1. Mwawiiwanana ni Malakiya 3:16, liivuru taani Yehova onamurepeiye nave tiheeni enaphwanyeyamo?

 MU IYAAKHA macikhwi macikhweene, Yehova onnamurepa liivuru avameekheiye. Mu liivuru yoowo annaphwanyeyamo masina, apaceryaka ni nsina na namoona oopacerya oororomeleya, Apele. * (Luka 11:50, 51) Moovira wa iyaakha, Yehova onnaaceererya masina mu liivuru yoowo, nave olelo annaphwanyeyamo mamilyawu a masina. Mpiipiliyani, liivuru yoowo oniichaniwa “nliivuru nawuupuxerya,” “liivuru a okumi” ni “eroolu ya okumi.” Mmwaha yoola, nnahaala omulocaka ntoko “liivuru a okumi.”—Mwaalakhanye Malakiya 3:16; Wup. 3:5; 17:8, TNM.

2. Taani masina aya anarempwa mu liivuru a okumi, nave ti mwawiihai masina ahu eneeraaya ephitaanyeryiwe mu liivuru yoowo?

² Mu liivuru yoola avameekheiye annaphwanyeyamo masina a oothene yaale anamulapa Yehova mmukhalelo waphaama ni yaawo anacicimiha nsina nawe. Awo anahaala okhalano ekari ya waakhela okumi woohimala. Olelo masina ahu ananwerya orempwa mu liivuru yoola wakhala wi nohunnuwiha onthamwene wawaacameleya ni Yehova moorweela wa mukucho wa Mwaana awe, Yesu Kristu. (Yoh. 3:16, 36) Oothene ahu ninnachuna wi masina ahu erempwe mu liivuru yoowo, moohiphwacha waakhanle wi ewehereryo ahu ti ya okhala wirimu naari veelaponi yavathi.

3-4. (1) Wakhala wi masina ahu aarempwa mu liivuru a okumi, apwanne nnamwaakhela okumi woohimala? Mutharihe. (2) Tiheeni nnahaalaahu othokororya mmwaha yoola ni onacharela?

 ³ Apwanne ela enataphulela wi oothene yaale masina aya arempwe mu liivuru yoowo, ahaakhwanela wi yaakhele okumi woohimala? Ninnaphwanya naakhulo na nikoho nenla mu masu a Yehova wa Mose, anaphwanyeya mu Mukwaha 32:33. Yehova aaloca: “Kinarwa kimushipiha muliivuruni mwaka muchu yoowo onakichekela.” Mwawiihiiha, masina yaawo anaphwanyeya mu liivuru yoowo ananwerya oxipihiwa. Eri ntoko wi Yehova woopaceryani onarepa masina awo ni elaapixi. (Wup. 3:5) Nnaphwanela wiilipixerya wi masina ahu etitelele okhala mu liivuru yoowo ophiyerya erempwe ni kaneta.

⁴ Ela enamuneeriha wiipakela makoho. Ntoko yootakiherya, tiheeni Piipiliya onaloceiye vooloca sa yaale masina aya arempwe mu liivuru a okumi ni yaale masina aya ahirempwe? Wa yaale masina aya eni etitelele okhala mu liivuru yoowo, ti liini anahaalaaya waakhela okumi woohimala? Hanka vooloca sa yaale akhwile ehintonkoru okhalano ekari ya omusuwela Yehova? Apwanne ti wooweryeya masina aya orempwa mu liivuru yoowo? Makoho yaala anahaala waakhuliwa mmwaha yoola ni mmwaha onacharela.

MASINA AWANI ARI MU LIIVURU?

5-6. (1) Ntoko etharihiwaaya mu Filipi 4:3, masina awani arempwe mu liivuru a okumi? (2) Ti liini masina aya eneeraaya erempwe wi etitelele okhala mu liivuru a okumi?

⁵ Masina awani arempwe mu liivuru a okumi? Wi naakhule nikoho nenla, nnahaala othokororya makhuuru mathanu oohiyana a achu. Wa yaala, akina aarempwa masina aya mu liivuru yoola a okumi nyenya akina hooye.

⁶ Nikhuuru noopacerya ti na yaale athanliwe wi yalamuleleke ni Yesu wirimu. Apwanne masina aya aarempwa mu liivuru a okumi? Aai. Mwawiiwanana ni masu a murummwa Paulo wa ‘akhwaawe a muteko’ o Filipi, masina a  oothanliwa yaawo awompwe wi yalamuleleke ni Yesu, hiihava annaphwanyeya mu liivuru a okumi. (Mwaalakhanye Filipi 4:3.) Nyenya, wi masina aya etitelele okhala mu liivuru yoola oosiphela, awo anaphwanela otitelela okhala oororomeleya. Emanle weeyeriwa eneneeryo yookuchula, masina aya anahaala otitelela okhala mu liivuru yoola. Eyo eneereya awo ehakumve okhwa nave enahaala tho weereya yoohooxa etokotoko ehipacenrye.—Wup. 7:3.

7. Tiheeni niiwexeenxaahu orweela wa Wupulula 7:16, 17 vooloca sa ti liini mucici muncipale wa ipuchepuche ikina, masina aya eneeraaya erempwe wi etitelele okhala mu liivuru a okumi?

⁷ Nikhuuru nanaawiili ti mucici muncipale wa ipuchepuche ikina. Apwanne masina aya hiihava aarempwa mu liivuru a okumi? Aai. Apwanne masina aya anahaala otitelela okhala mu liivuru a okumi emanle okophola mu Armaketo? Aai. (Wup. 7:14) Yesu olonce wi ipuchepuche seiha sinamuya “wookumini woohimala.” (Mat. 25:46) Nyenya yaale anahaala okophola mu Armaketo hanahaala waakhela okumi woohimala mu elukuluku ene yeeyo. Masina aya anahaala otitelela okhala oorempwa mu liivuru a okumi ni elaapixi, ntoko yaaryaaya. Variyari va Olamulelo wa Iyaakha 1.000, Yesu oni ‘onamwakukhula, ni onamwakeriha wa anatxutxu a mahi a ekumi.’ Yaawo anahaala waakhulela phaama ohoolela wa Kristu nave wookuchulani yeeriwa okhala oororomeleya wa Yehova, masina aya anahaala otitelela okhala mu liivuru a okumi.—Mwaalakhanye Wupulula 7:16, 17, BNM.

8. Taani masina aya ehirempwale mu liivuru a okumi, nave tiheeni enahaala weereya ni yaawo?

⁸ Nikhuuru naneeraru ti na ipuri, seiho inahaala otoloxiwa mu Armaketo. Masina aya herempwale mu liivuru a okumi. Yesu olonce wi awo “anamutoloxiwa moomalela.” (Mat. 25:46, TNM) Mooveereliwa, Paulo onnanleela wi “yaawo anamoonihiwa ekoyi, etoloshiwe okhala wookhala.” (2 Tes. 1:9; 2 Ped. 2:9) Emohamoha enanwerya olociwa wa yaale moovira wa elukuluku, yaalakelenle mwaayiini ochekela munepa waweela. Awo tho enahaala otoloxiwa okhala wookhala; hiyaakhela okumi woohimala. Mweeparipari, awo heviihiwa mookhwani. (Mat. 12:32; Mar. 3:28, 29; Ahe. 6:4-6) Vano hankooni nthokororye mwawiiseela makhuuru meeli a achu yaawo anahaala oviihiwa mookhwani wi ekhale veelaponi yavathi.

YAALE ANAHAALA OVIIHIWA MOOKHWANI

9. Ntoko yooniheryiwaaya mu Saweriwa T’arummwa 24:15, makhuuru taani meeli a achu anahaala oviihiwa wi ekhaleke veelaponi yavathi, nave ohiyana taani orivovo wa makhuuru yaala meeli?

⁹ Piipiliya onnaloca sa makhuuru meeli a achu yaawo anahaala oviihiwa ni ewehereryo ya okhala wookhala veelaponi ya vathi, “ékhaikhai” ni “óhikhala ékhaikhai.” (Mwaalakhanye Saweriwa T’arummwa 24:15, NN) “Ékhaikhai” ti yaale yaamurumeela Yehova moororomeleya vaavaa yaaraaya akumi. Moohiyana, “óhikhala ékhaikhai” hiyaamurumeela Yehova. Mweeparipari, mmikhalelo mincipale, meecelo aya hiyaari awookololowa. Vano woona wi makhuuru oomeeli anahaala oviihiwa, apwanne nnanwerya oloca wi masina aya aarempwa mu liivuru a okumi? Wi naakhule nikoho nenla, hankooni nthokororye nikhuuru ti nikhuuru.

10. Ntakhara heeni “ékhaikhai” anahaalaaya oviihiwa mookhwani, nave ekari taani akina a yaawo anahaalaaya opuha? (Moone tho mu erevista yeela “Makoho a Alipa Waalakhanya” vooloca sa oviihiwa wa alipa ookhwa veelaponi yavathi.)

¹⁰ “Ékhaikhai” nikhuuru naneexexe. Ehaakumve okhwa, masina aya yaanaphwanyeya mu liivuru a okumi. Apwanne masina aya yaaviihiwamo mu liivuru yoowo vaavaa yaakhwilaaya? Hooye, nthowa nawi awo nlelo ‘aakhala’ mmuupuweloni wa Yehova. Yehova “tahi Muluku  a achu ookhwa, nto Muluku a akumi, ntakhara oothene anakhala, akumi mwa yoowo.” (Luka 20:38) Eyo enataphulela wi vaavaa eekhaikhai eneeraaya eviihiwe wi ekhaleno okumi veelaponi ya vathi, masina aya anahaala ophwanyeyaka mu liivuru a okumi naamwi woopaceryani yaarempwe ni “elaapixi.” (Luka 14:14) Moohikhwa minikwa, akina a yaawo anahaala oviihiwa, anahaala okhalano ekari ya orumeela ntoko ‘alamuleli a elapo yoothene.’—Sal. 45:16.

11. Tiheeni “óhikhala ékhaikhai” anahaalaaya ochuna ohuserya ehaakumve orempwa masina aya mu liivuru a okumi?

¹¹ Wookuchulani, nthokororye nikhuuru naneethanu, “óhikhala ékhaikhai.” Akhweya nthowa na ohisuwela malamulo a Yehova, awo hiyaakhala mwawookololowa ehakumve okhwa. Mwawiihiiha masina aya haarempwe mu liivuru a okumi. Nyenya vaavaa Muluku onahaaleiye waaviiha mookhwani, anahaala okhalano ekari ya orempwa masina aya mu liivuru yoola. “Óhikhala ékhaikhai” yaala anahala ochuna nikhaviheryo nawaaca. Ehakumve okhwa, akina a yaawo yaanapaka ichu soonanaraxa. Mwawiihiiha awo anahaala ochuna ohusihiwa okhala mwawiiwanana ni malakiheryo awookololowa a Yehova. Wi ehusihiwe mukhalelo wa weerano yeela, Omwene wa Muluku onahaala ohoolela muteko mutokweene wa ohusiha ohintonko weereya veelaponi ya vathi.

12. (1) Taani onahaala waahusiha oohikhala eekhaikhai? (2) Tiheeni enahaala weereya ni yaawo anahaala okhooca opharihela yeeyo ahusihiwaaya?

¹² Taani onahaala waahusiha oohikhala eekhaikhai? Mucici muncipale ni eekhaikhai yaawo anahaala oviihiwa. Wi oohikhala eekhaikhai erempwe masina aya mu liivuru a okumi awo anaphwanela wunnuwiha onthamwene aya ni Yehova ni wiiveleela wa yoowo. Yesu Kristu vamoha ni oothanliwa, ovinyerya wirimu anahaala waavareryelaka moopwacha wi yoone mukhalelo oohikhala eekhaikhai anaakhulelaaya yeeyo anahusihiwaaya. (Wup. 20:4) Oothene yaale anahaala okhooca waakhulela phaama nikhaviheryo nenlo hiyeemereryiwa otitelela okhala naamwi erino iyaakha  100. (Isa. 65:20) Yehova ni Yesu ananwerya waalakhanya mirima ni othokororya seiho wi ahikhale ani atannye makacamiho mu elapo evyaani.—Isa. 11:9; 60:18; 65:25; Yoh. 2:25.

OVIIHIWA NTAKHARA OKUMI NI OTHORIHIWA

13-14. (1) Khalai, niiwexexa hai masu a Yesu anaphwanyeya mu Yohani 5:29? (2) Tiheeni nnaphwanelaahu othokororya vooloca sa masu yaala?

¹³ Yesu tho ooloca sa yaale anahaala oviihiwa wi ekhale veelaponi ya vathi. Ntoko yootakiherya owo oriye: “Ennoorwa elukuluku yeeyo oothene ari mmahiyeni eneeraaya yiiwe nsu nawe nave ekhumemo: Yaale yenreno ichu saphaama, oviihiwa wi yaakhele ekumi yoohimala, nave yaale yenreno ichu soonanara, oviihiwa wi yathorihiwe.” (Yoh. 5:28, 29, TNM) Tiheeni Yesu achuneiye oloca?

¹⁴ Khalai niiwexexa wi masu a Yesu yaataphulela ichu seiho achu yaawo eni eviihiwe yeeraaya epakeke emanle oviihiwa mookhwani, ela tiwi, akina yaahaala oviihiwa nave yeereke ichu saphaama, nave akina yaahaala oviihiwa ni yeereke ichu soonanara. Nyenya, moone wi Yesu halonce wi yaale anahaala okhuma mmahiyeni anahaala opakaka ichu saphaama naari anahaala opakaka ichu soonanara. Owo onapharihela elukuluku ya khalai. Owo olonce sa yale “yenreno ichu saphaama” ni yaale “yenreno ichu soonanara.” Ela enooniherya wi awo yeenre ichu seiha ehaakumve okhwa. Ela enniiwexexeya hoo? Mweeparipari, haavo onahaala weemereryiwa opaka ichu soonanara mu elapo evyaani. Oohikhala eekhaikhai yenreno ichu seiha soonanara ehaakumve okhwa. Vano nni niiwexexe hai masu a Yesu vooloca sa ‘ovinya wa okumi’ ni ‘ovinya wa othoriha?’

15. Taani anahaala oviihiwa wi “yaakhele okumi,” nave ntakhara heeni?

¹⁵ Eekhaikhai, yaawo yenreno ichu saphaama ehaakumve okhwa, anahaala “oviihiwa wi yaakhele ekumi yoohimala” nthowa nawi masina aya eni eniiha erempwe mu liivuru a okumi. Ela enataphulela wi ovinya mookhwani wa “yaale yenreno ichu saphaama” onalociwa mu Yohani 5:29 ovinya omohamoha wa “ékhaikhai” yoowo onalociwa mu Saweriwa T’arummwa 24:15. Wiiwexexa yoola onniiwanana ni masu atharihiwe mu Aroma 6:7, ani: “Yoole okhwile ootaphuliwa wa ocheka.” Soocheka seiho eekhaikhai yaala yaapankaaya sooxipihiwa vaavaa yaakhwilaaya, nyenya mukhalelo aya wa ororomeleya onnatitelela wuupuweleliwa. (Ahe. 6:10) Mweeparipari, eekhaikhai yaala anahaala oviihiwa anaphwanela otitelela okhala oororomeleya wi masina aya etitelele okhala mu liivuru a okumi.

16. Onataphulela eheeni ‘oviihiwa wa othoriha’?

¹⁶ Vano tiheeni enahaala weereya ni yaale yeera ichu soonanara ehakumve okhwa? Naamwi soocheka saya saaxipihiwe vaavaa yaakhwilaaya, awo hiyaamurumeela Yehova vaavaa yaaryaaya akumi. Masina aya haarempwe mu liivuru a okumi. Mwawiihiiha, oviihiwa mookhwani wa yaale “yenreno ichu soonanara” omohamoha ni oviihiwa wa “óhikhala ékhaikhai” yoowo onalociwa mu Saweriwa T’arummwa 24:15, NN. Awo anahaala “oviihiwa wi yathorihiwe.” * Ela enataphulela wi Yesu onahaala waavareryelaka. (Luka 22:30) Enamviravo elukuluku wi Yesu alakelele waakhanle wi masina aya annaphwanela orempwa mu liivuru a okumi. Pahiru wakhala wi oohikhala eekhaikhai aahiya mukhalo aya wa khalai wa  okumi nave yiiveeleela wa Yehova, masina aya ananwerya orempwa mu liivuru a okumi.

17-18. Tiheeni oothene yaale anahaala oviihiwa wi yaakhele ekumi veelaponi ya vathi anaphwanelaaya weera, nave ‘saweera’ taani inalociwa mu Wupulula 20:12, 13?

¹⁷ Moohipwacha waakhanle wi khalai yaari eekhaikhai naari oohikhala eekhaikhai, yaawo anahaala oviihiwa anaphwanela wiiwelela malamulo anahaala ophwanyeyaka mu iroolu ivyaani inahaala okhalawo variyari va iyaakha 1.000. Murummwa Yohani aahithariha yeeyo oonneiye mu yawoona: “Kaawoona tho achu ookhwa, atokweene ni akhaani, yeemenle vamiithoni wa munyukhu yoole, nave yaahuuliwa aliivuru. Liivuru mukina aahuliwa tho, ti liivuru a okumi. Achu ookhwa yaathorihiwa ntoko mwa seiho yeeraaya, seiho sarempwemo.”—Wup. 20:12, 13.

¹⁸ Yaale anahaala oviihiwa mookhwani ‘saweera’ taani anahaalaaya othorihiwano? Apwanne sinahaala okhala seiho yenraaya ehakumve okhwa? Hooye! Muupuwele wi soocheka saya saaxipihiwa vaavale yaakhwilaaya. Nyenya va, ‘saweera saya’ hinnalociwa seiho yenraaya ehaakumve okhwa. Ohiya yeeyo, enalociwa sa ichu seiho anahaalaaya weera emanle ohusihiwa mu elapo evyaani. Ophiyerya tho wi alopwana oororomeleya ntoko Nowa, Samuweli, Tavite ni Taniyeli, anahaala ohusihiwa vooloca sa Yesu Kristu ni wooniherya nroromelo mmukucho awe. Waakhanle wi sookhalavo sincipale wi alopwana yaala ehuserye, oohikhala eekhaikhai annaphwanela ohuserya ichu sincipalexa!

19. Tiheeni enahaala weereya ni yaale anahaala okhooca ekari yeela yootikhiniha?

¹⁹ Tiheeni enahaala weereya ni yaale anahaala okhooca ekari yeela yootikhiniha? Wupulula 20:15 onnanleela: “Yaale masina aya yaahaphwanyiwe erempwe mu liivuru a okumi, yaariheliwa tho munchiyani nenle na mooro.” Chiryene, awo anahaala otoloxiwa moomalela okhala wookhala. Mwawiihiiha, ti woochuneya opaka owetha wahu wi nsina nahu nrempwe mu liivuru a okumi nave ntitelele okhala mwemmo!

20. Muteko taani woohakalaliha onahaala opakiwa variyari va Iyaakha 1.000? (Moone eruku va ekaapa.)

²⁰ Enahaala okhala elukuluku yoohakalalihaxa variyari va Olamulelo wa Iyaakha Masanaru Khumi! Onahaala ophitaanyerya muteko mutokweene wa ohusiha yoowo ohintonko weereya veelaponi ya vathi. Nyenya tho enahaala okhala elukuluku ya ovareryiwa meecelo a achu eekhaikhai ni oohikhala eekhaikhai. (Isa. 26:9; Saw. 17:31) Ti mwawihai muteko yoowo wa ohusiha oneeraaya opakiwe? Mwaha ahu onacharela onahaala onikhaviherya wiiwexexa ni othamalela marehereryo yaawo ootikhiniha.