Onthele Yokulilongeswa 39
Okuti Enyina Liove Lili “Momukanda Womuenyo”?
“Apahonekwa omukanda wokuhinangela ava vena onthilo na Siovaa.” — MAL. 3:16.
OTYIIMBO 61 Nombangi Tualeiko!
ETYI MATULILONGESA a
Mokueenda kuomanima omanyingi, Siovaa ukahi nokuhoneka omanyina ovanthu “momukanda womwenyo” (Tala opalangalafu 1-2)
1. Ngetyi tyapopia omukanda wa Malaquias 3:16, Omukanda patyi Siovaa ekahi nokuhoneka iya oityi tyivasiwa-mo?
TUNDEE kohale Siovaa ukahi nokuhoneka omukanda umwe wesukisa unene. Omukanda oo una omanyina ovanthu. Enyina liotete liahonekwa momukanda oo olia Ambele. b (Luka 11:50, 51) Iya mokueenda kuomanima omanyingi Siovaa ukahi nokuyawisa-mo omanyina, iya pehepano muna omanyina ovanthu ovanyingi-nyingi. Ombimbiliya iihana omukanda oo okuti, “omukanda wehinangelo,” “omukanda womwenyo,” “omukanda wondyila yomuenyo.” Monthele ei, omukanda oo matuuti “omukanda womwenyo.” — Tanga Malaquias 3:16; Ehol. 3:5; 17:8.
2. Omanyina avalie ahonekwa momukanda womwenyo, iya oityi onthue tuna okulinga opo omanyina etu akalemo?
2 Momukanda oo, muna omanyina ovanthu vafenda Siovaa noukuatyili tupu vena onthilo nenyina liae. Ovanthu ovo vakevelela okukala nomwenyo wahapu. Hono nonthue inkha tukala noupanga wapama na Siovaa a tupande otyilikutila tyeyovo tyaawa nomona wae Sesusi Kilisitu, omanyina etu Makala momukanda oo. (Suau 3:16, 36) Ovanthu aveho tyilinge vana vena ekevelelo liokukala pano pohi tyilinge vana vena ekevelelo liokuenda keulo, omanyina avo ena okukala momukanda oo.
3-4. (a) Okuti tyina enyina lietu lia mapakwa momukanda womwenyo tyilekesa okuti matukakala nomwenyo wahapu? Hangununa. (b) Oityi matulilongesa monthele ei, nei mailandulako?
3 Okuti tyina omanyina etu a mapakwa momukanda womwenyo tyilekesa okuti matukakala nomwenyo wahapu? Ekumbululo tulivasa monondaka Siovaa apopilile Moisesi mbuvasiwa momukanda wa Êxodo 32:33. Siovaa wemupopilile okuti: “Mandyinyimi momukanda wange enyina lya una walinga onkhali kuame.” Otyo tyilekesa okuti omanyina ovanthu vana vapakwa momukanda oo apondola okunyimwa-mo. Ongatyina nkhele Siovaa ahoneka vala omanyina oo nolapi. (Ehol. 3:5, okatoi.) Onthue tuna okulinga ononkhono opo omanyina etu atualeko okukala momukanda oo, atee ahonekwa-mo nolapisela.
4 Pamwe tupondola okulilinga omapulo ngaa: Oityi Ombimbiliya ipopia tyayemba kovanthu vana vokuna omanyina ahonekwa momukanda oo, navana vahahonekelwemo? Ovanthu vana vokuahonekwa momukanda oo, onalupi mavakakala nomwenyo wahapu? Ovanthu vana vokuankhia mahi ankho kavenenoñgonoke Siovaa okuti omanyina avo apondola okuhonekwa momukanda oo? Onthele ei nei mailandulako maikumbulula omapulo oo.
OMANYINA AVA AHONEKWA MOMUKANDA WOMWENYO
5-6. (a) Ngetyi tyipopia omukanda Ova Filipu 4:3, omanyina a valie ahonekwa momukanda womwenyo? (b) Onalupi omanyina avo ahakanyimwamo vali?
5 Omanyina a valie ahonekwa momukanda womwenyo? Opo tukumbulule epulo olio, matulilongesa ovikundyi vitano viovanthu velikalaila. Ovanthu ovo, tyati umwe vamwe omanyina avo ahonekwa momukanda oo, ovakuavo omanyina avo kahonekelwe-mo.
6 Otyikundyi tyotete otyo vanthu vana mavakatumina na Sesusi keulu. Okuti omanyina avo eli umwe momukanda womwenyo? Enga. Onondaka Apositolu Paulu apopilile Ova Filipu mbati“ovaundapi vakuavo,” mbulekesa umwe okuti omanyina ovalembulwa mavakatumina na Sesusi Keulu elia-le momukanda womwenyo. (Tanga Ova Filipu 4:3.) Mahi opo omanyina avo atualeko okukala momukanda oo, vesukisa okutualako okukala ovakuatyili ku Siovaa. Mahi onalupi omanyina avo ahamakanyimuamo vali? Oputyina vamakapakwa otyilimbo. Otyilimbo otyo maveketyipakwa putyina nkhele vehenenkhie, okuti hatyo putyina ononkhumbi onene mbehenehimbike. — Ehol. 7:3.
7. Ngetyi tyipopia omukanda Eholololo 7:16, 17, onalupi omanyina onongi ononkhuavo makakala momukanda womwenyo pala apeho?
7 Otyikundyi tyavali o tyonongi ononkhuavo. Okuti omanyina avo ahonekwa umwe momukanda womwenyo? Enga. Okuti omanyina avo matualako okukala momukanda womwenyo tyina o Alumagedom yamalambe? Enga. (Ehol. 7:14) Sesusi wapopia okuti onongi ombo “mavakaya komuenyo uhapu.” (Mat. 25:46) Mahi vana mavakahupa kononkhumbi onene kamavakakala vala liwa-liwa nomwenyo wahapu. Nkhele omanyina avo momukanda womwenyo maakahonekwa vala nolapi. Mokueenda kuomanima 1000, Sesusi “mekeventhita iya ekevehongolela ponondyivi-ndyivi mbomaande omwenyo.” Vana veketavela okuhongolelwa na Sesusi avakaendela movitumino vya Siovaa omanyina avo makakala apeho momukanda womwenyo. — Tanga Eholololo 7:16, 17.
8. Omanyina a valie ahahonekelwe momukanda womwenyo, iya oityi matyikamoneka navo?
8 Otyikundyi tyatatu o tyovinkhombo, ovanthu vana mavakahanyuako mononkhumbi onene. Ovo omanyina avo kaahonekelwe momukanda womwenyo. Sesusi wapopia okuti “mavakaya kononkhia mba apeho.” (Mat. 25:46) Paulu kononkhono mba Huku wapopile okuti “ovo maveya okumona ononkhumbi mbekoyeso avahanyuako pala apeho.” (2 Tes. 1:9; 2 Pet. 2:9) Otyipuka otyo, otyo matyimoneka novanthu vekahi nokunumanesa o ononkhono mba Huku. Ovanthu ovo, navo mavakahanyuako pala apeho, kamavakakala nomwenyo wahapu, tupu kamavakatutiliswa. (Mat. 12:32; Malu. 3:28, 29; Heb. 6:4-6) Pahe matulilongesa ovikundyi vivali viovanthu mavakatutiliswa pala okukala pano pohi.
VANA MAVAKATUTILISWA
9. Ngetyi tyapopia Ovilinga 24:15, ovipi ovikundyi vivali mavikatutiliswa pala okukala pano pohi, iya oñgeni vielikalela?
9 Ombimbiliya ipopia ovikundyi vivali viovanthu mavakatutiliswa pala okukala pano pohi, “ovaviuki na vana vehevaviuki.” (Tanga Ovilinga 24:15.) “Ovaviuki” Ovo vana vaumbilile Siovaa noukuatyili etyi ankho vena omwenyo. “Vana vehevaviuki” ovo vana vahafendele Siovaa puetyi ankho vena omwenyo. Vamwe puvo ankho valinga ovipuka ovivi unene. Omokonda yatyi tupopila okuti ovikundyi ovio vivali omanyina avo eli momukanda womwenyo? Opo tukumbulule epulo olio matulilongesa otyikundyi tyike-tyike.
10. Omokonda yatyi “ovaviuki” mavakatutilisilwa, Iya elao patyi mavakala nalio? (Tala “Omapulo Ovatangi” ovalie mavakatutiliswa pala okukala pano pohi, momutala ou womulavi.)
10 “Ovaviuki” ovo tyikundyi tyakuana. Etyi ankho vehenenkhie, omanyina avo ahonekwa-le momukanda womwenyo. Okuti omanyina avo anyimwamo etyi vankhia? Au, mokonda komaiho a Siovaa ovanthu ovo nkhele vena “omwenyo.” Siovaa “ha Huku yo vokuankhia, mahi o Huku yo vokuna omwenyo.” (Luka 20:38) Otyo tyilekesa okuti tyina ovaviuki vamakatutiliswa pala okukala pano pohi, omanyina avo mavasiwa momukanda womwenyo. Mahi nkhele mavasiwa ahonekwa vala “nolapi.” (Luka 14:14) Iya vamwe povanthu ovo, mavakapewa otyilinga “tyokutumina ohi aiho.” — Sal. 45:16.
11. Oityi ovanthu vana “vehevaviuki” mavekesukisa okulinga opo omanyina avo akahonekwe momukanda womwenyo?
11 Pahe, matuhulilila notyikundyi tyatano, tyovanthu vana “vehevaviuki.” Tyipondola hamwe puetyi ankho vehenenkhie kavaendela movitumino via Siovaa, otyo omanyina avo ahahonekelelwe momukanda womwenyo. Mahi tyina pahe vamatutiliswa Siovaa meveavela omphitilo opo omanyina avo ahonekwe momukanda womwenyo. Ovanthu vana “vehevaviuki” mavekesukisa okukuatesuako unene, mokonda tyipondola hamwe puetyi ankho vena omwenyo valingile ovipuka ovivi unene. Mavekesukisa okulongeswa opo vaendele movitumino viavilapo vya Siovaa. Mokonda yotyo, kombanda yohi makukala otyilinga tyimwe otyinene tyokulongesa ovanthu.
12. (a) Ovalie mavakalongesa vana vehevaviuki? (b) Oityi matyikamoneka navana veheketavela okuendela muetyi vekahi nokulongeswa?
12 Ovalie mavakalongesa vana vehevaviuki? Ovo vana mavakahupa kononkhumbi onene novaviuki mavakatutiliswa. Opo omanyina ovanthu vana vehevaviuki akapakwe momukanda womwenyo, mavekesukisa okukala noupanga wapama na Siovaa nokulipakula kwe. Sesusi Kilisitu novo 144 mili, ovo mavakatala inkha ovanthu vana vehevaviuki vekahi umwe nokuendela muetyi vekahi nokulongeswa. (Ehol. 20:4) Una wahakaendela movitumino via Siovaa makahanyuako namphila hamwe ena umwe omanima 100. (Isa. 65:20) Siovaa na Sesusi vetyivila okutala komutima womunthu iya mavakalinga atyiho opo pahamoneke nawike unyona ouye. — Isa. 11:9; 60:18; 65:25; Suau 2:25.
ETUTILO LIOVAVIUKI NAVA VEHEVAVIKUKI
13-14. (a) Oñgeni ankho kohale tunoñgonoka onondaka mba Sesusi mbuvasiwa mukanda wa Suau 5:29? (b) Oityi tuna okutala nawa monondaka ombo?
13 Sesusi tupu wapopia konthele yavana mavakatutiliswa pala okukala pano pohi. Mongeleka wapopia okuti: “mokonda makuya oola aveho vana vekahi momalangalo mehinangelo lya Huku, mavekeiva ondaka yae, avatundu-mo, vana valinga ovipuka oviwa, avatutila pala okukala nomuenyo, mahi vana valinga ovipuka ovivi, avatutila pala ekoyeso.” (Suau 5:28, 29) Oityi Sesusi ankho ahanda okupopia?
14 Kohale, ankho tunoñgonoka okuti onondaka ombo mbapopia Sesusi mbulekesa ovipuka ovanthu mavakalinga tyina vamatutiliswa. Ngokuti povanthu vana mavakatutiliswa pena vamwe mavakalinga ovipuka oviwa, ovakuavo avakalinga ovipuka ovivi. Mahi tala okuti, Sesusi ankho kekahi nokupopia okuti ovanthu vana mavakatutiliswa mavakalinga ovipuka oviwa, ovakuavo avakalinga ovipuka ovivi. Ngwe ankho ukahi nokupopia ovipuka valingile etyi vehenenkhie. Sesusi wapopia okuti vana “valinga ovipuka oviwa” navana “valinga ovipuka ovivi.” Onondaka ombo mbulekesa okuti ovipuka ovio vevilinga puetyi ankho vehenenkhie. Iya otyo otyili umwe, mokonda mouye omupe nawike makalinga ovipuka ovivi. Ovanthu vana vapopiwa okuti valinga ovipuka ovivi, vevilinga puetyi ankho vehenenkhie. Opo naina oñgeni tuna okunoñgonoka onondaka mba Sesusi mbokuati ovanthu vamwe ‘mavakatutiliswa pala okukala nomwenyo,’ ovakuavo ‘avakatutiliswa pala okukoyeswa?’
15. Ovalie ‘mavakatutiliswa pala okukalako nomwenyo,’ iya omokonda yatyi?
15 Ovaviuki, ovovana valingile ovipuka oviwa puetyi ankho vehenenkhie, ‘mavakatutiliswa pala okukakalako nomwenyo,’ mokonda omanyina avo ahonekwa-le momukanda womwenyo. Otyo tyilekesa okuti, etutilo liavana “valinga ovipuka oviwa” liapopiwa momukanda wa Suau 5:29 like vala netutilo liovanthu “ovaviuki” liapopiwa momukanda Ovilinga 24:15. Enoñgonoko olio lielikuata kumwe nonondaka tuvasa momukanda Ova Loma 6:7, mbokuati: “Una wankhia wayovolua kononkhali mbae.” Ovipuka ovivi ovaviuki valingile viaevelwa-le etyi vankhia, mahi ovipuka oviwa valingile na hono nkhele vihinangelwa. (Heb. 6:10) Mahi ovaviuki mavakatutiliswa mavekesukisa okutualako okukala ovakuatyili ku Siovaa opo omanyina avo atualeko okukala momukanda womwenyo.
16. Oityi onondaka mbokuati ovanthu vamwe ‘mavakatutiliswa pala okukoyeswa’ mbuhangununa?
16 Oityi matyimoneka navana ankho vokulinga ovipuka ovivi puetyi ankho vehenenkhie? Namphila ononkhali mbavo mbaevelwa etyi vankhia, mahi kavalingile ovipuka oviwa. Omanyina avo kaahonekelwe momukanda womwenyo. Naina, etutilo liovanthu vana ‘vokualinga ovipuka ovivi,’ like vala netutilo liavana “vehevaviuki” liapopiwa momukanda Ovilinga 24:15. Etutilo olio, olio litiwa ‘etutilo liavana mavakakoyeswa.’ c Vana vehevaviuki mavakakoyeswa, tyilekesa okuti mavakatalwa nawa. (Luka 22:30) Matyikesukisa omuvo pala okutala inkha omanyina avo atokala umwe okupakwa momukanda womwenyo. Inkha ovanthu ovo mouye omupe vakayeka-po okulinga ovipuka ovivi, avekelipakula ku Siovaa, opo omanyina maakahonekwa momukanda womwenyo.
17-18. Oityi ovanthu aveho mavakatutiliswa pala okukala pano pohi mavekesukisa okulinga iya ovipuka patyi viapopiwa momukanda Eholololo 20:12, 13?
17 Ovanthu vatyo aveho makatutiliswa pala okukala pano pohi, tyilinge vana valingile ovipuka oviwa tyilinge vana valinge ovipuka ovivi, mavekesukisa okuendela movitumino vya Siovaa, mavikaikulwa monombuingwa mokueenda kuomanima 1000. Apositolu Suau wahoneka etyi amona memonekelo okuti: “Andyimono vokuankhia, ovanene novatutu, vetai komutwe wotyipundi tyoutumini, iya onombuingwa ambuikulwa. Mahi akuikulwa ombuingwa onkhuavo; oyo ombuingwa yomuenyo. Vokuankhia avakoyeswa konthele yovipuka viahonekwa monombuingwa okutalela kuetyi valinga.” — Ehol. 20:12, 13.
18 Ovanthu vana mavakatutiliswa pala okukala mouye omupe mavakakoyesilwa ovipuka patyi? Okuti ovipuka vina valingile puetyi vehenenkhie? Au! Hinangela okuti etyi vankhia vayovolwa kononkhali mbavo. Naina, tyina otesitu ei ikahi nokupopia ‘ovipuka valinga,’ havipukako valinga puetyi ankho vehenenkhie. Mahi ovipuka vina mavakalinga tyina vamatutiliswa mouye omupe. Inkha atee umwe ovalume ovakwatyili ovo Noe na Samuel na Daviti na Daniele mavekesukisa okulongeswa konthele ya Sesusi Kilisitu avakakala nekolelo motyilikutila tyeyovo iya pahe vana vehevaviuki!
19. Oityi matyikamoneka navana mavakaanya okuendela movitumino vya Huku?
19 Oityi matyikamoneka navana mavakaanya okuendela movitumino vya Huku? Omukanda Eholololo 20:15 utupopila okuti: “Una uhahonekelwe momukanda womuenyo, ayumbwa metala liotupia.” Otyo tyilekesa okuti, vana mavakaanya okuendela movitumino vya Huku makanyimuako pala apeho. Hatyo tuesukisila okulinga ononkhono opo omanyina etu ahonekwe momukanda womwenyo nokukalamo pala apeho!
Omukuatate ukahi nokulongesa ovanthu mouye omupe. Otyilinga onthue atuho matukalinga mokueenda kuomanima 1000 (Tala onthele yokulilongeswa 39, palangalafu 20)
20. Otyilinga patyi matyikalingwa mokueenda kuomanima 1000? (Tala olutalatu luokondye.)
20 Mokueenda koutumini womanima 1000 matukahambukwa unene! Kombanda yohi makukakala otyilinga tyimwe otyinene tyokulongesa ovanthu. Mahi tupu maukakala omuvo wokutala nawa ovanthu vana ovaviuki navana vehevaviuki. (Isa. 26:9; Ovil. 17:31) Oñgeni otyilinga otyo matyikalingwa? Onthele mailandulako matukuatesako okutyinoñgonoka nokutyipanda.
OTYIIMBO 147 Omulao Womuenyo Uhapu
a Onthele ei ipopia otyipuka tyimwe tyipilulula omu ankho tunoñgonokela onondaka mba Sesusi mbuli mu Suau 5:28, 29, mbupopia ‘etutilo liovanthu mavakakala nomwenyo, netutilo liava mavakakoyeswa.’ Matulilongesa oityi o matutilo oo evali alekesa iya ovalie vakutikinyamo.
b Omukanda oo ukahi nokuhonekwa tundee “konthyimbi youye,” Iya muna omanyina ovanthu vana vatokala okupola ouwa kotyilikutila tyeyovo. (Mat. 25:34; Ehol. 17:8) Iya mokutala omunthu wotete wahonekwa momukanda oo womwenyo o Ambele.
c Kohale ankho tupopia okuti, ondaka “okukoyeswa” yapopiwa mo velesikulu ei ihangununa okuhinganwa. Namphila ondaka “okukoyeswa” ipondola umwe okuhangununa otyipuka otyo, mahi monondaka ombu Sesusi ankho hatyoko ekahi nokupopia. Ankho ukahi nokupia okutala nawa omunthu. Ngetyi tyapopia ondisionaliu imwe Yombimbiliya, “okulandula umwe nawa etyi omunthu ekahi nokulinga.”
