1. Skont Malakija 3:16, Ġeħova xi ktieb qed jikteb u x’fih?

 ĠEĦOVA ilu jikteb ktieb speċjali għal eluf taʼ snin. Dan il-​ktieb fih lista taʼ ismijiet, u l-​ewwel isem hu tal-​ewwel raġel leali Abel. b (Lq. 11:50, 51) Minn dak iż-​żmien ’l hawn, Ġeħova baqaʼ jikteb ismijiet oħrajn, u sal-​lum il-​ġurnata dan il-​ktieb fih miljuni taʼ ismijiet. Fil-​Bibbja dan il-​ktieb jissejjaħ “ktieb it-​tifkira,” “il-​ktieb tal-​ħajja,” u “r-​romblu tal-​ħajja.” F’dan l-​artiklu se nirreferu għalih bħala “l-​ktieb tal-​ħajja.”—Aqra Malakija 3:16; Riv. 3:5; 17:8.

2. Liema ismijiet hemm miktubin fil-​ktieb tal-​ħajja, u aħna kif jistaʼ jkollna isimna fih?

² Dan il-​ktieb speċjali fih l-​ismijiet kollha taʼ dawk li jaqdu lil Ġeħova b’rispett kbir u jħobbu lil ismu. Huma se jkollhom l-​opportunità li jgħixu ħajja taʼ dejjem. Aħna wkoll jistaʼ jkollna isimna f’dan il-​ktieb jekk ikollna ħbiberija tajba ma’ Ġeħova, u dan grazzi għas-​sagrifiċċju t’Ibnu Ġesù Kristu. (Ġw. 3:16, 36) Kulħadd jixtieq ikollu ismu f’dan il-​ktieb, sew jekk għandna t-​tama li ngħixu fis-​sema u sew jekk fuq l-​art.

3-4. (a) Jekk bħalissa isimna qiegħed miktub fil-​ktieb tal-​ħajja, ifisser li se ngħixu għal dejjem? (b) X’se niddiskutu f’dan l-​artiklu u f’taʼ warajh?

 ³ Ifisser dan li dawk kollha li għandhom isimhom miktub fil-​ktieb tal-​ħajja se jkollhom ħajja taʼ dejjem? It-​tweġiba nsibuha f’dak li qal Ġeħova lil Mosè f’​Eżodu 32:33. Hu qallu: “Kulmin dineb kontrija, inħassru mill-​ktieb tiegħi.” Allura, l-​ismijiet li hemm f’dan il-​ktieb jistgħu jitħassru. Dan hu bħallikieku Ġeħova kiteb l-​ismijiet bil-​lapes. (Riv. 3:5) Aħna rridu noqogħdu attenti li isimna jibqaʼ miktub f’dan il-​ktieb sakemm jiġi miktub bil-​biro.

⁴ Dan iġegħelna nsaqsu xi mistoqsijiet. Pereżempju, il-​Bibbja x’tgħid dwar dawk li isimhom qiegħed miktub fil-​ktieb tal-​ħajja, u dawk li isimhom mhux qiegħed imniżżel fih? In-​nies li għandhom isimhom f’dan il-​ktieb meta se jirċievu l-​ħajja taʼ dejjem? U xi ngħidu dwar dawk li mietu imma ma kellhomx l-​opportunità li jsiru jafu lil Ġeħova? Isimhom jistaʼ jkun f’dan il-​ktieb? Dawn il-​mistoqsijiet se jitwieġbu f’dan l-​artiklu u f’taʼ warajh.

L-​ISMIJIET TAʼ MIN HUMA MIKTUBIN FIL-​KTIEB?

5-6. (a) Skont Filippin 4:3, l-​ismijiet taʼ min huma miktubin fil-​ktieb tal-​ħajja? (b) Isimhom meta se jibqaʼ miktub għal dejjem f’dan il-​ktieb?

⁵ L-​ismijiet taʼ min huma mniżżlin fil-​ktieb tal-​ħajja? Biex inwieġbu din il-​mistoqsija se naraw ħames gruppi taʼ nies differenti. Minn dawn il-​gruppi hemm min għandu ismu mniżżel fil-​ktieb tal-​ħajja u min le.

⁶ L-​ewwel grupp hu dawk li ġew magħżulin biex imexxu ma’ Ġesù fis-​sema.  Bħalissa isimhom hu miktub fil-​ktieb tal-​ħajja? Iva. Skont dak li qal l-​appostlu Pawlu lill-​‘ħaddiema sħabu’ f’Filippi, l-​ismijiet tal-​midlukin li ġew magħżulin biex imexxu ma’ Ġesù huma miktubin fil-​ktieb tal-​ħajja. (Aqra Filippin 4:3.) Biex isimhom jibqaʼ f’dan il-​ktieb huma jridu jibqgħu leali. Wara li jiġu mmarkati bis-​siġill, isimhom se jibqaʼ għal dejjem f’dan il-​ktieb. Dan jiġri qabel imutu jew qabel tibda t-​tribulazzjoni l-​kbira.—Riv. 7:3.

7. Skont Rivelazzjoni 7:16, 17, il-​folla kbira taʼ nagħaġ oħrajn meta se jkollhom isimhom miktub għal dejjem fil-​ktieb tal-​ħajja?

⁷ It-​tieni grupp hu l-​folla kbira taʼ nagħaġ oħrajn. Isimhom hu miktub fil-​ktieb tal-​ħajja? Iva. Se jkun għadu miktub f’dan il-​ktieb wara li jsalvaw minn Armageddon? Iva. (Riv. 7:14) Ġesù qal li dawn in-​nagħaġ se jgħaddu għall-​“ħajja taʼ dejjem.” (Mt. 25:46) Imma dawk li jgħaddu ħajjin wara Armageddon mhux se jirċievu l-​ħajja taʼ dejjem mill-​ewwel. Isimhom se jibqaʼ miktub f’dan il-​ktieb bħallikieku bil-​lapes. Matul ir-​Renju taʼ Elf Sena, Ġesù se “jirgħahom, u jiggwidahom lejn għejun taʼ l-​ilmijiet tal-​ħajja.” Dawk li se jobdu l-​gwida taʼ Kristu u li se jibqgħu leali lejn Ġeħova sal-​aħħar, se jkollhom isimhom miktub għal dejjem fil-​ktieb tal-​ħajja.—Aqra Rivelazzjoni 7:16, 17.

8. L-​ismijiet taʼ min mhux miktubin fil-​ktieb tal-​ħajja, u x’se jiġrilhom?

⁸ It-​tielet grupp hu dawk li jissejħu mogħoż, li se jiġu meqrudin f’Armageddon. Isimhom mhux miktub fil-​ktieb tal-​ħajja. Ġesù qal li dawn “imorru fil-​qtugħ taʼ dejjem.” (Mt. 25:46) Pawlu kiteb: “Dawn l-​istess nies jieħdu l-​kastig ġudizzjarju taʼ qerda għal dejjem.” (2 Tess. 1:9; 2 Pt. 2:9) Dan japplika wkoll għal dawk kollha li dinbu kontra l-​ispirtu qaddis apposta. Huma mhux se jgħixu għal dejjem imma se jiġu meqrudin. Bla dubju, dawn mhux se jiġu rxoxtati. (Mt. 12:32; Mk. 3:28, 29; Ebr. 6:4-​6) Issa ejja naraw żewġ gruppi taʼ nies oħra li se jiġu rxoxtati fuq l-​art.

DAWK LI SE JIĠU RXOXTATI

9. Skont Atti 24:15, liema żewġ gruppi se jiġu rxoxtati fuq l-​art, u x’inhi d-​differenza bejniethom?

⁹ Il-​Bibbja titkellem dwar żewġ gruppi taʼ nies li se jiġu rxoxtati bit-​tama li jgħixu għal dejjem fuq l-​art, dawk “sewwa” u “dawk li m’humiex sewwa.” (Aqra Atti 24:15.) In-​“nies sewwa” huma dawk li qdew lil Ġeħova meta kienu ħajjin. Mill-​banda l-​oħra, “dawk li m’humiex sewwa” ma kinux jaqdu lil Ġeħova qabel mietu. Fil-​fatt, dawn ma kinux jgħixu ħajja li togħġob lil Ġeħova. Peress li ż-​żewġ gruppi se jiġu rxoxtati, isimhom se jkun miktub fil-​ktieb tal-​ħajja? Biex inwieġbu din il-​mistoqsija, ejja nikkunsidraw iż-​żewġ gruppi wieħed wieħed.

10. In-​“nies sewwa” għala se jiġu rxoxtati, u x’responsabbiltà se jkollhom xi wħud minnhom? (Ara wkoll “Mistoqsijiet mill-​Qarrejja” f’din il-​ħarġa dwar l-​irxoxt fuq l-​art.)

¹⁰ Ir-​rabaʼ grupp hu n-​“nies sewwa.” Qabel mietu, isimhom kien miktub fil-​ktieb tal-​ħajja. Meta mietu, isimhom tħassar minn dan il-​ktieb? Le, għax għal Ġeħova huma għadhom “ħajjin.” Ġeħova “mhux Alla tal-​mejtin, imma tal-​ħajjin, għax kollha ħajjin għalih.”  (Lq. 20:38) Dan ifisser li meta n-​nies sewwa se jiġu rxoxtati fuq l-​art isimhom se jkun fil-​ktieb tal-​ħajja, imma bil-​lapes. (Lq. 14:14) Xi wħud minn dawk li se jiġu rxoxtati se jirċievu r-​responsabbiltà li jaqdu bħala “prinċpijiet fl-​art kollha.”—Salm 45:16.

11. In-​nies “li m’humiex sewwa” x’se jkollhom bżonn jitgħallmu biex isimhom ikun miktub fil-​ktieb tal-​ħajja?

¹¹ Issa ejja naraw l-​aħħar grupp, tan-​nies “li m’humiex sewwa.” Forsi minħabba li ma kinux jafu l-​liġijiet taʼ Ġeħova, qabel mietu m’għexux ħajja tajba. Allura isimhom mhux miktub fil-​ktieb tal-​ħajja. Imma Alla se jirxoxtahom biex jagħtihom l-​opportunità li jkollhom isimhom miktub f’dan il-​ktieb. Dawn l-​uħud “li m’humiex sewwa” se jkollhom bżonn ħafna għajnuna. Qabel mietu xi wħud minnhom għamlu affarijiet ħżiena ħafna. Għalhekk, se jkollhom jitgħallmu jgħixu skont il-​livelli taʼ Ġeħova. Biex dawn l-​uħud jitgħallmu, is-​Saltna t’Alla se tmexxi l-​ikbar xogħol taʼ tagħlim li qatt sar fuq l-​art.

12. (a) Min se jgħallem lin-​nies li mhumiex sewwa? (b) X’se jiġrilhom dawk li ma jkunux iridu japplikaw dak li jkunu qed jitgħallmu?

¹² Min se jgħallem lil dawk li mhumiex sewwa? Il-​folla l-​kbira u n-​nies sewwa li se jiġu rxoxtati. Biex in-​nies li mhumiex sewwa jkollhom isimhom miktub fil-​ktieb tal-​ħajja jridu jibnu ħbiberija ma’ Ġeħova u jiddedikaw ħajjithom lilu. Ġesù Kristu u l-​midlukin se joqogħdu attenti biex jaraw kif se jaġixxu dawk li mhumiex sewwa għal dak li jkunu qed jitgħallmu. (Riv. 20:4) Kull min ma jaċċettax l-​għajnuna mhux se jitħalla jgħix, anki jekk ikollu 100 sena. (Is. 65:20) Ġeħova u Ġesù jistgħu jaraw x’hemm fil-​qalb u mhu se jħallu lil ħadd jagħmel il-​ħsara fid-​dinja l-​ġdida.—Is. 11:9; 60:18; 65:25; Ġw. 2:25.

 IRXOXT TAʼ ĦAJJA U TAʼ ĠUDIZZJU

13-14. (a) Fil-​passat kif konna nifhmu dak li qal Ġesù fi Ġwanni 5:29? (b) X’għandna ninnotaw fil-​kliem li qal Ġesù?

¹³ Ġesù tkellem ukoll dwar dawk li se jiġu rxoxtati fuq l-​art. Pereżempju, hu qal: “Ġejja s-​siegħa li fiha dawk kollha li qegħdin fl-​oqbra tat-​tifkira jisimgħu leħnu u joħorġu, dawk li għamlu t-​tajjeb għal irxoxt taʼ ħajja, dawk li pprattikaw affarijiet vili għal irxoxt taʼ ġudizzju.” (Ġw. 5:28, 29) Ġesù x’ried ifisser?

¹⁴ Fil-​passat konna nifhmu li dak li qal Ġesù kien jirreferi għall-​affarijiet li kienu se jagħmlu n-​nies wara li jiġu rxoxtati. Fi kliem ieħor, xi wħud jiġu rxoxtati u jagħmlu affarijiet tajbin u oħrajn jiġu rxoxtati u jagħmlu affarijiet ħżiena. Però, innota li Ġesù ma qalx li dawk li se jiġu rxoxtati se jagħmlu affarijiet tajbin jew se jagħmlu affarijiet ħżiena. Hu tkellem fil-​passat u qal “dawk li għamlu t-​tajjeb” u “dawk li pprattikaw affarijiet vili.” Dan juri li l-​affarijiet li għamlu għamluhom qabel mietu. Dan jagħmel sens, għax fid-​dinja l-​ġdida, Ġeħova mhu se jħalli lil ħadd jagħmel affarijiet ħżiena. Għalhekk, in-​nies mhux sewwa għamlu dawn l-​affarijiet qabel mietu. Allura xi jfisser dak li qal Ġesù dwar “irxoxt taʼ ħajja” u “rxoxt taʼ ġudizzju”?

15. Min se jkollu “rxoxt taʼ ħajja,” u għala?

¹⁵ In-​nies sewwa, li għamlu affarijiet tajbin qabel mietu, se jkollhom “irxoxt taʼ ħajja” għax isimhom se jkun qiegħed diġà miktub fil-​ktieb tal-​ħajja. Dan ifisser li l-​irxoxt taʼ “dawk li għamlu t-​tajjeb” li jissemma fi Ġwanni 5:29 hu l-​istess irxoxt “tan-​nies sewwa” li jissemma f’​Atti 24:15. Din l-​ispjegazzjoni taqbel ma’ dak li hemm miktub f’​Rumani 6:7, li jgħid: “Min miet inħeles mid-​dnub.” Meta mietu, Ġeħova ħafrilhom id-​dnubiet tagħhom, u mhux se jinsa l-​affarijiet tajbin li għamlu meta kienu ħajjin. (Ebr. 6:10) Bla dubju, biex isimhom jibqaʼ fil-​ktieb tal-​ħajja, dawn in-​nies sewwa li se jiġu rxoxtati jridu jibqgħu leali.

16. Xi jfisser “irxoxt taʼ ġudizzju”?

¹⁶ Xi ngħidu għal dawk li għamlu affarijiet ħżiena qabel mietu? Għalkemm id-​dnubiet tagħhom tħassru meta mietu, huma ma kinux jaqdu lil Ġeħova meta kienu ħajjin. Huma m’għandhomx isimhom miktub fil-​ktieb tal-​ħajja. Għalhekk, l-​irxoxt taʼ “dawk li pprattikaw affarijiet vili” hu l-​istess irxoxt tan-​nies “li m’humiex sewwa” li jissemma f’​Atti 24:15. Huma se jkollhom “irxoxt taʼ ġudizzju.” c Dan ifisser li Ġesù se joqgħod attent u jara kif se jaġixxu. (Lq. 22:30) Wara xi żmien, Ġesù se jkun jaf jekk ħaqqhomx li isimhom ikun miktub fil-​ktieb tal-​ħajja. Ġeħova se jikteb isimhom fil-​ktieb biss jekk huma jgħixu ħajja tajba u jiddedikaw ħajjithom lilu.

17-18. Dawk kollha li se jiġu rxoxtati fuq l-​art x’se jkollhom jagħmlu, u “l-​għemejjel” li jsemmi Rivelazzjoni 20:12, 13 xi jfissru?

¹⁷ Dawk kollha li se jiġu rxoxtati, kemm in-​nies sewwa u kemm dawk li  mhumiex sewwa, se jkollhom jobdu l-​liġijiet li se jkun hemm fl-​iskrolli l-​ġodda, li se jinfetħu matul l-​1,000 sena. L-​appostlu Ġwanni jiddeskrivi x’ra fil-​viżjoni tiegħu: “Rajt il-​mejtin, il-​kbar u ż-​żgħar, weqfin quddiem it-​tron, u nfetħu r-​rombli. U nfetaħ romblu ieħor, ir-​romblu tal-​ħajja. U l-​mejtin ġew ġudikati fuq dak li kien miktub fir-​rombli skond l-​għemejjel tagħhom.”—Riv. 20:12, 13.

¹⁸ Dawk li se jiġu rxoxtati, skont liema “għemejjel” se jiġu ġudikati? Se jkunu l-​affarijiet li għamlu qabel mietu? Le! Ftakar li d-​dnubiet tagħhom kienu tħassrulhom meta mietu. Għalhekk, “l-​għemejjel tagħhom” ma jistgħux ikunu dak li għamlu meta kienu ħajjin. Minflok, dan jirreferi għall-​mod kif se jaġixxu għat-​tagħlim fid-​dinja l-​ġdida. Anki rġiel leali bħal Noè, Samwel, David, u Danjel se jkollhom jitgħallmu dwar Ġesù Kristu u juru l-​fidi fis-​sagrifiċċju tiegħu. Jekk dawn l-​irġiel se jkollhom ħafna x’jitgħallmu, aħseb u ara dawk in-​nies li mhumiex sewwa kemm se jkollhom jitgħallmu iktar!

19. X’se jiġrilhom dawk li ma jaċċettawx din l-​opportunità mill-​isbaħ?

¹⁹ X’se jiġrilhom dawk li ma jaċċettawx din l-​opportunità mill-​isbaħ? Rivelazzjoni 20:15 jgħid: “Kulmin ma nstabx miktub fil-​ktieb tal-​ħajja ġie mixħut fl-​għadira tan-​nar.” Dan ifisser li se jinqerdu għalkollox. Mela kemm hu importanti li nkunu ċerti li isimna jkun miktub fil-​ktieb tal-​ħajja u jibqaʼ hemm!

20. Liema xogħol eċċitanti se jsir matul l-​Elf Sena? (Ara l-​istampa tal-​qoxra.)

²⁰ Kemm se jkun eċċitanti ż-​żmien matul l-​Elf Sena! F’dan iż-​żmien se jsir l-​ikbar xogħol taʼ tagħlim li n-​nies t’Alla qatt għamlu fuq l-​art. Imma se jkun ukoll żmien taʼ test għan-​nies sewwa u dawk li mhumiex sewwa, biex juru kif iġibu ruħhom. (Is. 26:9; Atti 17:31) Kif se jsir dan ix-​xogħol kbir taʼ tagħlim? L-​artiklu li jmiss se jgħinna nifhmu u napprezzaw kif se jsir dan ix-​xogħol eċċitanti.