1. Arake ty Malakia 3:16, boke manao akore ty sorategne agnatreha i Jehovah eo, le ino ty agnate’e ao?

 FA AGN’ARIVO’E taogne zay ro nisy ze boke raike manokagne zay nisorategne tagnatreha i Jehovah eo. Agnaragne ty agnate o boke iohoe ao, le ty agnara i Abela ty voaloha’e ao, i mpanompo i Jehovah tsy nivalike voaloha’ey. * (Lioka 11:50, 51) Nanomboke tamy izay ty Jehovah ro nanoratse agnara o ndaty agnate o boke iohoe ao. Amy izao le fa an-tapetrisa’e ty agnara o ndaty voasoratse ao. “Boke fahatsiarovagne”, “boke i fiaignagney”, naho “horognam-boke ty fiaignagne” ty agnaragne irehafa ty Baiboly o boke iohoe. Amy ty fianaragne toy, le tihoe i “boke i fiaignagney” ro tena hampiasaentikagne.​—Vakio ty Malakia 3:16; Apok. 3:5; 17:8.

2. Agnara ia ty voasoratse amy i “boke i fiaignagney” ao, le ino ty toko’e hataontikagne naho teantika ho voasoratse ao ty agnarantikagne?

² Ze ndaty matahotse i Jehovah, ndra tena magnaja aze naho tea ty tahina’e ro agnate o boke manokagne iohoe ao. Managne fahafahagne hahazo havelogne nainai’e iareo. Afake ty ho voasoratse agnate o boke iohoe ao ka ty agnarantikagne naho mikezake mifandrambe maifitse amy i Jehovah, mioregne amy i solovoigne nanoe i Ana-dahi’eỳ ndra i Jesosy Kristỳ tika. (Jaona 3:16, 36) Teantika iaby naho ho voasoratse agnate o boke iohoe ao ty agnarantikagne, ndra mitamà hiaigne an-dagnitse agne tika ndra mitamà hiaigne an-tane etoa.

3-4. a) Hovelogne nainai’e vao tika naho fa voasoratse agnate i boke i fiaignagney ao ty agnarantikagne? Hazavao. b) Ino ty hodinehentikagne ato naho amo o lahatsoratse magnarakeo?

 ³ Faie midika vao zay tie le fa hahazo i havelogne nainai’ey ze voasoratse agnate o boke iohoe ao ty agnara’e? Ahatreavantika ty vale izay ty raha nisaontsie i Jehovah tamy i Mosesy, amy Eksodosy 32:33 ao. Hoe ty Jehovah ao: “Ty agnara ze nanao hakeo tamako avao ro ho forako tsy ho agnate i bokekoy ao.” Midika zay tie mbe azo foragne ndra fafagne ty agnara o ndaty sorategne aò. Hoe sorate i Jehovah amy ty crayon heike areke ze agnara o ndaty sorate’e ao. (Apok. 3:5; f.a.p.) Mila ataontika azo antoke areke fa hijanogne ao nainai’e ty agnarantikagne, manahake o raha sinoratse amy ty stilò.

⁴ Va’e hahavy antika hieretseretse ty fagnonteneagne retoa zay: Ino ty rehafe ty Baiboly miomba tihoe agnara ia ty voasoratse agnate i boke i fiaignagney ao, le ty agnara ia ro tsy ao? Naho fa ombia i ndaty agnate i boke i fiaignagney ao ty agnara’e rey ro hahazo havelogne nainai’e? Akore ty amy i ndaty le nimate avao fa tsy mba nanagne fahafahagne hahafantatse i Jehovah rey? Mbe afake ty ho voasoratse amy i boke i fiaignagney vao ty agnara iareo? Hovaleantika amy ty lahatsoratse toy naho amo o lahatsoratse magnarakeo o fagnonteneagne rehoe.

AGNARA IA TY AMY I BOKEY AO?

5-6. a) Agnara ia ty voasoratse agnate i boke i fiaignagney ao, arake ty asongady ty Filipianina 4:3? b) Naho fa ombia ty agnara iareo ro le lia’e hijanogne amy i boke i fiaignagney ao?

⁵ Ty agnara ia ty voasoratse agnate i boke i fiaignagney ao? Mba hamaleagne izay, le handineke antoko o ndaty dime tika. Ty ila’e amy iareo voasoratse agnate i bokey ao ty agnara’e fa ty ila’e tsy ao.

 ⁶ Ty antoko o ndaty voaloha’e, le i ndaty jinobogne mba hiarake hanjaka amy i Jesosy an-dagnitse agne rey. Voasoratse agnate i boke i fiaignagney vao ty agnara iareo? Eka. Arake ty reha i apostoly Paoly amy i “mpiara-miasa ama’e” a Filipy agne rey, le agnate i boke i fiaignagney ao ty agnara o voahosotseo. (Vakio ty Filipianina 4:3.) Faie naho tsy tea iareo ho voafafa ao i agnara iareoy, le mila mikezake mba tsy hivalike iareo. Naho fa isiagne tampò fara’e iareo, aloha ty imateza iareo ndra aloha ty hanomboha i haoreagne lahibeỳ, le lia’e mijanogne agnate i bokey ao nainai’e i agnara iareoy.​—Apok. 7:3.

7. Naho fa ombia ty agnara i vahoake maro tsy vatse isahegne agnisa ty agnondry hafa rey ro tsy mete fafagne sasa amy i boke i fiaignagney ao, arake ty fahazoantika ty Apokalypsy 7:16, 17?

⁷ Ty antoko o ndaty faharoe, le i vahoake maro tsy vatse isahegney. Fa voasoratse agnate i boke i fiaignagney ao vao ty agnara iareo amy izao? Eka. Mbe ho ao avao vao i agnara iareoy naho fa votso-belogne iareo afara i Aramagedonay? Eka. (Apok. 7:14) Nirehafe i Jesosy fa ho mbamy ‘i havelogne nainai’ey’ mbeo o agnondry rehoe. (Mat. 25:46) Faie tsy midika zay tie le avy le hahazo havelogne nainai’e ze votso-belogne amy i Aramagedonay. Ty anto’e, hoe tamy ty crayon avao heike ty nanoratagne i agnara iareoy amy i boke i fiaignagney ao. Amy i Fanjakagne Arivo Taogney agne ty Jesosy, le ‘hiarake iareo manahake ty atao o mpiarake agnondrio, sady hitarike aze ho mbamy i loharano ty ranon-kavelogney’ mbeo. Ze magneke ty fitariha i Kristy sady trea tie tsy mivalike amy i Jehovah amy i fitsaràgne fara’ey, le tsy ho fafagne amy i boke i fiaignagney ao ty agnara iareo.​—Vakio ty Apokalypsy 7:16, 17.

8. Agnara ia ty tsy voasoratse agnate i boke i fiaignagney ao, le ino ty raha hanjò iareo?

⁸ Ty antoko o ndaty fahatelo le ze ose ndra ze ndaty ho ringagne nainai’e amy i Aramagedonay. Tsy agnate i boke i fiaignagney ao ty agnara iareo. Rehafe i Jesosy tie “ho amy ty fandringanagne nainai’e agne iareo.” (Mat. 25:46) Nirehake ty Paoly fa “hotsaraegne iareo, le hosazaegne ndra haringagne nainai’e.” (2 Tes. 1:9; 2 Pet. 2:9) Izay ka ty saze mandigne ze ndaty nanota tamy ty fagnahy masigne. Fandringanagne nainai’e ty hoazo iareo fa tsy havelogne nainai’e. Tsy hovelomegne amy ty mate iareo. (Mat. 12:32; Mar. 3:28, 29; Heb. 6:4-6) Andao tika hinane zao handineke i antoko ndaty roe sisa rey. Hovelomegne amy ty mate an-tane etoa iareo.

IA TY HOVELOMEGNE AMY TY MATE?

9. Arake ty Asan’ny Apostoly 24:15, ia iaby i antoko o ndaty roe hovelomegne amy ty mate rey, le ino ty tsy mampitovy iareo?

⁹ Mirehake antoko o ndaty roe hovelomegne amy ty mate, afake ty hitamà hiaigne nainai’e an-tane etoy ty Baiboly. Ty antoko o ndaty raike “maregne” fa ty raike “tsy maregne.” (Vakio ty Asan’ny Apostoly 24:15.) O ndaty “maregne” reo le ze ndaty tsy nivalike tamy i Jehovah amparake ty nimateza’e. Fa o ndaty “tsy maregne” reo, le ze ndaty tsy nanompo i Jehovah taloha ty nimateza’e. Tsy nagnorike ty lilin’Andrianagnahare iareo. Faie sambe hovelomegne amy ty mate o antoko o ndaty roe rehoe. Fa midika vao zay tie voasoratse agnate i boke i fiaignagney ao ty agnara iareo? Mba hamaleagne izay, le andao hodinehentikagne tsikiraidraike o antoko o ndaty roe rehoe.

10. Nagnino o ndaty “maregneo” ro hovelomegne amy ty mate, le ino ty tombotsoa hanagna ty ila’e amy iareo? (Henteo ka ty lahatsoratse tihoe “Fagnonteneagne Boake amo o Mpamakio” amy ty gazete toy, fa magnazava miomba ty famelomagne ty mate an-tane etoa.)

¹⁰ “Ty maregne” ty antoko o ndaty fahaefatse. Fa sinoratse amy i boke i fiaignagney ao ty agnara iareo, taloha ty nimateza iareo. Faie nifafagne  amy i boke i fiaignagney ao vao ty agnara iareo naho fa nimate iareo? Aha’a. Ty anto’e, mbe velogne iareo amy i Jehovah, satria agnate ty fitadidia’e ao. I Jehovah “tsy mba Andrianagnahare ty mate fa ahy ty velogne, satria ama’e iareo le velogne iaby.” (Lioka 20:38) Midika zay tie naho fa hovelomegne amy ty mate an-tane etoa o ndaty maregne rehoe, le mbe hotrea agnate i boke i fiaignagney ao ty agnara iareo, ndra tie hoe mbe sinoratse amy ty crayon avao aza. (Lioka 14:14) Azo antoke fa ty ila’e amy iareo, le hahazo tombotsoa ho “roandriagne magneran-tane.”​—Sal. 45:16.

11. Ino ty raha mila hampianaregne o ndaty “tsy maregne” hovelomegne amy ty mate reo mba hahavy ty agnara iareo ho voasoratse amy i boke i fiaignagney ao?

¹¹ Ty antoko o ndaty fahadime fara’e le “ty tsy maregne.” Va’e noho iareo tsy nahay ty lily i Jehovah ro nahavy iareo tsy nagnorike izay tamy ty fahavelo iareo. Tsy agnate i boke i fiaignagney ao areke ty agnara iareo. Faie hovelomen’Andrianagnahare amy ty mate iareo, amy izay mba hanagne fahafahagne ho voasoratse amy i bokey ao ty agnara iareo. Maro ty raha hipaliava o ndaty “tsy maregne” rehoe fagnampeagne. Nisy tamy iareo ty nanao raha tena raty sady mampangorigne tamy ty fiaigna iareo tie taloha. Mila ampianaregne iareo areke tie akore ty hagnorihagne ty fitsipy i Jehovah amy ty fiaigna iareo. Mba hahavitagne izay, le hitarike asa fampianaragne lahibey mbe tsy nisy hoe’e amparake izay i Fanjakàn’Andrianagnaharey.

12. a) Ia ty hampianatse o ndaty “tsy maregneo”? b) Ino ty hanjò ze tsy mete mampihatse ty raha nianara’e?

¹² Ia ty hampianatse o ndaty tsy maregne rehoe? I vahoake maro tsy vatse isahegney naho o ndaty maregne hovelomegne amy ty mateo. Naho tea o ndaty tsy maregne rehoe ho voasoratse agnate i boke i fiaignagney ao ty agnara iareo, le mila mikezake mba hifandrambe amy i Jehovah naho manokan-tegna ho aze iareo. Harahe i Jesosy Kristy naho i mpitsara hiarake ama’e rey maso ty fandrosoagne atao o ndaty tsy maregne rehoe. (Apok. 20:4) Ze tsy mete  magnorike ty raha ampianaregne aze le tsy hengagne hiaigne amy tontolo vaovao ao, ndra tie va’e fa 100 taogne aza. (Isaia 65:20) Afake mamantatse ty am-po o ndatio ao ty Jehovah naho i Jesosy, le hatao iareo azo antoke tie tsy hisy ndaty atahoragne hampikorontagne ty amy tontolo vaovao agne.​—Isaia 11:9; 60:18; 65:25; Jaona 2:25.

VELOMEGNE MBA HAHAZO FIAIGNAGNE NAHO VELOMEGNE MBA HOTSARAEGNE

13-14. a) Akore ty nifahazoantikagne i reha i Jesosy amy Jaona 5:28, 29 ao tie taloha? b) Ino ty raha mila marehentikagne miomba o rehake rehoe?

¹³ Nirehake miomba o ndaty hovelomegne amy ty mate an-tane etoa ka ty Jesosy. Hoe reke: “Ko ilatsagne zay, fa ho avy ty andro hahareiza ze an-kibory agne ty feo’e, le hiakatse iareo. Ze nanao ty soa hovelomegne mba hahazo fiaignagne, fa ze zatse nanao raty hovelomegne mba hotsaraegne.” (Jaona 5:28, 29) Ino ty tea i Jesosy horehafegne amy ireo?

¹⁴ Manondro ty raha atao i ndaty hovelomegne amy ty mate rey afara ty amelomagne aze, ty nifahazoantikagne o reha i Jesosy iohoe taloha. Midika zay tie ty ila’e amy i ndaty hovelomegne amy ty mate rey hanao ty soa fa ty ila’e hanao raty. Faie mareho fa tsy nirehake ty Jesosy tie ze hiakatse hirike an-kibory ao le hanao ty soa ndra ho zatse hanao raty. Raha fa lasa ty nirehafe i Jesosy. Ze “nanao ty soa” naho ze “zatse nanao raty” ty nirehafe’e. Midika zay tie raha natao o ndaty rehoe taloha ty nimateza’e o rehafe i Jesosio. Tsy izay vao ro trea tie tena mitombegne? Ie. Ty anto’e, tsy hisy ndaty hengagne hanao raty zao ty amy i tontolo vaovaoy ao. Tsy maintsy ho taloha ty nimateza iareo areke o ndaty tsy maregne rehoe ro zatse nanao raty. Le ino areke ty tea i Jesosy horehafegne amy tihoe “hovelomegne mba hahazo fiaignagne” naho tihoe “hovelomegne mba hotsaraegne”?

15. Ia ty “hovelomegne mba hahazo fiaignagne”, le ino ty anto’e?

¹⁵ “Hovelomegne mba hahazo fiaignagne” i ndaty maregne rey, ndra i ndaty nanao ty soa taloha ty nimateza’e rey, satria fa agnate i boke i fiaignagney ao ty agnara iareo. Midika zay tie i ndaty “nanao ty soa” rehafegne amy Jaona 5:29 aoy, le iareo avao ka i “maregne” rehafegne tie hovelomegne amy ty mate amy Asan’ny Apostoly 24:15 aoy. Mifagnarake amy ty raha rehafe ty Romanina 6:7 toy ze fagnazavagne zay. Izao ty rehafe o andine’e iohoe: “Ze mate le votsotse amy ty hakeo’e.” Avela i Jehovah agne areke ty fahotagne natao i ndaty maregne rey naho fa mate iareo, faie ty raha soa natao iareo tadidie’e avao. (Heb. 6:10) Mazava hoaze fa mila mikezake mba tsy hivalike o ndaty maregne rehoe naho tea iareo tsy ho foragne amy i boke i fiaignagney ao ty agnara iareo.

16. Ino ty teagne horehafegne amy tihoe “hovelomegne mba hotsaraegne”?

¹⁶ Faie akore ty amy i ndaty zatse nanao raty taloha ty nimateza’e rey? Ndra tie foagne ka aza ty fahotagne natao iareo naho fa mate iareo, le tsy nanahake i ndaty tsy nivalike tamy i Jehovah rey iareo. Tsy agnate i boke i fiaignagney ao ty agnara iareo. Midika zay tie i “ndaty zatse nanao raty” nirehafe i Jesosỳ avao ka i ndaty “tsy maregne” hovelomegne amy ty mate rehafegne amy Asan’ny Apostoly 24:15 aoy. “Hovelomegne mba hotsaraegne iareo.” * Midika zay tie harahe i Jesosy maso naho hodinehe’e o ndaty tsy maregne rehoe. (Lioka 22:30) Hitake fotoagne ty hamaritagne tie fagneva ty ho sorategne amy i boke i fiaignagney  vao ty agnara iareo sa tsy fagneva ty ho sorategne ao. Tsy ho sorategne amy i boke i fiaignagney ao ty agnara iareo naho tsy miova sady tsy manokan-tegna hoahy i Jehovah iareo.

17-18. Ino ty raha mila atao ze ndaty iaby hovelomegne amy ty mate an-tane etoa, le ino ty tea ty Apokalypsy 20:12, 13 ho rehafegne amy tihoe ‘arakarake ze raha nanoe’e’?

¹⁷ Faie ndra maregne iareo ndra tsy maregne taloha ty nimateza iareo, le sambe mila magnorike ty lily trea amy i horognam-boke vaovao ho sokafegne amy i Fanjakagne Arivo Taogney agney. Izao ty raha nirehafe i apostoly Jaona miomba ty fahitagne nitrea’e: “Le nitreako ze nimate ndra bey ndra kede, nitsangagne taloha i sezan-droandriagney eo, sady nisy horognam-boke nivelaregne. Nisy horognam-boke raike ka nivelaregne, i horognam-boke i fiaignagneỳ. Le tsinara arake ze voasoratse amo o horognam-boke reo ze nimate, arakarake ze raha natao iareo.”​—Apok. 20:12, 13.

¹⁸ Arakarake ty raha natao’e tambia o hitsaragne o ndaty nimateò? Ty raha natao iareo taloha ty nimateza iareoy vao? Aha’a. Ko haligno fa ze mate le afake amy ty hakeo’e, arake i nirehafentikagne taloha teoy. Midika zay fa tsy ty raha natao iareo taloha ty nimateza iareo o rehafegne eò. Tsy maintsy ty raha hatao iareo amy i tontolo vaovaoy agne areke io, ndra ze fomba andrambesa iareo ty raha hampianaregne iareo. Ndra i lahilahy tsy nivalike taloha rey ka aza, agnisa izay ty Noa, i Samoela, i Davida naho i Daniela, le sambe hila hianatse ty miomba i Jesosy Kristy naho mila maneho finoagne i solovoigne nanoe’ey. Azo’o sare an-tsaigne amy izay vao ty ho hamaro ty raha mila hampianaregne o ndaty tsy maregneo?

19. Ino ty hanjò ze ndaty tsy magnararaotse o fahafahagne miambake iohoe?

¹⁹ Ino ty hanjò ze tsy magnararaotse ze fahafahagne miambake zay? Hoe ty Apokalypsy 20:15: “Ze tsy nivoasoratse tamy i boke i fiaignagney ao le natorake mafe tamy i antara afoy ao.” Ty dika izay, ho ringagne nainai’e iareo. Tena mila ataontika azo antoke areke fa voasoratse agnate i boke i fiaignagney ao ty agnarantikagne sady le lia’e tsy hifafa ao.

20. Ino ty asa mahafinaritse hatao agnate i Fanjakagne Arivo Taogney? (Henteo ty sare amy ty fogno ty gazete toy.)

²⁰ Tena hahafinaritse ty raha hisy amy i Fanjakagne Arivo Taogney ao. Agnisa izay, i asa fampianaragne lahibey mbe tsy nisy hoe’e amparake izay hatao amy ze fotoagne zaỳ. Faie sambe mila manoro o ndaty maregne naho tsy maregne rehoe amy izay tie te hankatò ty fitsipy i Jehovah iareo. (Isaia 26:9; Asa. 17:31) Akore ty handaminagne i asa fampianaragney? Hagnampe antika hahay izay naho hankasitrake o tombotsoa miambake iohoe ty lahatsoratse hianarantikagne magnarake.