ hpaˍ lehˬ, Yaˬhoˉvaˬ hkehˉ tanˬ bvuhꞈ taˍ ve htaꞈ shuˍ ve yoˬ. (Hpeuꞈ maˍ ve 3:5) Hkʼe te leh, ngaˬ hui awˬ meh liꞈ chi ve hkʼaw naꞈ meuˬ taˬ bvuhꞈ taˍ ve hkʼa shuˍ maˇ shiˆ baˬ gʼa leh yonˍ gʼa tuˬ gʼa te ve yoˬ.
4 Co tiꞈ ha tiꞈ gʼa tuˬ liꞈ awˬ hkʼaw lo awˬ meh cawˬ ve chaw leh, liꞈ chi ve hkʼaw awˬ meh maˇ cawˬ ve htaꞈ caˉ daꞈ ve, Liꞈ hpu hkʼaw hkʼaˬ hkʼe kʼoˆ laˇ taˍ ve le? Liꞈ chi ve hkʼaw awˬ meh cawˬ ve chaw lehˬ, co tiꞈ ha tiꞈ hkʼaˬ hkʼe htaˇ gʼa tuˬ ve le? Yaˬhoˉvaˬ htaꞈ maˇ shiˍ sheˍ leh suh˗oˬ ve chaw kʼo, hkʼaˬ hkʼe hpehꞈ tuˬ le? Liꞈ kʼoˆ chi ve hkʼaw yawˇ hui ve awˬ meh kaꞈ cawˬ gʼa˗aw laˇ? Awˬ lawn chi ve htaꞈ caˉ daꞈ ve chi ve teˇ lawn hkʼaw leh gʼuˇ suhˍ teˇ lawn hkʼaw hkʼawꞈ laˇ tuˬ yoˬ.
LIꞈ KʼOˆ CHI VE HKʼAW A SHU VE AWˬ MEH CAWˬ VE LE?
5-6. (a) Hpiˇliˇpiˆ liꞈ 4:3 hkʼaw kʼoˆ taˍ ve hkʼe, co tiꞈ ha tiꞈ gʼa tuˬ liꞈ awˬ hkʼaw lo a shu ve awˬ meh kaꞈ cawˬ ve le? (b) Yawˇ hui ve awˬ meh liꞈ chi ve hkʼaw co co taiˍ taiˍ hkʼaˬ hkʼe htaˇ cawˬ gʼa tuˬ ve le?
5 Co tiꞈ ha tiꞈ gʼa tuˬ liꞈ awˬ hkʼaw lo a shu ve awˬ meh cawˬ ve le? Awˬ lawn chi ve htaꞈ hkʼawꞈ laˇ tuˬ, chaw 5 moˍ ve awˬ lawn htaꞈ caˉ daꞈ ve teˇ geh henˇ tuˬ yoˬ. Teˇ moˍ moˍ kʼo liꞈ chi ve hkʼaw awˬ meh cawˬ leh teˇ moˍ moˍ kʼo liꞈ chi ve hkʼaw awˬ meh maˇ cawˬ.
6 Awˉ lawˉ teˇ moˍ lehˬ, mvuhˇ naw ma hkʼoˆ lo Yeˍsuˆ geh uˉ peunˍ tuˬ leuˆ yuˬ taˍ ve chaw hpehꞈ ve yoˬ. Chi teˇ hkui co tiꞈ ha tiꞈ gʼa tuˬ liꞈ awˬ hkʼaw lo yawˇ hui ve awˬ meh bvuhꞈ keu˗oˬ ve laˇ? Bvuhꞈ keu˗oˬ ve yoˬ. Tcuh yaˇ Pawˇluꞈ ‘yawˇ geh kanˉ te ve’ Hpiˇliˇpiˆ venˇ hkʼaw ve chaw htaꞈ kʼoˆ ve hkʼe, Yeˍsuˆ geh teˇ geh uˉ peunˍ tuˬ ve leuˆ yuˬ taˍ ve chaw lehˬ, co tiꞈ ha tiꞈ gʼa tuˬ liꞈ awˬ hkʼaw lo awˬ meh cawˬ˗oˬ ve yoˬ. (Hpiˇliˇpiˆ 4:3 gʼaw sheˍ.) Yaꞈ hkʼaˇ, yawˇ hui ve awˬ meh liꞈ kʼoˆ chi ve hkʼaw caˉ leh cawˬ gʼa tuˬ, awˬ leh meuˇ hkʼa gaˬ yinˉ tcuhˉ piˇ htaˇ ka tiꞈ gʼa yeˬ ve yoˬ. Chi ve lehˬ, yawˇ hui maˇ suh˗e sheˍ htaˇ maˇ heˆ leh tuꞈ jaˇ hkanˍ jaˇ ve awˬ yanˇ maˇ gaˬ sheˍ htaˇ hpehꞈ ve yoˬ.—Hpeuꞈ maˍ ve 7:3.
7. Hpeuꞈ maˍ ve liꞈ 7:16, 17 hkʼaw kʼoˆ taˍ ve hkʼe, chaw awˬ moˍ lonˉ ve awˬ meh co tiꞈ ha tiꞈ gʼa tuˬ liꞈ awˬ hkʼaw lo hkʼaˬ htaˆ kaꞈ cawˬ gʼa tuˬ hkʼaˬ hkʼe htaˇ le?
7 2 moˍ teˇ moˍ lehˬ, awˬ kaˍ awˬ nu ve yawˬ hpehꞈ ve chaw awˬ moˍ lonˉ yoˬ. Chi teˇ hkui yawˇ hui ve awˬ meh co tiꞈ ha tiꞈ gʼa tuˬ liꞈ awˬ hkʼaw lo bvuhꞈ keu˗oˬ ve laˇ? Bvuhꞈ keu˗oˬ ve yoˬ. Hkʼe kʼo, yawˇ hui ve awˬ meh Aˍmaˍgeˍdonˍ peuˬ hkʼawꞈ nawˉ kaꞈ liꞈ chi ve hkʼaw awˬ meh cawˬ tuˬ laˇ? Cawˬ tuˬ yoˬ. (Hpeuꞈ maˍ ve 7:14) Yeˍsuˆ kʼoˆ ve yawˬ chi teˇ hpaˍ lehˬ “co co taiˍ taiˍ” a shaꞈ gʼa tuˬ yoˬ. (Maꞈhtehˍ 25:46) Yaꞈ hkʼaˇ, yawˇ hui Aˍmaˍgeˍdonˍ hkʼaw gʼa ponˬ hkʼawꞈ nawˉ, yawˇ hui co co taiˍ taiˍ a shaꞈ laꞈ haˉ gʼa tuˬ ve maˇ heˆ. Oˇ ve teˇ yanˇ yawˇ hui ve awˬ meh hkehˉ tanˬ bvuhꞈ taˍ sheˍ ve yoˬ. Yeˍsuˆ uˉ peunˍ ve 1,000 hkʼawꞈ ve awˬ yanˇ htaˇ, “yawˇ lehˬ, co ha teꞈ piˇ lawˬ ve gʼuiˬ tuˇ teˇ hpaˍ lo yawˇ hui htaꞈ sheh kʼai tuˬ yoˬ.” Yeˍsuˆ hkawˇ na ve chaw leh Yaˬhoˉvaˬ htaꞈ ka tiꞈ yeˬ ve chaw lehˬ, awˬ leh meuˇ teˇ pawˆ beˬ ve lawˇ ve htaꞈ yeunˇ hkanˍ gʼaˇ htaˇ, co tiꞈ ha tiꞈ gʼa tuˬ liꞈ awˬ hkʼaw lo awˬ meh hkʼaˬ htaˆ kaꞈ cawˬ tuˬ yoˬ.—Hpeuꞈ maˍ ve 7:16, 17 gʼaw sheˍ.
8. Co tiꞈ ha tiꞈ gʼa tuˬ liꞈ awˬ hkʼaw lo a shu ve awˬ meh maˇ cawˬ ve le? Leh awˬ gʼuˇ suhˍ hpawˇ yawˇ hui htaꞈ hkʼaˬ hkʼe hpehꞈ la tuˬ ve le?
8 3 moˍ teˇ moˍ lehˬ, aˉ cheꞈ htaꞈ shuˍ leh Aˍmaˍgeˍdonˍ hkʼaw te luˬ piˇ tuˬ yoˬ. Yawˇ hui ve awˬ meh co tiꞈ ha tiꞈ gʼa tuˬ liꞈ awˬ hkʼaw lo awˬ meh maˇ cawˬ. Yeˍsuˆ yawˇ hui htaꞈ “co co taiˍ taiˍ ciˍ yanˍ” piˇ tuˬ yoˬ tehꞈ kʼoˆ ve yoˬ. (Maꞈhtehˍ 25:46) Pawˇluꞈ kʼoˆ ve, yawˇ hui lehˬ “co co taiˍ taiˍ luˬ ve sheˆ ve htaꞈ gʼa hkanˍ tuˬ yoˬ.” (2 Hteˇsaˍlawˇniˆ 1:9; 2 Peˍtruˆ 2:9) Gʼuiˬ sha ve daꞈ kehˬ ve awˬ ha hpu htaꞈ te yaꞈ ve chaw co co taiˍ taiˍ te luˬ piˇ ve hkʼa shuˍ, yawˇ hui htaꞈ kaꞈ te luˬ piˇ tuˬ yoˬ. Leh maˇ kʼawꞈ teꞈ tu la tcuh˗o. (Maꞈhtehˍ 12:32; Maˍkuˆ 3:28, 29; Heˍbrehˇ 6:4-6) Miˬ guiˬ hkʼoˆ lo kʼawꞈ teꞈ tu la ve 2 moˍ htaꞈ caˉ daꞈ ve chi teˇ hkui teˇ geh henˇ tuˬ yoˬ.
KʼAWꞈ TEꞈ TU LA VE CHAW
9. Tcuh yaˇ liꞈ 24:15 hkʼaw kʼoˆ taˍ ve hkʼe, miˬ guiˬ hkʼoˆ lo kʼawꞈ teꞈ tu la leh co co taiˍ taiˍ a shaꞈ gʼa tuˬ ve hkʼaˬ ve teˇ moˍ le? Leh chi ve 2 moˍ hkʼaˬ hkʼe te peun daꞈ ve le?
9 Miˬ guiˬ hkʼoˆ lo kʼawꞈ teꞈ tu la ve chaw leh co co taiˍ taiˍ a shaꞈ gʼa tuˬ ve chi ve 2 moˍ htaꞈ Liꞈ hpu hkʼaw kʼoˆ taˍ ve yoˬ. Chaw chi ve 2 moˍ lehˬ ‘hteˇ ve chaw leh maˇ hteˇ ve chaw’ hpehꞈ ve yoˬ. (Tcuh yaˇ 24:15 gʼaw sheˍ.) “Hteˇ ve chaw” lehˬ a shaꞈ teꞈ chehˇ htaˇ Yaˬhoˉvaˬ ve kanˉ ka tiꞈ yeˬ ve hkʼaw te ve yoˬ. “Maˇ hteˇ ve chaw” lehˬ Yaˬhoˉvaˬ ve kanˉ maˇ te leh yawˇ mehˆ gʼuˇ suhˍ yawˇ hui daꞈ ve awˬ ceuˬ htaꞈ maˇ te. Leh chi ve 2 moˍ htaꞈ kʼawꞈ teꞈ tu la piˇ ve awˬ hkʼoˆ kaꞈ, yawˇ hui co tiꞈ ha tiꞈ gʼa tuˬ liꞈ awˬ hkʼaw lo awˬ meh bvuhꞈ keu taˍ ve tehꞈ, ngaˬ hui kʼoˆ gʼa˗aw laˇ? Awˬ lawn chi ve htaꞈ hkʼawꞈ laˇ tuˬ, teˇ moˍ leh teˇ moˍ htaꞈ teˇ geh nyi sheˍ.
10. Aˬ htoꞈ ma te “hteˇ ve chaw” htaꞈ kʼawꞈ teꞈ tu la tcuh ve le? Leh yawˇ hui teˇ hpaˍ daꞈ ve awˬ vuiˬ aˬ htoꞈ ma cawˬ tuˬ le? (Liꞈ chi teˇ kʼoˆ “Gʼaw ve chaw na nyi hkawˇ” hkʼaw miˬ guiˬ hkʼoˆ lo kʼawꞈ teꞈ tu la ve htaꞈ caˉ daꞈ ve nyi sheˍ.)
10 4 moˍ teˇ moˍ lehˬ, “hteˇ ve chaw” hpehꞈ ve yoˬ. Yawˇ hui a shaꞈ teꞈ chehˇ sheˍ htaˇ, co tiꞈ ha tiꞈ gʼa tuˬ liꞈ awˬ hkʼaw lo awˬ meh cawˬ ve yoˬ. Leh yawˇ hui suh˗oˬ htaˇ, yawˇ hui ve awˬ meh liꞈ kʼoˆ chi ve hkʼaw shiˆ baˬ piˇ ve laˇ? Maˇ shiˆ baˬ piˇ taˬ. Awˬ lawn kʼo, yawˇ hui lehˬ, Yaˬhoˉvaˬ mehˆ gʼuˇ suh hkʼaˬ htaˆ kaꞈ “teꞈ chehˇ ve yoˬ.” Yaˬhoˉvaˬ lehˬ, “suh peuˬ ve chaw hui ve Gʼuiˬ sha hpehꞈ ve maˇ heˆ. Teꞈ chehˇ ve chaw hui ve Gʼuiˬ sha hpehꞈ ve yoˬ. Yawˇ htaꞈ pa taw chaw hkʼa peu˗eˬ teꞈ chehˇ ve yoˬ.” (Luˉkaꞈ 20:38) Chi kʼoˆ gaˇ ve lehˬ, miˬ guiˬ hkʼoˆ lo hteˇ ve chaw kʼawꞈ teꞈ tu la leh a shaꞈ gʼa tuˬ yoˬ. Awˉ lawˉ htaˇ yawˇ hui ve awˬ meh hkehˉ tanˬ bvuhꞈ taˍ ve htawˇ, yawˇ hui co tiꞈ ha tiꞈ gʼa tuˬ liꞈ awˬ hkʼaw lo awˬ meh cawˬ ve yoˬ. (Luˉkaꞈ 14:14) Leh chaw chi teˇ moˍ hkʼaw ve teˇ hpaˍ lehˬ, “miˬ guiˬ hkʼa peu˗eˬ htaꞈ uˉ peunˍ tcuh tuˬ yoˬ.”—Chiˇ mvuh ve 45:16.
11. “Maˇ hteˇ ve chaw” lehˬ co tiꞈ ha tiꞈ gʼa tuˬ liꞈ awˬ hkʼaw lo yawˇ hui ve awˬ meh bvuhꞈ laˇ tuˬ aˬ htoꞈ ma awˬ lawn gʼa henˇ sheˍ ve le?
11 5 moˍ teˇ moˍ lehˬ, “maˇ hteˇ ve chaw” awˬ leh meuˇ teˇ moˍ hpehꞈ ve yoˬ. Chi teˇ moˍ lehˬ yawˇ hui a shaꞈ teꞈ chehˇ htaˇ, Yaˬhoˉvaˬ htaꞈ maˇ shiˍ leh yawˇ ve awˬ liˇ awˬ hkʼaˇ htaꞈ maˇ gʼaꞈ te jaw ve yoˬ. Yawˇ hui ve awˬ meh lehˬ co tiꞈ ha tiꞈ gʼa tuˬ liꞈ awˬ hkʼaw lo maˇ cawˬ. Yaꞈ hkʼaˇ, yawˇ hui ve awˬ meh co tiꞈ ha tiꞈ gʼa tuˬ liꞈ awˬ hkʼaw lo cawˬ keunˍ ve tehꞈ hpeuꞈ maw piˇ tuˬ, yawˇ hui htaꞈ kʼawꞈ teꞈ tu la tcuh ve yoˬ. “Maˇ hteˇ ve chaw” teˇ hpaˍ lehˬ ga laˇ tuˬ loˍ jaˇ. Yawˇ hui a shaꞈ teꞈ chehˇ htaˇ, chaw teˇ hpaˍ lehˬ haiˬ jaˇ ve htaꞈ te ve yoˬ. Hkʼe te leh, yawˇ hui Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te tuˬ gʼa maˍ piˇ ve yoˬ. Chi htaꞈ pa taw, miˬ guiˬ awˬ suhˉ hkʼaw chaw chi teˇ hpaˍ htaꞈ gʼa ga piˇ tuˬ, Gʼuiˬ sha ve mvuhˇ miˬ lehˬ yawˇ hui htaꞈ gʼa beˆ maˍ piˇ leh miˬ guiˬ hkʼoˆ lo teˇ pawˆ kaꞈ maˇ cawˬ jaw sheˍ ve maˍ ve kanˉ uiˍ jaˇ ve cawˬ tuˬ yoˬ.
12. (a) Maˇ hteˇ ve chaw htaꞈ a shu maˍ piˇ tuˬ le? (b) Yawˇ gʼa henˇ taˍ ve awˬ ceuˬ htaꞈ maˇ gʼaꞈ te ve chaw hkʼaˬ hkʼe hpehꞈ tuˬ le?
12 Hkʼe kʼo, maˇ hteˇ ve chaw htaꞈ a shu maˍ piˇ tuˬ le? Chaw awˬ moˍ lonˉ leh “hteˇ ve chaw” kʼawꞈ teꞈ tu la peuˬ hkʼawꞈ nawˉ yawˇ hui htaꞈ maˍ piˇ tuˬ yoˬ. Co tiꞈ ha tiꞈ gʼa tuˬ liꞈ awˬ hkʼaw lo yawˇ hui ve awˬ meh cawˬ tuˬ, yawˇ hui Yaˬhoˉvaˬ geh gʼa meuˆ daꞈ leh yawˇ htaꞈ awˬ to gʼa chiˇ aꞈ piˇ ve yoˬ. Yawˇ hui awˬ lawn teˇ hpaˍ htaꞈ henˇ chehˇ ve awˬ yanˇ htaˇ, Yeˍsuˆ leh leuˆ yuˬ taˍ ve chaw yawˇ hui htaꞈ nyi chehˇ ve yoˬ. (Hpeuꞈ maˍ ve 20:4) Henˇ taˍ ve htaꞈ maˇ gʼaꞈ te ve chaw cawˬ ve kʼo, chaw teˇ hpaˍ 100 hkʼawꞈ maˇ gaˬ sheˍ ve htawˇ, yawˇ hui htaꞈ te luˬ piˇ tuˬ yoˬ. (Iˉsaˍyaˆ 65:20) Yaˬhoˉvaˬ leh Yeˍsuˆ teˇ gʼaˇ le le ve nyi ma htaꞈ shiˍ leh miˬ guiˬ awˬ suhˉ hkʼaw teˇ gʼaˇ kaꞈ luˬ ve awˬ ceuˬ maˇ te tcuh.—Iˉsaˍyaˆ 11:9; 60:18; 65:25; Yoˇhanˬ 2:25.
‘A SHAꞈ GʼA TUˬ KʼAWꞈ TEꞈ TU LA VE LEH SUHˉ JEHˬ TUˬ AWˬ PON KʼAWꞈ TEꞈ TU LA TUˬ YOˬ’
13-14. (a) Oˇ htaˇ ngaˬ hui Yoˇhanˬ liꞈ 5:29 hkʼaw hkʼaˬ hkʼe na gʼa jaw ve le? (b) Yeˍsuˆ kʼoˆ ve tawˇ htaꞈ caˉ daꞈ ve ngaˬ hui aˬ htoꞈ ma htaꞈ chaˬ nyi cawˇ ve le?
13 Miˬ guiˬ hkʼoˆ lo kʼawꞈ teꞈ tu la tuˬ ve chaw htaꞈ Yeˍsuˆ kaꞈ kʼoˆ taˍ ve yoˬ. Tawˇ pa haˉ te kʼo, Yeˍsuˆ kʼoˆ ve, “tuˍ hpfuh awˬ hkʼaw lo chehˇ ve chaw hkʼa peu˗eˬ lehˬ, yawˇ ve tawˇ hkawˇ htaꞈ gʼa kaˇ leh tawˆ la tuˬ ve awˬ yanˇ gaˬ la tuˬ yoˬ. Daꞈ ve htaꞈ te ve chaw teˇ hpaˍ lehˬ, co ha teꞈ ve awˬ pon kʼawꞈ teꞈ tu la tuˬ yoˬ. Haiˬ ve htaꞈ te ve chaw teˇ hpaˍ lehˬ, suhˉ jehˬ tuˬ awˬ pon kʼawꞈ teꞈ tu la tuˬ yoˬ.” (Yoˇhanˬ 5:28, 29) Chi Yeˍsuˆ aˬ htoꞈ ma htaꞈ kʼoˆ gaˇ ve le?
14 Kʼawꞈ teꞈ tu la peuˬ hkʼawꞈ nawˉ te tuˬ ve awˬ ceuˬ htaꞈ Yeˍsuˆ kʼoˆ taˍ ve tehꞈ oˇ htaˇ ngaˬ hui na gʼa jaw ve yoˬ. Teˇ hpaˍ kʼo daꞈ ve htaꞈ te leh teˇ hpaˍ kʼo maˇ daꞈ ve awˬ ceuˬ htaꞈ te tuˬ yoˬ. Yaꞈ hkʼaˇ, tuˍ hpfuh awˬ hkʼaw lo tawˆ la ve chaw daꞈ ve htaꞈ te tuˬ maˇ heˆ leh maˇ daꞈ ve htaꞈ te tuˬ Yeˍsuˆ maˇ gʼa kʼoˆ laˇ taˬ. Heˍlaˍsaˆ tawˇ hkawˇ hkʼaw oˇ htaˇ hpehꞈ la jaw ve awˬ ceuˬ htaꞈ Yeˍsuˆ kʼoˆ taˍ ve yoˬ. Chi htaꞈ pa taw, yawˇ hui maˇ suh sheˍ htaˇ te ve awˬ ceuˬ htaꞈ Yeˍsuˆ kʼoˆ gaˇ ve yoˬ. Yaˬhoˉvaˬ leh Yeˍsuˆ miˬ guiˬ awˬ suhˉ hkʼaw teˇ gʼaˇ kaꞈ maˇ daꞈ ve awˬ ceuˬ maˇ te tcuh tehꞈ kʼoˆ maˍ laˇ taˍ ve chi yonˍ gʼa ve yoˬ. Hkʼe te leh, chaw chi teˇ hpaˍ lehˬ yawˇ hui maˇ suh sheˍ htaˇ, maˇ daꞈ ve awˬ ceuˬ htaꞈ te ve tehꞈ kʼoˆ gaˇ ve yoˬ. Chi hkʼe hpehꞈ ve kʼo Yeˍsuˆ kʼoˆ ve, ‘a shaꞈ gʼa tuˬ kʼawꞈ teꞈ tu la ve leh suhˉ jehˬ tuˬ awˬ pon kʼawꞈ teꞈ tu la tuˬ’ ve aˬ htoꞈ ma htaꞈ kʼoˆ gaˇ ve le?
15. ‘A shaꞈ gʼa tuˬ kʼawꞈ teꞈ tu la ve’ chaw a shu le? Leh aˬ htoꞈ ma pa taw le?
15 Yawˇ hui maˇ suh sheˍ htaˇ daꞈ ve awˬ ceuˬ htaꞈ te ve chaw lehˬ, ‘a shaꞈ gʼa tuˬ kʼawꞈ teꞈ tu la tuˬ yoˬ.’ Awˬ lawn kʼo, co tiꞈ ha tiꞈ gʼa tuˬ liꞈ awˬ hkʼaw lo yawˇ hui ve awˬ meh cawˬ˗oˬ ve yoˬ. Chi kʼoˆ gaˇ ve lehˬ Yoˇhanˬ liꞈ 5:29 hkʼaw “daꞈ ve htaꞈ te ve chaw” kʼawꞈ teꞈ tu la leh Tcuh yaˇ liꞈ 24:15 hkʼaw “hteˇ ve chaw” kʼawꞈ teꞈ tu la ve chi ve 2 ceuˬ shuˍ daꞈ ve yoˬ. Roˉmaꞈ liꞈ 6:7 hkʼaw kʼoˆ ve, “suh peuˬ ve chaw teˇ gʼaˇ lehˬ, venˇ baˆ awˬ hkʼaw lo ponˬ tawˆ la peuˬ.” Awˬ tehˬ yoˬ, yawˇ hui suh peuˬ kʼo venˇ baˆ gʼa ponˬ peuˬ. Yaꞈ hkʼaˇ, yawˇ hui Gʼuiˬ sha ve kanˉ ka tiꞈ yeˬ ve hkʼaw te ve hkʼaˬ htaˆ kaꞈ cawˬ tuˬ yoˬ. Chi htaꞈ pa taw, yawˇ hui suh˗oˬ ve htawˇ, co tiꞈ ha tiꞈ gʼa tuˬ liꞈ awˬ hkʼaw lo yawˇ hui ve awˬ meh cawˬ ve yoˬ. (Heˍbrehˇ 6:10) Yawˇ hui ve awˬ meh liꞈ chi ve hkʼaw hkʼaˬ htaˆ kaꞈ cawˬ tuˬ ka tiꞈ gʼa yeˬ ve yoˬ.
16. ‘Suhˉ jehˬ tuˬ awˬ pon kʼawꞈ teꞈ tu la tuˬ’ ve aˬ htoꞈ ma htaꞈ kʼoˆ gaˇ ve le?
16 Maˇ suh sheˍ htaˇ haiˬ ve htaꞈ te ve chaw hkʼaˬ hkʼe hpehꞈ tuˬ le? Yawˇ hui suh˗oˬ htaˇ yawˇ hui ve venˇ baˆ gʼa ponˬ peuˬ. Yaꞈ hkʼaˇ, yawˇ hui Yaˬhoˉvaˬ ve kanˉ ka tiꞈ yeˬ ve hkʼaw maˇ te jaw ve awˬ hkʼoˆ kaꞈ, co tiꞈ ha tiꞈ gʼa tuˬ liꞈ awˬ hkʼaw lo yawˇ hui ve awˬ meh maˇ cawˬ. Ngaˬ hui kʼoˆ gʼa ve lehˬ, Yoˇhanˬ liꞈ 5:29 hkʼaw “haiˬ ve htaꞈ te ve chaw” kʼawꞈ teꞈ tu la ve leh Tcuh yaˇ liꞈ 24:15 hkʼaw “maˇ hteˇ ve chaw” kʼawꞈ teꞈ tu la ve chi ve 2 ceuˬ shuˍ daꞈ ve yoˬ. Yawˇ hui ‘suhˉ jehˬ tuˬ awˬ pon kʼawꞈ teꞈ tu la’ ve yoˬ. * Haiˬ ve chaw htaꞈ suhˉ jehˬ piˇ tuˬ, yawˇ hkʼaˬ hkʼe hpehꞈ ve htaꞈ Yeˍsuˆ kʼawꞈ nyi tuˬ yoˬ. (Luˉkaꞈ 22:30) Co tiꞈ ha tiꞈ gʼa tuˬ liꞈ awˬ hkʼaw lo yawˇ hui ve awˬ meh cawˬ keunˍ ve laˇ tehꞈ, hpeuꞈ maw laˇ tuˬ awˬ yanˇ piˇ ve yoˬ. Leh yawˇ hui ve awˬ meh liꞈ chi ve hkʼaw cawˬ tuˬ, yawˇ hui maˇ suh sheˍ htaˇ haiˬ ve htaꞈ te jaw ve hkʼe maˇ kʼawꞈ te˗o leh Yaˬhoˉvaˬ htaꞈ awˬ to gʼa chiˇ aꞈ piˇ ve yoˬ.
17-18. Miˬ guiˬ chi hkʼoˆ lo kʼawꞈ teꞈ tu la ve chaw teˇ gʼaˇ le le aˬ htoꞈ ma gʼa te cawˇ ve le? Hpeuꞈ maˍ ve liꞈ 20:12, 13 hkʼaw “te taˍ ve” kʼoˆ ve tawˇ lehˬ aˬ htoꞈ ma htaꞈ kʼoˆ gaˇ ve le?
17 Hteˇ ve chaw maˇ heˆ leh maˇ hteˇ ve chaw kʼawꞈ teꞈ tu la ve htawˇ maˇ kʼoˆ, Yeˍsuˆ uˉ peunˍ ve 1,000 hkʼawꞈ ve awˬ yanˇ htaˇ, liꞈ teˇ hpaˍ hkʼaw bvuhꞈ taˍ ve awˬ liˇ tawˇ hkawˇ htaꞈ yawˇ hui gʼa na yuˬ cawˇ ve yoˬ. Tcuh yaˇ Yoˇhanˬ yawˇ mawˬ ve awˬ han hkʼaw kʼoˆ ve, “suh taˍ ve chaw uiˍ chaw i hkʼa peu˗eˬ kʼaw jaw oˇ ve awˬ gʼuˇ suhˍ lo huˉ chehˇ taˍ ve htaꞈ ngaˬ gʼa mawˬ ve yoˬ. Oˇ htaˇ, liꞈ teˇ hpaˍ htaꞈ hpeuꞈ taˍ ve yoˬ. Co tiꞈ ha tiꞈ liꞈ teˇ kʼoˆ htaꞈ htawˇ hpeuꞈ taˍ ve yoˬ. Suh peuˬ ve chaw hui te taˍ ve kanˉ teˇ hpaˍ liꞈ awˬ hkʼaw lo bvuhꞈ taˍ ve hkʼe, liꞈ oˇ ve teˇ hpaˍ htaꞈ cuˇ leh yawˇ hui htaꞈ suhˉ jehˬ ve yoˬ.”—Hpeuꞈ maˍ ve 20:12, 13.
18 Kʼawꞈ teꞈ tu la ve chaw “te taˍ ve” hkʼaˬ ve teˇ yanˇ htaˇ suhˉ jehˬ piˇ tuˬ le? Yawˇ hui maˇ suh sheˍ htaˇ te ve awˬ ceuˬ htaꞈ laˇ? Maˇ heˆ! Ngaˬ hui gʼa henˇ kʼai peuˬ ve hkʼe, yawˇ hui suh˗oˬ htaˇ venˇ baˆ gʼa ponˬ peuˬ. Hkʼe te leh, yawˇ hui maˇ suh sheˍ htaˇ, te ve awˬ ceuˬ htaꞈ suhˉ jehˬ piˇ maˇ gʼa. Te taˍ ve tcuhˉ kuiˬ lehˬ, miˬ guiˬ awˬ suhˉ hkʼaw yawˇ hui gʼa henˇ taˍ ve awˬ ceuˬ htaꞈ gʼaꞈ te tuˬ ve laˇ, maˇ gʼaꞈ te tuˬ ve laˇ tehꞈ kʼoˆ gaˇ ve yoˬ. Yaˬhoˉvaˬ ve kanˉ ka tiꞈ yeˬ ve hkʼaw te ve chaw kʼawꞈ teꞈ tu la ve teˇ hpaˍ lehˬ, Noˉaꞈ, Saˍmo˗eˍlaˆ, leh Daˍviˆ, Yeˍsuˆ ve awˬ lawn htaꞈ caˉ daꞈ ve gʼa henˇ leh yawˇ htaiˍ hkʼawꞈ laˇ ve htaꞈ yonˍ ve tehꞈ gʼa hpeuꞈ maw piˇ ve yoˬ. Maˇ hteˇ ve chaw kaꞈ laiˉ ceuˬ htaꞈ maˇ maˇ gʼa henˇ leh henˇ taˍ ve teˇ hpaˍ htaꞈ gʼa gʼaꞈ te ve yoˬ!
19. Yawˇ gʼa henˇ tuˬ ve awˬ yanˇ cawˬ leh henˇ taˍ ve awˬ ceuˬ htaꞈ a yeˇ maˇ yuˬ leh maˇ gʼaꞈ te ve chaw htaꞈ hkʼaˬ hkʼe hpehꞈ la tuˬ le?
19 Yawˇ gʼa henˇ tuˬ ve awˬ yanˇ cawˬ leh henˇ taˍ ve awˬ ceuˬ htaꞈ a yeˇ maˇ yuˬ leh maˇ gʼaꞈ te ve chaw htaꞈ hkʼaˬ hkʼe hpehꞈ la tuˬ le? Hpeuꞈ maˍ ve liꞈ 20:15 hkʼaw kʼoˆ ve, “co tiꞈ ha tiꞈ liꞈ awˬ hkʼaw lo awˬ meh maˇ cawˬ ve chaw hkʼaˬ ve teˇ gʼaˇ htaꞈ maˇ kʼoˆ, aˬ miˍ gʼuiˬ po awˬ hkʼaw lo baˬ keu ve yoˬ.” Chi kʼoˆ gaˇ ve lehˬ yawˇ hui htaꞈ co co taiˍ taiˍ te luˬ piˇ tuˬ yoˬ. Co tiꞈ ha tiꞈ gʼa tuˬ liꞈ awˬ hkʼaw lo ngaˬ hui ve awˬ meh cawˬ leh maˇ gʼa shiˆ baˬ laˇ tuˬ, chi ve ngaˬ hui yonˍ gʼa tuˬ a yeˇ uiˍ jaˇ ve tehꞈ gʼa mawˬ ve yoˬ.
Yeˍsuˆ uˉ peunˍ ve 1,000 hkʼawꞈ ve awˬ yanˇ htaˇ, miˬ guiˬ hkʼoˆ lo teˇ pawˆ kaꞈ maˇ cawˬ jaw sheˍ ve maˍ ve kanˉ uiˍ jaˇ ve htaꞈ awˬ viˉ awˬ nyi hawˉ hkʼaˆ ga piˇ chehˇ ve (Awˬ tawn 20 nyi sheˍ)
20. Yeˍsuˆ uˉ peunˍ ve 1,000 hkʼawꞈ ve awˬ yanˇ htaˇ, ha lehˬ jaˇ tuˬ ve kanˉ aˬ htoꞈ ma cawˬ tuˬ le? (Awˬ htaꞈ hpawˇ ve awˬ han htaꞈ nyi sheˍ.)
20 Yeˍsuˆ uˉ peunˍ ve 1,000 hkʼawꞈ ve awˬ yanˇ htaˇ, ngaˬ hui hkʼaˬ hkʼe taw ha lehˬ jaˇ tuˬ ve htaꞈ dawˇ nyi sheˍ. Oˇ ve teˇ yanˇ miˬ guiˬ hkʼoˆ lo teˇ pawˆ kaꞈ maˇ cawˬ jaw sheˍ ve maˍ ve kanˉ uiˍ jaˇ ve cawˬ tuˬ yoˬ. Leh awˬ yanˇ oˇ ve teˇ yanˇ htaˇ, “hteˇ ve chaw” leh “maˇ hteˇ ve chaw” yawˇ hui gʼa henˇ taˍ ve awˬ ceuˬ htaꞈ gʼaꞈ te˗aw laˇ tehꞈ nyi tuˬ yoˬ. (Iˉsaˍyaˆ 26:9; Tcuh yaˇ 17:31) Yaꞈ hkʼaˇ, hkʼaˬ hkʼe te henˇ tuˬ le? Gʼuˇ suhˍ teˇ lawn hkʼaw awˬ lawn chi htaꞈ hkʼawꞈ laˇ leh awˬ bon uiˍ jaˇ tehꞈ kʼoˆ piˇ tuˬ ga laˇ gʼa ve kaꞈ teˇ geh henˇ tuˬ yoˬ.
KʼA MUIˬ HKAWˇ 147 Ka tiꞈ co co taiˍ taiˍ ve a shaꞈ
^ Yoˇhanˬ liꞈ 5:28, 29 ‘a shaꞈ gʼa tuˬ kʼawꞈ teꞈ tu la ve leh suhˉ jehˬ tuˬ awˬ pon kʼawꞈ teꞈ tu la tuˬ’ Yeˍsuˆ kʼoˆ ve htaꞈ caˉ daꞈ ve na gʼa ve awˬ suhˉ, awˬ lawn chi ve hkʼaw teˇ geh henˇ tuˬ yoˬ. Kʼawꞈ teꞈ tu la ve chi ve 2 ceuˬ aˬ htoꞈ ma htaꞈ kʼoˆ gaˇ ve, leh Liꞈ hpu awˬ tawn chi ve hkʼaw kʼoˆ taˍ ve hkʼe, a shu kaꞈ kʼawꞈ teꞈ tu la tuˬ teˇ geh henˇ tuˬ yoˬ.
^ Yaˬhoˉvaˬ lehˬ “miˬ guiˬ te hpanˍ htaˇ” liꞈ kʼoˆ chi tanˬ bvuhꞈ ve yoˬ. Chi lehˬ, Yeˍsuˆ htaiˍ hkʼawꞈ laˇ ve htaꞈ chaw yaˇ awˬ bon gʼa htaˇ tanˬ ve yoˬ. (Maꞈhtehˍ 25:34; Hpeuꞈ maˍ ve 17:8) Hkʼe te leh, Aˍbeˍlaˆ lehˬ co tiꞈ ha tiꞈ liꞈ awˬ hkʼaw lo awˬ meh cawˬ ve awˉ lawˉ teˇ gʼaˇ hpehꞈ ve yoˬ hehˉ.
^ Oˇ htaˇ ngaˬ hui na gʼa jaw ve, “suhˉ jehˬ ve” ciˍ yanˍ ve htaꞈ kʼoˆ gaˇ ve yoˬ. Awˬ tehˬ kʼo, “suhˉ jehˬ ve” lehˬ chi ve htaꞈ kʼoˆ gaˇ ve yoˬ hehˉ. Yaꞈ hkʼaˇ, awˬ lawn chi ve hkʼaw Yeˍsuˆ “suhˉ jehˬ ve” htaꞈ kʼoˆ htaˇ, laiˉ ceuˬ htaꞈ kʼoˆ gaˇ ve yoˬ. Tawˇ hkawˇ chi lehˬ, chaw teˇ hpaˍ hpaˍ htaꞈ chaˬ nyi leh yawˇ hkʼaˬ hkʼe kʼai ve htaꞈ kʼoˆ gaˇ ve yoˬ. Heˍlaˍsaˆ ve liꞈ kʼoˆ teˇ kʼoˆ hkʼaw tawˇ hkawˇ chi htaꞈ kʼoˆ maˍ laˇ ve, “hkʼa dehꞈ chaˬ nyi ve yoˬ.”
