TLAMACHTIJLI 39
¿Nestika motoka ipan amoxtli tlen kijtoua akinomej kipiyaskej nemilistli?
“Niman se amoxtli tlen tetlalnamiktia onoijkuilo ixpan inpampa akin kimojkaitayaj Jehová” (MAL. 3:16, TNM).
TLAKUIKAJLI 61 ¡Tlayekapan, teixpantijkej!
TLEN TIKITASKEJ a
Desde youejkauj, Jehová kinualijkuilojtiuj intoka itekipanojkauan ipan amoxtli tlen kijtoua akinomej kipiyaskej nemilistli. (Xkimita párrafos 1 niman 2).
1. Ken kijtoua Malaquías 3:16, ¿katlejua amoxtli kualijkuilojtiuj Jehová, niman tlenon ompa kualijkuilojtiuj?
JEHOVÁ melak youejkauj ika kuajchijchiujtiuj se amoxtli kampa nestokej miyek tokayomej. ¿Akinon kachtopa ompa okijkuilojkej? Abel, pampa yejua akin kachtopa omelajkanen itech Jehová (Luc. 11:50, 51). b Jehová melak youejkauj ika ompa kinualijkuilojtiuj miyek tokayomej. Ipan Biblia, yejuin amoxtli kitokayotia ken “se amoxtli tlen tetlalnamiktia” niman “amamoxtli yejuan kijtoua akinomej kipiyaj on yenkuik nemilistli para nochipa”. Ipan yejuin tlamachtijli tiktokayotiskej ken amoxtli tlen kijtoua akinomej kipiyaskej nemilistli (xpoua Malaquías 3:16, TNM; Apoc. 3:5; 17:8). c
2. ¿Akinomej nestokej ipan amoxtli tlen kijtoua akinomej kipiyaskej nemilistli, niman kenon uelis ompa techijkuiloskej?
2 Ipan yejuin amoxtli nestika intoka akin kiueyichiuaj Jehová, akin kitlakaitaj niman akin kitlasojtlaj. Nochimej akin ompa nestok intoka kichiaj nemiskej ne iluikak noso nikan ipan tlaltikpaktli. ¿Kenon uelis kijkuiloskej totokayo ipan yejon amoxtli? Tla kuajli touikaj iuan Jehová niman tla tikneltokaj ika iKoneuj, Jesucristo, omikiko topampa (Juan 3:16, 36). ¿Xmelak ika tinochimej tikuelitaskiaj ompa maijkuiliujto totokayo?
3, 4. a) Tla iijkuiliujtika totokayo ipan amoxtli tlen kijtoua akinomej kipiyaskej nemilistli, ¿kijtosneki ika iuelis tikpiyaskej nemilistli tlen xkeman tlamis? b) ¿Tlenon tikitaskej ipan yejuin niman ipan okse tlamachtijli?
3 Tla iijkuiliujtika motoka ipan amoxtli tlen kijtoua akinomej kipiyaskej nemilistli, ¿kijtosneki ika iuelis tikpiyas nemilistli tlen xkeman tlamis? Tla tiknekij tikmatiskej yejuin, matikitakan tlen kijtoua Éxodo 32:33. Ompa Jehová okijli Moisés: “Nikpopolos itoka ipan on amamoxtli yejuan yotlajtlakoj nixpan”. Yejon kijtosneki ika tokayomej tlen ompa ijkuiliujtokej uelis kinpopoloskej. Kentla Jehová san okimijkuilo ika lápiz (Apoc. 3:5). Noneki tokojtiliskej hasta ijkuak Jehová makijkuilo totokayo ika lapicero.
4 Kanaj totlajtoltiaj, ¿tlenon kijtoua Biblia intech akin nestika intoka ipan amoxtli tlen kijtoua akinomej kipiyaskej nemilistli niman intech akin xnesi intoka? ¿Kemanon kiseliskej nemilistli tlen xkeman tlamis akin ompa nestika intoka? ¿Tlenon inpan nochiuas akin xokixmatkej Jehová ijkuak yoltoyaj? ¿Noijki uelis kimijkuiloskej ipan yejon amoxtli? Yejon tlen tikitaskej ipan yejuin niman ipan okse tlamachtijli.
¿AKINOMEJ NESTIKA INTOKA IPAN AMOXTLI TLEN KIJTOUA AKINOMEJ KIPIYASKEJ NEMILISTLI?
5, 6. a) Ken kijtoua Filipenses 4:3, ¿akinomej nestika intoka ipan amoxtli tlen kijtoua akinomej kipiyaskej nemilistli? b) ¿Kemanon xok uelis popoliuis intoka ipan yejon amoxtli?
5 ¿Akinomej nestokej ipan amoxtli tlen kijtoua akinomej kipiyaskej nemilistli? Para tiknankiliskej, titlajtoskej itech makuijli grupos. Sekimej inestika intoka ipan yejuin amoxtli niman oksekimej ka.
6 Ipan kachtopa grupo nemij akin yokintlapejpenijkej para tekiuajtiskej iuan Cristo ne iluikak. ¿Intoka inestika ipan amoxtli tlen kijtoua akinomej kipiyaskej nemilistli? Kema. Apóstol Pablo okimijli tokniuan akin chantiyaj Filipos ika intoka tokniuan tlapejpeniltin, noso akin yokinnotskej para tekiuajtiskej iuan Cristo, inestika ipan “amamoxtli kampa onkaj intoka on yejuan kipiyaj nemilistli para nochipa” (xpoua Filipenses 4:3). San ika, yejuamej noneki nochipa melajkanemiskej para xkinpopoloskej intoka ipan yejon amoxtli. Niman ijkuak kintlaliliskej “sello” achto ika mikiskej noso achto ika yejkos ueyi tlajyouilistli, intoka xok keman popoliuis ipan amoxtli tlen kijtoua akinomej kipiyaskej nemilistli (Apoc. 7:3).
7. ¿Kenon techpaleuiya Apocalipsis 7:16, 17 matikmatikan kemanon xok keman popoliuis intoka borreguitos ipan amoxtli tlen kijtoua akinomej kipiyaskej nemilistli?
7 Niman ipan ika ome grupo nemij borreguitos noso akin nochipa chantiskej ipan tlaltikpaktli. ¿Intoka inestika ipan amoxtli tlen kijtoua akinomej kipiyaskej nemilistli? Kema. ¿Ok ompa nestos intoka tla yopanok Armagedón? Kema (Apoc. 7:14). Jesús okijto ika yejuamej kipiyaskej nemilistli tlen xkeman tlamis (Mat. 25:46). San ika, akin makisaskej ipan Armagedón xnimantsin kinmakaskej nemilistli tlen xkeman tlamis. Intoka kentla san ijkuiliujtoskia ika lápiz. Niman ijkuak Jesús tekiuajtitos Mil xiuitl, yejua “kimpiyas ken borreguitos, niman kinuikas kampa meya atl yejuan kitemaka nemilistli”. Akin nochipa kitlakamatiskej Cristo niman nochipa melajkanemiskej itech Jehová, xok keman popoliuis intoka ipan amoxtli tlen kijtoua akinomej kipiyaskej nemilistli (xpoua Apocalipsis 7:16, 17).
8. ¿Akinomej xnestika intoka ipan amoxtli tlen kijtoua akinomej kipiyaskej nemilistli, niman tlenon inpan nochiuas?
8 Ipan ika yeyi grupo nemij chivos, akin kinpopoloskej ipan Armagedón. Intoka xnestika ipan amoxtli tlen kijtoua akinomej kipiyaskej nemilistli. Jesús okijto ika yejuamej popoliuiskej (Mat. 25:46). Niman Pablo okijto ika “kincastigaroskej ikan mikilistli para nochipa” (2 Tes. 1:9; 2 Ped. 2:9). Noijki, nochimej akin kiteneuiliaj tlen xkuajli “on Espíritu Santo, Dios xki[n]tlapojpoluis”. Yejuamej xkiseliskej nemilistli tlen xkeman tlamis. Kijtosneki ika xkeman kinyolitiskej (Mat. 12:32; Mar. 3:28, 29; Heb. 6:4-6). Aman titlajtoskej itech ome grupos akin yoliuiskej ipan tlaltikpaktli.
AKIN YOLIUISKEJ
9. ¿Kenon noixmatij on ome grupos akin yoliuiskej ipan tlaltikpaktli, niman akinomej nemij ipan yejon grupos? (Hechos 24:15).
9 Biblia kijtoua ika yoliuiskej ome grupos: akin “yolmelajkej” niman akin “xyolmelajkej”. Yejuamej noijki uelis nochipa nemiskej ipan tlaltikpaktli (xpoua Hechos 24:15). ¿Akinomej on “yolmelajkej”? Nochimej akin omelajkanenkej itech Jehová hasta ijkuak omijkej. Niman ¿akinomej on “xyolmelajkej”? Akin xokitekichiuilijkej Jehová ijkuak yoltoyaj. Niman miyekej okichiujkej tlen sajnoye kitlauelita Jehová. Pampa yejuin ome grupos yoliuiskej, ¿kijtosneki ika intoka ijkuiliujtika ipan amoxtli tlen kijtoua akinomej kipiyaskej nemilistli? Tla tiknekij tikmatiskej, kachtopa más matikimixmatikan akin nemij ipan yejuin ome grupos.
10. ¿Tleka yoliuiskej akin “yolmelajkej”, niman sekimej tlen tekitl kichiuaskej? (Noijki xkita ipan yejuin revista tlamachtijli “Tlen notlajtoltiaj akin kitaj revistas” kampa tlajtoua itech akin yoliuiskej ipan tlaltikpaktli).
10 Ipan ika naui grupo nemij akin “yolmelajkej”. Ijkuak yoltoyaj, intoka inestoyaj ipan amoxtli tlen kijtoua akinomej kipiyaskej nemilistli. ¿Opopoliujkej intoka ijkuak omijkej? Ka, pampa Jehová xkimilkaua. Biblia kijtoua: “Dios xejua iminDios on mikatsitsimej, yej yejua iminDios on yoltokej, pampa para yejua melauak nochimej kipiyaj nemilistli” (Luc. 20:38). Yejon kijtosneki ika ijkuak yoliuiskej, intoka ok nestos ipan amoxtli tlen kijtoua akinomej kipiyaskej nemilistli. San ika, uelis tikijtoskej ika intoka san ijkuiliujtok ika lápiz (Luc. 14:14). Kanaj sekimej akin yoliuiskej tlanauatiskej ipan nochi tlaltikpaktli (Sal. 45:16).
11. ¿Tlenon nonekis kichiuaskej akin “xyolmelajkej” tla kinekij ika toTajtsin makimijkuilo ipan amoxtli tlen kijtoua akinomej kipiyaskej nemilistli?
11 Niman ipan ika makuijli grupo nemij akin “xyolmelajkej”. Ijkuak yejuamej yoltoyaj okichiujkej tlen xkuajli pampa kanaj xkimixmatiyaj itlanauatiluan Jehová. Ika yejon, intoka xnestika ipan amoxtli tlen kijtoua akinomej kipiyaskej nemilistli. San ika, ijkuak toTajtsin kinyolitis, yejuamej uelis nokojtiliskej para makimijkuilokan intoka ipan yejon amoxtli. Akin xyolmelajkej melak nonekis makinpaleuikan pampa ijkuak yoltoyaj sekimej okichiujkej tlen melak xkuajli. Yejuamej nonekis nokojtiliskej kichiuaskej nochi tlen Jehová kuelita. Ika yejon, ijkuak tlayekantos iTekiuajyo toTajtsin, tikpiyaskej miyek tekitl pampa nochimej tikinmachtiskej.
12. a) ¿Akinomej kinmachtiskej akin xyolmelajkej? b) ¿Tlenon inpan nochiuas akin xkinekiskej nopatlaskej?
12 Akin makisaskej ipan Armagedón niman on “yolmelajkej” akin yoliuiskej, kinmachtiskej nochimej akin xyolmelajkej. ¿Tlenon noneki kichiuaskej akin xyolmelajkej tla kinekij ika toTajtsin makimijkuilo intoka ipan amoxtli tlen kijtoua akinomej kipiyaskej nemilistli? Noneki kuajli iuan nouikaskej niman itech nosentemakaskej. Jesús niman tlapejpeniltin, akin yeskej ken jueces, kitstoskej kenon nopatlatiuej akin xyolmelajkej (Apoc. 20:4). Tla yakaj xkineki nopatlas, kipopoloskej maski tla kipiya 100 xiuitl (Is. 65:20). Jehová niman Jesús kimatij tlenon tikpiyaj ipan toyojlo, ika yejon, xakaj kikauiliskej makijtlako yejuin tlaltikpaktli (Is. 11:9; 60:18; 65:25; Juan 2:25).
YOLIUISKEJ AKIN NOCHIPA NEMISKEJ NIMAN AKIN KINTLAJTLAKOLMAKASKEJ
13, 14. a) ¿Kenon tikasikamatiyaj tlen okijto Jesús ipan Juan 5:29? b) ¿Tlenon noneki tikitaskej ijkuak tikamapouaskej yejuin tlaxelojli?
13 Jesús noijki otlajto intech akin yoliuiskej ipan tlaltikpaktli. Yejua okijto: “Yejkos on tonajli ijkuak nochimej on mikatsitsimej kakiskej notlajtol niman kisaskej ipan intlalkon. On yejuan okichijkej tlen kuajli, yoliskej niman nokuiteuaskej ipan intlalkon para kipiyaskej nemilistli yejuan para nochipa. Pero on yejuan okichijkej tlen xkuajli, yoliskej niman nokuiteuaskej para kintlajtlakolmakaskej” (Juan 5:28, 29). ¿Tlenon okijtosnek Jesús?
14 Tejuamej tiknemiliayaj ika tlen Jesús okijto ipan Juan 5:28, 29 nochiuaskia tla yoyoliujkej akin yomijkej. Tikijtouayaj ika sekimej akin yoliuiskej kichiuaskiaj tlen kuajli niman oksekimej kichiuaskiaj tlen xkuajli. San ika, tla kuajli tikitaj, Jesús xokijto ika akin yoliuiskej kichiuaskej tlen kuajli noso kichiuaskej tlen xkuajli. Ka, yejua okijto ika yoliuiskej “on yejuan okichijkej tlen kuajli” niman “on yejuan okichijkej tlen xkuajli”. Yejua tlajtotoya itech tlen okichiujkej ijkuak ximikiyaj. Matikilnamikikan ika ipan yenkuik tlaltikpaktli xok nochiuas tlen xkuajli. Ika yejon, akin kichiuayaj tlen xkuajli ijkuak yoltoyaj, xok kinkauiliskej oksejpa ijkon makichiuakan ijkuak kinyolitiskej. Kuakon, ¿tlenon okijtosnek Jesús ijkuak okijto ika “on yejuan okichijkej tlen kuajli, yoliskej [...] para kipiyaskej nemilistli yejuan para nochipa”, niman “on yejuan okichijkej tlen xkuajli, yoliskej [...] para kintlajtlakolmakaskej”? Matikitakan.
15. ¿Akinomej “yoliskej [...] para kipiyaskej nemilistli yejuan para nochipa”, niman tleka?
15 Akin yolmelajkej, noso akin okichiujkej tlen kuajli ijkuak yoltoyaj, “yoliskej [...] para kipiyaskej nemilistli yejuan para nochipa” pampa intoka inestos ipan amoxtli tlen kijtoua akinomej kipiyaskej nemilistli. Yejuin kijtosneki ika “on yejuan okichijkej tlen kuajli”, akin noteneuaj ipan Juan 5:29, sa no yejuamej on “yolmelajkej” akin noteneuaj ipan Hechos 24:15. Niman ijkin tikijtouaj pampa Romanos 6:7 kijtoua: “Ijkuak se miki, nomanauiya de ipoder on tlajtlakojli”. Ijkuak akin yolmelajkej mikij, intlajtlakoluan popoliuij, san ika, Jehová xkilkaua kenon itech omelajkanenkej (Heb. 6:10). San ika, ijkuak yoliuiskej nonekis nochipa melajkanemiskej para xkipopoloskej intoka ipan amoxtli tlen kijtoua akinomej kipiyaskej nemilistli.
16. ¿Akinomej “yoliskej niman nokuiteuaskej para kintlajtlakolmakaskej”?
16 Aman matitlajtokan itech akin okichiujkej tlen xkuajli ijkuak yoltoyaj. Ijkuak omijkej, intlajtlakoluan noijki opopoliujkej, san ika, intoka xnestok ipan amoxtli tlen kijtoua akinomej kipiyaskej nemilistli pampa xomelajkanenkej itech toTajtsin. Yejuin kijtosneki ika “on yejuan okichijkej tlen xkuajli”, akin noteneuaj ipan Juan 5:29, sa no yejuamej on “xyolmelajkej” akin noteneuaj ipan Hechos 24:15. Yejuamej “yoliskej niman nokuiteuaskej para kintlajtlakolmakaskej”. d Ijkuak yoliuiskej noitas tla yejuamej kinektokej noyolkuepaskej (Luc. 22:30). Niman nonekis tiempo niman ijkon noitas akinomej kinmelaua makimijkuilokan intoka ipan amoxtli tlen kijtoua akinomej kipiyaskej nemilistli. Yejuamej nonekis kikajkauaskej nochi tlen xkuajli kichiuayaj niman nosentemakaskej itech Jehová.
17, 18. a) ¿Tlenon nonekis kichiuaskej akin yoliuiskej ipan tlaltikpaktli? b) Ken kijtoua Apocalipsis 20:12, 13, ¿itech tlenon kintlajtlakolmakaskej akin yoliuiskej?
17 Ijkuak nochimej yoliuiskej, akin yolmelajkej niman akin xyolmelajkej, nonekis kintlakamatiskej yenkuikej tlanauatiltin tlen techinmakaskej ijkuak tekiuajtitos Jesucristo 1,000 xiuitl. Apóstol Juan techijlia tlen okitak, yejua okijto: “Onikintak ixpan Dios majmantikatkaj on mikatsitsimej yejuan uejueyixtokej niman yejuan xuejueyixtokej. Kemaj, okintlapojkej on amamoxtin, niman no okitlapojkej okse amamoxtli yejuan kijtoua akinon kipiya yenkuik nemilistli para nochipa. On mikatsitsimej okinyolkuitij niman okintlaxtlauilij ken kitocaroua ika on tlen okichijkej ijkon ken tlajkuilolnestikaj” (Apoc. 20:12, 13).
18 ¿Kenon kintlajtlakolmakaskej akin yoliuiskej? ¿Kintlajtlakolmakaskej itech tlen okichiujkej ijkuak yoltoyaj? Ka. Matikilnamikikan ika ijkuak omijkej, opopoliujkej intlajtlakoluan. Kuakon, xkintlajtlakolmakaskej itech tlen okichiujkej ijkuak yoltoyaj, yej kintlajtlakolmakaskej itech tlen kichiuaskej ijkuak kinyolitiskej ipan yenkuik tlaltikpaktli, ijkuak kinmachtiskej. Niman hasta Noé, Samuel, David, Daniel niman oksekimej itekipanojkauan Jehová nonekis tikinmachtiskej itech Jesucristo, niman yejuamej nonekis kiteititiskej ika yemelak tlaneltokaj itech imikilis. ¡Miyek tlen kichiuaskej akin xyolmelajkej!
19. ¿Tlenon inpan nochiuas akin xkinekiskej kitlakamatiskej Jehová?
19 ¿Tlenon inpan nochiuas akin xkinekiskej kitlakamatiskej Jehová? Apocalipsis 20:15 technankilia: “On yejuan xtlajkuilolnestikatka imintoka ipan on amamoxtli yejuan kijtoua akinomej kipiyaj yenkuik nemilistli para nochipa, ompa okominxinijkej ipan on tliko”. Kuakon, yejuamej kinpopoloskej para nochipa. Matotlajtoltikan: “¿Yokijkuilo Jehová notoka ipan amoxtli tlen kijtoua akinomej kipiyaskej nemilistli?” Tla kema, nochipa matokojtilikan matiktlakamatikan Jehová para maka kipopolos totokayo.
Se tokniuj temachtijtika ijkuak Jesús tekiuajtitok mil xiuitl ipan tlaltikpaktli. (Xkita párrafo 20).
20. ¿Tlenon tikchiuaskej ipan Mil xiuitl ijkuak tlayekantos iTekiuajyo toTajtsin? (Xkita tlaixkopinajli tlen onka ixpan yejuin revista).
20 Melak kualtsin yes ijkuak tlayekantos iTekiuajyo toTajtsin ipan yejon Mil xiuitl. ¿Tleka? Pampa ijkuakon más chikauak titenojnotsaskej niman más miyekej tikinmachtiskej. Ijkuakon, Jehová kitas tla akin yoliuiskej, akin yolmelajkej niman akin xyolmelajkej, kinektokej kitlakamatiskej (Is. 26:9; Hech. 17:31). Niman ¿kenon titemachtiskej ipan yejon Mil xiuitl? Yejon tlen tikitaskej ipan okse tlamachtijli. Noijki tikitaskej kenon uelis más tikpatiojkaitaskej yejuin tekitl.
TLAKUIKAJLI 147 Techmakas nemilistli tlen xtlamis
a Ipan yejuin tlamachtijli nopatlas ken tikasikamatij tlen Jesús okijto ipan Juan 5:28, 29, kampa okijto ika sekimej yoliuiskej “para kipiyaskej nemilistli yejuan para nochipa” niman oksekimej yoliuiskej “para kintlajtlakolmakaskej”. Tikitaskej akinomej kinteneujtoya Jesús niman tlenon okijtosnek.
b ToTajtsin kualijkuilojtiuj yejuin amoxtli “desde ijkuak okichijchiu in tlaltikpaktli”. “In tlaltikpaktli” kijtosneki tlaltikpakchanejkej akin uelis kinmakixtiskej itech tlajtlakojli (Mat. 25:34; Apoc. 17:8). Nesi ika ipan yejuin amoxtli kachtopa onoijkuilo itoka Abel, akin kachtopa omelajkanen itech Jehová.
c Malaquías 3:16: “Ipan yejon tonaltin akin kimojkaitayaj Jehová otlajtokej se iuan okse, se iuan akin kistinemij, niman Jehová xnoteltiaya ika kuajli kinkakiya. Niman se amoxtli tlen tetlalnamiktia onoijkuilo ixpan inpampa akin kimojkaitayaj Jehová niman akin tlanemiliayaj itech itoka”.
d Tejuamej tiknemiliayaj ika ijkuak Juan 5:29 kijtoua ika yoliuiskej akin xkuajkualtin, yejuamej nokuiteuaskiaj san para kintlajtlakolmakaskej niman kinpopoloskej para nochipa. Niman ijkon tikijtouayaj pampa tlajtojli “kintlajtlakolmakaskej” yejon tlen uelis kijtosnekis. Se diccionario Griego tlen kitekitiltia Biblia, kijtoua ika yejuin tlajtojli kijtosneki “tikitas tlen yakaj kichiua”. Ika yejon, aman tikijtouaj ika ijkuak Jesús okitekitilti yejuin tlajtojli kijtosneki ika ijkuak yoliuiskej akin xkuajkualtin yejua kitas tla yemelak yonoyolkuepkej.
